Ngunun epwe Nonnom Reom

Pwi me fefinei, ua kinisou ren ewe tufich ai ua afanafan ngeni kemi non an ewe Samon we ranin Sabbath, non ewe mwichenapen An Mwichefen, non ei fansoun Paska. Ua kinisou ngeni Semach won Nang ren ewe niffang an Noun we Acheingicheing, a feito fonufan an epwe ach Chon Amanau. Ua kinisou ren ai sinei pwe A riaffou fan iten ach tipis me A pwata non ewe Manausefan. Iteiten ran ua feioch ren ai sinei, pokiten An Achasefan, upwe tongeni manausefan me manau fenfeino non eu famini mi tong.

Ua sinei ekkei mettoch ifa usun kich meinisin mi tongeni sineiir. Ewe Ngun mi Fel a kapas ngeni ai ekiek me netipei pwe mi ennet—esap chok fan eu nge fan chommong. Ua mochen ei memef epwe chok sopwosopwono ngeni ei. Kich meinisin mi kuna osukosuk iwe mi namwot sipwe angei pochokun seni ewe Ngun mi Fel. Ua mefi non eu ran nupwen ua nom ren semei non pioing. Aua katon inei we ren an achocho ne ngasangas—me mwirin a kouno. Nupwen aua nengeni mesan, a emenimen nupwen ewe metek a suseni. Mwirin ekkis fansoun mosonoson, semei we a kapas akkom. A apasa, “Emon kukun nengin a niwiniti imwan.”

A kapas pwetete. A mesemesen kinamwe. A pwarata eu mettoch a sinei pwe mi ennet. A poputa ne angei pisekin Inei we. A tou seni ewe rum me a apasa an kinisou ngeni emon me emon ekkewe tokter me kangof minne ra anisi inei we.

Ewe Ngun mi Fel a nom ren semei we non ena fansoun an epwe mefi, sinei, me fori met a fori non ena ran. A fen angei ewe pwon minne chommong me neich mi fen angei pwe Ngunun epwe nonnom rer (D&C 20:79).

Ikenai ua mochen ai upwe awatteno ami mochen me tufich ami oupwe angei ewe Ngun mi Fel. Oupwe chechemeni pwe I emon chon ekkewe Unumon non Kot. Ewe Sam me ewe Nau ir aramas mi manau sefan. Ewe Ngun mi Fel mi emon ngun. (Nengeni D&C 130:22.) Finiemi ika oupwe angei me etiwanong non netipemi me ami ekiek.

Iteiten wiik sia rong ekkewe kapas mi afata met sipwe fori ach sipwe angei ei feioch seni nang nge fan ekkoch sise weweiti non netipach me non ach ekiek. Ika sia mochen ewe Ngun mi Fel epwe nomnom rech sipwe chechemeni ewe Chon Amanau fansoun meinisin, me annesochisi an kewe annuk (D&C 20:77).

Ei fansoun ewe ier a anisikich ach sipwe chechemeni an ewe Chon Amanau Achasefan me An manausefan seni ewe peias. Chommong me neich sia fen ekieki usun ekkei mettoch. Fan eu ngang me punuei aua nom nukun eu peias non Jerusalem. Chommong ra nuku pwe ena ewe peias minne ewe Chon Amanau a tou seni pwe emon Kot mi manau sefan.

Ewe chon emwenikem non ena ran a eitieta poun me a apasa ngenikem, “Feito katon eu peias mi pon.”

Aua pworetiw am aupwe tonong. Aua kuna eu nenien mommot mi for seni fau won eu epek. Nge non ai ekiek ua kuna pwan eu sasing, mi ennet usun chok met aua kuna non ena ran. Ua kuna Mary, minne a nonnom unukun ewe peias nupwen ekkewe Apostel ra feino. Ena met ewe Ngun mi Fel a mut ngeniei ai upwe kuna me pwan rong non ai ekiek, usun chok ita ua nom non ena atun:

“Mary a ukkuta o kekkechiw nukun ewe peias. Nupwen neminnewe mi chuwen kekkechiw, a pworetiw o nenong non ewe peias,

“Iwe a kuna ruomon chon nang ikewe ie ra ufouf mi pwech, ra mommot ikewe sooman Jesus a fen nom ie, emon unun-mokuran pwan emon unun-pechan.

“Ra eisini Mary, ‘Neminnan, pwata ka kechiw?’ A ponuweni, ‘Ra fen wano ai we Samol, nge use sinei ia ra isoni ie!”

“Iwe, neminnewe a kunusefan nge a kuna Jesus a ukkuta ikewe ie, nge neminnewe ese sinei pwe Jesus ewe.

“Jesus a eisini, ‘Neminnan, pwata ka kechiw? Io ena ka kukkutta?’ Mary a ekieki pwe i ewe chon atake, iwe a ereni, ‘Ika en ka wano, kopwe chok ereni ei ikewe ka isoni ie, pwe upwe feinno angei.’

“Jesus a apasa ngeni, ‘Mary!’ Neminnewe a kunu ngeni Jesus o a apasa non kapasen Hebrew, ‘Rabboni!’ (Wewen ‘Sense.’)

“Jesus a apasa ngeni, ‘Kosap amwochu ei, pun usamo niwinsefanita ren ewe Sam. Nge kopwe feinno ren pwii kewe o erenir pwe upwe niwinno ren Semei o pwan Semer, ren ai God o pwan ar God’” (John 20:11–17).

Ua fen iotek ai upwe tufichin mefi met Mary a mefi non ewe peias me met ekkewe chok ruemon chon kaeo ra mefi won ewe aan ngeni Emmaus nupwen ra fetan ren ewe Chon Amanau mi manausefan, nge ra ekieki pwe I emon wasona ngeni Jerusalem:

“Nge ra aueno i, ra ereni, ‘Kopwe nom rem, pun a pwinituk.’ Iwe a nomeno rer.

“A mottiw pwe epwe fitir ne mongo, a angei ewe pinawa o a ioteki, iwe a kinifeseni ewe pinawa o a ngenir.

“Iwe, ra nenneno o ra sinneni i, nge a monuch senir.

“Ra kapas fengen nefiner, ‘Netipach ese mokutukut ussun chok ew ekkei mi ngetenget nupwen a kapas ngeni kich won ewe aan o a awewei ngeni kich ewe Pukepin?” (Luke 24:29–32).

Emon a anneani ekkei kapas non eu mwichen sakramen minne ua fifiti non ukukun 70 ier a ano. Non ena fansoun mwichen sakramen a fis nepwin. A kiroch nukun. Ekkewe chon mwich ra konu ekkei kapas sia fen sinei. Ua fen rong fan chommong. Nge ua chok chechemeni eu memmef non ena pwinim. A anisiei ai upwe arap ngeni ewe Chon Amanau. Naman ika upwe anneanei ekkewe kapas epwe anisikich ach sipwe pwan mefi ewe memmef sefan:

Ach chechemeni nupwen ewe Ngun mi Fel a ku netipach me an pwarata usun met mi ennet mi auchea nap seni ach chechemeni mettoch a fen fis. Ach chechemeni ekkewe memmef a fiti mongungun ewe Ngun mi Fel mi auchea nap seni ach kuna mettoch ren mesach are ach chechemeni kapas sia rong are anneani. Ese fis fan chommong nupwen ua mefi usun ekkewe chon fetan won ewe aan ngeni Emmaus—nupwen netipei a mokutukut ussun chok ew ekkei mi ngetenget. Napengeni, ua mefi kinamwe mi pwetete.

Kich sia angei ewe pwon mi aucheanap pwe ewe Ngun mi Fel epwe nonnom rech, me sia pwan angei kapasen pesepes ifa usun sipwe tongeni ne angei ei niffang. Emon chon angangen ewe Samon a iseta poun won mokurach me a apasa: “Angei ewe Ngun mi Fel.” Non ena chok fansoun en me ngang sia angei ewe pwon pwe Epwe feito. Nge a nom rech ach sipwe finata ach sipwe suki netipach ach sipwe angei emwen seni ewe Ngun mi Fen non unusen manauach.

Met a fis ngeni ewe Soufos Joseph Smith a tongeni aitikich met sipwe fori. A poputa me sopweno an angang ren an finata pwe an pwisin mirit ese naf an epwe sinei met epwe fori. A finata an epwe tipetekison me mwen Kot.

Mwirin, Joseph a finata an epwe tingor ngeni Kot. A iotek fiti nuku pwe Kot epwe ponueni an iotek. Ponuen an iotek a feito nupwen a emon anuon. A angei ponuen an iotek nupwen a mochen sinei ifa usun Kot A mochen forata An Mwichefen. Ewe Ngun mi Fel a awora kinamwe me a emweni i non unusen manauan.

A anneasochisi ekkewe pwarata nupwen a weires. Awewe, a angei pwarata an epwe tinano ekkewe Engon me Ruemon ngeni England nupwen ita a mochen repwe nom ren. Nge a tinireno.

A angei pesepes me kinamwe seni ewe Ngun mi Fel nupwen a nom non kanapus me ekkewe Souneng mi riaffou. Me a anneasochisi nupwen a feino ngeni Carthage ina mwo pwe a sinei pwe naman epwe mano.

Ewe Soufos Joseph a eu nenien appiru ngeni kich ren an epwe ifa usun ach sipwe angei emwen me kinamwe seni ewe Ngun mi Fel.

Aewin a finata an epwe tipetekison me mwen Kot.

Oruan a iotek fiti nuku non ewe Samon Jises Kraist.

Ununagtin a anneasochis. Anneasochis wewen pwe a tongeni ach sipwe mwitir ne mwokut. wewen pwe sipwe moneta. Are wewen pwe sipwe engino ne witiwit tori ach sipwe pwan angei ekkoch pwarata.

Me aruanuan sipwe iotek ach sipwe sinei osupwangen me netipen aramas me ifa usun sipwe anisir fan iten ewe Samon. Joseph a iotek fan iten ekkewe Souneng mi riaffou nupwen a nom non kanapus. Ua fen tufichin kuna ekkewe soufosun Kot nupwen ra iotek, tingor ren pwarata, angei emwen, me anganga.

Ua fen kuna pwe fan chommong ra iotek usun aramas ra tongei me angang ngeni. Ar tong fan iten ekkoch a suki netiper ar repwe angei pwarata. A pwan tongeni fis ngeni kemi.

Pwarata a tongeni anisikich nupwen sia angang ngeni ekkoch fan iten ewe Samon. En me ngang sia fen kuna ren met a fen fis ngeni kich. Nei we pisop a apasa ngeniei—nupwen punuei a men osukosuk non manauan—”Iteiten fansoun ua rong pwe emon non ewe wart a osukosuk, nupwen ua war, ua kaeo pwe punuom a fen churiir. Ifa usun an a fori?”

A usun meinisin ekkewe chon angang mi nap non ewe muun ewe Samon. A wor ru mettoch ra fori. Chon angang mi nap ra nimenimoch pwe ewe Ngun mi Fel a tongeni nom rer fansoun meinisin. Me ra tufichin angei ewe niffangen tong ennet, ewe tongen Kraist. Ekkei niffang ra mamarita me rer nupwen ra aea ren ar angang fiti tong fan iten ewe Samon.

Me rei ekkei kapas ra awewe ifa usun iotek, pwarata me tongen ewe Samon mi angang fengen non ach angang ngeni ekkoch:

“Ika oupwe tingor ngeni ei och mettoch fan itei, iwe upwe fori.

“Ika ami mi tongei ei, iwe oupwe anneasochisi ai kewe annuk.

“Upwe tingor ngeni ewe Sam, iwe epwe ngeni kemi pwan emon Chon Anisi pwe epwe chok nonnom remi feinfeino.

“I ewe Ngunupin, ewe a pwarano minne mi ennet ussun God. Fonufan ese tongeni etiwa i, pun ese tongeni kuna are sinei i. Nge ami oua sinei, pun a nonnom remi o a nonnom non ami.

“Usap nikitikemino, nge upwe pwan niwinsefaniti kemi.

“Murin chok ekis fansoun, fonufan esap chuwen kuna ei, nge ami oupwe kuna ei. Iwe pokiten ngang mi manau, ami oupwe pwan manau.

“Nupwen ewe ran epwe wareto, oupwe sinei pwe ngang ua nom non Semei we o ami oua nom non ngang, pwan ussun chok ngang non ami.

“Ion a etiwa ai kewe annuk o apwonueta, i ewe emon mi tongei ei. Semei epwe tongei ewe mi tongei ei. Iwe ngang upwe pwan tongei i o upwe pwarieino ngeni i” (John 14:14–21).

Ua pwarata pwe non ei fansoun ewe Sam a sinei kemi, mefiemi, me met ekkewe aramas unukumi mi osupwang ren non pekin ngun me inis. Ua pwarata pwe ewe Sam me ewe Nau ra tinato ewe Ngun mi Fel ngeni ion mi fen angei ewe niffangen ewe Ngun mi Fel, a tingorei ena feioch, me a achocho an epwe nimenimoch. Ewe Sam, ewe Nau, me ewe Ngun mi Fel rese tongeni echimwa kich ach sipwe etiwer non manauach. Sia tufichin finata. Ewe Samon a apasa ngeni kich meinisin:

“Oupwe ausening! Ua ukkuta ren ewe asam o fichifich. Ika emon mi rong neuwei o suki ewe asam upwe tonong non imwan o fiti i ne mongo o epwe fiti ei ne mongo.

“Ngeni ir ekkewe ra pworacho upwe mut ngenir pwe repwe mot won ai we neenien mottun king, ussun chok ua fen pworacho o iei ua fiti Semei ne mot won an we neenien mottun king.

“Ika mi wor seningemi, iwe oupwe ausening ngeni minne ewe Ngunupin a apasa” (Pwarata 3:20–22).

Ua iotek ren unusen netipei pwe oupwe rong mongungun ewe Ngun mi Fel, minne a tinato remi. Me ua pwan iotek pwe opwe suki netipemi fansoun meinisin pwe oupwe etiwa I. Ika oupwe eis fiti ennetin netipemi me nuku non Jises Kraist pwe oupwe angei pwarata, oupwe angei non An ewe Samon napanap me An fansoun. Kot a fori fan iten ewe at Joseph Smith. A fori ikenai fan iten noun soufos mi manau, Preseten Russell M. Nelson. A anomukemi non manauen noun Kot semirit pwe oupwe angang ngeniir fan itan. Ua sinei pwe mi pung pokiten ua pwisin kuna ren mesei nge ua pwan sinei pokiten met ewe Ngun mi Fel a apasa ngeni netipei.

Ua fen mefi an ewe Sam me Noun we Acheingicheng tong fan iten noun Kot kewe semirit ekis meinisin won fonufan me Noun kewe non ewe nenien ngun. Ua fen mefi kinamwe me emwen seni ewe Ngun mi Fel. Ua iotek pwe oupwe pwapwa pokiten ewe Ngun mi Fel a nonnom remi fansoun meinisin. Fan iten Jises Kraist, amen.