Nws tus Ntsuj Plig Nrog Nej Nyob

Kuv cov kwv tij thiab cov muam, kuv ris Vajtswv txiaj rau lub cib fim kuv muaj hnub no hais rau nej thaum tus Tswv Hnub Caiv, nyob hauv lub tuam rooj sab laj ntawm Nws lub Koom Txoos hauv lub caij Easter no. Kuv ua peb Leej Txiv Saum Ntuj Ceeb Tsheej tsaug rau lub txiaj ntsim uas yog Nws Leej Tub uas Nws Hlub, tus uas ua siab dawb tuaj rau lub ntiaj teb ua peb tus Txhiv Dim. Kuv zoo siab uas kuv paub tias Nws tau theej peb lub txhoj thiab tau Sawv Rov Los. Txhua hnub kuv tau koob hmoov vim kuv paub tias, vim muaj Nws txoj Kev Theej Txhoj, muaj ib hnuv kuv yuav sawv rov los nyob mus ib txhis nrog ib tsev neeg uas hlub kuv.

Kuv paub tej yam no los ntawm tib txoj kev uas peb txhua tus yuav paub. Tus Vaj Ntsuj Plig Dawb Huv tau hais lus rau kuv lub siab lub ntsws qhia kuv tias tej no muaj tseeb—tsis yog ib zaug xwb tiam sis Nws qhia ntau zaus. Kuv twb xav tau kev nplij siab tsis tu ncua li ntawd. Peb txhua tus yeej raug kev txom nyem uas ua rau peb xav tau tus Ntsuj Plig txoj kev nplij siab. Muaj ib hnub kuv twb hnov li ntawd thaum kuv sawv nrog kuv txiv nyob hauv ib lub tsev kho mob. Wb tau saib kuv niam ua pa ob peb zaug xwb—ces nws tsis ua pa ntxiv. Thaum wb saib nws lub ntsej muag, nws luag nyav thaum txoj kev mob ploj lawm. Tom qab ib me ntsis, kuv txiv hais lus. Nws hais tias, “Ib tug me ntxhais twb mus tsev lawm.”

Nws hais li ntawd ntsiag to. Zoo li nws nyob kaj siab lug. Nws qhia ib yam uas nws paub muaj tseeb. Nws maj mam pib khaws Niam tej khoom. Nws tau tawm hoob kho mob ntawd kom hais ua tsaug rau txhua tus nais maum thiab cov kwv kho mob uas tau saib xyuas nws tau ntau hnub lawm.

Kuv txiv tau muaj tus Vaj Ntsuj Plig Dawb Huv ua nws tus khub thawm ntawd kom nws txawj hnov, paub, thiab ua li nws tau ua hnub ntawd. Nws tau txais kev cog lus zoo li ntau tus neeg: “Kom lawv yuav muaj nws tus Ntsuj Plig nrog lawv nyob” (Q&K 20:79).

Hnub no kuv cia siab tias kuv yuav ua rau nej haj yam xav thiab haj yam txawj txais tau tus Vaj Ntsuj Plig Dawb Huv. Cia li nco ntsoov tias, Nws yog tus thib peb ntawm Pawg Vajtswv. Leej Txiv thiab Leej Tub yog ob tug neeg uas tau sawv rov los. Tus Vaj Ntsuj Plig Dawb Huv yog ib tug ntsuj plig. (Saib Q&K 130:22.) Nej yuav tsum xaiv seb nej puas xav txais tau Nws thiab cia Nws nyob hauv nej lub siab lub ntsws.

Tej yam uas peb yuav tsum ua kom txais tau txoj koob hmoov zoo kawg nkaus los muaj nyob hauv tej lus uas hais txhua lub lim tiam tiam sis tej zaum peb tsis cia nkag mus rau hauv peb lub siab lub ntsws. Xwv kom muaj tus Ntsuj Plig nrog peb, peb yuav tsum “nco ntsoov” txog tus Cawm Seej thiab “ua raws li nws tej lus txib” (Q&K 20:77).

Lub sij hawm no pab peb nco txog tus Cawm Seej txoj kev txi thiab Nws txoj kev sawv los tawm qhov ntxa los ua ib tug neeg uas tau sawv rov los. Peb feem coob xav txog qhov uas lub sij hawm ntawd zoo li cas nyob hauv peb lub cim xeeb. Muaj ib zaug kuv tau nrog kuv tus poj niam sawv nyob rau ntawm ib lub ntxa nyob hauv Yeluxalees. Neeg feem coob ntseeg tias yog lub ntxa uas tus Cawm Seej uas tau raug ntsia saum ntoo khaub lig tau tawm los ua ib tug uas tau sawv rov los thiab ib tug Vajtswv uas muaj txoj sia nyob.

Tus uas coj kev maj mam yoj tes kom wb los thiab hais rau wb tias, “Los, saib hauv ib lub ntxa uas tsis muaj dab tsi haud.”

Wb nyo hau kom nkag mus haud. Wb pom ib lub rooj zeb nyob rau ntawm ib phab ntsa. Tiam sis hauv kuv lub siab los muaj ib daim duab ntxiv, uas zoo li yog tiag tiag ib yam tej yam uas wb tau pom. Kuv pom tau Maivliag, uas cov Thwj Tim cia nyob rau ntawm qhov ntxa. Tus Ntsuj Plig tau cia kuv pom thiab hnov hauv kuv lub siab, meej meej zoo ib yam li kuv nyob ntawd tiag:

“Tiam sis Maivliag tseem sawv ntawm lub qhov ntxa sab nraud quaj. Thaum nws tseem quaj quaj ntawd nws khoov ntshis xauj hauv lub qhov ntxa,

“Nws pom ob tug tim tswv ceeb tsheej hnav ris tsho dawb paug zaum ntawm qhov chaw uas tso Yexus lub cev rau; ib tug zaum pem taub hau thiab ib tug zaum pem ko taw.

“Nkawd nug Maivliag hais tias, Me ntxhais, ua li cas koj quaj? Maivliag teb nkawd hais tias, Xyov lawv coj kuv tus Tswv mus tso rau qhov twg lawm, kuv tsis paub li.

“Thaum Maivliag hais li ntawd tas nws tig hlo los pom Yexus sawv ntawm nws ib sab, tiam sis nws tsis paub hais tias yog Yexus.

“Yexus nug Maivliag hais tias, Me ntxhais, ua li cas koj quaj? Koj nrhiav leej twg? Maivliag xav hais tias Yexus yog tus txiv neej uas tu lub vaj ntawd, nws thiaj nug hais tias, Tus Tswv, yog koj muab nws mus tso rau qhov twg lawm, thov koj qhia rau kuv; kuv yuav mus nqa nws rov qab los.

“Yexus hais rau nws hais tias, Maivliag. Nws tig hlo mus saib Yexus thiab hais rau Yexus hais tias, Launpaunis; uas txhais hais tias, Xib Hwb.

“Yexus hais rau Maivliag hais tias, Koj tsis txhob tuav kuv, rau qhov kuv tseem tsis tau rov mus cuag kuv Txiv. Koj cia li mus hais rau kuv cov kwv tij hais tias, Kuv yuav rov mus cuag tus uas yog kuv Txiv thiab nej Txiv; nws yog kuv tus Vajtswv thiab nej tus Vajtswv” (Yauhas 20:11–17).

Kuv tau thov kom hnov tau ib qho me ntsis uas Maivliag hnov thaum nws nyob ntawm qhov ntxa thiab tej uas ob tug thwj tim tau hnov thaum lawv taug mus txoj kev mus rau Ema-us nrog tus Cawm Seej, es nkawd xav tias Nws yog ib tug qhua uas tuaj xyuas Yeluxalees.

“Tiam sis nkawd cheem hais tias, Nrog wb so ntawm no, rau qhov twb yuav tsaus ntuj thiab hnub yuav poob. Yexus thiaj mus nrog nkawd so.

“Thaum Yexus nrog nkawd zaum noj mov ntawm rooj, Yexus muab ib lub ncuav los nws ua Vajtswv tsaug thiab muab faib rau nkawd noj.

“Yam uas plooj ntawm nkawd lub qhov muag txawm tshem hlo lawm, nkawd thiaj paub hais tias, yog Yexus, tam sim ntawd Yexus cia li ploj ntais ntawm nkawd mus lawm.

“Nkawd sib tham hais tias, Thaum peb taug kev tuaj, nws nrog wb tham thiab piav Vajtswv Txoj Lus rau wb mloog, mas wb lub siab kub lug cuag li hluav taws hlawv puas yog?” (Lukas 24:29–32).

Muaj ib txhia ntawm tej lus no uas tau hais nyob hauv kev sib ntsib txais lub cim nco txog uas kuv koom 70 tawm xyoo tas los. Thaum ntawd peb ua kev sib ntsib txais lub cim nco txog thaum hmo ntuj. Twb tsaus ntuj nti. Pawg ntseeg tau hu nkauj tej lus uas peb paub zoo. Kuv tau hnov tej lus ntawd ntau zaus. Tiam sis kuv nco ntsoov qhov uas kuv tau hnov hmo ntawd. Ua rau kuv nyob ze tus Cawm Seej. Tej zaum yog kuv hais tej lus ntawd, ces peb txhua tus yuav txais qhov uas kuv tau hnov:

Qhov uas muaj nqi tshaj peb txoj kev nco txog tej uas muaj los yog qhov uas peb nco txog tus Vaj Ntsuj Plig Dawb Huv txoj kev tshoov peb lub siab thiab Nws txoj kev pom zoo rau qhov tseeb. Qhov uas muaj nqi tshaj tej uas peb pom nrog peb qhov muag los sis nco txog tej lus uas tau hais los yog nyeem yog qhov uas peb nco txog tej yam uas peb hnov nrog rau tus Ntsuj Plig lub suab yau yau. Kuv tsis tshua tau hnov tus Ntsuj Plig zoo li ob tug thwj tim uas taug kev Ema-us hnov—uas ua rau nkawd lub siab kub lug. Feem ntau kuv hnov zoo li yog qhov kaj thiab kev paub tseeb.

Peb tau txais kev cog lus tias yuav muaj tus Vaj Ntsuj Plig Dawb Huv ua peb tus khub, ib yam li peb tau txais tej lus qhia meej kom peb paub yuav muaj lub txiaj ntsim ntawd. Tus Tswv tus tub qhe uas tau tso cai rau hais tej lus no thaum nws muab nws txhais tes tso saum peb lub taub hau: “Cia li txais tus Vaj Ntsuj Plig Dawb Huv.” Tam sim ntawd peb paub tias Vajtswv yuav txib Nws. Tiam sis peb yuav tsum xaiv kom qhib peb lub siab thiaj li txais tau tus Ntsuj Plig txoj kev txhawb pab tas peb lub neej.

Tej yam uas muaj los rau tus Yaj Saub Yauxej Xamiv qhia peb tias peb yuav tsum ua li cas. Thaum nws pib ua thiab tom qab nws ua nws txoj hauj lwm qhuab qhia nws txiav txim siab tias nws lub tswv yim tsis txaus kom paub tias nws yuav tsum ua li cas. Nws tau xaiv kom txo hwj chim rau Vajtswv.

Ces Yauxej txiav txim siab nws yuav thov Vajtswv. Nws tau thov nrog kev ntseeg hais tias Vajtswv yuav teb. Tej lus teb tau los rau nws thaum nws yog ib tug tub hluas. Tej zaj lus ntawd los thaum nws yuav tsum paub tias Vajtswv xav kom txhim tsa Nws lub Koom Txoos li cas. Tus Vaj Ntsuj Plig Dawb Huv tau nplij nws lub siab thiab coj nws kev tas nws lub neej.

Nws tau ua raws li kev tshoov siab thaum nyuaj ua li ntawd. Ua piv txwv hais tias, nws tau txais kev qhia txib Pawg Kaum Ob tug Thwj Tim mus rau Akiv Teb thaum nws xav tau lawv ntau tshaj plaws. Nws twb txib lawv.

Nws cia tus Ntsuj Plig qhia thiab nplij nws lub siab thaum nws raug kaw thiab Haiv Neeg Ntseeg raug txom nyem loj heev. Thiab nws mloog lus thaum nws tau mus rau Carthage txawm yog nws paub tias nws yuav raug xwm txheej heev.

Tus Yaj Saub Yauxej tau coj yam ntxwv rau peb txhua tus kom paub txais tus Vaj Ntsuj Plig Dawb Huv txoj kev coj peb sab ntsuj plig thiab txoj kev nplij siab tsis tu ncua.

Qhov thib ib uas nws tau xaiv ua ntej yog kev txo hwj chim rau Vajtswv.

Qhov thib ob uas nws tau xaiv yog kev thov Vajtswv nrog kev ntseeg tus Tswv Yexus Khetos.

Qhov thib peb yog kev ua raws nraim li Vajtswv hais. Tej lub sij hawm kev mloog lus txhais tias peb yuav tsum ua sai sai. Tej lub sij hawm peb yuav tsum npaj. Thiab tej lub sij hawm peb yuav tsum ua siab ntev tos txais kev tshoov siab ntxiv.

Thiab qhov thib plaub yog kev thov Vajtswv kom paub lwm tus tej kev xav tau thiab paub lawv lub siab thiab paub pab lawv rau tus Tswv. Yauxej tau thov rau Haiv Neeg Ntseeg uas ntxhov siab thaum nws nyob hauv lub tsev kaw. Kuv twb muaj cib fim pom tau Vajtswv cov yaj saub thaum lawv thov Vajtswv, thov txais kev tshoov siab, txais tej lus qhia, thiab ua raws li tej lus ntawd.

Kuv twb hnov hais tias lawv tej lus thov Vajtswv feem ntau yog kev thov txog cov neeg uas lawv hlub thiab xav pab. Lawv txoj kev txhawj txog lwm tus ua rau lawv qhib siab kom txais tau kev tshoov siab. Qhov no yuav muaj tseeb rau nej thiab.

Kev tshoov siab yuav pab peb sawv tus Tswv cev txhawb pab lwm tus. Nej twb tau pom muaj li no, ib yam li kuv tau pom thiab. Kuv tus npisov qhia kuv tias—yog ib lub sij hawm thaum kuv tus poj niam muaj ntau yam xwm txheej hauv nws lub neej—“txhua zaus kuv hnov txog ib tug hauv pawg ntseeg uas xav tau kev pab, thaum kuv tuaj pab lawv, kuv kawm tias koj tus poj niam twb tuaj ua kuv ntej lawm. Nws ua li cas kom ua tau li ntawd?”

Nws yeej zoo li txhua tus uas yog cov neeg txhawb pab zoo nyob huav tus Tswv lub nceeg vaj. Zoo li muaj ob yam uas lawv txhua tus ua. Cov neeg txhawb pab zoo tsim nyog txais tau tus Vaj Ntsuj Plig Dawb Huv ua lawv tus khub tsis tu ncua. Thiab lawv tsim nyog txais tau lub txiaj ntsim muaj kev siab hlub, uas yog Khetos txoj kev hlub dawb huv. Ob lub txiaj ntsim tau loj tuaj nyob hauv lawv thaum lawv siv tej ntawd pab lwm tus vim lawv hlub tus Tswv.

Qhov uas kev thov Vajtswv, kev tshoov siab, thiab kev hlub tus Tswv ua hauj lwm ua ke thaum peb ua hauj lwm pab lwm tus los kuv xav tias tej lus no piav meej txog qhov ntawd:

“Yog nej tuav kuv lub npe thov kom kuv ua ib yam dab tsi, kuv yuav ua yam ntawd rau nej.

“Yog nej hlub kuv, nej yeej yuav ua raws li kuv tej lus txib.

“Kuv yuav thov Leej Txiv, thiab nws yuav txib dua ib tug Nplij Siab los, tus ntawd yuav nrog nej nyob mus ib txhis.

“Nws yog Vaj Ntsuj Plig, nws yuav qhia Vajtswv zaj uas yog qhov tseeb rau nej. Neeg ntiaj teb tsis lees yuav nws, rau qhov lawv tsis pom nws los sis tsis paub nws. Tiam sis nej paub nws, rau qhov nws nrog nej nyob thiab nws yuav nyob hauv nej lub siab.

“Kuv yuav tsis tso nej ua ntsuag ib zaug li; kuv yuav rov qab los cuag nej.

“Tshuav tsis ntev neeg ntiaj teb yuav tsis pom kuv lawm, tiam sis nej yuav pom kuv; nej yuav muaj txoj sia nyob, rau qhov kuv muaj txoj sia nyob.

“Thaum txog hnub ntawd nej yuav paub hais tias kuv nyob hauv Leej Txiv thiab nej nyob hauv kuv ib yam li kuv nyob hauv nej.

“Tus uas lees yuav kuv tej lus qhia thiab ua raws li tej lus ntawd, tus ntawd yog tus uas hlub kuv. Tus uas hlub kuv, kuv Txiv yuav hlub tus ntawd; kuv yuav hlub tus ntawd thiab qhia kuv rau nws paub” (Yauhas 14:14–21).

Kuv ua tim khawv tias tam sim no Leej Txib paub nej, paub nej xav li cas, thiab paub txhua leej txhua tus nyob ib puag ncig nej tej kev xav tau ntawm sab ntsuj plig thiab sab cev nqaij daim tawv. Kuv ua tim khawv tias Leej Txiv thiab Leej Tub xa tus Vaj Ntsuj Plig Dawb Huv rau txhua tus uas muaj lub txiaj ntsim ntawd, thov kom tau txoj koob hmoov ntawd, thiab siv zog ua neeg tsim nyog. Leej Txiv, Leej Tub, thiab tus Vaj Ntsuj Plig Dawb Huv yeej yuav tsis yuam kom nej muaj Lawv nyob hauv peb lub neej. Peb muaj kev ywj siab xaiv. Tus Tswv tau hais rau txhua tus hais tias:

“Nej sim mloog saib, kuv sawv sab qhov rooj nraud thiab khob; yog leej twg hnov kuv khob thiab qhib qhov rooj rau kuv, kuv yuav los hauv tus ntawd lub tsev. Kuv yuav nrog nws noj mov thiab nws yuav nrog kuv noj mov.

“Kuv yuav pub tus uas kov yeej los nrog kuv zaum ntawm kuv lub zwm txwv, ib yam li kuv Txiv kom kuv los nrog nws zaum ntawm nws lub zwm txwv.

“Yog leej twg muaj pob ntseg, cia li mloog tej lus uas Vaj Ntsuj Plig qhia rau cov ntseeg” (Tshwm Sim 3:20–22).

Kuv thov Vajtswv kawg kuv lub siab hais tias nej yuav mloog tus Ntsuj Plig lub suab, uas Nws txib rau nej ntau nplua mias. Thia kuv thov kom nej yeej yuav qhib nej lub siab txais tau nws. Yog nej thov xav paub tiag tiag thiab muaj kev ntseeg Yexus Khetos ntseeg tias nej yuav txais tau kev tshoov siab, nej yuav txais tau raws li tus Tswv txoj kev ua thiab raws li Nws lub sij hawm. Vajtswv tau ua li ntawd rau tus tub hluas Yauxej Xamiv. Nws ua li ntawd niaj hnub no rau peb tus yaj saub, Thawj Tswj Hwm Russell M. Nelson. Nws tau xa nej mus nyob nrog lwm tus ntawm Vajtswv cov me nyuam kom nej sawv Nws cev pab lawv. Kuv paub li ntawd tsis yog los ntawm tej yam kuv qhov muag tau pom xwb tiam sis qhov uas muaj hwj chim ntau tshaj plaws yog qhov uas tus Ntsuj Plig tau ntxhi lus rau kuv lub siab.

Kuv twb tau hnov Vajtswv thiab Nws Tib Leeg Tub txoj kev hlub rau tag nrho Vajtswv cov me nyuam nyob hauv lub ntiaj teb thiab Nws cov me nyuam nyob hauv lub ntuj ntsuj plig. Kuv twb tau hnov tus Vaj Ntsuj Plig Dawb Huv txoj kev nplij siab thiab txoj kev coj. Kuv thov kom nej yuav muaj kev xyiv fab uas muaj thaum tus Ntsuj Plig yog nej tus khub. Los ntawm Yexus Khetos lub npe, amees.