A Reng er Ngii Bo Lobengkem

Rodam me a rodos, ng dmeu a renguk er a techall el kungedecheduch er kemiu er tial Chedaol Sils er a Rubak, er a klou el ongdibel er a Ikelesia er ngii, er tial temel a Baskua. A kureng a sulel a Demad er a Babeluades er a sengk er Ngii er a Ngelekel, el mlei er a beluulechad el mo Osobeled. Ak mereng a saul el medengei el kmo Ngii a tilenget a kngtid e Mlekiis er a kodall. Bek el sils e ak ngeltengat el medengelii tiang, leng Tngakireng er Ngii a uchul, ea tara klebesei e ak mo mekiis er a kodall e mo kiei el mo cherechar er a chelsel a ungil telungalek.

Ak medengei el kmo aikal tekoi a sebeched el mo medengei lokiu a di chimol rolel. A Chedaol Reng a mla subedak er a uldesuek me a renguk el kmo ng klemerang—el diak dil tang ng mla mo betok el sbedak. A kusbech er tiakid el melemolem el ongelaod. Kede rokui el mo chelbangel a kerior e rokui el ousbech er a ongelaod er a Reng. Ak milchesuar er a tara taem er a kdechor lobengkel a demak e ra ospitar. Aki ulemes er a delak el mengoit a telil. Sera ki momes er a medal, eng mle klikmechur er a lekea ringel. Telkib el taem ruriul, e a demak a dula el kmo, “A kekerei el dil a rieda el mo remei.”

Ng millekoi el kmal ko er a mekekokil. Ng uai a le bla er a budech. Ng uluchais er a tekoi el ngii a mle medengelii el kmo ng klemerang. Ng mocha mengedmokl aikel kloklel a delak. E tobeda ra rikl e oureng a sulir a re nurs me a retoktang el ulengeseu er ngii er a ikal mereko el klebesei.

A ongelaod er a Chedaol Reng a ulebengkel a demak er tiaikid el taem, meng mlo medengei, el kmo ng mekerang er tiakid el sils. Ng uaia rebetok el chad el mla nguu sel yaksok el kmo a Reng er Ngii a mo obengterir (Mesa D&C 20:79).

A urungulek er chelechal sils a mo choisisii a klemeriar reng me a duch er kemiu el mo otireklii Chedaol Reng. Bo modengei el kmo Ngii a ongedei el chedal a bdelul a Kledios. A Chedam me a Ngalek a mla mekiis er a kodall el chad. E a Chedaol Reng a di reng el blebelel a chad. (Mesa D&C 130:22.) Ng kmal di iior kau el melilt el mo Ngii e mengemedaol er Ngii el me soiseb er a rengum me a uldesuem.

A teletael el luchul e kede nguu tial klengeltengat er a babeluades a kmal bleketakl er a blelekl el tekoi el dolekoi er a bek el sandei eng di ng locha diak el medalm er a rengud me a uldesued. Sel luchul e a Chedaol Reng a mei er kid eng kired el mo “blechoel el melbedebek” er a Osobel e “oltirakl a Llechul” (Mesa D&C 20:77).

Tiakid el taem er a bekl el rak a ngosukid el mo dobedebekii a tngakireng er a Osobel me a Okisel er a kodall el mo ngar el chad. Betok er kid a uaia lolcheluches er a uldesued aikel teletael el dilubech. Ng mle tal kngara Jerusalem ngak me a bechik e dilchor er a iikrel sel olekull. Betok el chad oumerang el kmo tiakid sel debull el blol medakl er ngii a mlekerus el Osobel e milkiis er ngii a ngar el Dios.

A chad el ulemekrael er kemam a millutk e dilu el kmo, “Mei, e mesa sel bechachau el debull.”

Aki kora ngilbeet el mo reou e soisebang. Aki milsa bad el kora kingall er bita er a kboub. Eng di a mla er a uldesuek a kuk tara siasing, el kmal merang el di uaia ikal ki mulmes er tial sils. Ak ulemdaosu er a Mary, el re Apostol a mirrael e ngii a mlo medechel er tial debull. Tiakid a lulkrolak a Chedaol Reng el mesang e dirrek el rongesii er a uldesuek, el kmal bleketakl el di ngii mak bla er sei:

“Eng di a Mary a dilechor iikrel a debull lemangel: me sera llangel, eng mlo terrob, lomes er a chelsel a debull,

“E milsterir a re teru el anghel bleiull er a becheleleu e dengchokl, el chimo er tir a ngara bedul a bdelul, e a chimong a ngara ochil, er tial ble lulkeduus er ngii a Jesus.

“E dula er ngii el kmo, Kau el dil, ngera me kelmangel? Meng dula er tir el kmo, Le tir el mla nguu a bedengel a Rubak er ngak, e diak kudengei el kmo te mla nguu el mekedusii er ker.

“Tia er a le dela el uaisei, eng ulebult lomes rullel, e milsa Jesus el dechor, e dimlak lodengei el kmo ng kaikid a Jesus.

“Me a Jesus a dula e rngii el kmo, Kel dil, ngera me kelmangel? Kosiik er techang? E ngii, omdasou el kmo ngika el chad a locha chad er a sers, e dula er ngii el kmo, Kau el chad, alsekum e kengiluu, e mouchais er ngak el kmo ngara ker, me bo knguu el merael.

“Me a Jesus a dula el kmo, Mary. Me ng ulebult, e dula el kmo, Rabboni; el belkul a kmo, Mastang.

“Me a Jesus a dula el kmo, Lak morutech er ngak; leng dirkak ngesechekl el mo er a Demak: e bai morael el mo er a rodam er ngak, e mdu er tir el kmo, Ak ngosechekl el mo er a Demak, e Demerir, e Dios er ngak, e Dios er kemiu” (Johanes 20:11–17).

A kmal mla meluluuch me bo kulchesuar a teletael el uai sel lulmelchsiu er ngii a Mary er a le ngara debull me sel lulmelchesiu er ngi tirkel teru el chedal a Jesus er a le ngara rael el mo er a Emmaus e lorael lobengkel a mla mekiis er a kodall el Osobel, lomdasou el kmo ng kuk di chad el mle oldingel er a Jerusalem:

“E te mocha orreked er ngii, e kmo, Di mkiei lobengkemam: leng mocha milkolk, e cheroid a klukuk. Meng mocha kiei lobengterir.

“Me a bocha ledengchokl, lomesoil lobengterir, eng ngiluu a blauang, e ulemekngeltengat er ngii, e millebtib er ngii, e ngiluu el mesterir.

“Me a osengir a ulebok, me te mklo medengelii; e ng mocha dibus er mederir.

“Me te mocha kareker, Ng dimlak el sal kora mo mengelad a rengud, er ngika el chad er a longedecheduch er kid, e losaod chedaol llechukl el mei er kid?” (Lukas 24:29–32).

A bebil er a ikal tekoi a mildung er a tal miting er a sacrament elk bla rngii e ra kmeed el okeuid el rak er a memong. Sel taem e a temel a miting er a sacrament a sel le kebesengei. Ng mle milkolk a iikr. E tial seked er a rechad a milngitakl er tiakid el dodengelii el chelitakl. Ak mla rongesterir el betok el taem. E ng di diak kubes er tiaikid el kesus. Ng kmal ngoikak el mo kmeed er a Osobel. A kumdasou ek luut el dmu tekoi er a chelsel e kede locha rokui el muut el mo kmeed er a Osobel:

Sel kmal mekreos el dodengelii el teletael a sel uldesued el kirel a Chedaol Reng el dolchesuar er a rengud me sel oterkeklel er a klaumerang el mei er kid. Ng lmuut el kmal mekreos omko kede mesa er a medad, malechub e kede dobedebk a tekoi el medung me a mechuiu, a sel dolchesuar a chelellakl el ngerel a Chedaol Reng. Ng diak sal, kmal mla melchesuar el uai tirkel chad el mlara omerollir el mo er a Emmaus—el ulmelchesiu el mengeald er a rengrir. Ak bai blechoel, melchesuar a llomes me a chelellakl el reng.

Kede oba mkereos el yaksok er a Chedaol Reng el kldemed, e dirrek lolab a meral ulekrael el kirel a ngeiul tial sengk. Aikakid el tekoi e mildung er a mla moterekokl el mesiungel a Rubak sel lengai chimal locha er a bebul a bdelud el du el kmo: “Mnguu Chedaol Reng.” Seikid el taem e kau me a ngak a ansing el kmo Ngii a modurokl el mei er kid. E ng di a ngercheled a kired el melilt el mok a rengud el uchul e kede nguu a odngelel tial Chedaol Reng, er a chelsel a klengar kid el rokir.

A teletael el dilubech el mo er a Profet Joseph Smith a meskid a ulekrael. Ngii a ulemuchel e millmolem a urerel el mle medengei el kmo ng dimlak el klebech a di luldesuel el mo medengelii a rael kirel merael er ngii. Ngii a millilt el mo oba ngariou el reng er medal a Dios.

Ng dirrek, el Joseph a millilt el mo oker er a Dios. Ngii a milluluuch lokiu a klaumerang el kmo a Dios bo longer ngii. A nger a mlei er a le dirk ngeasek el buik. Aikel klumech a mlei er ngii er a bol kirel mo medengei el kmo ngera soal a Dios el kirel a teketekel a Ikelesia er Ngii. A Chedaol Reng a milngelaod e ulemekrael er a klengar ngii el rokir.

Ng ulengesenges er a llomes er a taem el sal mle meringel. A okesiul tiang, e ngiluu a ulekrael el mo oldurokl er a Reteruich me a teru el mo er a England e a osisiu el taem e ngii a kmal ulusbech er tir. Ng di ng uldurokl er tir.

Ng kilengei a le mesemchokl e le mechelaod er a Chedaol Reng er a le ngara kelebus e a Resanto le sal kmal ngara ringel. E ngii a ulengesenges er a bocha el kirel merael el mo er a Carthage el mle ungil medengei el kmo ng sebechel mo okodall.

A Profet Joseph a mla chotii okesiu el me er kid el kirel a kmo kede mekerang e melemolem el melai a ulekrael me a ongelaod lokiu Chedaol Reng.

A kot el tekoi el rirelii a mo ngariou a rengul er medal a Dios.

A ongerung eng milluluuch loba klaumerang el ngara Rubak el Jesus Kristo.

A ongedei eng ulngesenges. A blekongesenges a sebechel belkul a kmo ng orechudel. Ng dirrek el sebechel kldmokl. A lechub eng sebechel belkul a kmo bo el klou a rengum el mengiil er a lmuut el bebil er a ulekrael.

E a ongeuang a meluluuch el mo medengei a ikel lousbech me a rengrir a rebebil e mekera omolngeseu er tir el kirel a Rubak. A Joseph a milluluuch el kirir a Resanto el mlara chelebuul er sera lengara kelebus. Ng chetengakl el techall el bla kumes er a reprofet er a Dios sel loluluch, lolengit a ulekrael, e lengai a ulekrael, e bo lotirakl el remuul.

Ak mla remenges a nglunguchir el kirir a rechad el tir a ou beltik el reng el mo er tir e mesiou er tir. A uldesuir el kirir a rebebil a uaia le bok a rengrir el mo ngmai a ulekrael. Tia kmal sebechel klemerang el tekoi el me er kau.

A llomes a ngosukid el mo olngeseu er a rebebil el kirel a Rubak. Ko mla mesa tiang er a ikel moruul, el di uai ngak. A bisop er ngak a mle ta el du er ngak el kmo—er a taem el bechik a kmal mlo omelchesiu er a klou el berraod er a klengar ngii—“Bek el taem el krenges a chisel a kmo ng techa er a ward el ousbech a ngeseu e sel kbong, e a bechim a bai mla kot el mong. Ng mekera e uaisei?”

Ngii a di uaia a rebetok el chad el ungil mesiou er a rengedel a Rubak. Ng uaia le ngarngii a eru el tekoi loruul. A rungil mesiou a beot el nguu Chedaol Reng el mo kldemir. E oba sengk er a bliochel el bletikelreng, el ngii a klikiid el beltik el reng er a Kristo. Aika el sengk a mla mukeroul er a rengrir le te mla ousbech el mesiou loeak a beltik el reng er tir el mo er a Rubak.

A teletael ra nglunguuch, ulekrael, me a beltik el reng er a Rubak a dmak el oureor sel dosiou a kmal ungil kleuadel el me er ngak er a ikakid el tekoi:

“Alsekum e komolengit a ngii di el ngerang el ngara ngklek, e ak mo rulii.

“A le betik a rengmiu er ngak, e moltirakl a llechuk.

“E ak mo meluluuch el mo er a Chedam, e ngii a mo meskemiu a lmuut el tara Ongelaod, el mo kiei lobengkem el mo cherechar;

“Ng dirrek el Reng er a klemerang; el beluulechad a diak el nguu, le ngii el diak lesang, me a diak lodengelii: eng di ko medengelii; le ngii lobengkemiu, e mo er a delongeliu.

“Ng diak chitemiu me lak a cholodiu: Ak mei obengkemiu.

“Ng kmal di telkib el taem, e ak mo cheroid er a beluulechad; e ng di kemiu a mesekak: le ngak el ngar, me kemiu me kom ngar.

“Seikid el sils e ko mo medengei el kmo ngak obengkel a Chedam, e kemiu a obengkek, e ngak obengkemiu.

“Ngike el mla ngmai a llechuk, e oltirakl, a ngii a betik a rengul er ngak: e ngike el betik a rengul er ngak a Chedam a mo betik a rengul er ngii, e ngak a mo betik a renguk er ngii, e mo mocholt el mo er ngii” (John 14:14–21).

A kuchotii a sioning er ngak el kmo a Chedam a kmal medengelkau er chelechal taem, aikel momelchesiu, me a ikel lousbech a reng me a klechad er tirkel ngara bita er kau. Ak sioning el kmo a Chedam me a Ngalek a odureklii Chedaol Reng el mo er a rokui loba tial sengk, e olengit er ngii el klengeltengat, e osiik el mo klikiid el kirel. Ng diak el Chedam, malechub el Ngalek, malechub a Chedaol Reng a di tir lorrimel er Tir el me soiseb er a klengar kid. Kid a mimokl el melilt. A Rubak a mla dmu el kmo:

“Mesang, ak dechor bita er a chesimer, e melengod: ngii di el chad el rongesak, e mekengii a chesimer, e ak me soiseb, e omesoil lobengkel, me ngii me ngobengkek.

“Ngike el mo mesisiich a klaumera er ngii ak kengei er ngii el me soiseb er a rengedek, el uai ngak el mlo mesisiich, e mlo obengkel a Demak er a rengedel.

“Ngike el ngarngii a dingal, lorrenges aikel ledung a Chedaol Reng” (Ocholt 3:20–22).

Nglunguchek loba renguk el rokir me bom rengesii a ngerrel Chedaol Reng, el kmal di kldmokl el kiriu. E nglunguchek me bo blechoel mok a rengmiu el Kirel. Alsekum e ko molengit loba blakelreng me a klaumerang er a Jesus Kristo lolengit a ulekrael, e ko mo nguu er sel teletelel a Rubak me sel lungil Temel. Tia le kildmeklii a Dios el mo er a ngeasek el Joseph Smith. E dirrek el meruul er ngii er chelechal sils el mo er a profet, President Russell M. Nelson. Ngii a mla ngoikemiu el mo olngeseu a klengar er a rebebil er a rengelekel a Dios me bo mosiou er tir el Kirel. Ng diak di kudengei aikel blak ues er a medak ak dirrek el medengei lokiu a klisichel Chedaol Reng louchais er a renguk.

Ak mla melchesuar a beltik el reng er a Chedam me a Chimol Ngelekel Sechal el mo er a rokui el ngelekel a Dios er a beluulechad me a Rengelekel el ngara beluu er a redeleb. Ak mla melchesuar ongelaod me a ulekrael er a Chedaol Reng. Nglunguchek me bo molchesuar a deureng er a Chedaol Reng el kldemiu el di blechoel. El ngara ngklel a Jesus Kristo, amen.