2010–2019
Kan Nthothup Rok Ninge Paer Rom
April 2018


Kan Nthothup Rok Ninge Paer Rom

Gube meybil u gumircha’eg ni gara rung’ag lungun fare Kan Nthothup, nikan pi’ ngom.

Pi walageg, gub falfalen’ ko daba’ ni nggu non ngomed ko Madnom rok Somoel, u lane general conference ko Galasia Rok, ko re Easter ney. Gube pining e magaer ngak e Chitamangdaed nu Tharmiy ko tawa’ath rok ni fare Faak nib Tu’uf Rok, nike yib nga fayleng ni nge mange Tabiyul rodaed. Gub falfalen’ ni ku nang ni ke bayluy ni fan ko denen rodaed me Fokoyam’ biyay. Gubin e rran ma gub tawa’ath ni gu manang e binem, ni bachane e Bayul Rok, ma ra boran ma gura fos ko yam’ dabkug yim’ ni gamaed e tabinaew rog.

Kemus e kanawo’ ni gumanang e pin’em e rogon ni ku nang. Fare Kan ni Thothup e ke yoeg ko tafney rog nge gumircha’eg ni riyul’—gathi ta’abiyay machane bo’or yay. Ba tu’uf e binem e gapas ngog ninge ulul. Gadaed gubin ni gadaed ma yan u fithik e gafgow nib tu’uf e thin rok fare Kan Nthothup rodaed. Ku thamiy ni ra boran napan ni ku sak’iy u to’ben e chitamngig u aspital. Gu yaliy e chitinngig ni i pogfan—nge taw ko tomuren e pogfan rok. Napan ni gu sap gaed nga owchen, ma be falfalen’ napan ni chuw fare amith. Tomuren ni dariy bee’ nibe non, me non e chitamngig ko somm’on. I ga’ar, “Ke sul bochi bulyol nga tabinaew.”

Ke yoeg nib munguy rogon. Ba gapasen riy. Ke yoeg ban’en ni manang nib riyul’. Me kunuy e chugum rok nina’. Me yan nga lane hallway ko aspital ni nge pining e magaer ngak e pi nurse nge togta ni kar awyuegned ni bukun e rran.

Bay fare Kan ni Thothup rok e chitamangig e rofen nem ni nge thamiy, ni nge nang, nge n’en ni nge rrin’ e rofen nem. Ke thapeg fare micheg nike thapeg bukun e gidii’ ni yaed ra thapeg e Kan Nthothup rok” (D&C 20:79).

Athap rog e daba’ e nggu gel nag e n’en ni ga ba adag ni ngam thapeg fare Kan ni Thothup. Tafneyem, ni Ir e cha’an dalip ku Got. Chitamangiy nge Faak e bay e dowef rorow. Fare Kan ni Thotuhp e ya’el. (Muguy ko D&C 130:22.) Gur rom e ngam thapeg mag pag nge yib nga lane gumircha’em nge tafney rom.

Pin’en ni rayog ni ngad thapeged u tharmiy nib tawa’ath e kan tamilang nag ko thin nikan noeg ni gubin e wik machane sana gathi gubin ngiyal’ nima paer u lan gumircha’en daed nga tafney rodaed. Ra ngad thapeged fare Kan Nthothup ma ngarin leam niged fare Tathapeg man fol ko pi motochiyel Rok” (D&C 20:77).

Ngiyal’ ney u lane duw e ma ayuweg daed ni ngad leam niged fare miligach rok fare Tathapeg nge Ir nike fas ko yam’. Oren i gadaed e ma tafney nag ya’an e binem nike buch. Bay biyay ni gu sak’iy gow e ppin rog u waen ko fare tomb u Jerusalem. Oren e gidii’ e mich u wan’ ni iraram fare tomb nike fas fare Tathapeg riy nikan kruth nag ko yam’ nib Got nib fas.

Bee’ nima gagyeg nigey u rom e non ni ga’ar ngomow, “Moy, muguy fare tomb ni dariy ban’en u langgin.”

Mu gomow garbog nga but ni nggu warow nga langgin. U guyew ba benchi nib simen nibay u downgin e rungrung. Machane gu leam nag ban’en, nib riyul’ ni boed ko n’en ni guyew e rofen nem. Ya’an Mary, ni fapi Apostle e ri digeyed ko fare tomb. Iraram e n’en ni pageg fare Kan Nthothup ni ngguy mug rung’ag ko tafney rog, ni rib tamilang ni boed ni rugu bay u rom:

“Me sak’iy Maria u wuru’ fare low ko yam’ ngi yor, ka be yor me lumel nga but’ nge changar ngalan fare low ko yam’,

“Me guy l’agruw i engel u lan fare low nib wechwech e mad rorow, ni kar pirew nga but’ ko gin ba’aram ni imoy downgin Yesus riy, ni bagayow e bay ko gin ni imoy lolugen Yesus riy, ma bagayow e bay ko gin ni imoy rifrifen ay riy.

“Miyow fith ngak ni lungurow, Bpin, mang ni ga be yor?Me fulweg ngorow ni ga’ar, Kar feked e Somol rog ngabang nda gu nang e gin ni kranod ra ted ngay.

“fa’ani mu’ i yog rok e re bugithin ney me sap nga tomur me guy Yesus nib sak’iy u rom, machane de pow rok ni ir Yesus.

“Me fith Yesus ngak ni ga’ar, Bpin, mang ni ga be yor? i mini’ e ga be changarnag? Me finey fare pin ni ir fa’anem nma tamilangnag fithik’ fare chuwo’ i gek’iy, ma aram me ga’ar ngak Yesus, fa’anra gur e kam fek ngabang, me ere mog ngog e gin ni kam man mu tay ngay nggu wan gu fek.

“Me ga’ar Yesus, Maria. Me changar ngak Yesus me yog nthin ni Hebrew ni ga’ar, Rabboni; fa e re bugithin ney e Tamchib.

“Me ga’ar Yesus ngak, Dab mmath ngog; ya dawor gu sul ngak e Chitamag nga tharmiy: machane mman ngak fapi cha’ ni walgeg ngamog ngorad ni bay gu sul nga tharmiy ngak fa’anem ni ir e Chitamag me ir e Chitamangimed, ni ir e Got rog me ir e Got romed” (John 20:11–17).

Ku meybil ni nggu thamiy e n’en nike thamiy Maria ko fare tomb nge n’en nike thamiy fare gal gachalpen u dakean e kanawo’ ni yow be sar nga Emmaus napan ni yow be un ngak fare Tathapeg ko yan, ni yow be leam nag ni bea’ nike yib nga Jerusalem:

Machane miyow taleg ni be lungurow, Mu par romow: yak e chugur ni nge m’ay e biney e rran ma ere nge aw e lumow. Ma aram me un ngorow nga naun ni nge par rorow.

“Me ya i un ngorow ko par ko tebel, me fek e flowa, me pining e magaer riy ngak Got, me t’ar fare flowa nge pi’ ngorow.

“Ma gowa puf owcherow miyow poy; machane me m’ay ngabang ndakur guyew.

“Me lungurow, Gathi da thamiyew rodow ni bod ba nifiy ni be yik’ u ngorngordow ni fa’ani i welthin ngodow u daken e kanawo’ me weliy fan fapi thin nu babyor nib thothup ngodow?” (Luke 24:29–32).

Boech e pi thin nem e yima sul u dakean napan e mo’olung ko sacrament ni kug un ngay nike pag 70 e duw. Lane pi rran nem ma mo’olung ko sacrament e yima tay ko balayal’. Ba lumor u waen. Ma gidii’ e ma yoen’ e tang. Guma rung’ag ni bukun yay. Machane bin tomur e n’en ni gu manag e n’en ni ku thamiy reb e neap. Ke fekeg kug chugur ngak Tathapeg. Sana fa’anra ragu yoeg e thin ma ra yib ngodaed biyay:

Mpaer rog; ko re balayal’ ney.

Ke m’ay fare rran;

Ke aw e lumor;

Ke yib e neap.

Mpaer u gumircha’eg,

Nge lane tabinaew rog.

Mpaer rog; ko re balayal’ ney.

Kam un ngog e daba’

Ke sug gumircha’eg ko Kan Thothup,

Napan ni gu non ngom.

Thin rom e ke suguyeg

Ma gu ba adag ni nggu chugur ngom.

O Tathapeg, mpaer rog e re balayal’ ney;

Musap, re balayal’ ney.

O Tathapeg, mpaer rog ko re balayal’ ney;

Musap, re balayal’ ney.1

Pin’en ni yimanang nib falel’ e mornga’agen fare Kan ni Thothup nibe aw nga gumircha’en daed ma kube ulul nibe yoeg e tin nib riyul’. Pin’en ni rib falel’ ni gadaed be guy nga owchen daed, ma thin ni gadaed manang ni kan noeg fa bi’eg, e yibe nang e thamtham nibe non fare Kan Nthothup. Boech ngiyal’, ma karug thamiy ni boed fare gal cha’ ni yow be yan ko kanawo’ nga Emmaus—be thamiy u gumircha’en. Baga’ ni, ba thamtham nib ba’ud ma be achig luman.

Bay e micheg rodaed ko fare Kan ni Thothup ni be paer rodaed ni boed nibay e kanawo’en ko rogon ni ngan thapeg e binem e tawa’ath. Pi thin ney nike yoeg e tapigpig rok Somoel nike tay pa’ nga dakean loelgen daed: “Thapeg fare Kan ni Thothup.” Ngiyal’ nem, me gur nge gag e kad nangew ni ran pi’ nge yib. Machane gadaed e ngad binged gumircha’eg daed ni ngad thapeged e machib rok fare Kan Nthothup, u lane yafas rodaed.

Pin’en nike buch rok fare Profet Joseph Smith e ma pi’ e wo’. Ke tabab me ululeg e machib rok nike dugliy ni birok e gonop e dani fal’ ni nge nang ko mang kanawo’ e nge feek. Ke mel’eg ni nge ta’er e tafney rok u pow’chen Got.

Bin migid, Ke dugliy Joseph ni nge fith Got. Ke meybil u fithik e mich ni ra fulweg Got lungun. Ni fulweg luman napan ni kab bitir. Pi mulwol nem e yib napan nib tu’uf ni nang rogon ni ra fal’egin Got e Galasia Rok. Fare Kan ni Thothup e gapaseg me gagyeg nag u lane yafas rok.

Ke fol ko n’en ni yibe yoeg mus nib momaw’. Boed ni, thapeg e wo’ ni nge pi’ Ragag nge L’agruw nga England napan nib tu’uf e ayuw roraed rok. Ma ke pi’ raed.

Ke feek e gapas nge oloboch rok nike yib rok fare Kan Nthothup napan nikan kalbus nag ma fapi Gidii’ e ke gafgow. Ke fol napan ni yan nga Carthage mus ni manang ni rayog ni nge yim’.

Fare Profet Joseph e pi’ e wo’ ngodaed ko rogon ni ngad thapeged e kanawo’ nge gapas u dakean fare Kan ni Thothup.

Bin somm’on e n’en nike rrin’ e ke ta’er e tafney rok u pow’chen Got.

Bin l’agruw e ke meybil u fithik e mich ngak Somoel ni Yesus Kristus.

Bin dalip e ke fol nib fal’ rogon. Fol e be yip fan ni ngan mithmith nib papey. Be yoeg ni ngan fal’eg rogoy. Fa be yoe gni ngan soen u fithik e athamgil ni yibe soen nag e ayuw.

Bin aningeg e ngan meybil ngan nang e pin’en nib tu’uf ko pi’in ni yibe guy nge gumircha’en raed nge rogon ni ngan ayuweg raed ni fan ngak Somoel. Joseph e meybil ni fan ko pi Gidii’ nike gafgow napan ni bay u kalbus. Kuguy e pi profet rok Got napan ni yad be meybil, ni yad be ning e ayuw, ni yaed be thapeg e kanawo’, mar fol gaed riy.

Kuguy ni baga’ ni meybil roraed e mornga’agen e gidii’ ni yaed be pigpig ngak. Magar roraed ngak e gidii’ e ma bing gumircha’en raed ngar thapeged e ayuw. Ku rayog nib riyul’ e binem ngom.

Ayuw e ma ayuweg daed ni ngad machib gaed ngak e gidii’ ni fan ngak Somoel. Kam guy e binem nike buch rom, ni boed gag. I ga’ar biyay e bishop rog ngog—ko ngiyal’ nike magawon e ppin rog—“Gubin ngiyal’ ni gura rung’ag mornga’agen bee’ u lane ward nike tu’uf e ayuw rok, ma gubay u rom ni nggu ayuw, ku pir’eg ni ppin rom e bay u rom nib m’on rog. Urogon nima rrin’ e binem?”

Boed gubin e pi tamachib u lane gil’ilungun Somoel. Boed ni l’agruw ban’en ni yad ma rrin’. Tamachib nib cheag e bay fare Kan ni Thothup rok ni gubin ngiyal’. Ma rayog fare tawa’ath ko tu’ufeg roraed, ni fare adag rok Kristus nib manechubog. Pi tawa’ath nem e ke ga’ roraed napan ni yaed be murwel ngay ni yaed be pigpig u fithik e tu’ufeg ngak Somoel.

Rogon ni meybil, ayuw, nge tu’ufeg rok Somoel e ma murwel u ta’bang u lane pigpig rodaed e kan weliy ngog nib fal’ rogon ko pi thin ney;

“Fa’an gimed ra ning ban’en ngog u fithingag, ma ri gu ra rin’.

“Fa’an gu ra t’uf romed, ma gimed ra fol ko tin kug ta’chiylen ngomed.

“Bay gu wenig ngak e en ni Chitamangiy, nge pi’ yug reb e Taayuw ngomed, ni bayi par romed ndariy n’umngin nap’an;

“Dab gu pagmed ngam pired ni go’ gimed: y aba kug sul ngomed.

“Dabki n’uw nap’an ma dabki guyeg e girdi’ nu fayleng; machane gimed e bay mu guyed gag: bay gu par ni gub fos, ere ku er rogomed ni bay kum pired ni gimed ba fos.

“Bayi taw ko chirofen nem ma bay mu nanged ni gu bay u fithik’ e Chitamag, ma gimed bay u fithik’ag, ni bod rogog ni gu bay u fithik’med.

“En nra fel’ u wan’ e tin kug ta’chiylen ngomed, me fol riy, e ireram e cha’ ni gub t’uf rok: Chitamag e ra t’ufeg e cha’ ni gub t’uf rok, ma ku er rogog ni ra t’uf rog mu gguy rogon nge nangeg” (John 14:14–21).

Gube yoeg e mich rog ni fare Chitamangiy e chiney e manangem, nge thamtham rom, nge pin’en nib tu’uf rom nge pi’in nib liyeg nem. Gube micheg ni fare Chitamangiy nge Faak e yow be pi’ fare Kan ni Thothup ngak gubin e pi’in nibay e binem e tawa’ath rok, nibe ning e binem e tawa’ath, nibe gay rogon ni nge paer nib yul’yul’ ni fan. Gathi Chitamangiy, fa Faak, fa fare Kan ni Thothup e ngar tawasor Yaed raed nga lane yafas rodaed. Mil fan ngodaed. Ke ga’ar Somoel ngak gubin e gidii’:

“Mmotoyil, kug sak’iy nga langan e mab, gu be tugtuguy: ma fa’anra rung’ag be’ lungug me bing e mab, mra gub ngalan e naun rok, nggu un ngak ko abich, me un ngog ko abich.

“Pi’in yad ra gel ndar paged yad ko kireb e gu ra pi’ mat’awrad ni ngar pired nga but’ u to’obeg u tagil’ig, ni bod rogon ni kug gek ngak e kireb, me ere chiney e kug par nga but’ u to’oben e Chitamag u tagil’.

“Fa’anra bay telim, me ere mmotoyil ko n’en ni be yog fare Kan Nthothup ngak e pi galesiya” (Revelation 3:20–22).

Gube meybil u gumircha’eg ni gara rung’ag lungun fare Kan Nthothup, nikan pi’ ngom. Ma gube meybil ni gubin ngiyal’ ma bam ab gumircha’em ni ngam thapeg. Fa’anra gara fith u fithik e yul’yul’ nge mich ngak Yesus Kristus ni fan ko ayuw, ma gara thapeg ko kanawo’en Somoel ko ngiyal’ Rok. Ke rrin’ Got e binem ngak Joseph Smith ni kab bitir. Ke rrin’ e daba’ ni fan ngak e profet rodaed e chiney, i President Russell M. Nelson. Ke tem ko gin ni bay boech pifaak Got riy ni ngam ayuweg raed ni pa’. Gu manang e binem ni gathi kemus ko n’en ni kuguy nga owcheg machane n’en nike kathkath nag fare Kan Nthothup nga gumircha’eg.

Ku thamiy e tu’ufeg rok e Chitamangiy nge Faak nib Tu’uf Rok ni fan ngak pifaak Got u fayleng nge pifaak u tafen e ya’el. Ku tharmiy e gapas nge fare kanawo’ rok fare Kan ni Thothup. Gube meybil ni gara thapeg e falflaen’ nibay fare Kan Nthothup rom. U dakean fithngan Yesus Kristus, amen.

Babyoren Ayuw

  1. “Abide with Me; ’Tis Eventide,” Hymns, no. 165.