Inspirado nga Pagpangalagad

Pinalangga kong mga kauturan, nagapasalamat ako sa pribelihiyo nga maghambal sa inyo sa sining makasaysayan nga pangkabilugan nga komperensya. Gintib-ong naton si Pangulong Russell M. Nelson bilang ika-17 nga Pangulo sang—Ang Simbahan ni Jesucristo sang Mga Santos sa Ulihing mga Adlaw. Tungod ginbugayan ako nga makatrabaho sia kada adlaw, nabatyagan ko ang kompirmasyon sang Espiritu nga si Pangulong Nelson gintawag sang Dios nga magpanguna sang matuod nga Simbahan sang Ginuo.

Nagasaksi man ako nga ang Ginuo nagtawag kay Elder Gerrit W. Gong kag Elder Ulisses Soares sa pag-alagad bilang mga miyembro sang Korum sang Napulo’g Duha ka mga Apostoles. Ginapalangga kag ginatib-ong ko sila. Sila, paagi sa ila pagpangalagad, magabugay sang mga kabuhi sa bug-os nga kalibutan kag sa mga henerasyon.

Makasaysayan man ang ini nga komperensya sa isa pa gid ka rason. Si Pangulong Nelson nag-anunsyo sang isa ka inspirado nga tikang pasulong sa plastado nga plano sang Ginuo para sa Iya Simbahan. Inang plano nagalakip sang bag-o nga istraktura sa mga korum sang priesthood sa mga ward kag stake agud matungdan naton sing mas maayo ang aton mga responsibilidad sa priesthood. Ina nga mga responsibilidad may kaangtanan sa aton pag-atipan sa priesthood sa mga anak sang aton Amay.

Ang plano sang Ginuo para sa Iya mga Santos sa paghatag sang mapinalanggaon nga pag-atipan may nagkalain-lain nga porma sa sulod sang mga tinuig. Sang bag-o pa lang sa Nauvoo, si Propetang Joseph Smith nagkinahanglan sang organisado nga paagi sa pag-atipan sang nagadamo nga kalabanan pigado nga mga hinaylo nga nagapasulod sa siyudad. Apat sa akon kalolohan nalakip sa ila—ang mga Eyring, mga Bennion, mga Romney, kag mga Smith. Ang Propeta nagplastar sang pag-atipan sining mga Santos suno sa ila lugar. Sa Illinois inang pagbahin-bahin sang siyudad gintawag nga mga “ward.”

Samtang nagatabok ang mga Santos sa kapatagan, ang ila pag-atipan sa kada isa ginplastar sa mga “guban/companies.” Isa sang akon lolo sa tuhod (sa bahin ni tatay) nagapapuli na halin sa iya misyon sa ginatawag na sa karon nga Oklahoma sang nasugata niya ang isa ka guban sa dalanon. Maluya sia kaayo tungod sa balatian gani sia kag ang iya kaupod naghigda na lang sa isa ka gamay nga karo.

Ang lider sang guban nagpadala sang duha ka bataon nga babayi agud buligan ang kon sin-o man nga yara sa sinang makaluluoy nga karo. Isa sa ila, isa ka bataon nga utod nga babayi nga nahaylo sa Switzerland, nagtulok sa isa sa mga misyonero kag nakabatyag sang kaluoy. Ginluwas sia sadtong guban sang mga Santos. Naumpawan sia tubtob nasarangan niya nga maglakat padulong sa Salt Lake Valley nga katupad ang iya tigluwas. Nagluyagay sila kag nagpakasal. Sia ang akon nangin lolo sa tuhod nga si Henry Eyring, kag sia ang akon lola sa tuhod nga si Maria Bommeli Eyring.

Pila ka tuig ang nagligad, kon munuhon sang mga tawo ang dako nga kabudlay sang pagtabok sa isa ka kontinente, siling niya, “Ay indi, indi mabudlay. Samtang nagalakat kami, gina-istoryahan namon kon daw ano nga milagro nga pareho namon nga nakita ang matuod nga ebanghelyo ni Jesucristo. Amo yadto ang pinakamalipayon nga tion nga akon madumduman.”

Sugod sadto, ang Ginuo naggamit sang nagkalain-lain nga paagi agud buligan ang Iya mga Santos nga mag-atipan sa kada isa. Sa karon ginbugayan Niya kita sang ginpabakod kag gin-isa nga mga korum sa ward kag stake—mga korum nga nagapakig-angot sa tanan nga organisasyon sa ward.

Ang mga ward sa tagsa ka lugar, mga guban, kag ginpabakod nga mga korum tanan nagkinahanglan sang duha ka butang agud magmadinalag-on sa tuyo sang Ginuo nga atipanon sang Iya mga Santos ang kada isa pareho sang Iya pag-atipan sa ila. Nagamadinalag-on sila kon nabatyagan sang mga Santos ang paghigugma ni Cristo para sa kada isa labaw sangsa ila kaugalingon nga interes. Ang balaan nga kasulatan nagatawag sini nga “putli nga pagmahal … ang putli nga gugma ni Cristo” (Moroni 7:47). Kag nagamadinalag-on sila kon ang Balaan nga Espiritu nagagiya sa manug-atipan nga mahibal-an kon ano ang nahibal-an sang Ginuo nga pinakamaayo para sa tawo nga Iya gusto buligan.

Sa madamo nga beses sang nagliligad nga semana, ang mga miyembro sang Simbahan nag-akto sa akon atubang nga daw nahibaluan na nila kon ano ang himuon sang Ginuo, pareho sang gin-anunsyo diri karon. Hatagan ko kamo sang duha ka halimbawa. Isa, sa simple nga pamulong-pulong sa pang-sakramento nga miting sang isa ka 14-anyos nga titser sa Aaronic Priesthood nga nakahangop kon ano ang malab-ot sang mga nagakapot sa priesthood sa ila pag-alagad sa Ginuo. Ikaduha, isa ka nagakapot sang Melchizedek Priesthood nga, upod ang gugma ni Cristo, ginpadasig sa pag-alagad sang isa ka pamilya.

Una, ipaambit ko sa inyo ang mga pulong sang pamatan-on nga nagahambal sa pang-sakramento nga miting sa ward. Yara ako didto. Panumduma kon daw ano kamo sang 14 anyos pa lang kamo kag pamatii sia nga nagahambal sang sobra pa sa pwede mahibal-an sang isa ka bata.

“Nanamian gid ako nga mangin miyembro sang teachers quorum sa amon ward halin sang mag-14 ako sa nagligad nga tuig. Ang teacher may mga responsibilidad gihapon sang isa ka deacon kag may dugang pa nga mga bag-o.

“Bangod kay ang pila sa aton mga teacher, ang iban man sa pila ka adlaw, kag tanan sa Simbahan ginabugayan sang priesthood, importante nga aton tanan mahibal-an ang mga katungdanan sang isa ka teacher.

“Una sa tanan, ang Doktrina kag mga Kasugtanan 20:53 nagasiling, ‘Katungdanan sang isa ka teacher ang bantayan ang simbahan pirme, kag mag-upod kag magpabakod sa ila.’

“Madason, ang Doktrina kag mga Kasugtanan 20:54–55 nagasiling:

“Kag pat-uron ninyo nga wala sing kalautan sa simbahan, ukon kaakig sa isa kag isa, ukon pagbinutig, panglibak, ukon malaut nga paghinambalanay;

“Kag pat-uron ninyo nga ang mga miyembro sang simbahan masami nga nagatililipon, kag pat-uron ninyo nga ang tanan nga mga katapo nagatuman sang ila mga katungdanan.”

Ang pamatan-on nagpadayon:

“Ang Ginuo nagasiling sa aton nga may responsibilidad kita indi lamang sa pag-atipan sang Simbahan kundi pati man sa mga tawo sa sulod sang Simbahan sa paagi nga himuon ni Cristo tungod Iya ini Simbahan. Kon ginatinguhaan naton nga tumanon ang mga kasuguan, mangin maayo sa kada isa, mangin matuod, mangin maayo nga mga abyan, kag magkalipay sa pag-ilinupod, aton maangkon ang Espiritu kaupod naton kag mahibaluan kon ano ang gusto sang Amay nga Langitnon nga aton himuon. Kon indi, indi naton matuman ang aton katungdanan.”

Nagpadayon sia sa pagsiling:

“Kon ginapili sang isa ka teacher ang magpakita sang husto nga halimbawa paagi sa pagka maayo nga home teacher, pagtamyaw sang mga miyembro sa simbahan, paghanda sang sakramento, pagbulig sa balay, kag pagka makigdaeton, ginapili niya nga tahuron ang iya priesthood kag tungdan ang iya calling.

“Ang mangin maayo nga teacher indi lamang ang pagkaresponsable kon yara kita sa simbahan ukon sa mga kahiwatan sang Simbahan. Si Apostoles Pablo nagtudlo, ‘Magmangin huwaran ka sa mga nagatuo, sa pulong, sa paggawi, sa gugma, [sa espiritu], sa pagtuo, sa kaputli’ (1 Timoteo 4:12).

Dayon ang pamatan-on nagsiling:

“Bisan sa diin kita ukon ano man ang aton ginahimo, sarang kita mangin maayo nga halimbawa sang pagkamatarong sa tanan nga tion kag sa tanan nga lugar.”

“Ako kag si tatay naga-home teach sa pamilya Brown.¹ Kada magkadto kami didto, nasadyahan ako mag-istorya kag magpangilala sa ila. Isa sa nanamian ko gid sa pamilya Brown amo nga kada kadto namon didto, handa sila pirme nga mamati kag may manami sila pirme nga istorya.

”Kon kilala naton ang mga tawo sa ward tungod sa home teaching, mas mangin mahapos himuon ang madason nga katungdanan sang isa ka teacher, kag amo ina ang pagtamyaw sang mga miyembro sa simbahan. Ang pagbulig sa mga tawo nga mapahamtang kag nalakip sa simbahan nagabulig sa tanan nga miyembro sa ward nga makabatyag sang pagpalangga kag kahanda sa pag-ambit sang sakramento.

“Pagkatapos tamyaw sang mga miyembro nga nagsimba, ang mga teacher nagabulig kada Dominggo paagi sa paghanda sang sakramento. Nasadyahan gid ko magpasa kag maghanda sang sakramento sa sini nga ward tungod ang tanan matinahuron. Mabatyagan ko pirme ang Espiritu kon maghanda ako kag magpaambit sang sakramento. Isa ka matuod nga bugay sa akon nga sarang ko ini himuon kada Dominggo.

“Ang pag-alagad pareho sang pagpanagtag sang sakramento isa ka butang nga makita sang tawo kag ginapasalamatan kami sa paghimo sini, pero ang pag-alagad nga pareho sang paghanda sang sakramento ginahimo nga wala sang may makatalupangod. Indi importante kon makita kami sang tawo nga nagaalagad; ang importante amo nga nakahibalo ang Ginuo nga nag-alagad kami sa Iya.

“Bilang mga teacher, dapat gid naton pirme tinguhaan nga pabakuron ang Simbahan, ang aton mga abyan, ang aton pamilya paagi sa pagtuman sang aton katungdanan sa priesthood. Indi ini pirme mahapos, pero ang Ginuo wala nagahatag sang kasuguan sa aton ‘luwas nga magahanda sia sang paagi para sa [aton agud] mahimo ang butang nga iya ginasugo’ (1 Nefi 3:7).”

Sa paghingapos sadtong pamatan-on, padayon ako nga nagdayaw sa iya kahamtong kag kaalam. Naghingapos sia sa pagsiling, “Nakahibalo ako nga mangin mas maayo pa gid kita kon pilion naton nga sundon si [Jesucristo].”

Isa pa gid ka istorya sang pag-alagad sa priesthod ginsugid isa ka bulan ang nagligad sa isa ka pang-sakramento nga miting. Sa liwat, yara ako didto. Sa sini nga hugada, ining madugay na nga nagakapot sang priesthood wala makahibalo samtang nagahambal sia nga ginalaragway niya mismo ang luyag sang Ginuo nga matabo upod ang ginpabakod nga mga korum sang priesthood. Yari ang punto sang iya istorya:

Sia kag ang isa ka kaupod sa home teaching gintokahan nga mag-alagad sa pito ka pamilya. Halos tanan sa ila indi gusto bisitahan. Sang ang mga home teacher nagkadto sa ila mga apartment, wala nila ginabuksan ang pwertahan. Kon magtawag sila sa telepono, wala sang may nagasabat. Kon magbilin sila sang mensahe, wala sang may nagabalos. Ining mas gulang nga kaupod sang ulihi nagdesisyon nga magpangalagad paagi sa pagsulat. Nagsugod sia sa paggamit sang masiri nga dalag nga sobre nga nagalaum nga makabaton sang sabat.

Isa sa pito ka pamilya amo ang indi-gawa aktibo nga solo lawas nga sister nga nagsalhin halin sa Europa. May duha sia ka magagmay nga kabataan.

Pagligad sang madamo nga pagtinguha nga makontak sia, nakabaton sia sang isa ka text. Direkta niya sia nga ginhambalan nga tama sa iya kasako agud magbaton sang mga home teacher. Duha ang iya trabaho kag yara man sia sa militar. Ang mayor niya nga trabaho amo ang pagka-pulis, kag handum niya nga mangin isa ka detektib kag dayon magbalik sa iya pungsod nga natawhan kag didto magpadayon obra.

Wala gid makabisita ang iya home teacher sa iya balay. Gina-textan niya sia sing panalagsa. Kada bulan nagapadala sia sing sulat, nga may upod nga mga kard para sa tagsa ka bata.

Wala sia sing nabaton nga sabat. Pero kilala niya kon sin-o ang iya mga home teacher, paano sila kontakon, kag nga magapadayon sila sa sining pag-alagad sa priesthood.

Dayon isa ka adlaw nakabaton sia sa nagasako nga text halin sa iya. Nagakinahanglan sia sang gilayon nga bulig. Indi niya kilala kon sin-o ang bishop, pero kilala niya ang iya mga home teacher.

Pila na lang ka adlaw, kinahanglan niya maglakat para sa isa ka bulan nga paghanas sa militar. Indi niya pwede updon ang iya kabataan. Ang iya iloy, nga amo tani ang magbantay sa iya nga anak, bag-o lang nagbiyahe pa-Europa agud atipanon ang iya bana, nga may emerhensya medikal.

Ining indi-gawa aktibo nga sister may igo lang nga kwarta nga ibakal sang tiket pa-Europa para sa kinagot nga bata wala labot ang iya 12-anyos nga bata nga si Eric.² Namangkot sia sa iya home teacher kon may kilala sia nga mabuot nga pamilya nga LDS nga mag-inakop kay Eric sa sulod sang 30 ka adlaw!

Nagbalos sa text ang home teacher nga tinguhaan niya. Iya dayon gintawgan ang iya mga lider sa priesthood. Ang bishop, nga amo ang nagapangulo nga high priest, nagtugot nga nga magpalapit sia sa mga miyembro sang konseho sa ward, lakip na sa pangulo sang Relief Society.

Madasig nga nakakita ang pangulo sang Relief Society sang apat ka maayo nga pamilya nga LDS, nga may kabataan nga ka-edad ni Eric, nga mag-inakop kay Eric sa ila puluy-an sing tig-isa ka semana. Sa sulod sang isa ka bulan, ining mga pamilya nagpakaon kay Eric, nagtigana sang kwarto para sa iya sa ila gutok na nga daan nga mga apartment ukon balay, gin-upod sia ila mga kahiwatan sa tig-ilinit, gindala sia sa simbahan, kag ginlakip sia sa ila mga family home evening, kag madamo pa.

Pila sa mga pamilya may nga bata nga lalaki nga ka-edad ni Eric, kag ginlakip nila sia sa ila mga miting kag kahiwatan sa korum sang deacon. Sa sulod sining 30-ka adlaw, nagsimba si Eric tagsa ka Dominggo sa una nga tion sang iya kabuhi.

Pagbalik sang iya iloy halin sa paghanas, nagpadayon si Eric sa pagsimba, masami kaupod ang isa sining apat ka nagboluntaryo nga LDS nga pamilya ukon iban pa nga nagpakig-abyan sa iya, lakip na ang mga visiting teacher sng iya iloy. Sang ulihi, gin-ordinan sia nga deacon kag nagsugod sa pagpanagtag sang sakramento sing masunson.

Karon tan-awon naton ang bwas-damlag ni Eric. Indi kita matingala kon mangin isa sia ka lider sang Simbahan sa dutang natawhan sang iya iloy kon magbalik didto ang ila pamilya—tanan bangod sa mga Santos nga nagtrabaho sing ululupod nga nagahiliusa, sa idalom sang direksyon sang bishop, nga mag-alagad halin sa gugma sa isigkatawo sa ila tagipusuon kag upod ang gahum sang Balaan nga Espiritu.

Nakahibalo kita nga ang gugma sa isigkatawo importante para sa aton agud maluwas sa ginharian sang Dios. Si Moroni nagsulat, “Luwas nga kamo may putli nga pagmahal indi gid kamo nga mas-a maluwas sa ginharian sang Dios” (Moroni 10:21; tan-awa man sa Eter 12:34).

Nahibal-an man naton nga ang gugma sa isigkatawo isa ka regalo nga ginhatag sa aton pagkatapos sang tanan nga aton mahimo. Kinahanglan kita nga “magpangamuyo sa Amay sa bug-os nga ikasarang sang tagipusuon, agud mapuno kamo sa sining gugma, nga iya ginhatag sa tanan nga matuod nga mga sumolunod sang iya Anak nga si Jesucristo” (Moroni 7:48).

Sa pamatyag ko labi nga mabaton naton ang Espiritu sang Dios kon nagatutok kita sa pag-alagad sa iban. Amo ina kon ngaa may katungdanan kita sa priesthood nga mag-alagad para sa Manluluwas. Kon yara kita sa pag-alagad sa iban, wala naton pirme ginapamensar ang aton kaugalingon, kag ang Balaan nga Espiritu makapalapit gilayon sa aton kag magbulig sa aton sa aton handum sa kabuhi nga maangkon ang regalo sang gugma sa isigkatawo.

Nagasaksi ako sa inyo nga ang Ginuo nagsugod na sang dako nga tikang pasulong sa Iya plano agud kita mangin mas inspirado kag maluluy-on sa aton pagpangalagad sa priesthood. Nagapasalamat ako sa Iya gugma, nga maalwan Niya nga ginahatag sa aton. Nagapamatuod gid ako sa ngalan ni Jesucristo, amen.