Naparegta a Panagserbi
Kasayaatan a maawattayo ti Espiritu ti Dios no ipamaysatayo ti agserbi iti dadduma. Dayta ti gapu no apay adda pagrebbengantayo iti priesthood nga agserbi ti Mangisalakan.
Ay-ayatek a kakabsatko, agyamanak a makasaokayo iti daytoy napnuan a pakasaritaan a sapasap a komperensia. Nakanunongantayon ni President Russell M. Nelson kas maika-17 a Presidente ti Ti Simbaan ni Jesucristo dagiti Santo iti Ud-udina nga Aldaw. Iti pannakaparaburko a nakipagtrabaho kenkuana iti inaldaw, nariknak ti pammatalged ti Espiritu nga inawagan ti Dios ni President Nelson a mangidaulo iti pudno a Simbaan ti Apo.
Paneknekak pay nga inawagan ti Apo da Elder Gerrit W. Gong ken Elder Ulisses Soares tapno agserbi a kas miembro ti Korum ti Sangapulo-ket-dua nga Apostol. Ay-ayatek ken kanunongak ida. Paraburandanto, babaen ti panagserbida, ti biag iti sangalubongan ken iti intero a henerasion.
Napnuan pakasaritaan daytoy a komperensia iti maysa pay a gapu. Impakaammo ni President Nelson ti naparegta nga addang a mangituloy iti nabukel a plano ti Apo iti Simbaanna. Iraman dayta a plano ti baro a structure para kadagiti priesthood quorum kadagiti ward ken stake tapno nasaysayaat a matungpaltayo dagiti pagrebbengantayo iti priesthood. Mainaig dagita a pagrebbengan iti panangaywan ti priesthood kadagiti annak ti Amatayo.
Ti plano ti Apo kadagiti Santona a mangted iti naayat a panagaywan ket naipatungpal iti adu a wagas iti unos dagiti tawen. Kadagiti nagkauna nga aldaw iti Nauvoo, kasapulan ni Propeta Joseph Smith ti nabukel a wagas a pangaywan ti adu a napanglaw a convert nga umay iti siudad. Maibilang ida ti uppat kadagiti appok iti tumeng—dagiti Eyring, Bennion, Romney, ken Smith. Binukel ti Propeta ti pangaywan kadagita a Santo babaen ti heograpia. Iti Illinois naawagan iti “ward” dagita a dibision ti siudad.
Idi nagdaliasat dagiti Santo kadagiti tanap, nabukel ti panaggiinnaywanda iti “bunggoy.” Maysa kadagiti lelongko iti tumeng ti nagsubli manipud iti misionna iti makuna itan nga Oklahoma idi masabatna ti bunggoy iti dalan. Nakapuy unay gapu iti sakit ta nagiddada iti kaduana iti bassit a karison.
Nangibaon ti lider ti bunggoy iti dua a balasitang a tumulong iti asino man a mabalin nga adda iti dayta a karison. Maysa kadakuada, kabsat a balasitang a na-convert iti Switzerland, ti kimmita iti maysa kadagiti misionario ket naasian. Insalakan isuna dayta a bunggoy dagiti Santo. Umdas a nakaungar tapno pagnaenna ti natda a dalan iti Salt Lake Valley a kaabay ti balasitang a nangispal kenkuana. Nagginnayat ket nagkallaysada. Nagbalin a lelongko iti tumeng ni Henry Eyring, ken lelangko iti tumeng ni Maria Bommeli Eyring.
Kalpasan dagiti tawen, idi masao dagiti tao ti rigat ti panagdaliasat iti kontinente, kinunana, “Saan, saan a narigat. Bayat ti pannagnami, napagsaritaanmi maipapan ti milagro a naammuanmi ti pudno nga ebanghelio ni Jesucristo. Daytoy ti karagsakan a panawen a malagipko.”
Manipud idin, inusar ti Apo ti agduduma a wagas a pangtulong kadagiti Santona nga aggiinnaywan. Ita pinaraburannatayo iti napapigsa ken nagkaykaysa a korum iti lebel ti ward ken stake—dagiti korum nga agtrabaho iti pannakitunos iti amin nga organisasion iti ward.
Naidawat amin iti municipal ward, bunggoy, ken napapigsa a korum ti dua a banag tapno agballigi iti panggep ti Apo a paggiinnaywanen dagiti Santona iti wagas a panangaywanna kadakuada. Agballigida no marikna dagiti Santo ti ayat ni Cristo iti tunggal maysa nga ad-adda ngem iti bukodda. Awagan ti nasantuan a kasuratan daytoy iti “asi … ti natarnaw nga ayat ti Cristo” (Moroni 7:47). Ket agballigida no tarabayen ti Espiritu Santo ti agay-aywan a mangammo iti ammo ti Apo a kasayaatan para iti tao a tulonganna.
Iti adu a gundaway iti kallabes a lawlawas, nagtignay dagiti miembro ti Simbaan iti imatangko a kasla inurayda no ania ti aramiden ti Apo a kas iti naipakaammo ditoy ita nga aldaw. Mangtedak man iti dua a pagarigan. Maysa, simple a mensahe iti miting ti sakrament ti 14 tawenna a teacher iti Aaronic Priesthood a makaawat no ania ti maipatungpal dagiti priesthood holder iti serbisio iti Apo. Maikadua, ti Melchizedek Priesthood holder a, babaen ti ayat ni Cristo, ket naparegta nga agserbi iti pamilia.
Umuna, mangtedak man iti balikas ti barito nga agsasao iti miting ti sakrament iti ward. Addaak sadiay. Lagipenyo no aniakayo idi agtawenkayo iti 14 ket denggenyo nga agsao iti ad-adu ngem iti namnamaen a maammuan ti maysa a barito:
“Nagustuak ti panagmiembrok ti teachers quorum iti wardmi manipud pay idi agtawenak 14 itay naglabas a tawen.Addaan ti teacher iti amin a pagrebbengan ti deacon ken nayon a dadduma pay.
“Gapu ta sumagmamano ti teacher kadatayo, agbalinto ti dadduma no madanonan, ken paraburan amin ti priesthood iti Simbaan, isu a nasken nga ammuentayo amin ti adu pay maipapan ti pagrebbengan ti teacher.
“Umuna, kuna ti Doktrina ken Katulagan 20:53 , ‘Pagrebbengan ti maestro ti mangkitkita iti simbaan a kanayon, ken makipulapol ken mangpapigsa kadakuada.’
“Sumaruno, kuna ti Doktrina ken Katulagan 20:54–55 :
“‘Ken kitaenna nga awan ti basol iti simbaan, wenno kinasukir iti tunggal maysa, wenno panagulbod, panagsasao iti liklikudan, wenno dakes a panagsasao;
“‘Ken kitaenna a masansan ti panagmimiting ti simbaan, ken kasta met a kitaenna nga aramiden amin dagiti kameng ti pagrebbenganda.’”
Intuloy ti barito:
“Ibagbaga ti Apo a pagrebbengantayo di laeng mangaywan iti Simbaan ngem aywanantayo pay dagiti tao iti uneg ti Simbaan iti wagas a kayat ni Cristo gapu ta Simbaanna daytoy. No tungpalentayo dagiti bilin, agbalin a naasi, napudno, naimbag a gayyem, ken naragsak iti panaglalangen, ngarud kabaelantayto a mangikut iti Espirituna ken maammuan ti kayat nga ipaaramid kadatayo ti Nailangitan nga Ama. No ditay’ aramiden, ditayo maipatungpal ti callingtayo.”
Intuloyna nga insao:
“No pilien ti teacher nga ipakita ti umno a pagwadan babaen ti panagbalin a nasayaat a home teacher, kumablaaw iti miembro iti simbaan, mangisagana iti sakrament, tumulong iti balay, ken mamagkappia, dayawenna ti priesthoodna ken ipatungpal ti callingna.
“Ti panagbalin a nasayaat a teacher di laeng kaipapanan ti panagbalin a responsable no addatayo iti simbaan wenno iti aktibidad ti Simbaan. Insuro ni Apostol Pablo, ‘Sika koma ti ulidan dagiti mamati, iti sao, iti panagbiag, iti ayat, iti pammati, iti kinadalus’ (1 Timoteo 4:12).”
Kalpasanna, kinuna ti barito:
“Sadino man ti yantayo wenno ania ti ar-aramidentayo, makapagbalintayo a pagwadan ti kinalinteg iti amin nga oras ken liti amin a ugar.”
“Mangisurokami ken tatang iti balay dagiti Brown.1 Tunggal mapankami idiay, naragsakak a sumarungkar ken makaam-ammo ida. Maysa a banag a magustuak kadagiti Brown ket no mapankam idiay, naayatda a dumngeg ken adda latta estoria nga isaritada.
“No am-ammotayo a nasayaat dagiti tao iti ward gapu iti home teaching, nalaklaka nga aramiden ti sumaruno a pagrebbengan ti teacher, ket dayta ti mangkablaaw kadagiti miembro iti simbaan. Ti panangtulong iti tao a makarikna a maawat ken maibilang iti simbaan ket makatulong iti amin a miembro ti ward a makarikna a maayat ken nakasagana nga umawat iti sakrament.
“Kalpasan ti panangkablaaw kadagiti miembro nga umay iti simbaan, tumulong dagiti teacher iti Domingo a mangisagana iti sakrament. Pudno a magustuak ti agipasa ken agisagana iti sakrament ditoy a ward gapu ta managraem unay ti amin. Kanayon a mariknak ti Espiritu no agisagana ken agipasaak iti sakrament. Pudno a bendision kaniak ta maaramidko daytoy tunggal Domingo.
“Ti serbisio kas panagipasa iti sakrament ket banag a makita ti tao ket pagyamanandatayo iti panangaramid iti daytoy, ngem ti sabali a serbiso kas pangisagana iti sakrament ket gagangay a maaramid nga awan makakita. Saan a napateg no makita dagiti tao nga agserserbitayo; ti napateg ket ammo ti Dios a nagserbitayo Kenkuana.
“Kas teacher, kanayon koma a papigsaentayo ti Simbaan, gagayyem, ken pamiliatayo babaen ti panangipatungpaltayo kadagiti pagrebbengantayo iti priesthood. Saan a kanayon a nalaka daytoy, ngem dinatayo ikkan ti Apo iti bilin ‘malaksid no isaganananto iti dalan [kadatayo a] mangipatungpal iti banag nga ibilinna’ (1 Nephi 3:7).”
Idi igibus dayta a barito, nasdaawak iti kinamanakem ken siribna. Ginupgopna iti panagkunana, “Ammok nga agbalintayo a nasaysayaat no pilientayo a suroten ni [Jesucristo].”
Maysa pay nga estoria iti serbisio ti priesthood ti naisarita makabulan ti naglabas iti miting ti sakrament iti ward. Manen, addaak sadiay. Iti daytoy a kaso, di ammo bayat panagsao daytoy aduan padas a priesthood holder nga iladladawanna mismo ti tarigagay ti Apo a mapasamak babaen dagiti napapigsa a korum iti priesthood. Daytoy ti kangrunaan a detalye ti salaysayna:
Nadutokanda iti kaduana iti home teaching nga agserbi iti pito a pamilia. Dumami amin ida ti saan a kayat ti pabisita. Idi mapan dagiti home teacher iti balayda, agkedkedda a manglukat it ridaw. Idi tinawaganda iti telepono, awan ti simmungbat. Idi nangibatida iti mensahe, saan a nasungbatan. Kamaudianan inkeddeng daytoy a senior companion ti mangted iti surat. Inusarna pay dagiti narangrang nga amarilio a sobre a mangnamnama iti sungbat.
Maysa kadagiti pito a pamilia ti less-active single sister a naggapu iti Europa. Adda dua a babassit nga annakna.
Kalpasan ti adu a gandat a mangkontak kenkuana, immawat iti mensahe iti teks. Dagus nga impakaammona kenkuana a busy unay daytoy a makipagkita kadagiti home teacherna. Dua ti trabahona ket adda pay iti military.Police officer ti umuna a trabahona, ket goalna iti trabahona ti agbalin a detective ket kalpasanna agsublinto iti pagilianna ket ituloyna ti agtrabaho idiay.
Di pulos nabisita ti home teacher iti pagtaenganna. Masansan nga agteks kenkuana. Binulan a nangipatulod iti surat a naisurat iti ima, ken holiday card para iti tunggal ubing.
Awan naawatna a sungbat. Ngem ammona no asino dagiti home teacherna, kasano a kontaken ida, ken agpilitda no kua iti serbisioda iti priesthood.
Maysa nga aldaw immawat iti urgent a teks kenkuana. Kasapulanna unay ti tulong. Dina ammo no asino ti bishop, ngem ammona dagiti home teacherna.
Iti sumagmamano nga aldaw, nasken a pumanaw iti estado para iti makabulan a military training servicena. Dina mabalin nga ikuyog dagiti annakna. Ti inana, a mangaywan koma kadagiti annakna, kapampanawna a napan Europa a mangaywan iti asawana, a naaddaan iti medical emergency.
Umdas ti kuarta daytoy less-active single sister a panggatang iti tiket a mapan Europa iti inaudi nga anakna ngem di umanay iti anakna a 12 ti tawenna, ni Eric.2 Kiniddawna iti home teacherna no maisapulanna iti pamilia LDS a mangala ken Eric iti balayda iti 30 nga aldaw!
Insungbat ti home teacher iti teks nga aramidenna ti kabaelanna. Kinontakna dagiti liderna iti priesthood. Ti bishop, nga isu ti presiding high priest, nangted kenkuana iti approval nga umasideg kadagiti miembro ti ward council, agraman ti Relief Society president.
Dagus a nakasapul ti Relief Society president iti uppat a naimbag a pamilia LDS, adda annakda a kaedad ni Eric, a mangala kenkuana iti pagtaenganda iti makalawas iti maminsan. Iti sumaruno a bulan, pinakan dagitoy a pamilia ni Eric, insarakanda iti siledna iti nailet wenno bassit a balayda, inkuyogda kadagiti naplanoda nga aktibidad ti pamilia iti kalgaw, inkuyogda iti simbaan, inramanda iti family home eveningda, ken dadduma pay.
Addaan dagiti pamilia iti barito a kaedad ni Eric, ket inramanda daytoy iti miting ti deacons quorum ken aktibidad. Bayat daytoy 30 nga aldaw, adda ni Eric iti simbaan tunggal Domingo iti umuna a gundaway.
Idi nagawid ni nanangna manipud iti trainingna, intuloy niEric ti nakimisa, a kakuyog ti maysa kadagitoy uppat a volunteer a pamilia LDS wenno dadduma a kinagayyemna, agraman ti visiting teachers ni nanangna. Idi agangay, naordenan a deacon ket nangrugi a nagipasa iti sakrament.
Ita, kitaentayo ti masakbayan ni Eric. Ditayto masdaaw no agbalinto a maysa a lider iti Simbaan iti pagilian ti inana no agawid ti pamilliana sadiay—gapu kadagiti Santo a nagtitinnulong a nagtrabaho iti panagkaykaysa, babaen ti direksion ti bishop, tapno agserbi iti ayat iti puspusoda ken addaan iti bileg ti Espiritu Santo.
Ammotayo a kasapulan ti asi tapno maisalakantayo iti pagarian ti Dios. Insurat ni Moroni, “Malaksid no adda asiyo, saankayto a maisalakan iti pagarian ti Dios” (Moroni 10:21; kitaen met iti Ether 12:34).
Ammotayo pay a ti asi ket sagut nga intedna kadatayo kalpasan ti amin a maaramidtayo. Nasken nga “agkararag[tayo] iti Ama iti amin a kabaelan ti pusoyo, tapno maaddaan[tayo] iti daytoy nga ayat, nga impaayna iti amin a napudno a pasurot ti Anakna, ni Jesucristo” (Moroni 7:48).
Para kaniak kasayaatan nga awatentayo ti Espiritu ti Dios no ipamaysatayo ti agserbi iti dadduma. Dayta ti gapu no apay adda pagrebbengantayo iti priesthood nga agserbi ti Mangisalakan. No makiramantayo iti serbisio iti dadduma, ditayo panunoten ti bagitayo, ken nakasagana nga umay kadatayo ti Nasantuan nga Espiritu ket tulongannatayo iti panagkalikagumtayo a maipaay ti sagut ti asi kadatayo.
Paneknekak kadakayo a rinugianen ti Apo ti dakkel nga addang a mangituloy iti planona nga agbalintayo nga ad-adda a naparegta ken managtulong iti panagserbitayo iti priesthood. Agyamanak iti ayatna, a nabuslon nga intedna kadatayo. Iti sagrado a nagan ni Jesucristo, amen.