2010–2019
Kamarain en Kalohk
Epreil 2018


Sawas Kamarain

Kitail kin alehdi mwahu Ngehn Sarawi ni ansou me kitail kin nantieng sewese mehteikan. Ihme karehda pwukoahn prihstud rehtail pwe kitail en kak papah Sounkomouro.

Riei ohloko, I ahneki ansou mwahu en koasoi ong kumwail nan kapokon lap kesempwal wet. Kitail utungadahr Presiden Russel M. Nelson en wia 17 en President en Mwomwohdiso en Sises Krais en Souleng en Imwin Rahn akan. Ni ahi aleier kapai en ieiang Ih wia doadoahk wet nan ehu ehu rahn, I kehn utuht pen Ngehn Sarawime Presiden Nelson lukwer da sang rehn Kauno en kaweid an Kauno Mwomwohdiso mehlel wet.

Oh I pil kadehde me Kauno eker dahr Elder Gerrit W. Gong oh Elder Ulisses Soares en iang sawas oh wia tohn Wahnpoaron Ehk Riemen wet. I poakpoake oh utung irail da. Irail pahn, sang ni arailkalohk, pahn kapaiada mour wasa teikan nan sampah.

Kapokon wet wia mehn ketemen kesempwal iou ong pil ehu kahrepe tohrohr. Presiden Nelson pakairkidahr kamarain en keirda sang pahn an Kauno kaosondi unsek ong Sapwlime Mwomwohdiso.Koasondi wet audaudki kamwohmwda kapw iou ong pwihn en prihstuhd nanward kan oh stake kan, pwe kitail en kak kamwahuihla atail pwukoahn prihstuhd kan. Pwukoahko koaros pid en atail prihsduhd eh kin apwalih seri en Sahm kan.

Koasoandi me Kauno ketkihong Sapwelime Souleng kan ni arail pahn kin apwalih meteikan ni limpoak, pweidahr ni soangen mwohmw kei sang mahs leledo ahnsou wet. Mahs nan mwehin tepin Nauvoo, Soukohp Joseph Smith anahne koasoanehdi wiepen apwalih kidalap en aramas semwehmwe me kahpw nan Mwomwohdiso me wia kohkohlongala nan kahnimwo. En ahi nohno pahpa ara nohno pahpa kahlap ko pil iang irail--irail iei peneinei en Eyring, Bennion, Romney oh Smith. Soukohpo koasoanehdi epwelpen Souleng ko nan ehu ehu sahpw. Nan Illinois soangen pwalpeseng en sapw nan kahnimwo kadahniki “ward.”

Ni en Souleng pwukat ahr mwekid lahng ehr nan wasa teikan, arail kesempwaliki emen emen nan pwungarail paohsoandasang arail kin minimin pene. Emen ahi pahpa kahlap ako sang en ahi pahpao ah pali, apw pwurasang nan ah misin me iei Oklahoma ni ah tuwongedi kapar en pwihn wet pohn ahlo. E luwetkihdi soumwahu iou oh Ih oh iengehu wenkihdi pohn mehn dakadak kurumahu.

Kaun en kaparo kadarala peinakapw riemen en sewesehda ihs me mihmi pohn kuruma o. Emen ira, peinakapw me apwte iangala tohn sarawiet sang Switzerland, kilangete emen misineri ko ihpoakepoakehda. E pitila pwehki sawas en kapar en pwihn en Souleng wet. E ekis kehlail da oh kakala aluhkila lel pohn pwel en Salt Lake, ni ah ieiang ienge peinakapw me sewesedahu. Ira eri poakpoakehla emen emen oh eri pwopwoudla. Mwahnakapw menet me wia an ahi pahpahu pahpa kahlap, me iei Henry Eyring, oh peinakapw et, iei an ahi pahpahu nohno kahlap, Maria Bommeli Eyring.

Pahr kei mwuri, ni ansou me aramas kin kosoia apwal laud ni arail kotehla sahow laud ehu e kin sapengki, “Oh soh, e sohte apwal. Ni aht alu, se kin koasoia ni aht alialu kohwei uwen koapwuriamwei en ara koaros diarada rongamwahu mehlel en Sises Krais wet. E wia ansou me keieu kaperen ong ie.”

Mwuri mwo kohdo, Kauno ketikihdohr songen kalahngan kei me kin sewesehda Sapwelime Souleng kan ni arail pahn kin kesemwpwaliki emen emen nan pwungarail. Met, E ketin kapai kin kiht sang ni kehlail oh minimin en pwihn en utuht koaros en ward de stake kan—pwihn en utuht me kin ehupene oh doadoahk ong ward koaros.

Ward tikitik kan, ehu kapar en pwihn, oh pwihnen utuht roson akananahnehte soang riau pwe irail en kin pweida wia kupwuren Kauno, sang ni Ah kupwurki Souleng kan en kin apwalih emen emen nan pwungarail duwehte E ketin kesempwalikin irail.Irail kin pweida ni ansou me Souleng kan kin kehn limpoak en Krais nan pwungarail sang dahme re pein mwahuki en wiawi.Nan pwuhk sarawikin mahsani “limpoak mehlel en Krais” (Moroni 7:47). Oh irail kin pweikihda ni ansou me Ngehn Sarawio kin kaweid kiong irail soun sawas akan en kak ese dahme Kauno kupwurki me pahn mwahu ong aramas me re songen sewesehda kan.

Pak tohto nan wihk apwtehn nekier ko, tohn Mwomwohdisohtkasalehdame re kin kak eseier dahme Kauno pahn ketin wia. Iet songen karasaras riau. Keiou, ehu padahk nan ansoun kamadipw sarawi sang mwahnakapw sounpar eisek pahiou men (14), me wia sounpadahk men nan prihstuhd en aron men me ese dahme irail koaros me kolokol prihstuhd akan pahn kak pweikihda ni arail pahn kin wia arail pwukoa me iei sang rehn Kauno. Keriau, emen me kolokol prihstud en Melkisedik me, sang ni limpoak en Krais, ale kamarain en sewese peneinei iou.

Keiou, I pahn kosoia weikosoi kei me mwahnakapw men me padpadahk nan ward iou ansoun kamadipw sarawi me I towehda. Song medewe kowe ni ahmw sounpar 14 oh kowe rong ah pahn nda kosoi me sohte mwahnakapw pwulepwul men kak kosoia:

“I inenen perenki wia emen pwihn en soupadahk en nan atail ward et, sang nan pahr teio ni ahi sounpar [eisek pahiou lahu] 14. Sounpadahk men ahneki te pwukoa me dihken men ahneki oh pil kapatahieng me kapw teikan.

“Pwehki ekei kitail ah wia Sounpadahk kei, ekei pahn pil wiala ehu rahn, oh koaros nan Mwomwohdisohtkapai dahr sang prihstud kan, eri e kesemwpwal ong kitail koaros en esehla pwukoa kan me sounpadahk ahneki.

“Keiou, Doctrine and Covenants 20:53 kosoia, an Sounpadahk men pwukoa iei en apwalih mwomwohdiso ansou kaoros, oh ieiang oh kakehlaka irail.

“Mwuri, Doctrine and Covenants 20:54–55 kosoia:

“Oh tehk mwahu pwe e de mie uhpene nan mwomwohdiso, e de mie kahpwal nan pwungerail, de likamw, lipahned, de lokaia suwed;

“Oh tehk pwe mwomwohdiso en kin patpene ansou koaros, oh pil tehk towe kan en kin wia arail pwukoa.”

Mwahnakapwo apw doula:

“Kauno kaskasalehiongkitail me atail pwukoa kaidehn te apwalihMwomwohdiso ahpw en pil apwalihtohn Mwomwohdisoht duwehte dahme Krais pahn ketin wia, pwe iei Sapwelime Mwomwohdiso met. Ma kitail songosong en kapwaiada kosoned akan, kitail en kin kadek ong emen emen, ahneki mehlel, wia kompoakepahn aramas men me mwahu, oh kin perenki mihmi pene, eri kitailpahn kak ale Ngehn Sarawi rehtail oh ese dahme Samatail Nanleng kupwurki kitail en wia. Ma kitail sohte pahn, eri kitail sohte pahn kak wia atail pwukoa.”

E pil doula kosoia:

“Ni Sounpadahk emen ah piladahr en wia karasaras mwahu sang ni ah kin wia sounpadahk en peneinei men, kasamwoh tohn mwomwohdiso ni ihmw sarawi, kaunopada mehn kamadipw sarawi, sawas nihmwo, oh wia soun kameleilei men, e piladahr en wauneki ah prihstud oh kapwaiadahr ah pwukoa.

“Soundahk mwahu men kaidehn te sang ni ah kin insenoh ansou kitail mihmi nan ihmw sarawi de ansoun kemwekid en sarawi. Wahnpaoron Paul padahngki, ‘ahpw ke en wia mehn kahlemengih ehu ong irail kan me pwoson, ni omw koasoi, ni omw tiahk, ni omw limpoak, ni omw pwoson oh mwakelekel’ (1 Timothy 4:12).”

Eri mwanakapw-o nda:

“Sohte katepe wasa kitail mih de dahme kitail wia, kitail kak wia karasaras mwahu me mehlel ansou koaros oh wasa koaros.

“Ngehi pahpa kin sounpadahk en peneinei rehn peneinei en Brown ko.1 Ansou koaros se kohla mwo, I kin perenki mwemweitla oh ese irail la. Ehu me I kin keiou perenki rehn peneineio ansou koaros se kohla mwo, irail kin men rong oh pil kin miete mehkot mwahu me re kin iang kosoia.

“Ni atail kin esehla aramas mwahu pwehki sang ni atail kin wia sounpadahk en peneinei kei, e kin uhd kamengeilaatail pahn wia mepwukat, oh met iei kasamwoh tohn mwomwohdiso kan ni ihmw sarawi. Sewese aramas akan en eseme kitail perenki irail oh sewese tohn mwomwohdisohn ward kan en ahneki pepehm me mie me poakong irail oh kaunop en ale kamadipw sarawi.

“Mwurin kasamwo tohn mwomwohdiso me kin kodo iang sarawi, sounpadahk kan kin sawas rahn sarawi koaros oh kaunop kamadipw sarawi. I perenki iang nehk oh kaunop kamadipw sarwi nan ward et pwehki koaros udahn kin meleilei. I kin kehn Ngehn Sarawi ni ahi kin kaunopada oh nehkkamadipw Sarawi. E wia kapai laud ong ie ni ahi kin kak wia met rahn Sarawi koaros.

“Ekei ansoun sawas me duwehte nehne en kamadipw sarawi iei mehkot me aramas kilang oh kin kalahngan ki ongkiht aht kin kak wia, ahpw ekei ansoun sawas me duwehte kaunop kamadipw sarawi kin wiawi ansou me sohte me kin kilang. E sohte kesemwpwal ma aramas kilang kitail ni atail kin sawas seli; dahme kesemwpwal iei me Kauno mwahngi me kitail papah ier nek.

“Ni atail wia Sounpadahk, kitail anahne ansou koaros en kin kakehlakaMwomwohdisoht, iengetail kan, oh atail peneinei sang ni atail pahn kin kapwaiada atail pwukoahn prihstud akan. E sohte mengei, ahpw Kauno sohte ketkihdo kosonned rehtail, ahpw E ketin kaunop ong kitail ahlo, pwe kitail en kin kak kapwaiada Sapwelime kosonned akan (1 Nephi 3:7).”

Ni iwmwin an mwahnakapwo padahko, I doula oh pwuriamweikihla uwen koaiok oh marain me E ahneki. E keimwsekihla ni ah kosoia, “I ese me kitail pahn kak mwahula ma kitail pilada en idawehnla [Sises Krais].”

Ehu soaien papah sang prihsduhd wiawisounpwong ehu nekiero ni ansoun kamadipw sarawien ward iou. I iang towehda. Met wiawier ni ansou me prihstud men ah sohte kehn me dahme e kosoia ko kawehwehda dahme Kauno udahn kupwurki en wiawi pwe en kakehlaka irail pwihn en prihstuhd ko. Iet pisetikih duwen ah kosoia:

Ih oh ienge sounpadahn en peneinei o pwukoaki en pwarek peneinei [isuh] 7. Pali laud en irail sohte kin kasik aramas en pwarek irail. Ni ansou me sounpadahk en peneinei pwukat kin pwarek irail ni arail wasahn kouson ko, irail kin sohte ritingada arail wenihmwko. Ma irail kin delepwohn la, sohte me kin sapeng. Ma irail peki mehkoat, sohte me kin pwurehng likweri irail. Me mah nan pwungarahu uhd medewehda me ira pahn uhd ntinglahng irail. E kin ale enpelop me ongohng marain oh doadoahngki, kasik ira en ale pasapeng.

Ehu nan pwungen peneinei isuh wet, wia peinakapw men me kohsang Europe, sohte pwopwoudoh me sohte kalap sarawi. Nah seri tikitik riemen.

Mwurin sosong kei en kak alehdi peinkapw menet, e koledi pasapeng nan delepwohn sang peinakapwo. E padahkiong sounpadahko me udahn e kediropw oh sohte ah ansou ong irail sounpadahk en peneinei ko. Ah doadoahk riau oh pil kin iang sounpei ni asnouwohte. Ahpw udahn ah doadaohk e wia pwolihs men, oh e songosong en wiala pwolihs me kin pwukoaki pali en roprop, ih pwurala ni udahn ah wasahn kousoan-o ehu rahn, doula nan palein doadoahk ohte.

Sounpadahko sohte kak tuwong di ni ah wasahn kousoan o. E kin kalap nting lahng sang nan nah cell-o. Sounpwong koaros e nting kisinlikou lahng, kapatahiong kisinlikou en rahn kesemwpwal kan ong serihko.

Sohte pasapeng kin kohdo rehn ohlo. Ahpw peinakapwo ese ihs me pwukoaki en kin wia nah sounpadahk, ia mwomwen ah pahn kak ale ira di, oh ira pahn ngihtehte wia ara pwukoa en sawas en prihstud o.

Eri ehu rahno e alehdi nting sang rehn peinakapwo me inenen karwaru. E udahn anahne sawas ansou karwaru. E sehse ismewia pisop apw e ese ihs me nah sounpadahk.

Mwurin rahn kei, peinakapwo pahn anahne mwesel da sounpwong ehu pwehki kaskuhl en sounpei. E sohte kak wahda nah serihko. Ah nohno, me pahn sewese ki serihko, apwtehn pihrla Europe pwe en kak apwalih ah pwoud, me lelong soumwahu karwaru.

Peinakapw pwulepwul menet me sohte kin kalap iang sarawi et, kak pwain ticket tehiou pweinen me tikitik o apw sohte pweinen nah kisin pwutak sounpar 12 Eric.2E peki rehn nah Sounpadahko ma E kak sewese kilangada ehu kisin peneinei en LDS me kak ale Eric oh apwalih erein rahn 30!

Sounpadahk en peneinei-o ntinglahng me e pahn wia ah kak koaros en rapahkihda. Ih eri rapahki irail prihstud leader ko. Pisop kiong mweimwei en tuhkiong irail pwihn en ward kaunsel ko, me presiden en Pwihn en Sawas en Lih iang towe.

Presiden en Pwihn en Sawas en Lih mwadangete diar peneinei mwahu pahiou me wia LDS kei, me naineki pil seri me irail oh Eric sounpar ehute, me ale oh apwalih nan wihk ehu ong ehu ehu peneinei. Erein sounpwong ehu, peneinei pwuka kamwenge Eric, kieng ah wasahn wendi mendahte ah dir tohn imwarail ko, kemwekid en peneinei kaoros me koasondier mwowe, e pil iang towehda nan summer-o, wahdo sarawi, pil patehng irail sarawi en peneinei oh pil soang teikan.

Peneinei ko mie neirail pwutak kan oh Eric ehu dih, kieng en iang patehng irail nan arail mihting de kemwekid en pwihn en dihken kan. Erein rahn 30, ehidn Eric ah kin iang te sarawi rahn sarawi kaoros.

Mwurin ah nohnohu ah pwuredohr nimwarailo sang kaskuhlo, Eric doula ieiangete sarawi, ekei pak e iang ehu peneinei en LDS pahiou me apwalih-ko de irail me wiala koampoakepah, me iangahki nein ah nohnoh sounpadahko. Sohte pwand e kasarawi ong en wiala emen dihken oh tepda iang nehk kamadipw sarawi.

Eri, kitail song kilenglahng dahme pahn wiawi ehu rahn nan an Eric mour. Kitail pahn sohte pwuriamwei ma e wiala emen kaun en Sarawiet nan an ah nohnou wehi, ma ah peneinei pwurala wasao—Soang koaros pwehki irail Souleng kan me kin doadaohk pene oh ehupene pwe irail en kin papah sang kaweid pen Ngehn Sarawi oh pwehki limpoak mehlel sang nanarail mohngiong.

Kitail eseier me limpoak mehlel pahn sewese kitail en kak komourla na Wein Koht. Moroni ntingihdier, Ihte ma ke ahneki limpoak mehlel ke pahn kak iang komourla nan Sapwelimen Kauno kahnihmwo (tehk Moroni 10:21; Ether 12:34).

Kitail pil ese me limpoak mehlel kisakis iou me E ketin ketkidohr rehtail pwehki kitail en kak wia mehkoaros. Kitail anahne kapakap ong Samatail-o sang nan mohngiong unsek, pwe kitail en kak audaud kihda limpoak wet, me e ketin ketkihdohng kitailehr, ni atail wia soun idawehn sapwelime Iehros, Sises Krais (Moroni 7:48).

E sansal ong Ie, me kitail kin alehdi Ngehn Sarawi ma kitail kin papah mehteikan. Met iei kahrepen atail ahneki pwukoa en prihstudpwe kitail en kak papah Kauno. Ni atail kin pwukoaki papah mehteikan, kitail kin sohla medewe peinkitail, oh Ngehn Sarawi kin onop ong en pwarek kitail oh sewese kitail en wia atail pwukoahn doadoahk pwe kitail en ahneki limpoak mehlel wet rehtail.

I kadehdi kihwei ahi kadehde me Kauno tapiadahr kahk keiou ong Sapwelime koasondi ong kitail en marain kihla oh ahneki limpoak mehlel nan atail pwukoahn prihstud en sawas oh papah. i kaping ki Sapwelime limpoak, me E ketin ketkihdohng kitail ehr. Ni mwaren Sises Krais, amen.

Irehkan

  1. Ahd kan wekideklahr.

  2. Ahd kan wekideklahr.