Pasiuna nga Pakigpulong

Salamat, Brother Holmes, sa imong importante nga mensahe.

Minahal nga kaigsoonan, gimingaw kaayo kami ni Presidente Thomas S. Monson ug Elder Robert D. Hales. Apan kinahanglan kaming “mopadayon sa buhat sa Ginoo.”¹

Mapasalamaton ko sa matag lalaki kinsa naghupot sa balaan nga priesthood. Kamo ang paglaum sa atong Manunubos nga nagtinguha “nga ang matag tawo unta mamulong sa ngalan sa Dios nga Ginoo, gani ang Manluluwas sa kalibutan.”² Buot Niya nga ang tanan Niyang giorden nga mga anak nga lalaki magrepresentar Kaniya, mamulong alang Kaniya, molihok alang Kaniya, ug mopanalangin sa mga kinabuhi sa mga anak sa Dios sa tibuok kalibutan nga ang katuyoan mao “nga ang hugot nga pagtuo usab molambo sa [tibuok] yuta.”³

Ang pipila kaninyo nagserbisyo sa lugar nga ang Simbahan naestablisar sa daghan nang mga henerasyon. Ang uban nagserbisyo sa lugar nga ang Simbahan bag-ohay pa lang. Alang sa pipila, ang inyong mga ward dagko. Alang sa uban, ang inyong mga branch gagmay ug lagyo kaayo. Bisan pa man sa inyong indibidwal nga mga kahimtang, ang matag usa kaninyo sakop sa korum sa priesthood nga adunay balaan nga mandato sa pagkat-on ug pagtudlo, sa paghigugma ug pagserbisyo sa uban.

Karong gabii, kami mopahibalo og usa ka mahinungdanon nga kausaban sa atong mga korum sa Melchizedek Priesthood aron mas epektibo ang pagpatuman sa buhat sa Ginoo. Sa matag ward, ang mga high priest ug ang mga elder magtipon na karon isip usa ka korum sa mga elder. Kini nga kausaban makapalambo og dako sa kapasidad ug abilidad sa mga kalalakin-an kinsa naghupot sa priesthood sa pagserbisyo sa uban. Ang mga prospective elder [gilauman nga mahimong elder] maabi-abi ug ma-fellowship pinaagi niana nga korum. Sa matag stake, ang kapangulohan sa stake magpadayon sa pagdumala sa korum sa mga high priest sa stake. Apan ang malangkob niana nga korum magbase sa kasamtangang mga calling sa priesthood, nga ipasabut sa dili madugay.

Si Elder D. Todd Christofferson ug si Elder Ronald A. Rasband sa Korum sa Napulog Duha karon modugang og tudlo kanato mahitungod niining importanting mga kausaban.

Kining mga kausaban gipaubos sa pagtuon sulod sa daghang mga bulan. Among gibati ang dinaliang panginahanglan sa pagpalambo sa atong pamaagi sa pag-amuma sa atong mga miyembro ug pag-report sa atong mga inter-aksyon uban kanila. Sa pagpalambo niini, kinahanglan natong lig-unon ang mga korum sa priesthood aron mahatagan og dakong pagtagad ang pagpangalagad sa gugma ug suporta nga gusto sa Ginoo alang sa Iyang mga Santos.

Kini nga mga kausaban dinasig sa Ginoo. Samtang ato kining ipatuman, mas mahimo kitang epektibo kay sa kaniadto.

Nalambigit kita sa buhat sa Makagagahum nga Dios. Si Jesus mao ang Kristo! Kita Iyang mga mapaubsanong sulugoon! Ang Ginoo mopanalangin kaninyo, mga kaigsoonan, samtang kita nagkat-on ug nagbuhat sa atong katungdanan, ako nag-ampo sa pangalan ni Jesukristo, amen.