Taeka ni Kaukuki

Ko rabwa, te Tari Holmes, ibukin am rongorongo ae kakawaki.

Tariu aika tangiraki, ti rangin n ururingiia Beretitenti Thomas S. Monson ao Unimwaane Robert D. Hales. E ngae n anne “ti na wakinako ma ana mwakuri te Uea.”¹

I rangin ni kakaitau ibukiia mwaane aika uoman aikai ake a boutoka te tamnei ae raoiroi. Ngkami ana kantaninga ara Tia Kabooira are e tangiria, “bwa aomata nako a na taetae n aran te Atua ae te Uea, are te Tia Kamaiua te aonaaba.”² E tangiriia natina mwaane ni kabane bwa a na tei Ibukina, n taetae nako Ina, ni mwakuri Ibukina ao ni kakabwaiai maiuia natin te Atua n te aonaaba ni karokoa te toki bwa “e aonga naba te onimaki ni manga rikirake [ni kabane] te aonaaba.”³

Tabeman mai ibuakomi a beku n te mwakuri ao te wewete are e a tia ni kateia te Ekaretia inanon rooro. Tabeman a beku n te tabo are e rangin ni boou iai te Ekaretia. Ibukiia tabeman mai ibuakomi, ami uoote a bubura. Ibukiia tabeman, a uarereke ami mwaanga ao tiaia a rang n raroa nako. N aki tabe ma ami kaangaanga n tatabemani ngkami, ngkami ni kabane bon membwa n te kooram n te nakoanibonga ma te katabeaki mai ieta n reirei ao n anga reirei, n tangira ao ni buokiia tabeman.

N te tairiki aei, ti katanoata manga katean ara koram n te Nakoanibonga ae te Merekitereka ni kakoroa nanon ana mwakuri te Uea n ae nakoraoi riki. Ni katoai uoote nako, te ibonga ae rietaata ao unimwaane a na ikotaki ngkai nakon te kooram n unimwaane ae ti teuana. Te bitaki aei e na kakorakora riki aia konabwai mwaane are iai irouna te nakoanibonga ni beku ibukiia tabeman. Unimwaane aika a tauraoi a na butimwaeaki n iraorao ma te kooram anne. Ni katoa titeiki, e na teimatoa te beretitentii n te titeiki n tararua te kooram n ibonga ae rietaata n te titeiki. Ma bairean te kooram anne e na boboto iaon te wewete n te nakoanibonga ae bwainaki n aron ae na kabwarabwaraaki n te tai ae waekoa.

Unimwaane D. Todd Christofferson ao Unimwaane Ronald A. Rasband man te Kooram n Abotoro n te Tengaun ma Uoman e na reireiniira ngkai taekan riki bitaki aika kakawaki aikai.

Bitaki aikai e a tia ni kamatebwaiaki inanon ririki aika mwaiti. Ti a tia n namakina kainnanoan te kawaekoa ni katamaroaan te kawai ae tina buokiia iai ara membwa ao n taui mwiin ara reitaki ma ngaia. Kanakoraoan riki anne, ti riai ni kakorakora ara kooram n te nakoanibonga n anga kaetieti nakon kabwarabwaraan te ibuobuoki n tangira ao te boutoka are e tangiria te Uea ibukiia Aika Itiaki.

Bitaki aikai bon kairi mairoun te Uea. Ngkana ti karaoi, ti na nakoraoi riki nakon are mai imwaina.

Ti katabaeaki n ana mwakuri te Atua are Moan te Mwaaka. Iesu bon te Kristo! Ngaira Bon Ana Toro Aika Nanorinano! E kakabwaiai ngkami te Atua taari ngkana ti reiakinna ao ni karaoa tabera, I tataro n aran Iesu Kristo, amen.