Tej Lus Cev
Peb tshaj tawm txog kev muab peb tej pawg Pov Thawj Hwj Mekixedes hloov loj heev kom haj yam txawj ua tus Tswv txoj hauj lwm.
Ua tsaug, Tij Laug Holmes, rau koj zaj lus tseem ceeb.
Cov kwv tij, peb nco nco Thawj Tswj Hwm Thomas S. Monson thiab Txwj Laug Robert D. Hales. Tiam sis peb tseem mus lawm tom hauv ntej ua tus Tswv txoj hauj lwm.”1
Kuv yeej ua Vajtswv tsaug rau txhua tus txiv neej uas tuav lub pov thawj hwj dawb huv. Nej yog cov uas tus Txhiv Dim cia siab rau, tus uas xav “kom txhua tus neeg yuav hais lus los ntawm Vajtswv uas yog tus Tswv lub npe, uas twb yog tus Cawm Seej ntawm neeg ntiaj teb.”2 Nws xav kom Nws cov tub uas Nws tau tsa txhua leej txhua tus sawv Nws cev hais lus, ua tej hauj lwm rau Nws, thiab foom koob hmoov rau Vajtswv cov me nyuam nyob thoob plaws lub ntiaj teb xwv kom “txoj kev ntseeg yuav loj hlob tuaj nyob rau hauv lub ntiaj teb [tag nrho].”3
Nej ib txhia ua hauj lwm rau Vajtswv nyob hauv ib qho chaw uas muaj lub Koom Txoos tau ntau tiam neeg lawm. Ib txhia ua hauj lwm rau Vajtswv nyob hauv ib qho chaw uas tsis tau muaj lub Koom Txoos ntev. Ib txhia muaj pawg ntseeg loj. Ib txhia muaj ceg ntseeg me me thiab yuav tsum mus deb heev. Txawm yog li cas los, nej txhua tus yog ib tug mej zeej hauv ib pawg pov thawj hwj uas Vajtswv tau txib kom kawm thiab qhia, kom hlub thiab pab lwm tus.
Hmo no, peb tshaj tawm txog kev muab peb tej pawg Pov Thawj Hwj Mekixedes hloov loj heev kom haj yam txawj ua tus Tswv txoj hauj lwm. Nyob hauv txhua pawg ntseeg pawg pov thawj hlob thiab pawg txwj laug los yuav koom ua ke ua ib pawg txwj laug. Txoj kev hloov no yuav pab cov txiv neej uas tuav lub pov thawj hwj muaj peev xwm thiab txawj pab lwm tus. Pawg txwj laug ntawd yuav tos txais thiab ua phooj ywg nrog cov uas tseem tsis tau tsa ua txwj laug thiab. Nyob hauv txhua ceg txheem ntseeg, ceg txheem ntseeg pawg thawj tswj hwm tseem yuav tswj hwm ceg txheem ntseeg pawg pov thawj hlob. Tiam sis cov nyob hauv pawg pov thawj hlob hauv ceg txheem ntseeg yuav nyob ntawm seb leej twg ua tej hauj lwm pov thawj hwj twg tam sim no.
Txwj Laug D. Todd Christofferson thiab Txwj Laug Ronald A. Rasband ntawm Pawg Kaum Ob tug Thwj Tim yuav qhia peb ntxiv txog tej yam tseem ceeb uas tau muab hloov no.
Peb tau tshuaj xyuas tej kev hloov no tau ntau lub hlis. Peb tau txais kev tshoov siab kom kho tus txheej txheem uas peb siv kom saib xyuas peb cov mej zeej thiab qhia thaum peb nrog lawv tham. Yog peb yuav ua li ntawd zoo dua ntxiv, peb yuav tsum txhawb peb tej pawg pov thawj hwj lub zog kom coj tau txoj kev txhawb pab uas yog kev hlub thiab kev txhawb nqa uas tus Tswv xav muab rau Nws Haiv Neeg Ntseeg.
Tej kev hloov no yog los ntawm tus Tswv txoj kev tshoov siab. Thaum peb hloov tej yam no, peb yuav haj yam txawj ua hauj lwm zoo dua li yav tas los.
Peb ua Vajtswv tus uas Muaj Hwj Chim Tag Nrho tej hauj lwm. Yexus yog tus Khetos! Peb yog Nws cov tub qhe uas txo hwj chim! Thov Vajtswv foom koob hmoov rau nej cov kwv tij thaum peb kawm txog thiab ua peb tej dej num, kuv thov los ntawm Yexus Khetos lub npe, amees.