Pangyam-ammo a Sarita
Ipakaammomi ti napateg a pannakabukel manen dagiti korum ti Melchizedek Priesthood tapno nasamsamay a maipatungpal ti aramid ti Apo.
Agyamanak, Brother Holmes, iti napateg a mensahem.
Ay-ayatek a kakabsat, nalaus ti iliwmi kada President Thomas S. Monson ken Elder Robert D. Hales. Ngem “itultuloytayo amin ti aramid ti Apo.”1
Agyamanak unay iti tunggal lalaki nga addaan iti nasantuan a priesthood.Dakayo ti namnama ti Mannubbottayo nga agtarigagay “a mabalin ti tunggal tao ti agsao iti nagan ti Dios nga Apo, nga isu ti Mangisalakan iti lubong.”2 Kayatna nga amin a naordenan nga annakna a lallaki ket mangibagi Kenkuana, nga agsao para Kenkuana, nga agtignay para Kenkuana, ken mangbendision kadagiti annak ti Dios iti intero a lubong tapno “agsaknap met ti pammati iti [amin] a daga.”3
Agserbi ti dadduma kadakayo iti lugar a nabayagen a nakaipasdekan ti Simbaan para kadagiti henerasion. Agserbi dagiti dadduma iti lugar a kabarbaro pay ti Simbaan.Kadagiti dadduma, dakkel dagiti wardyo.Kadagiti dadduma, babassit ken agaaddayo dagiti sangayo. Ania man ti kasasaad ti tunggal maysa, miembrokayo iti priesthood quorum nga addaan iti nadiosan a bilin nga agadal ken mangisuro; agayat ken agserbi iti sabali.
Ita, ipakaammomi ti napateg a pannakabukel manen dagiti korum ti Melchizedek Priesthood tapno nasamsamay a maipatungpal ti aramid ti Apo. Iti tunggal ward, agtiponen dagiti high priest ken elder ket agbalin a korum dagiti elder. Daytoy a panagbalbaliw ti mangpadur-asto iti kabaelan dagiti lallaki nga addaan iti priesthood nga agserbi iti dadduma. Awaten ken kasinningedto dayta a korum dagiti maisagsagana nga elder. Iti tunggal stake, ituloyto ti stake presidency ti mangidaulo iti stake high priests quorum. Ngem maibatayto ti pannakabukel dayta a korum kadagiti agdama a calling iti priesthood iti wagas a mailawlawagto no madamdama.
Da Elder D. Todd Christofferson ken Elder Ronald A. Rasband ti Korum ti Sangapulo-ket-dua nga Apostol ti mangisuro kadatayo kadagitoy napateg a panagbalbaliw.
Adu a bulan a naadal dagitoy a panagbalbaliw Nariknami a nasken unay a maidur-as ti wagas a panangaywantayo kadagiti miembrotayo ken ipakaammo dagiti kontaktayo kadakuada. Tapno maaramid a nasaysayaat dayta, nasken a papigsaentayo dagiti korumtayo iti priesthood tapno mapasayaat ti panagserbi iti ayat ken suporta nga insangrat ti Apo kadagiti Santona.
Pinaregta ti Apo dagitoy a panagbalbaliw. No ipatungpaltayo dagitoy, ad-adda a nasamsamaytayonto ngem iti sigud.
Mairamantayo iti aramid ti Mannakabalin a Dios.Ni Jesus ti Cristo! Datayo dagiti napakumbaba a katulonganna!Bendisionannakayo ti Dios, kakabsat, bayat ti panangadal ken panangaramidtayo iti rebbengentayo, ikararagko iti nagan ni Jesucristo, amen.