Mahsen kan en Kapehse
Se pahn pakairkihda wekdek la kesempwal iu ohng pwihn enMelkisedek Prihsduhd me pahn sewese kakehlailih la Sapwelimen Kauno doadoahk.
Kalahngan en komwi, Brother Holmes, pwehki omwi sakarada kesempwalo.
Riei ohl akan, kitail inenen laloidki Presiden Thomas S. Monson oh Elder Rober D. Hales. Ahpw kitail koaros wenwenlahte mwowe nan doadoahk en Kauno.1
I kaping kalahngan ong ohl koaros me kolokol prihsduhd sarawi. Iei kumwail me kolokol koapworopwoar en atail Soundoaro me kupwurki “ohl koaros en kak koasoi ni mwaren Koht, Kauno oh Sounkomour pen sampah.”2 E kupwurki Sapwelime pwutak koaros me kasarawilahr en welian Ih, koasoiki Ih, mwekidki Ih, oh kapaiada mour en seri en Koht kan nan sampah pwe “pwoson en kak kekeirda wasa [koaros] nan sampa.”3
Ekei kumwail papah wasa me Mwomwohdiso wet kokouda kapw. Ohng ekei, amwail ward kan laud. Ohng mehteikan, amwail branch kan tikitik oh inenen doh. Mendahte mie wekpeseng, emenemen kumwail wia tohn pwihn en prihsduhd ehu me ahneki pwukoah sarawi en esehla pwehn kasukuhlki; en poakehng oh papah mehteikan.
Pwohnget se pakairkihda wekidekla kesempwal ehu ong atail pwihn kan en Melkisedek Prihsduhd pwehn kadaiala pweidahn doadoahk en Kauno Nan ehu ehu ward, high prihs kan oh elder kan pahn patpene oh wiahla ehu pwihn en elder kan. Koason sapahl wet pahn kalaudehla koahiek oh kak en ohl akan me kin kolokol prihsduhd pwehn papah mehtaikan. Pwihno pahn kasamwoh oh ehuieng elder kan me pahn pidelong. Nan ehuehu stake, stake presidensi pahn wie kakaunte pwihn en high prihs en stake. Ahpw tohn pwihno pahn audaudki irail kan me wie kolokol malipilip kan en prihsduhd me pahn kawehwehda ansou keren.
Elder D. Todd Christofferson oh Elder Ronald A. Rasband en Pwihn en Wahnparon Ehkriemeno me pahn kawehweiong kitail audepen wekdekla pwukat.
Doupen wekdekla pwukat wiewiawiherki sounpwong kei. Se pehmehr me mie anahnepen kamwahuwiala wiepen aht kin apwalih toweh kan oh repwohtki aht kin tuhong irail. Pwehn wiame mwahusang, kitail anahne kakehlaili atail pwihn en prihsduhd kan pwehn kihda kaweid en kalohngki limpoak oh sawas me Kauno ketin kupwurki ong Sapwellime Souleng kan.
Kauno me ketkihda wekdekla pwukat. Ni atail pahn kamwakidewei wekdekla pwukat, kitail pahn koahiekla sang mahso.
Kitail wie mwekmwekidehr nan doadoahk en Koht Lapalahpie. Sises iei Krais! Kitail wia Sapwellime ladu karakarahk kei! Koht en kapaiada kumwail riei ohl akan ni atial esehla oh wia atail pwukoa, iei ahi kapakap ni mwaren Sises Krais, amen.