Malelega Tomua
O le po nei, matou te faasilasila atu ai se toefaatulagaga iloga o a tatou korama o le au Perisitua Mekisateko ia atili ai ona mataalia le faataunuuina o le galuega a le Alii.
Faafetai lava Brother Holmes, mo lau savali taua.
Uso pele, ua tatou misia tele lava Peresitene Thomas S. Monson ma Elder Robert D. Hales. Ae o loo tatou “fetaomi uma atu pea i le galuega a le Alii.”1
Ou te faafetai lava mo alii taitasi o loo umiaina le perisitua paia. O outou o le faamoemoe o lo tatou Togiola o loo finagalo “ia mafai e tagata taitoatasi ona tautala i le suafa o le Atua le Alii, le Faaola lea o le lalolagi.”2 E finagalo o Ia i Ona atalii uma ua faauuina ia fai ma sui o Ia, ia tautala atu mo Ia, ia galue mo Ia, ma faamanuia olaga o fanau a le Atua i le lalolagi atoa i le tulaga e “mafai [ai] foi ona faateleina o le faatuatua i le lalolagi [atoa].”3
O nisi o outou o loo auauna atu i nofoaga na faavae ai le Ekalesia mo le tele o tupulaga. O isi o loo auauna atu i nofoaga e fou tele ai le Ekalesia. Mo nisi, o a outou uarota e tetele. Mo isi, e toalaiti tou paranesi ma e vava mamao tele. Po o a lava o outou tulaga faaletagata lava ia, o outou taitoatasi o se uso o se korama o le perisitua faatasi ai ma se tiute paia e aoao mai ma aoao atu; ia alolofa atu ma auauna atu i isi.
O le po nei, matou te faasilasila atu ai se toefaatulagaga iloga o a tatou korama o le au Perisitua Mekisateko ia atili ai ona mataalia le faataunuuina o le galuega a le Alii. I uarota taitasi, o le a tuufaatasia ai nei faitaulaga sili ma toeaina i se korama e tasi a toeaina. O lenei fetuunaiga o le a matua faaleleia ai lava le gafatia ma le tomai o alii o loo umiaina le perisitua e auauna atu ai i isi. O le a talileleia toeaina faaolioli ma faaaumeaina e lena korama. I siteki taitasi, o le a faaauau pea e le au peresitene o le siteki ona pulefaamalumalu i le korama a faitaulaga sili o le siteki. Ae o le faatulagaga o lena korama o le a faavae i valaauga o le perisitua o loo i ai nei lea o le a faamalamalama atu.
O le a aoaoina atili nei i tatou e Elder D. Todd Christofferson ma Elder Ronald A. Rasband o le Korama a Aposetolo e Toasefululua e uiga i nei fetuunaiga taua.
O nei suiga sa faia ai suesuega mo le tele o masina. Ua matou lagonaina se manaoga faanatinati e faaleleia le ala tatou te tausia ai o tatou tagata ma lipoti atu a tatou fesootaiga ma i latou. Ina ia faia lelei lena mea, e manaomia ona tatou faamalolosia a tatou korama o perisitua e avatu ai le taitaiga sili atu i le auaunaga o le alofa ma le lagolago ua faamoemoeina e le Alii mo Lana Au Paia.
O nei fetuunaiga ua musuia e le Alii. A o tatou faatinoina ai, o le a atili ai ona tatou mataalia nai lo le mea sa tatou i ai muamua.
O loo tatou i ai i le galuega a le Atua Silisili Ese. O Iesu o le Keriso! O i tatou o Ana auauna faatauvaa! Ia faamanuia e le Atua outou uso a o tatou aoao ma faia lo tatou tiute, ou te tatalo atu ai, i le suafa o Iesu Keriso, amene.