Fan iten chok aramas

Nupwen am wa enukunuk ren angangen ewe ningechun temple non Paris France, a wor ew foffor a fis usapw tongeni ai upwe menuki. Non 2010, nupwen pisekin ewe temple a pwa, ewe meierun ewe neni a tungor am aupwe mwich ren an epwe sinei echuu uruwon ewe mwichefen. Ei mwich a unusen aweires kinikin ren am aupwe tongeni angei taropwen mwumwutan forun imw. Am auwa fokkun amonota echo taropwe mi fiti ekkoch sasingin temple ren Aramas mi pin non fansoun sopwonon. Met ua kon aneanei pwe foforun ningechur epwe anisi an ewe meier epwe anisi ewe angang.

Ua wesen mairu, pwe ewe meier ese mwochen epwe katon ach ewe anapana nge ii me chiechian kewe repwe pwusin fori an pekin kaeo ren ar repwe pwusin sinei ika met sokkun am we mwichefen. Ewe maram mwurin, ra mwochen am aupwe niwin sefan ren am aupwe rongorong ewe repot epwe kawor meren emon chon emwenin ewe neni ewe mi pwan sinei uruon namanam. Neminewe a apasa, “Nap seni mettoch meinisin, auwa mwochen aupwe sinei ien chon ami we mwichefen akkom. Aewin, auwa fiti ami mwichen sakramen. Auwa momot nukunupen ewe fan me auwa katon nikinikin kewe aramas chon fiti fan me met ra fori. Iwe mwurin auwa churi ami kewe neiper—kewe re nomw unukun ami we steik—me auwa eisinir met sokkun aramas ami ekewe Mormon.”

“Iwe met omuchunon omw ekiek?” Uwa kapas eis, uwa mefi ekis nuokus. Neminewe a penuweni, “Sia kuna pwe ewe Mwichefenin Jises Kraist ren aramas mi pin non fansoun sopwonon ewe a kanengeni an Jises ewe akomw mwichefen nap seni kewe ekkoch mwichefen kich mei sinei.” Ekis ngeni chok upwe penuweni ne apasa, “Ese kon nien pwung! Esapw ewe mwichefen ekon akarap; iei ewe mwichefenin Jises Kraist—ewe chok mwichefen, ewe mwichefen mi enet!” Nge uwa engino ngeni chok me uwa iotek non mosonoson ren ai kinisow. Ewe meier a urenikem pwe, anongonong won met ra kuna, ii me chienan kewe ese wor met repwe pinei ren angangen ewe tempel non nenier we.

Ikanai, nupwe uwa ekieki usun met ewe a fis, uwa mefi kinisow ren an ewe meier mirit me ewe ngunun awena ekiek. Ii mei sinei pwe ewe euchean an epwe weweiti ewe mwichefen esapw seni an epwe kuna ren nikinikin me nukun ekkewe imw watte ika fen ew kokotechun mwicheich nge ren ekewe minion member, ekewe ra achocho iteiten ran ne fori an Jises Kraist ke nikinik.

Wewen ewe Mwichefenepwe anongonong won ewe wokisin non ewe puken Mormon a apasa, “Iwe ir kewe [noun ewe Samon kewe chon kaeo] ir kewe ra paptais non ewe iten Jises ra iteni ewe mwichefenin Kraist.”¹

Non ew sokkun kapas, ewe mwichefel fan iten aramas. Fan itom chok, noun ewe Samon kewe chon kaeo—ekewe ra tongei me tapweno mwurin me ekewe ra angei itan ren ar nukunuk.

Preseten Russell M. Nelson fan ew mi anene ewe Mwichefen ngeni efoch toraku mi ech. Sia unusen tongei nupwen waach ewe mei nimech me maratitin. Nge pwopwun ewe toraku esapw ren an epwe ningeno usun ew ningen mwesin; nge epwe uwei aramas non ewe toraku.² Pwan non ena nikinik, kich, ren wisach chon ewe Mwichefen, sipwe kinisow ren an wor ekewe ningochun nenien fen ra nimech me tumun, me sia pwan sani fisiochun kewe program. Nge ekei chok pekin aninis. Ren met sia mochen pwe sipwe tungorei emon me emon noun Kot aat me nengin ar repwe feito ngeni Kraist me anisiir ngeni ewe anen pwon. Ese wor mettoch ekon auchea. Ach angang a chok fan iten aramas me ekewe pwon.

Met ese euchea ewe iit a kawor seni ewe pwarata ren niwinsefaniton ewe Mwichefen a amwochufengenii kewe ruu euchean masowen non ew me ew kewe pwonen kapas alim? Aewin ewe iit Jises Kraist.. An ei mwichefen, me an Achasefan me pwon ina chok ewe an ngeni manaw ese mwuch me fefeitan manawach. Ewe oruwen iit a wewe ngeni kich:: ekewe Aramas non Fansoun Sopwonon, ika non ew kapas, neun chon pwarata me chon kaeo.

Uwa kaeo auchean ai ekieki usun ekewe aramas uwa angang fan iter nupwen ai we steik preseten non France. Nepwopwutan ai we angang, uwa ekieki ekkoch auchean mwochen ren ewe steik: forutan minafen wart, kaun minafen nenien mwich, me pwan angangen forun temple non neniem we. Nupwen uwa wes seni wiseiwe 6 ier mwurin, esapw ew nein kei mwochen a fisita. Ei mi tongeni ai upwe mefi pwe use fori met kewe nge ew chok, non kewe 6 ier, ai kewe mwochen ra sosokono.

Nupwen uwa momot won ewe rong non ewe ran uwa wes seni wiseiwe, uwa unusen chouchou ren ew pechekunen memef ren kinisow me uwa fori met kewe wa mwochen. Uwa nengeni won mesen emon me emon ekewe ipuku member mei nomw. Uwa chechemeni ew memef mi pin a emwochu fengeniir.

Ikenair pwiich me fefinach kewe ra tonong non ewe konikin paptais, iir ekewe uwa sainei neur kewe aewin taropwen mumutan non tempel pwe repwe tongeni angei ekewe foffor mi pin non ewe tempel, me ekewe anuon me foppun me pwupwunu uwa fen ewisa ngeni wiser ika epichireno seni wiser kewe misinari. Mei pwan wor chomong me neir uwa iamwirir nupwen ra nomw non osukosuk me weires non manawer. Uwa unusen mefi ewe tongen pwipwi ngeni emon me emon neir. Uwa kuna unusen pwapwa non ai angang ngenir me pwapwa non ar watenon afona me nuku ewe chon amanaw.

Preseten M  Russell Ballard a aitikich, “Met a kon auchea non wisach non mwichefen esapw met kewe ra repot me ewe mwich ra fis nge ren emon aramas epwe mwich ngeni—iamwiri emon me emon usun chok ewe chon amanaw a fori—afen ekieta me anisi me ususen akasiwini.”³

Pwii me fefinei kana mi achengicheng, met kich mei achocho ngeni ach sipwe manaueni ewe kapas allim, ika kich mei fori wisach non ewe Mwichefen? Ewe kii ach sipwe fori usun met ewe Chon Amanau a fori non mettoch meinisin. Ika sia fori ena, sipwe chok fori me anisi emon me emon nap seni fori chok kewe angang me kewe prokram.

En mei mo kan eisinuk pwusin ika epwe ifa usun ika ewe Chon Amanau a tori omw ewe wart ika branch non Ranifen? Met epwe fori? Epwe fen ekieki ika ewe nios ra aa ne osukun mi ech ika ekewe nenien mot mei tetenech non ewe knasrum? Ika epwe kuna emon epwe tongeni tongei, aiti, me efeiochu? Meni epwe kuta emon minafon member ika chiechiean epwe etiwa, emon pwich mi samaw ika fefinach mi weires, ika emon sarafo ese watte an nuku ewe a mochen an epwe ekieta me pesei.

Meni knas Jises epwe tori? Usapw mairu ika etori ekewe kinter akomw. Epwe fen fotoposukutiw me kapas ngeniir emon me emon won meser. Epwe pwari ngeniir an tong fan iter, tutunap ngenir, pwapwaitir ren ar kewe chunga, me pwarata usun semanwe won nang. An foffor epwe chok mecheres, unusech, me fokkun ennet. Kich mei tongeni fori usun ii?

Uwa pwon ngonuk pwe nupwen ka achocho ngeni ne fori met ewe Samon a mochen kopwe fori, esapw wor mettoch epwe euchea seni omw kopwe kutta kana aramas kopwe tongeni anisir me efeiechur. Non Mwichefen kopwe achocho ne aiti emon me emon me atapa manawer. Kopwe eteneki omw kopwe awateno kewe sinen ngunupin nap seni omw kopwe eteteni ew euchun urumot, ren omw kopwe iamwiri chienomw member nap seni omw chok fori ren omw cheki pwe epwe esisina pwe ka fori omw amwa. Esapw usun chok fan itom nge fan iter kewe sia aita ngenir pwiich me fefinach.

Fan ekkoch sia kapas ren ach sipwe no fan. Nge ewe Mwichefen a nap seni ew imw watte ika ew chok neni. Mi unusech me manaw non sokopaten neni non fonufan usun chon ewe ofesin Mwichefen non Salt Lake City. Ewe Samon a apasa, “Ren ian ekewe ruemen ika unumon ra chufengen ia non itei, ngang mi nonomw rer.”⁴

Kewe memef sia mefi non fan mi fitikich ian sipwe feino ia: ngeni angang, sikun, fekeison, me akaewin non imwach kewe. Nonomwuch me foforuch epwe tongeni naf ren an epwe fori ian sia nomw ia ew neni mi pin.

Uwa chemeni ew kapas am me chieneiwe auwa kapasan esapw emon chon ach nuku. A mairu an a sinei pwe emon mwan mi nimenimoch non ach Mwichefen a tongeni angei ewe pristut. A kapas eis, “Nge fitemon pristut non omw we wart?”

Uwa penuweni, “Nefinen 30 me 40.”

A osukosuk, iwe a sopwosopwono, “Non am mwichefen, emon chok neum priest. Pwata a namot tepetep pristut non nesosorun Raninfen?”

Ren ei kapas ei, uwa mefi ai mwochen upwe penuweni, “Ngang mi tipew ngonuk. Ai nuku sise nit kana ukukun pristut non fan non Raninfel. Nge sia a namot prisitut non iteiten imw. Me nupwen ese wor pristut non ew imw, ekewe ekkoch pristut ra keke pwe repwe tumunu me iamwiri na famini.”

Ach esapw chok fenin Ranifen. Ach Fen ngeni epwe sopwosopw iteiten ran ewe wiik, ren ian sa nomw ia me met sia fori. Imwach kewe akaewin iir kewe nenien ach nuku.”⁵ Ekon napengeni ach iotek non imwach kewe, sia efeiechu, sia kaeo, sia aiti ewe kapasen Kot, me sia aninis non enetin tong. Upwe pwarata ren met uwa fen sinei pwe imwach kewe ra ekkoch neni mi pin ian ewe ngun epwe nonomw ia—mi nap, me fan ekkoch mi fen napseni, ach nenien fen.

Ngang ua apasata ai kapasen pwarata pwe ei mwichefen ewe mwichefenin Jises Kraist Pechekunan me euchean a feito seni foforun ekkewe chon fen ngeni iteiten ran ekewe ra achocho ne fori nikinikin kewe ren an tongei ekkoch. Kraist mi manaw me a emweni an ei mwichefen. Preseten Russell M. Nelson ewe soufos a kefinita pwe epwe akomw me emwenikich non ach kei fansoun. Ren ekei mettoch uwa pwarata non iten Jises Kraist, amen.