Bukin Baike Ti Karaoi bon Tabeakinaia Aomata

Inanon te katauraoi ibukin katean Paris France Tembora ae koro kamiimina, iai au taeniai ae I aki kona ni mwaninga. N 2010 ngke a kuneaki bwain te tembora, te meeia n te kaawa e bubuti bwa ti na kaitibo ni kan ataa riki rongorogon te Ekaretia. Te boowi bon te mwaneka ae kaangaanga ni karekean te kariaia ibukin te kateitei. Ti katauraoa raoi ara maroro iaon te Powerpoint are a raonaki ma tabeua tamnein aia tembora Aomata aika Itiaki. Au kantaninga ae moan te korakora bwa tamaroan korotamnein aron kateakiia e anaa nanon te meeia bwa e na boutoka ara mwakuri.

Inanon miimiiu, e taekinna te meeia bwa n oneamwiin are ti na rinanoa ara maroro, ngaia ma kaain ana tiim a iangoia bwa a na kaira oin aia kakae bwa aekakira te Ekaretia ae ti mena iai. Te namwakaina are imwiina, ti kaoaki bwa ti na oki n ongora n te ribooti are e anga te kauntira man te kaawa are e riki naba bwa te burobeetia n rongorongon te aro. E teirake ao e taku, “Iaon bwaai nako, ti kan ataia antai aika kaain ami Ekaretia. Te moan, ti iira teuana ami bootaki n toa. Ti tekateka mai bukin te umwantabu ao ni karaurau raoi n taraia aomata ibuakoia kaain te taromauri ao tera ae a karaoia. Ngkanne ti kaitbo ma kaain rarikimi—naake a maeka irarikin ami titeiki tienta—ao ti titirakiniia aekakin aomata raa ngkami aika kaain te Moomon.”

“Ngaia are tera kabanean ami taeka?” I titiraki, n namakina teutana te raraoma. E kaeka, “Ti kunea bwa Ana Ekaretia Iesu Kristo ibukiia aika Itiaki ni Boong aika Kaitira e rang kaan ma are bon ana Ekaretia Iesu Kristo nakon riki tabeua aro ake ti atai.” I kuri ni kaberetokoa man taku, “E aki bwanin koauan anne! Tiaki te aro ae e kaan; bon ana Ekaretia Iesu Kristo—te Ekaretia ae titebo, te Ekaretia ae koaua!” Ma I tuukai ao oneamwiina I anga te tataro ni kakaitau ae mabu. Ngkanne te meeia e reireiniira bwa, ae boboto iaon aia kukune, ngaia ma kaain ana tiim aki kaberetokoa katean te tembora n aia kaawa.

N te bong aei, ngke I iangoa te taneiai ae kamiimi aei, I namakina te kakaitau ibukin wanawanan te meeia ao tamneina ni kainamakin. E ataia bwa kiingin ataakin te Ekaretia tiaki taraakin ana kateitei mai itinaniku ke n aron taraakin ana reirei ae barongaaki raoi ma rinanon ana aomata aika mirion aika a kakaonimaki, ake a kataia n iriira ana katoto Iesu Kristo ni katoa bong.

Nanon te Ekaretia e bae n anaaki man te rongorongo n ana Boki Moomon are e taku: “Ao … naake [nanona ana reirei te Uea] a bwabetitoaki n aran Iesu a aranaki bwa ana ekaretia Kristo.”¹

N taekana teuana, te Ekaretia bon ibukiia aomata ni kabane. Bon ibukimi ni kabane, ana reirei te Uea—naake a tangiria ao n Iriiria ao naake a tia ni katoka arana iaoia man berita aika tabu.

Beretitenti Russell M. Nelson n te taina ao e kabootaua te Ekaretia ma te kaa. Ti bane n tangiria ngkana e itiaki ara kaa ao n raneanea. Oin te kantaninga ibukin te kaa tiaki ae e tei ni kaokoro ngkai te mitiin ae katika te nano taraakina; bon karinaia aomata inanon te kaa.² N te aro naba anne, ngaira, ngkai tabera kaain te Ekaretia, ti kakaitau n reken ara tabo n taromauri ae tamaroa man itiaki ao ni kateimatoaaki raoi, ao ti kukurei naba ni karekei burokuraem aika mwakuri raoi. Ma aikai tititem aika a na boutokaaki. Ara taakete bon kaoakiia natin te Atua mwaane ao aine bwa a na nakon Kristo ao ni kaira teuanne ke neienne iaon kawain ana berita. Akea riki te bwai ae kakaawaki. Ara mwakuri bon ibukiia aomata ni kabane ao berita aika tabu.

E aki kamiimi bwa te ara ae nako man te kaotioti nakon te Ekaretia ae kaokaki e kabaei uoua bwaai aika moan te kakawaki inanon tatabeua berita aika tabu n te euangkerio? Te Moan bon aran Iesu Kristo. Aio bon ana Ekaretia, ao Ana Mwakuri ni Kamaiu ae tabu ao ana berita aika tabu bon tii te kawai nakon te kamaiuaki ao te karietataaki. Te kauoua e kaineti nakoira: Aomata aika Itiaki, ke taekana teuana, Ana tia kakoaua ao Ana reirei.

I reiakina kakawakin tii tabeakinaia aomata ngke I beku bwa te beretitenti n te titeiki i France. Ni moan au mwakuri, I angoi tabeua kouru aika a na uaiakinaki ibukin te titeiki: katean taian uoote aika boou, katean autinibootaki aika boou, ao bon katean te tembora inanon ara aono. Ngke I a motirawa onoua te ririki n nako, akea mai ibuakon botoniango aikai aika a kakoroaki nanoia. Aei e kona ni karika namakinan te kabwaka ma tii, inanon tain te kooti ae onoua ririkina, oin au kantaninga e riki bwa te bwai ae kaokoro.

Ngkai I tekateka iaon te tabo n taetae n te bong are I motirawa iai, I kukurei man namakinan te kakaitau ao baika a koro bukiia. I tarai mataia aika tebubua kaain te aro ake a roko. I uringa te taneiai n tamnei are e reitaki imarenaia n tatabemaniia.

Iai taari mwane ao aine ake a bwabetitoaki, naake I moan tiaainai aia rekomente bwa a aonga ni karekei otenanti aika tabu n te tembora, ao kairake n aomata ao taanga ake I a tia ni kamatoaia ke ni kamotirawaia bwa mitinare aika a bwanin aia tai. Iai riki aika mwaiti ake I a tia ni buokiia ngkai a rinanon kakatai ao kakaitara inanon maiuia. I namakina te tangira n itaritari ibukiia ni kabane. I a tia ni kunea te kimwareirei ni beku ibukiia ao ni kukurei n rikiraken aia kakaonimaki ao onimakinan te Tia Kamaiu.

E reirei Beretitenti M. Russell Ballard, “Te bwai ae te kabanea ni kakawaki ni katabeakira inanon te Ekaretia tiaki waare ake a ribootinaki ke boowi ake a karaoakii ke tiaki aomata n tatabemaniia—a buoka temanna n te taina n aron are e karaoia te Tia Kamaiu—a tia n tabekakirake ao ni kaungaaki ao ni bitaki n te kabane.”³

Tariu ao mwaaaneu aika tangiraki, ti kakaonimaki n te euangkerio, ke ti katabeira ni kakoroi bukin tabera n te Ekaretia? Te kiing aei bon iriiran ana katoto te Tia Kamaiu ni bwaai ni kabane. Ngkana ti karaoa anne, ti kabanei nanora iaon kamaiuaia aomata n tatabemaniia nakon tii karaoan tabera ao karinan taian burokuraem.

Ko a tia n titirakiniko i bon iroum e na kanga arona ngkana e kawara am uoote ke am mwaanga te Tia Kamaiu n te Tabati are imwiina? Tera ae e kona ni karaoia? E na raraoma n ataia bwa tamnei ni buokan te angareirei a bon tau ke kaintekateka a baireaki raoi inanon te kiraatiruum? Ke E na kunea temanna ae E kona n tangiria, reireia, ao ni kakabwaia? Tao E na karoko iroun kain te aro ae boou ke te rao ni butimwaaia, te tari mwaane ae aoraki ke te aine ae e na karauaki nanona, ke te kairake ae nano tiotio ae e na tabekakirake ao ni boutokaaki.

Tera kiraati ae e na kawari Iesu? I aki miimi ngkana E kawariia moa ataein te Moanrinan. E na bae ni katorobubua ao n taetae nakoia n itaramata. E bae ni kaota Ana tangira nakoia, ni karaki nakoia, ni katekeraoiia iaon aia korotamnei, ao ni kaota koauan Tamana are i Karawa. E bebete kateina, e koaua, ao e aki betanna. Ti kona ni karaoa naba anne?

I berita nakoim bwa ngkai ko kekeiaki ni karaoa are e tangiria te Uea bwa ko na karaoia, akea te bwai ae kakawaki riki nakon kuneakiia aomata akanne ae ko na buokiia ao ni kakabwaiaiia. N te taromauri ko na kabotoa nanom iaon reireiakiia aomata ao n riingii nanoia. Tabeaiangam bon kaungaan am taneiai n te tamnei nakon are tii barongaia te waaki ni kakukurei ae tau, ni buokiia kain te aro nakon ae tii kamoamoa te mwaiti are ko a tia ni kawariia. Bon tiaki ibukim ma bon ibukiia are ti araniia bwa tarira ao mwaanera.

N tabetai ti kakarabakauakina taekan te nako n taromauri. Ma te Ekaretia e riaon riki te kateitei ke te tabo ae onoti. Bon te bwai ae koaua ao ni maiu n te tabo ni maeka ae mangori n ana tabo te aonaaba aika tionako ngkai a riki bwa ana etekuata te Ekaretia i Salt Lake City. E taku te Uea “Baike a bootaki iai uoman ke teniman n arau ao I mena naba iai ibuakoia.”⁵

Ti karekea te namakin ae ti te arona n te tabo are ti nako iai: ni mwakuri, nakon te reirei, ni motirawa, ao riki inanon mweengara. Oin rokora ao uaara ti bon tau ni karaoia bwa ti kuneira ni mena n te tabo ae tabu.

I uringa au maroro ma raoraou are tiaki kaain ara aro. E miimi n reiakinna bwa ngkana e tau te mwaane n ara Ekaretia e kona ni karekea te nakoanibonga. E titiraki, “Ma iraman kaain te nakoanibonga inanon am uoote?”

I kaeka, “Imarenan 30 ao 40.”

Ma te raraoma, e reitia, “N au bootaki n taromauri, tii temanna ara ibonga. Bukin tera kam kainnanoia ibonga aika a mwaiti n ingabongin te Tabati?”

N anaakin nanou n ana titiraki, I namakinna bwa N na kaeka, “I kariaia ane ko taku. I taku bwa ti aki kainnanoia kaain te nakoanibonga ae mwaiti n te taromauri n te Tabati. Ma ti bon kainnanoa kaain te nakoanibonga ni katoai mweenga nako. Ao ngkana akea te nakoanibonga n te mweenga, tabeman kaain te nakoanibonga a weteaki bwa a na tararua ao ni buoka te utu anne.”

Tiaki tii ara bwai te taromauri n te Tabati. Ara taromauri e reitinako ni katoa bong n te wiiki, n te tabo are ti mena iai ao n te bwai are ti karaoia. Mweengara n ae e onoti bon “te tabo ae ti na maiuakina iai ara onimaki.”⁶ N angiin te tai inanon mweengara bwa ti tataro, ti kakabwaia, ti kamatebwai, ti reirei ana taeka te Atua, ao ti beku ma te tangira ae itiaki. I kakoaua man oin au taneiai bwa mweengara bon taabo aika tabu ike e kona ni mena iai te Tamnei—n ae mwaiti, ao n tabetai n ae mwaiti riki, n ara tabo n taromauri ae baireaki.

I kakoaua bwa te Ekaretia aei bon ana Ekaretia Iesu Kristo. Korakorana ao kakawakina e roko man aia mwakuri ni katoa tai mirion Ana reirei ake a iriira Ana katoto ni katoa bong n tabeakiniia tabeman. E maiu Kristo, ao E kaira te Ekaretia aei. Beretitenti Russell M. Nelson bon te burabeti are E a tia n rineia bwa e na kairiira ao ni kawakiniira inanon ara bong. I kakoauai koaua aikai n aran Iesu Kristo, amen.