Srihpen Ma Nuhkwewa pa Mwet uh.

Ke ahkolah ke muhsah luhn sie tempuhl wolacna Paris France, oasr puhlah se luhk nga fah tiac muhlkuhnlah. Ke 2010, ke ma nuh ke tempuhl uh konweyuckyak, mayor luhn acn sac siyuck in ohsun yohrohsr in etuh yohk ke Alu lasr. Toeni se inge el sie step upac in eis sie pwepuh in lwelah in muhsah. Kuht ahkolah wi sie prisacntesin ma oasr kain in petsac kahto ke tempuhl luhn Mwet Luhlahlfongi ke Lwen-Sahflah. Finsrak yohk luhk pa kahtoiyacn muhsah lalos in kwacfe mayor sac in pahtok project lasr uh.

Ke mwe luht luhk, mayor sac fahk lah likina in liye prisacntesin se lasr ah, el ac mwet weluhl ah ke sifacna oruh lohlngohk lalos in sokwack lah kuht alu fuhkah se. Mahlwem tok ah, kuht suliyuck in fohlohk in lohng ripohrt utuckuh sin mwet kahsruh luhn acn sac suc oacyacpac sikyak muh mwet luti se ke sramsram mahtuh luhn alu. El fahk, “Sahyacn ma nuh kwewa, kuht ke etuh lah suc mempucr ke alu lowos an. Ma se met, kuht wi toeni ke sackracmacn. Kuht muhta e tok ke alu ac na liye ahkwoyac mwet ke alu ac na meac elos oruh. Na kuht ohsun nuh sin mwet atuhlani lowos—elos suc muhta raunwelah infulwacn stek lowos—ac kuht siyuck lah mwet fuhkah kowos Mormon uh.”

“Na meac nuhnak lom?” nga siyuck, puhlah kihtin elyah. El topuk, “Kuht konwacack lah Alu luhn Jisus Kraist luhn Mwet Luhlahlfongi ke Lwen-Sahflah el fototo nuh ke Alu na pwacye luhn Jisus Kraist liki na alu sahyac kuht etuh kac.” Apkuhran ngan lain in fahk, “Tiac pwacye ma se ingacn! El tiac alu se ma fototo uh; pa Alu luhn Jisus Kraist—Alu sacna, Alu pwacye sac!” Tuh nga kutongyucwi ac oruh pruhe mihs se in kulohkihn. Na mayor sac kahsrwe kuht lah, in fal nuh ke ma elos konwacack uh, el ac u lal ah tiac na lain muhsahiyacn sie tempuhl ke acn selos ah.

Mihsenge, ke nga nuhnkuh ke puhla wolacna se ingacn, nga puhla sruikihn lahlmwetmwet ac nguhn in akihlen luhn meyor sac. El etuh lah sie ip yohk srihpac in etuh Alu pa in tiac liye ke lihkihn atacn muhsah kuh ke ahkolah wo luhn u tuh ke mempucr luhlahlfongi miliacn kac, suc insacnweacng kais sie lwen in ukwe srihkasrak luhn Jisus Kraist.

Kalmac ke Alu sahp itucklac ke sie puhloh kahs ke Puk luhn Mormon ma fahk:“ Ac…elos [kalmac mwet tuhma lutlut luhn Leum] suc pacptaislac ke inen Jisus tuh pahngpahng alu luhn Kraist.”¹

Ke kahs sahyac an, mwet nuhkwewa pa kalmacn Alu se. Kalmac kwewa pa kom, mwet tuhma lutlut luhn Leum—elos suc luhngse ac Ukwacl ac suc eis Inel nuh faclos ke olwelah.

Prestuhn Russel M. Nelson el kapsra sie Alu nuh ke sie mwe wiwac kahto. Kuht kwewa luhngse ke stosah okwacsr uh nwacsnwacs ac sahromrom uh. Tuh srihpen stosah uh tiac kalmac pa in mwe inte se; pa stosah in wiwac mwet soko.² Ke kain ohiyac sacn, kuht, ekihn mempucr ke Alu uh, srui in oasr acn in alu kahto ma nwacsnwacs ac akwucki wo, ac kuht oacyacpac engan ke oasr mukwikwi wo ke prokracm. Tuh ma inge el mwena atac in kahsruh. Kena muhkwena lasr pa in suli kais sie wen ac tuhlihk muhtwacn nuhtin God in tuhkuh nuh yurin Kraist ac kol mukul ac muhtwacn ke inek luhn wuhlweacng. Wacngihn ma yohk srihpac. Orekma lasr uh ma nuh sin mwet nuh kwewa ac wuhlweacng uh.

Yac tiac ma wolacna se lah ine se ituckyang ke fwackyuck nuh ke fohlohk luhn Alu orwacni kwewa ip yohk srihpac luo ke kais sie wuhlweacng luhn wosasuc? Ma se met pa inen Jisus Kraist. Alu se inge ma Lal, ac kihsac in Iwaclah Lal ac wuhlweacng pa inek in molwelah ac moul ma pahtpaht. Ine se ahk luo an tuhkuh nuh sesr: Mwet Luhlahlfongi, kuh ke kahs sahyac, mwet lohoh Lal ac mwet tuhma lutlut Lal.

Nga lotwelah ma yohk srihpac ke lohacng nuh sin mwet ke nga kuhlwacnsuhpuh orekma ke stek prestuhn fin acn France ah. Ke muhtwacwacackiyacn kuhlwacnsap luhk, nga nuhnkuh ke finsrak ma soenna ahksahfyeyucklac luhn stek: oreklac luhn ward sasuc, muhsah sasuc ke lohm in toeni, ac finne ke muhsah luhn tempuhl ke eria lasr. Ke nga fihliyucklac tukun yac ohnkohsr, tiac sie sin finsrak inge oreklac. Ma se inge puhlakihnyuck muh kuluk sahyacn ma sacn, lusacn yac ohnkohsr ke orekma sacn, finsrak luhk tuhkuh siena.

Ke nga muhta ke mwe muhta ke lwen in fihlfihllac luhk, nga kuf ke puhla wolacna ke srui ac ahksahf uh. Nga liye muhtuhn foko ke mempucr siofok ma wi ac. Nga kuh in esam sie puhla luhn nguhn kuhpahsryang nuh sin kais sie selos.

Oasr tamuhlwel ac tahmtahel suc tuhkuh liki kof in pacptais, elos suc nga sainiyac pwepuh in lwelah tuh elos in kuh in eis akwuck muhtahl luhn tempuhl, ac mwet fuhsr ac siacnyacn nga set apart ac fuhlwelah ke orekma fohnlah luhn misineri. Oasr pac mwet puhs sahyac suc nga luti ke elos sun mwe srihke ac ma upac ke moul lalos. Nga puhla luhngse kuh nuh sin kais sie selos. Nga konwacack engan pwacye in kuhlwacnsapwaclos ac engan ke kapkapwack luhn luhlahlfongi lalos nuh sin ac ke Mwet Lahngo.

Prestuhn M. Russel Ballard el luti, “Ma yohk srihpac ke orekma luhn Alu lasr uh tiac pa pihsen mwet ma ripohrtiyuck kuh toeni ma orek tuhsruhk lah kais sie mwet el oruh kuh tiac—luti kais sie pacl oacna ke Leum el oruh—el sruhkyuckyak ac ahkkweyeyuck ac sahflahiyac eklac.”³

Tamuhlwel ac tahmtahel sacohk wiyuck, kuh kuht suk in moul fal nuh ke ma sap luhn wosasuc, kuh kuht kahfofo muhkwena ke Alu? Ki uh pa in ukwe srihkasrak luhn Leum ke ma nuhkwewa. Fin kuht oruh kac, kuht fah lohacng wo in molwelah kais sie liki na in oruh orekma ac ahkwoye prokracm an.

Yac kom siyuck sum sifacna lah ac fuhkah fin Mwet Lahngo el muhtwacta ke ward kuh pracns lom an ke Sacnri se tok uh? Mac El fah oruh? Yac El fah elyah in etuh fin petsac in luti tuhlihk ingacn el wo fal kuh fin siah an el an fal lun acn in lutlut an? Kuh yac El fah suk kais sie ma El kuh in luhngse, luti, ac ahkinsewowoye? Sahp El fah suk sie mempucr sasuc kuh sie kawuck sasuc in paing, sie tamuhlwel ac tahmtahel mas ma enenuh kahsruh, kuh sie mwet fuhsr ma muhnahs fahkwack la suc enenuh sruhkyuck ac ahkkweyeyuck.

Piac kuhlahs Jisus El fah muhtwacta kac? Nga fah tiac lut fin El muhtwacta ke U luhn tuhlihk srihsrihk met. Sahp El fah sikuckmuhtuhntei ac sramsram nuh selos kais sie. El fah sang luhngse Lal nuh selos, sruhmuhn sramsram nuh selos, kaksakuhnuhlos ke sral lalos, ac fahkwack ke Pahpah Tuhmwacl Inkuhsrao. Ohiyac Lal fah fihsrwacsr, pwacye, ac wacngihn ma stuhuh kac. Kuh kuht kuh in oruh oacna?

Nga olwelah nuh sum lah ke kom insacnweacng in oruh ma Leum El luhngse kom in oruh, wacngihn ma yohk srihpac in suk elos ma kom kuh in kahsruh ac ahkinsewowoye an. Ke Alu ac kom fah lohacng in luti kais sie ac mokle insiyaclos. Mwe nuhnak lom fah kapkapwack ke mwe puhla luhn nguhn liki na in orwaclah in wo sie mukwikwi, in luti mempucr sacohk wiom liki na in suk molin kais sie muhtwacta kom orwaclah. Ac fah tiac kalmac nuh sum tuhsruhk ma nuh selos suc kuht pahngon tamuhlwel wiyacsr ac tahmtahel wiyacsr.

Kuhtuh pacl uh kuht sruhmuhn som nuhke Alu. Tuh sie Alu el yohk liki na sie muhsah kuh acn se.Pa sie ma pwacye ac moul ke acn in muhta puhsisacl ke eria puhs fin facluh oacna inge ke ohfohs luhlahp ke Alu fin acn Salt Lake. Leum Sifacna El fahk, “tu yen luo kuh tolu tukeni in Ek, nga muta in masrlolos.”⁴

Kuht kuh in us puhla se ke Alu an wi kuht ke acn nuhkwewa kuht som nuh we: ke orekma, ke lutlut, ke muhtwacta, ac yohk na in lohm sesr. Oasr ac wo lasr kuh in fal in oruh kuhtuh ma ke acn ma kuht sokwack muh acn muhtahl uh.

Nga esam sie sramsram luhk yurin sie kawuck suc tiac na mempucr ke alu lasr uh. El lut in lotwelah lah oacna sie mwet suwohswohs ke Alu lasr kuh in eis pristut. El siyuck, “Tuhsruhk mwet ekahsr sruok ki luhn pristut ma oasr ke ward lom an?”

Nga topuk, “Inmahsrlon 30 ac 40.

Fohsack, el kampare, “Ke alu luhk ah, oasr prist se fanna lasr. Efuh kom enenuh prist puhkantwen ke lotutacng in Sacnri uh?”

Pwacr ke kihsen siyuck lal, nga puhlah moklweyuck in topuk, “Nga insese nuh sum. Nga tiac nuhnkuh muh kuht enenuh mwet puhs ma sruok ki luhn pristut ke alu ke Sacnri. Tuhsruhk kuht enenuh in oruh sie mwet sruok pristut ke lohm nuh kwewa. Na fin wacngihn mwet sruok pristut ke sie lohm, mwet sruok pristut sahyac uh pahngonyuck in karihngihn ac luti sucu sacn.

Ma lasr uh tiac pa in wina Alu ke sacnri. Ahkfuhlwact lasr muhtwacack ke kais sie lwen ke wik, acn nuhkwewa kuht oasr we ac in ma nuh kwewa kuht oruh. Lohm sesr yohkna pa acn se ma kuht oruh luhlahlfongi lasr we.⁵ Kuhtuh pacl uh kuht pruhe in lohm sesr, kuht insewowo, kuht luti kahs luhn God, ac kuht kuhlwacnsap ke luhngse pwacye. Nga kuh in fahkwack ke puhla luhk sifacna lah lohm sesr el acn muhtahl ma kuh in sesseslah ke Nguhn—yohk, ac finne yohk liki kuhtuh pacl, ke acn muhtahl in alu wo lasr.

Nga usot mwe lohoh lah Alu se inge pa Alu luhn Jisus Kraist. Kuh ac ma enenuh kac tuhkuh ke orekma lwen nuh kwewa luhn Mwet Tuhma Lutlut miliacn Lal suc insacnweacng ke kais sie lwen in ukwe srihkasrak wo Lal ke karihngihn mwet sahyac. Kraist El moul ac El kol Alu se inge. Prestuhn Russell M. Nelson el mwet pahluh se ma El suleyucklac in kol ac luti kuht ke pacl lasr uh. Ke ma inge nga fahkwack ke inen Jisus Kraist, amacn.