Aramas Akan me Keieu Kesempwal

Ansou me se kaukaunop kokoudahn Tehnpas Sarawi en Paris France, I lelohng irair ehu me I sohte pahn manokehla. Ansou me sahpw en tehnpas sarawio dierekdahr, nan pahr 2010, Kaun en kahnimwo peki ma se kak tuhpene pwehn esehla duwehn Mwomwohdisoht. Tuhpenehu wia ehu kahk pwehn alehdi mweimwei en kawada ihmw. Se kaunopada dahme se pahn kak kasalehiong irail nan kasdo me iangahki kilel kaselel kan en Tehnpas Sarawi kan en Mwomwohdisoht. Dahme I kasik me kaselel en wiepen ihmw ko pahn pwungohng oh pahn kak kahrehiong kaun en kahnihmwo en utung aht pekipeko.

I pwuriamweiki, Kaun en kahnimwo kosoia me ieremen sen kasalehda dahme se kaunopadahr pwehn kasalehiong irail, pwe ih oh iengeh kan men wia pein arail ropirop pwehn kak esehla mwomwohdiso dah ieu me se towehda. Sounpwung ehu mwuri, re pwurehng luke kiht sen iang karonge repwoht me kohsang rehn emen lih me wia soun sawas en kahnihmwo me wia emen sounpadahk en poadopoad en palien sarawi. E kosoia, “Mwohn mehkoaros se men esehla ihs me wia tohn amwail mwomwohdisohn. Keieu, se iang towehda ehu amwail sarawi en kamadipw sarawi. Se mwohndi ni kapio oh song en tehk mwahu irail akan me iang towe sarawio oh dahme irail wiewia. Se ahpw pil tuhong mehn mpemwail kan—irail akan me koukousoan limwahn amwail Stake center—oh kiht eri idek rehrail soangen aramas dah kei kumwail Mormon kan.”

“I ekis ahneki pepehm en saloh, iahpw idek, “Eri ia amwail pasapeng?” E sapengki, “Se diarada me Mwomwohdisohn Sises Krais en Souleng en Imwin Rahn Akan me keieuhn karanih sapwelimen Sises Krais Mwomwohdiso me e kawada mahso.” Kerenieng ien uhongada oh kosoia me, “E sapwung! Kaidehn mwomwohdiso me keieuhn karanih; ahpw iei Mwomwohdisohn Sises Krais—Mwomwohdisohute, Mwomwohdiso mehlelo!” Ahpw I uhdi oh sohte kosoia ahpw I kapakap loaleiet pwehki kalahngan wet. Kaun en kahnimwo ahpw kesehkin kiht me sang ni dahme re diaradahr, ih oh ienge kan sohte pahn uhong kokoudahn tenpas sarawio nan arail kousapwo.

Rahnwet, ansou koaros me I kin medewe rahn kopwuriamweio, I kin ahneki pepehm en kaping ong kaun en kahnimwo pwehki marain oh ngehn en kasawiada mwahu me mih reh. E ese me e sohte anahne en kilang mwomwen wiepen tehnpas sarawi kan oh pil ia uwen koasoandi mwahu ahpw sang ni loaloapwoat en irail towe kan, me kin nanantihong rahn koaros en kin idawehn karasaras en Sises Krais.

Wehwehn Mwomwohdisoht kak poahsoanda sang ire ieu nan Pwuken Mormon me kosoia: “Oh … irail [me wehwehki irail sapwellimen Kauno Wahnpoaron kan] me pepdaislahr ni mwaren Sises Krais kin adaniki mwomwohdiso en Krais.”¹

De pilehu, aramas me keieuhn kesempwal nan mwomwohdisoht. Iei kumwail Sapwellimen Kauno soun papah kan—irail akan me kin poakohng oh kin idawehn Ih oh me aledahr Mware sang ni Inou sarawi.

Presiden Russell M. Nelson karasahieng mwomwohdisoht sdohsa kaselel pwoat. Kitail koaros kin pereniki ma waratail sdohda kan kin mwakelekel oh lingan. Ahpw sdohsa sohte wiawihda pwehn wia mehn kasansal me kaselel; Ahpw e wia mehn wa aramas.² Pil ni soangen mwohmwohte, kitail tohn mwomwohdisoht kin pereniki ahneki wasahn kaudok me kaselel oh mwakelekel, oh kitail pil kin pereniki wia soangen kemwekid kei me kin pweida mwahu. Ahpw soahng puwkat koaros wiahte mehn sawas kei. Atail pwukoah keieuhn kesempwal iei en luke emen emen Sapwellimen Koht pwutak oh serepein en kohdo rehn Krais oh kaweid irail nan ahl en inouo. Sohte mehkot kesempwalsang met. Atail doadoahk iei irail aramas oh inou kan.

Ahd me kohieng Mwomwohdisoht sang ni kaudiahl sou wia mehkot kesempwal ehu pwehki e kolokol soahng riau me keieu kesempwal nan inou kan koaros en rongamwahuo? Keieu iei Mwaren Sises Krais. Mwomwohdisoht wia Sapwellime, oh Sapwellime Tomwo oh inou kan iei ihte ahl ong mour soutuk oh lapalapala. Keriaun ahd iei Kitail: Souleng en Imwin Rahn Akan, de pil ehu, Sapwellime sounkadehde kan oh sounpapah kan.

I esehla duwen kesempwal en kin medewehte irail aramas akan ansou me I wia Stake Presiden men nan France. Ansou me I tapiada wia pwukoah wet, I medewehda soangen koasoandi mwahu kei me inenen apwal en wiawi ong Stake o: wiawihdahn ekei ward kapw, ihmw sarawi kapw, oh pil kokoudahn tehnpas sarawi nan wasahu. Sohte ehute koasoandi mwahu pwukat pweida ansou me I kommoaldi, sounpar weneu mwuri. E kakete kihongie pepehm en sohte pweida ahpw, erein sounpar weneuo, ahi koasoandi ko wekila.

Nindoken ahi wie mwowmwohd powe rahn me I pahn kommoaldio, I ahnekihdi pepehm kehlail ehu pepehm en kaping oh pweida. I kilenglahng mesen irail meh epwiki kei me iang towehda rahno. I kak taman ngehn sarawi me I kehn sang emen emen irail.

I kilang irail riei pwutak oh serepein kan me pepdaislahr, irail akan me pein ngehi kamanahla neirail doaropwehn mweimwei kan pwe ren kak alehdi tiahk sarawi kan nan tehnpas sarawi, oh irail me pwulopwul kan oh pwopwoud kan me I kasarawilahr de kakomoalehdi sang arail misin. Pil tohto irail akan me I kaweidehr nan arail kahpwal kan oh kasongsong kan. I ahnekihdi pepehm en limpoak laud ong irail koaros. I diarada peren sang ni ahi papah irail oh ahneki kaping pwehki arail mehleliong oh kin pwoson Sounkomouro.

Presiden M. Russell Ballard padagnki, “Dahme keieu kesempwal nan pwukoah kan en Mwomwohdisoht iei irail aramas akan ahpw kaidehn totohn towe kan de ehupene kan me kin wiawi—kasukuhl ong emen emen ni duwen dahme Sounkomouro wiahier—kalaudlahr oh kakehlailahr oh wekideklahr.”³

Riei ohl oh lih akan, kitail kehlail nan rongamwahu wet? De kitail soupisek nan Mwomwohdisoht? Me keieu kesempwal iei en idawehn Sounkomouro ni soahng koaros. Ma kitail wia met, kitail pahn kalaudehla atail medewehte emen emen ahpw kaidehn en kin wia pwukoah kan oh kemwekid teikan.

Mie pak ehu kumwail medewe ma Soukomouro pahn pwarek amwail ward de branch kan rahn sarawi me pahn wadedo? Dahme E pahn wia? E pahn kediropwiki en ese ma kilel kan mwahu de ma sehr kan koasoandi mwahu nan perehu? De E pahn kilangada emen aramas me E kak poakohng, kasukuhlih, oh kapaiada? Mwein E pahn rapahkihda emen towe kapw de kempoakepah me E kak kasamwoh, rie ohl de lih me soumwahu oh anahne sawas en nsenamwahu, de aramas pwulopwul men me anahne sawas en kakehlail oh kakehlaka.

Soangen wasahn sukuhl da me Sises pahn pwarek? I sohte pahn pwuriamweiki ma e tepte pwarek irail seri kan. Mwein E pahn kelepwikihdi oh koasoaieng irail. E pahn kasalehiong irail ah limpoak, soai ong irail, kapingkihong irail arail mahlen kan, oh kadehdeiong irail duwen Seme Nanleng. Ah mwekid pahn mengei, karakarahk, oh sohte aklapalap. Kitail kak wia duwehte?

I inoukihong kumwail me ma kumwail pahn nantihong en kin idawehn Kauno ansou koaros, sohte mehkot pahn kesempwal sang amwail pahn rapahkihda irail akan me ke kak sewese oh kapaiada. Nan imwen sarawio, ke pahn kin nantihong en padahkohng emen emen oh kin sair arail mohngiong kan. Ke pahn kin medewehte en kin kakehlailiala kaweid en ngehn sarawi, ahpw kaidehn en kin koasoanehdi soangen kemwekid ehu me unsek, en kin padahk ong emen emen towe kan ahpw kaidehn en kin kilelehdi ia uwen tohtohn irail akan me ke pwarekehr. E sohte pahn pid duwen pein kowe ahpw irail akan me kitail kin kahdaneki riatail.

Ekei pak kitail kin kosoia mwomwen kohla sarawi. Ahpw Mwomwohdisoht sohte wiahte ihmw ehu de wasa ieu. E uhdahn mehlel oh momour wasa kan me paisuwed nan sampah duwehte poahsoankaun en Mwomwohdiso nan kanihmw en Salt Lake. Pein kauno mahsani, “Pwe wasa kis me riemen de silimen kin kohpene ie ni mwarei, I kin iang irail mih wasao.”⁴

Kitail kin uhkihda mwomwohdisoht wasa koaros me kitail kin kohla ie, wasahn doadoahk kan, imwen sukuhl kan, ansoun mwemweit kan, oh ni mehlel nan imwatail kan. Pein atail wiewia oh mwomwetail kak itar en wiahda wasa koaros me kitail kin mihie en wia wasa sarawi.

I tamanda ansou ehu me I koasoaieng emen kempoakepahi me sohte iang atail palien lamalam. E pwuriamweikihla ah esehda me emen emen ohl me warohng nan Mwomwohdisoht kak alehdi Prisduhd. E idek, “Ahpw ohl depe me kolokol prisduhd nan ahmw wardo?”

I sapengki, “Nanpwungen 30 oh 40.”

E ekis sawehwehki, ih doula, “Nan mwomwohdiso me I iang, emente ohl me wia priest. Dahme kumwail anahnehki soangen diren priest en rahn sarawi kan?”

I medewe mwahu ah kalelapako, ngehi ahnekihdi pepehm ehu me I pahn sapengki, “I pwungki dahme ke ndahn. I sohte medewe me se anahne soangen diren ohl me kolokol prisduhd ko rahn sarawih kan. Ahpw se pil anahne en mie ohl emen me kolokol prisduhd nan ihmw koaros. Oh ansou me sohte me kolokol prisduhd nan ihmw ehu, ekei ohl me kolokol prisduhd kin apwalih oh padahkohng peneineio.

Aht mwomwohdisoht sohte kin ongete Rahn Sarawi. Se kin kaudok ohng ih rahn koaros nan wihk koaros, wasa koaros me se mih ie oh soahng koaros me se kin wia. Ahpw mehlel nan imwat kan “me wia poahsoan en aht pwoson.”⁵ Ansou koaros se kin kapakap, se kin kapai, onop, oh kin padahngki mahsen en Koht, oh se kin papahngki limpoak mehlel. I kak kadehdehki sang ni pein dahme I esehier me imwatail kan wia wasa sarawi kei wasa me Ngehn Sarawi kin mih ie—Me duwehte, oh ekei pak kin laudsang wasa kan me kitail kin patepene oh kaudok ie.

I kadehdehki me Mwomwohdisoht wia Mwomwohdisohn Sises Krais—Kakehlepe oh kaunsekpe kin kohsang ni wiewiahn irail towe kan me tohtohki rar kei me wia Sapwellime Sounpapah kei me kin nantihong rahn koaros en kin idawehn Sapwellime Karasaras unseko sang ni arail kin sewese mehteikan. Krais ketin ieias, oh E kin kaweid Sapwellime mwomwohdisoht. Presiden Russell M. Nelson wia soukohp men me Kauno piladahr pwehn kaweid oh kahluwai kitail rahn pwukat. Mepwukat koaros I kadehdehki ni mwaren Sises Krais, amen.