Yumi Mas Gohed
Yu wantem moa blong obei taem yu stap tingbaot mo tingtingbak long wanem yu bin filim long ol las tu dei ia.
Ol brata mo sista we mi lavem. Taem yumi stap kam long klosem histri konfrens ia, mi joenem yufala blong talem tangkyu long Lod from daereksen blong Hem mo paoa blong Hem blong lidim yumi tru long insperesen. Miusik i bin naes tumas mo i leftemap tingting. Ol mesej oli bin leftemap tingting, be !oli jenisim laef!
Long wan tabu asembli, yumi bin sastenem wan niu Fas Presidensi. Yumi bin putum tu gudfala man insaed long Kworom blong Olgeta Twelef Aposol. Mo eitfala niu Jeneral Atoriti Seventi oli bin singaotem olgeta.
Naoia, wan fevret hym i raonemap niufala tingting blong yumi, jalenj blong yumi, mo wok we yumi bin kasem blong go fored:
Yumi mas gohed blong mekem wok blong God,
Taem we laef i finis, yu winim blesing blong God,
Taem we yumi faet, yusum wan strong swod,
Swod ia, nem blong hem, trutok.
No fraet, spos enemi i jikim yu;
Gohed, Lod God i stap wetem yumi.
Taem ol man blong sin oli tok jes talem se,
Papa God, nomo mi mas obei.1
Mi askem strong long yufala blong stadi long ol mesej blong konfrens ia plante taem—iven we yufala i ripripitim—long ol nekis sikis manis. Wetem tingting, lukaotem sam wei blong yusum ol mesej ia long famli haos naet blong yufala, long gospel tijing blong yufala, long storian blong yufala wetem ol famli mo fren, mo iven, long ol storian blong yufala wetem olgeta we oli no biliv olsem yumi. Plante gudfala pipol bae oli save mekem folem ol trutok we oli tijim insaed long konfrens ia, taem yumi tokbaot wetem lav. Mo bambae yu wantem moa blong obei taem yu stap tingbaot mo tingtingbak long wanem yu bin filim long ol las tu dei ia.
Jeneral Konfrens ia i makem stat blong wan niu taem blong givhan. Lod i mekem ol impoten jenis long wei we yumi stap kea long wanwan long yumi. … Ol sista mo brata—olfala mo yangfala—bambae oli givgivim seves long wanwan long olgeta long wan niu, tabu wei. Ol kworom blong ol elda bae oli kam strong moa blong blesem laef blong ol man, ol woman mo ol pikinini raon long wol. Ol Rilif Sosaeti sista bae oli gohed blong givhan olsem olgeta nomo oli save mekem wetem lav, i go kasem we ol yangfala sista oli joenem olgeta taem oli givim wok long olgeta.
Mesej blong yumi long wol i simpol mo i ones: mifala i stap invaetem evriwan long ol pikinini blong God, long tugeta saed blong vel, blong kam long Sevya blong olgeta, blong kasem ol blesing blong tabu tempol, gat wan glad we i gogohed blong stap, mo kwalifae from laef we i no save finis.2
Blong save kam olsem god long en, i nidim blong yumi mas tru fulwan naoia long ol kavenan we yumi mekem, mo long ol odinens we yumi kasem insaed long haos blong Lod. Naoia i stap, yumi gat 159 tempol we i open, mo oli stap bildim moa yet. Yumi wantem blong tekem ol tempol oli go kolosap long membasip blong Jos we i stap gro. Mekem se, naoia, mifala i glad blong anaonsem ol plan blong bildim seven moa tempol. So naoia, mifala i glad blong anaonsem plan blong bildim ol tempol long ol ples ia: Salta, Ajentina; Bengaluru, India; Managua, Nikaragwa; Kagayan de Oro, Filipin; Leiton, Yuta; Rijmon, Vijinia; mo wan moa long wan taon we bae oli jusum yet long Rasia.
Ol dia brata mo sista. Taem oli bildim ol tempol ia, maet bae i no jenisim laef blong yufala, be taem blong insaed long tempol, yes. Long sem tingting ia, mi blesem yufala blong faenem ol stret samting ia we yufala i save livim i stap long saed blong mekem se yufala i save spendem moa taem insaed long tempol. Mi blesem yufala wetem moa fasin blong agri mo wetem lav insaed long ol hom blong yufala, mo wan moa dip filing blong wantem kea long ol famli rilesensip we oli no save finis. Mi blesem yufala wetem wan fet we i stap gro long Lod Jisas Kraes, mo wan paoa we i moa bigwan blong save folem Hem olsem ol tru disaepol blong Hem.
Mi blesem yufala blong leftemap voes blong yufala wetem testemoni, semmak olsem mi stap mekem naoia, !se yumi joen i stap long wok blong God we I Gat Olgeta Paoa! Jisas Hem I Kraes. Hemia i Jos blong Hem, we Hem i lidim tru long ol wokman we Hem i bin jusum. Mi testifae olsem, mo talemaot lav blong mi long wanwan long yufala, long tabu nem blong Jisas Kraes, amen.