Cia Peb Sawv Daws Ua Vajtswv Tes Dej Num
Nej yuav haj yam xav mloog lus thaum nej nco thiab xav txog tej yam uas nej tau hnov ob hnub no.
Kuv cov kwv tij thiab cov muam, thaum peb muab lub rooj sab laj no xaus, kuv koom nrog nej ua tus Tswv tsaug rau Nws txoj kev qhia peb thiab kev tshoov siab. Cov nkauj yeej zoo mloog thiab txhawb nqa peb. Tej zaj lus twb txhawb peb lub siab, thiab tau hloov peb lub neej!
Nyob hauv rooj sab laj dawb huv peb tau txhawb nqa pom zoo rau ib Thawj Pawg Thawj Tswj Hwm tshiab. Peb tau tso ob tug txiv neej zoo rau hauv Pawg Kaum Ob tug Thwj Tim. Thiab peb tau hu yim tus Tuam Thawj Coj Xya Caum hnub no.
Muaj ib zaj nkauj qhuas Vajtswv uas qhia ntsiab lus txog peb txoj kev cog lus uas peb rov ua dua tshiab, thiab peb txoj kev txib kom mus tom ntej:
Cia peb sawv daws sib zog ua Vajtswv tes num,
Kom peb thiaj tau nrog Vajtswv nyob puag saum ntuj;
Thaum peb ntaus rog yog peb yuav tuav ntaj txhua tus,
Tuav ntaj ntawm txoj lus tseeb.
Txhob ntshai, thaum tus yeeb ncuab tsim txom peb;
Yexus, nws yeej yuav tsis tso peb tseg.
Peb yuav tsis mloog Dab Ntxwg Nyoog cov lus ntxias,
Vim peb yuav mloog Vajtswv tib leeg tiag.1
Kuv ntuas nej kom ib sij kawm tej zaj los ntawm lub rooj sab laj no—ntau zaus—thaum lub caij rau hli mus tom ntej. Ua tib zoo nrhiav kev kom siv tej zaj lus no nyob hauv nej tsev neeg hmo ua ke, thaum nej qhia txog txoj moo zoo, thaum nej sib tham nrog tsev neeg thiab phooj ywg, thiab thaum nej sib tham nrog cov uas tsis ntseeg li peb. Ntau tus neeg zoo yuav nyiam tej lus tseeb uas peb tau qhia nyob hauv lub rooj sab laj no thaum peb qhia tej ntawd nrog kev hlub. Thiab nej yuav haj yam xav mloog lus thaum nej nco thiab xav txog tej yam uas nej tau hnov ob hnub no.
Lub tuam rooj sab laj no yeej qhib kev rau ib lub caij nyoog tshiab uas peb yuav txhawb pab lwm tus. Tus Tswv twb tau hloov tej yam uas tseem ceeb rau qhov uas peb ib leeg saib xyuas ib leeg. Cov kwv tij thiab cov muam—tsis hais cov laus thiab cov hluas los yog—yuav siv ib txoj kev tshiab thiab dawb huv ntxiv kom ib leeg pab ib leeg. Tej pawg txwj laug yuav muaj zog ntxiv kom foom koob hmoov rau cov txiv neej, cov poj niam thiab cov me nyuam nyob thoob plaws lub ntiaj teb. Cov muam nyob hauv Koom Haum Niam Tsev tseem yuav txhawb pab lwm tus nrog lawv txoj kev hlub, thiab muab cib fim rau cov ntxhais hluas koom nrog lawv thaum tsim nyog txib lawv ua li ntawd.
Peb zaj lus rau lub ntiaj teb yeej yooj yim thiab ncaj ncees: peb caw tag nrho Vajtswv cov me nyuam nyob ob sab ntawm daim ntaub thaiv kom los cuag lawv tus Cawm Seej, txais cov koob hmoov ntawm lub tuam tsev dawb huv, muaj kev xyiv fab, thiab ua neeg tsim nyog txais txoj sia nyob mus ib txhis.2
Peb yuav tsum ua raws nraim li peb tej kev khi lus thiab cov kab ke uas peb txais nyob hauv tus Tswv lub tuam tsev yog peb xav txais kev tsa nto thaum kawg. Lub sij hawm no, peb muaj 159 lub tuam tsev uas tau qhib, thiab tshuav ntxiv uas tseem ua tam sim no. Peb xav kom cov mej zeej ntawm lub Koom Txoos uas muaj coob zuj zus tuaj nyob ze ib lub tuam tsev. Yog li ntawd peb zoo siab tshaj tawm txog qhov uas peb xav ua xya lub tuam tsev ntxiv. Xya lub tuam tsev ntawd yuav nyob hauv tej qhov chaw no: Salta, Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; thiab ib lub nroog uas peb tseem tsis tau paub nyob hauv Russia.
Kuv cov kwv tij thiab cov muam, kev ua cov tuam tsev no tej zaum yuav tsis hloov nej lub neej, tiam sis lub sij hawm uas nej siv hauv lub tuam tsev yeej yuav hloov nej lub neej. Yog li ntawd, kuv foom koob hmoov rau nej kom paub tej yam uas nej tso tseg tau nej thiaj siv tau sij hawm ntxiv nyob hauv lub tuam tsev. Kuv foom koob hmoov rau nej kom nej koom siab thiab muaj kev hlub nyob hauv nej tsev thiab xav saib xyuas nej txoj kev sib raug zoo hauv nej tsev neeg nyob mus ib txhis. Kuv foom koob hmoov rau nej kom nej muaj kev ntseeg tus Tswv Yexus Khetos ntxiv thiab kom nej txawj coj raws li Nws vim nej yog Nws cov thwj tim tseeb.
Kuv foom koob hmoov rau nej kom nej tsa suab ua tim khawv, zoo li kuv ua tam sim no, hais tias peb rau siab ua Vajtswv tus uas Muaj Hwj Chim Tag Nrho tej hauj lwm! Yexus yog tus Khetos. Nov yog Nws lub Koom Txoos, uas Nws coj dhau los ntawm Nws cov tub qhe uas Nws tau muab tsa. Kuv ua tim khawv, nrog kuv txoj kev hlub rau nej txhua tus li no, los ntawm Yexus Khetos lub npe dawb ceev, amees.