2010–2019
Sa’ xk’anjel li Dios chiqayal tz’aqal qaq’e
Abril 2018


Sa’ xk’anjel li Dios chiqayal tz’aqal qaq’e

Li rajom eech’ool chi paab’ank taanimob’resiiq naq teejultika ut teek’oxla li xereek’a chiruheb’ li wiib’ chi kutan a’in.

Ex was wiitz’in raarookex inb’aan, naq nokowulak anajwan sa’ xraqik li xnimal ru ch’utub’aj-ib’ a’in, eerochb’een ninb’antioxi re li Qaawa’ lix b’eresinkil ut lix musiq’anb’il na’leb’. Ch’ina-useb’ li b’ich li xe’xwaklesi li qamusiq’. Ink’a’ ka’ajwi’ xqab’i li aatin aj waklesinel ch’oolej anajwan, a’an aj b’an wi’ aatin li neke’jalok yu’amej!

Sa’ li ch’utlajik re tiik ruhil k’a’uxlej xqaxaqab’ xwankil jun ak’ Xb’eenil Awa’b’ejil. Wiib’eb’ li chaab’il winq xe’ok sa’ lix Molameb’ li Kab’laju chi Apostol. Ut xe’b’oqe’ waqxaqib’eb’ li ak’Jolomil aj B’eresinel aj Setenta.

Anajwan, jun reheb’ li b’ich jwal nawulak chiqu taa’ak’ob’resinq re lix kawilal qach’ool, li qak’anjel, ut li qateneb’ahom sa’ xtiikob’resinkil qib’ chi uub’ej:

Sa’ xk’anjel li Dios chiqayal tz’aqal qaq’e;

Re naq sa’ roso’jik jun maatan A’an tixke;

Sa’ xkolb’al li tiik jun li ch’iich’ ak k’eeb’il qe,

A’ lix yok’leb’ ch’iich’ li yaal.

Meexuwa li xik’ nekexril.

Kawo, li Qaawa’ qochb’een naqil.

Miqab’iheb’ li maa’us ut li te’xye,

Ka’ajwi’ li Dios tixk’am qab’e.1

Nawelaji cheru naq teetz’il rixeb’ li esil re li ch’utub’aj-ib’ a’in chi kok’ aj xsa’—chi k’iilasutinb’il—chiruheb’ li waqib’ po chalkeb’ re. Sik’omaq chi anchal eek’a’uxl chan ru teeroksiheb’ li esil a’in sa’ li Q’ojyin re Junkab’al, sa’ xk’utb’al li evangelio, sa’ aatinak rik’in lee junkab’al ut lee ramiiw, ut jo’kan ajwi’ sa’ aatinak rik’ineb’ li ani maji’ qakomon sa’ li qapaab’aal. Wankeb’ naab’al li chaab’il kristiaan li sa te’xk’uleb’ li yaalil na’leb’ k’utb’il sa’ li ch’utub’aj-ib’ a’in wi k’eeb’il reheb’ rik’in rahok. Ut li rajom eech’ool chi paab’ank taanimob’resiiq naq teejultika ut teek’oxla li xereek’a chiruheb’ li wiib’ kutan a’in.

Li jolomil ch’utub’aj-ib’ a’in natikib’ank re jun ak’ xq’ehil re rilb’aleb’ li komon. Li Qaawa’ ak xjal chan ru naqaqil qib’ chiqib’il qib’. Ex was wiitz’in—li tiix jo’eb’ ajwi’ li saaj—te’rileb’ rib’ chirib’ileb’ rib’ chi ak’il ut rik’in santilal. Te’kawob’resiiq lix molameb’ li xb’eenil re rosob’tesinkil xyu’ameb’ li winq, li ixq, ut li kok’al chiru li ruchich’och’. Eb’ li ixq sa’ li Komonil re Tenq’ank toj te’k’anjelaq rik’in rahok ut jo’ ka’ajwi’ naru chiruheb’, xk’eeb’al ajwi’ xhoonaleb’ li saaj ixq re te’k’anjelaq rochb’eeneb’.

Li esilal naqak’ut chiru li ruchich’och’ saqen ru ut maak’a’ xb’alaq’; naqab’oq chixjunileb’ li ralal xk’ajol li Dios arin sa’ ruchich’och’ ut li ak kamenaq naq che’chalq rik’in li Kolonel, naq che’xk’uleb’ li osob’tesink re li santil ochoch, naq che’saho’q chi junelik, ut naq che’wanq chi k’ulub’ejaqeb’ re xk’ulb’al li junelik yu’am.2

Li kolb’a-ib’ sa’ li taqenaqil loq’al naraj ru naq anajwan naqapaab’eb’ chi tz’aqal li qasumwank noko’ok wi’ ut li k’ojob’anb’il k’anjel naqak’ul sa’ li rochoch li Qaawa’. Anajwan, wankeb’ 159 li santil ochoch li yookeb’ chi k’anjelak, ut toj yoo chi kab’laak junjunq chik. Naqaj xkab’lankil xkomoneb’ chik li santil ochoch re naq nach’eb’ chik li qakomon rik’ineb’. Jo’kan ut, chi sa sa’ qach’ool naqayaab’asi naq too’ok chixkab’lankil wuqub’eb’ chik li santil ochoch. Eb’ li santil ochoch a’in te’kab’laaq sa’eb’ li na’ajej a’in: Salta, Argentina; Bengaluru, India; Managua, Nicaragua; Cagayan de Oro, Filipinas; Layton, Utah; Richmond, Virginia; ut jun nimla tenamit maji’ sik’b’il ru aran Rusia.

Ex was wiitz’in raarookex inb’aan, maare ink’a’ te’jalaaq eeyu’am rik’in lix kab’lankileb’ li santil ochoch a’in, a’b’anan te’jalaaq b’an eeyu’am naq neke’wulak chi k’anjelak sa’eb’ li santil ochoch. Rik’in li musiq’ej a’an, nekexwosob’tesi naq teek’e reetal li k’a’ru tento teekanab’ re naq texruuq chi wulak sa’ li santil ochoch chi kok’ aj xsa’. Nekexwosob’tesi rik’in xkomon chik li sahil wank ut rahok sa’ lee rochoch ut jun rajom eech’ool nimob’resinb’il chik re xch’olaninkil lee junelikil komonil sa’ junkab’al. Nekexwosob’tesi rik’in xkomon chik lee paab’aal chirix li Qaawa’ Jesukristo ut xkomon chik lee seeb’al chixtaaqenkil a’an jo’ tz’aqal xtzolom.

Nekexwosob’tesi chixtaqsinkil xyaab’ lee kux sa’ xch’olob’ankil xnawom eech’ool, jo’ yookin anajwan, naq k’eeb’il qach’ool sa’ xk’anjel li Nimajwal Dios! Li Jesus a’an li Kristo. A’an a’in lix Iglees, li naxb’eresi rik’in lix moos sik’b’ileb’ ru xb’aan. Jo’kan ninch’olob’ xyaalal, rik’in rahok choq’ eere chejunilex, sa’ lix santil k’ab’a’ li Jesukristo, amen.

Eb’ li raqalil

  1. “Sa’ xk’anjel li Dios chiqayal tz’aqal qaq’e,” Eb’ li B’ich, ajl 155.

  2. Ch’olob’anb’il sa’ Tzol’leb’ ut Sumwank 14:7 jo’ “li maatan li q’axal nim re chixjunileb’ lix maatan li Dios.”