Ara mai tātou

E au mau taea’e, e au mau tuahine here, ’ua tae tātou i te hope’a o teie ’āmuira’a fa’ahiahia, tē ’āpiti atu nei au ia ’outou nō te ha’amāuruuru i te Fatu nō tāna arata’ira’a ’e tōna mana fa’auru.E mea nehenehe roa ’e te putapū te mau hīmene.’Aita te mau parau poro’i i ha’aputapū noa, ’ua tāui ato’a rā i te orara’a !

I roto i te ’āmuira’a hanahana ’ua pāturu tātou i te hō’ē Peresidenira’a Mātāmua ’āpī.E piti nā ta’ata fa’ahiahia tei tu’uhia i roto i te pupu nō te Tino ’Ahuru Ma Piti ’āpōsetolo. ’E e va’u Hitu ’Ahuru Hui mana fa’atere rahi tei pi’ihia.

I teienei, tē vai nei hō’ē hīmene maita’i roa, ’ei pū’ohura’a i tā tātou fa’aotira’a ’āpī, tā tātou tītaura’a, ’e tā tātou fa’auera’a ’a haere ai tātou i mua :

Te fa’aitoito atu nei au ia ’outou ’ia tuatāpapa pinepine i te mau parau poro’i o teie ’āmuira’a—noa atu ē, nā ni’a iho noa—i roto i nā ’āva’e e ono i muri nei. ’A ’imi māite i te mau rāve’a nō te fa’aō i teie mau parau poro’i i roto i tō ’outou mau pō ’utuāfare, tā ’outou ha’api’ira’a ’evanelia, tā ’outou mau ’āparaura’a ’e tō ’outou ’utuāfare ’e tō ’outou mau hoa, ’e tae noa atu i tā ’outou mau ’āparaura’a ’e te mau ta’ata e ’ere i tā tātou fa’aro’o. E rave rahi te ta’ata e pāhono i te mau parau mau i ha’api’ihia i roto i teie ’āmuira’a mai te mea ē, e pūpūhia te reira ma te here.E ha’amaita’ihia tō ’outou hina’aro ia ha’apa’o mai te mea ē, e ha’amana’o ’e e feruri māite ’outou i ni’a i te mau mea tā ’outou i fāri’i i roto i te ’ā’au, i roto i nā mahana e piti i ma’iri iho nei.

’Ua riro teie ’āmuira’a rahi ’ei ’ōmuara’a nō te hō’ē tau ’āpī i roto i te parau nō te aupurura’a. ’Ua fa’a’ite mai te Fatu i te tahi mau fa’atanotanora’a faufa’a rahi i roto i tā tātou aupurura’a ia vetahi ’ē. E tāvini te mau tuahine ’e te mau taea’e—te feiā pa’ari ’e te feiā ’āpī—ma te rāve’a ’āpī ’e te mea mo’a atu. E ha’apūaihia te mau pupu peresibutero nō te ha’amaita’ira’a i te orara’a o te mau tāne ’e te mau vahine ’e te mau tamari’i ’ati a’e i te ao nei. E tāmau noa te mau tuahine nō te Sōtaiete Tauturu i te tāvini ma te ’aravihi ’e te aroha mau ’e ma te ’āmui mai te mau feiā ’āpī tamāhine mai tei fa’ata’ahia atu.

E mea ’ōhie roa ’e te ’ā’au tae tā tātou parau poro’i i tō te ao nei : tē ani manihini nei tātou i te mau tamari’i ato’a a te Atua i nā pae e piti o te pāruru ’ia haere mai i tō tātou Fa’aora ra, ’ia fāri’i i te mau ha’amaita’ira’a o te hiero mo’a, ’ia fāri’i i te ’oa’oa vai maoro, ’e ’ia fāri’i i te ora mure ’ore.²

E tītau te fa’ateiteira’a i tō tātou ha’apa’o maita’i roa, i teienei, i te mau fafaura’a tā tātou e rave nei ’e i te mau ’ōro’a tā tātou i fāri’i i roto i te fare o te Fatu.I teie mahana, e 159 hiero e ’ohipa nei ’e tē patuhia ra e rave rahi atu ā. Tē hina’aro nei mātou e ha’afātata i te hiero i te mau melo o te ’Ēkālesia e tupu rahi noa nei. Nō reira, tē ’oa’oa nei mātou i te fa’a’ite atu i te ’ōpuara’a e patu i te mau hiero i te mau fenua i muri nei e hitu. E patuhia te reira mau hiero i te mau vāhi i muri nei : i Salta (Rāparata) ; i Bengaluru (Inidia) ; i Managua (Nicaragua) ; i Cagayan de Oro (Philipino) ; i Layton (Utaha) ; i Richmond (Virginia) ; ’e i roto i te ’oire rahi e fa’a’itehia atu i Rusia.

E au mau taea’e, e au mau tuahine here ē, e’ita paha teie mau patura’a hiero e taui i tō tātou orara’a, nā te taime rā tātou i roto i te hiero e nā reira. Nō reira, tē ha’amaita’i nei au ia ’outou nō te fa’ata’a i te mau mea tā ’outou e nehenehe e tu’u i te hiti, i reira e ti’a ai ia ’outou ’ia hōro’a hau atu i te taime i roto i te hiero.Tē ha’amaita’i atu nei au ia ’outou ’ia vai te au māite ’e te here i roto i tō ’outou mau ’utuāfare, ’e te hina’aro rahi a’e ’ia aupuru i tō ’outou mau aura’a ’utuāfare mure ’ore.Tē ha’amaita’i nei au ia ’outou ’ia rahi tō ’outou fa’aro’o ia Iesu Mesia, ’e te hō’ē ’aravihi rahi a’e nō te pe’e iāna ’ei mau pipi mau nāna.

Tē ha’amaita’i nei au ia ’outou ’ia fa’ateitei i tō ’outou reo ’ei fa’a’ite-pāpū-ra’a ē, mai tā’u e nā reira nei i teienei, tei roto tātou i te ’ohipa a te Atua Mana Hope ! ’O Iesu te Mesia. Nāna teie ’Ēkālesia, tāna e arata’i nei nā roto i tōna mau tāvini fa’atāhinuhia. Tē fa’a’ite pāpū nei au i te reira, ’e tae noa atu i tō’u here ia ’outou tāta’itahi, i roto i te i’oa mo’a o Iesu Mesia ra, ’āmene.