Maaghup ug Mapaubsanon sa Kasingkasing

Sa Bag-ong Tugon, atong makat-unan ang mahitungod sa batan-ong lalaki nga adunahan kinsa nangutana ni Jesus, “Magtutudlo, unsa bay maayong buhaton ko aron makapanag-iya ako sa kinabuhing dayon?”² Ang Manluluwas unang mipahimangno kaniya sa paghupot sa mga sugo. Sunod ang Agalon mihatag sa batan-ong lalaki og dugang nga kinahanglanon nga haum sa iyang piho nga mga panginahanglan ug kahimtang.

“Kaniya mitubag si Jesus nga nag-ingon, Kon buot ikaw mamahingpit, lumakaw ka, ibaligya ang imong kabtangan, ug ang halin ihatag sa mga kabus, ug makabaton kag bahandi didto sa langit: ug unya umanhi ka ug sumunod kanako.

“Ug sa pagkadungog niini sa batan-ong lalaki, siya mipahawa nga masulub-on: kay daghan man gud siyag katigayunan.”³

Itandi ang tubag sa batan-ong lalaki nga adunahan ngadto sa kasinatian ni Amulek, sama sa gihulagway sa Basahon ni Mormon. Si Amulek usa ka kugihan ug mauswagon nga tawo nga adunay daghang kaliwatan ug kahigalaan.⁴ Gihulagway niya ang iyang kaugalingon isip usa ka tawo nga gitawag sa makadaghan nga higayon apan wala mopatalinghug, usa ka tawo nga nasayud mahitungod sa mga butang nga iya sa Dios apan wala magpakasayud.⁵ Usa ka maayo gayud nga tawo, si Amulek nabalda sa kalibutanon nga mga kabalaka sama sa adunahan nga batan-ong lalaki nga gihulagway sa Bag-ong Tugon.

Bisan pa man nga kaniadto mipatig-a sa iyang kasingkasing, si Amulek mipatalinghug sa tingog sa anghel, midawat ni propeta Alma sa iyang panimalay, ug mipakaon kaniya. Espirituhanong nahigmata siya sa dihang si Alma mibisita ug natawag sa pagsangyaw sa ebanghelyo. Si Amulek dayon mibiya “sa tanan niya nga bulawan, ug pilak, ug iyang mahalon nga mga butang … alang sa pulong sa Dios, [ug ] gisalikway niadto kinsa kanhiay iyang mga kahigalaan ug usab sa iyang amahan ug mga kaliwatan;”⁶

Unsa sa inyong hunahuna ang kalainan tali sa mga reaksyon sa batan-ong lalaki nga adunahan ug ni Amulek?

Atol sa makapagun-ob nga panahon sa gubat nga gihulagway sa Basahon ni Mormon, usa ka pagsinulatay ang nahitabo tali ni Moroni, ang kapitan sa mga sundalong Nephite, ug ni Pahoran, ang labawng maghuhukom ug gobernador sa yuta. Si Moroni, kansang mga sundalo nag-antus tungod sa kulang nga suporta gikan sa gobyerno, misulat kang Pahoran “pinaagi sa panghimaraut”⁷ ug miakusar kaniya ug sa iyang kauban nga mga lider nga walay paghunahuna, tapulan, pagpasagad, ug gani mga traydor.⁸

Si Pahoran dali untang maglagot ni Moroni ug sa iyang sayop nga mga pasangil, apan wala niya buhata. Masinabtanon siyang mitubag ug mihulagway sa usa ka rebelyon batok sa gobyerno nga wala masayri ni Moroni. Ug dayon namahayag si Pahoran:

“Tan-awa, ako moingon nganha kanimo, Moroni, nga ako wala magmaya sa inyong dako nga mga kasakit, oo, kini nakapaguol sa akong kalag. …

“… Sa imong epistola ikaw misaway kanako, apan kini walay sapayan; ako wala masuko, apan nagmaya diha sa pagkamapasayloon sa imong kasingkasing.”⁹

Unsa kahay hinungdan nga mapailubon kaayo ang tubag ni Pahoran ngadto sa mga pasangil ni Moroni?

Sa kinatibuk-ang komperensya unom ka bulan ang milabay, si Presidente Russell M. Nelson mihulagway sa iyang tubag sa pag-awhag ni Presidente Thomas S. Monson sa pagtuon, pagpamalandong, ug paggamit sa mga kamatuoran nga anaa sa Basahon ni Mormon. Miingon siya: “Naningkamot ko sa pagsunod sa iyang tambag. Lakip sa ubang mga butang, naglista ko kon unsa ang Basahon ni Mormon, unsa ang gipamatud-an, unsa ang gisupak, unsa ang gituman, unsa ang gipatin-aw, ug unsa ang gipadayag niini. Ang pagsusi sa Basahon ni Mormon sa ingon niana nga paagi makapahinuktok ug makapadasig nga buhat! Morekomendar ko niini sa matag usa ninyo.”¹⁰

Si Presidente Henry B. Eyring usab mipasabut sa kaimportante sa hangyo ni Presidente Monson sa iyang kinabuhi. Siya miingon:

“Akong gibasa ang Basahon ni Mormon matag adlaw sulod sa sobra sa 50 ka tuig. Mao nga resonable tingali nga maghunahuna ko nga ang mga pulong ni Presidente Monson alang sa laing tawo. Apan, sama sa daghan kaninyo, akong nabati ang pagdasig sa propeta ug ang iyang saad nagdapit kanako sa paghimo og mas dakong paningkamot. …

“Ang malipayong resulta alang kanako, ug sa kadaghanan ninyo, mao ang unsay gisaad sa propeta.”¹¹

Unsa kaha ang gipasabut sa diha-diha ug kinasingkasing nga mga reaksyon niining duha ka mga lider sa Simbahan sa Ginoo sa pagdapit ni Presidente Monson?

Wala ko mosugyot nga ang lig-on nga espirituhanong mga reaksyon nila ni Amulek, Pahoran, Presidente Nelson ug Presidente Eyring resulta sa usa lamang ka Kristohanong hiyas. Sa pagkatinuod, daghang susamang mga kinaiya ug kasinatian ang nagdala ngadto sa espirituhanong kahingkod nga makita sa mga kinabuhi niining upat ka halangdong mga sulugoon. Apan ang Manluluwas ug ang Iyang mga propeta mihatag og gibug-aton sa usa ka mahinungdanong hiyas nga kitang tanan kinahanglang mas makasabut ug maningkamot nga malakip sa atong kinabuhi.

Palihug bantayi ang mga kinaiya nga gigamit sa Ginoo sa paghulagway sa Iyang Kaugalingon sa mosunod nga mga kasulatan: “Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.”¹²

Sa pagtudlo niini, ang Manluluwas mipili nga mohatag og gibug-aton sa kaaghup gikan sa tanang mga kinaiya ug hiyas nga mahimo Niyang pilion.

Ang samang sumbanan makita diha sa pagpadayag nga nadawat ni Propeta Joseph Smith niadtong 1829. Ang Ginoo mipahayag, “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako.”¹³

Ang kaaghup usa ka mahinungdanong kinaiya sa Manunubos ug mailhan pinaagi sa matarung nga pagtubag, andam sa pagkamanunuton, ug lig-on sa pagpugong sa kaugalingon. Kini nga hiyas makatabang kanato nga hingpit nga mas makasabut sa mga reaksyon nila ni Amulek, Pahoran, Presidente Nelson, ug Presidente Eyring.

Sama pananglit, silang Presidente Nelson ug Presidente Eyring matarung ug abtik nga mitubag sa pag-awhag ni Presidente Monson sa pagbasa ug pagtuon sa Basahon ni Mormon. Bisan og ang duha nagserbisyo sa importante ug dayag kaayo nga mga posisyon sa Simbahan ug subsub nga nagtuon sa mga kasulatan sa daghang mga dekada, wala sila magpakita og pagduha-duha sa ilang mga reaksyon o mibati og sobra ka importante.

Si Amulek andam nga miuyon sa kabubut-on sa Dios, midawat sa tawag sa pagsangyaw sa ebanghelyo, ug mibiya sa iyang haruhay nga kinabuhi ug mga relasyon sa pamilya ug higala. Ug si Pahoran napanalanginan og panabut ug lig-on nga pagpugong sa kaugalingon sa pag-aksyon imbis mobuhat og reaksyon samtang iyang gipasabut ngadto ni Moroni ang mga hagit nga miabut tungod sa rebelyon batok sa gobyerno.

Ang Kristohanong hiyas sa kaaghup kasagaran masaypan sa pagsabut sa atong moderno nga kalibutan. Ang kaaghup usa ka kalig-on, dili kahuyang; aktibo, dili walay timik; maisugon, dili mahadlukon; kontrolado, dili nanghinubra; ligdong, dili magpalabaw sa kaugalingon; ug matinahuron, dili bastos. Ang maaghup nga tawo dili dali nga masuko, magpakaaron-ingnon, o hambugero ug daling moila sa mga kalampusan sa uban.

Samtang ang pagkamapainubsanon kasagaran nagpasabut og pagsalig diha sa Dios ug kanunay nga nagkinahanglan sa Iyang giya ug suporta, usa ka ilhanan nga kinaiya sa kaaghup mao ang usa ka piho nga espirituhanong kaandam sa pagkat-on gikan sa Espiritu Santo ug sa mga tawo nga daw dili kaayo makamao, hanas, o edukado, kinsa tingali wala maghupot og importante nga mga posisyon, o kinsa makita nga daw dili dako ang matampo. Hinumdumi giunsa ni Naaman, ang kapitan sa kasundalohan sa hari sa Siria, pagbuntog sa iyang garbo ug maaghup nga midawat sa tambag sa iyang sulugoon sa pagtuman kang Eliseo ang propeta ug manghugas og kapito ka higayon sa suba sa Jordan.¹⁴ Ang kaaghup mao ang nag-unang proteksyon gikan sa pagkabuta sa garbo nga kasagaran mahitabo tungod sa pagkainila, posisyon, gahum, katigayunan, ug pasidungog.

Ang kaaghup usa ka hiyas nga mapalambo pinaagi sa tinguha, sa matarung nga paggamit sa moral nga kabubut-on, ug sa pagtinguha kanunay nga magbaton sa kapasayloan sa atong mga sala.¹⁵ Usa usab kini ka espirituhanon nga gasa nga angayan natong tinguhaon.¹⁶ Hinoon, kinahanglan natong hinumduman, ang mga katuyoan nga gihatag kini nga panalangin, mao ang kaayohan ug mapangalagaran ang mga anak sa Dios.¹⁷

Samtang mopaduol kita ug mosunod sa Manluluwas, kita mag-anam-anam ug sa hinay-hinay mahimong mas mahisama Kaniya.Gihatagan kita og gahum sa Espiritu nga disiplinado nga magpugong sa atong kaugalingon ug usa ka lig-on ug kalma nga kinaiya. Mao nga, mahimo gayud kitang maaghup isip mga disipulo sa Agalon ug dili lang nagpakamaaghup kunohay.

“Si Moises gitudloan sa tanang kaalam sa mga Ehiptohanon, ug siya makagagahum sa iyang mga pulong ug mga buhat.”¹⁸ Apan siya “mapainubsanon kaayo, labaw kay sa tanang mga tawo ibabaw sa yuta.”¹⁹ Ang iyang kaalam ug kahanas makahimo unta kaniya nga mapasigarbuhon. Hinuon, ang hiyas ug espirituhanon nga gasa sa kaaghup nga siya gipanalanginan mipakunhod sa pagkamapahitas-on sa iyang kinabuhi ug mipalambo ni Moises isip instrumento sa pagbuhat sa mga katuyoan sa Dios.

Ang labing talagsaon ug makahuluganon nga mga panig-ingnan sa kaaghup makita sa kinabuhi sa Manluluwas Mismo.

Ang Bantugang Manunubos, kinsa “nakasinati sa tanang mga butang”²⁰ ug nag-antus, nagkadugo, ug namatay “aron magahinlo kanato gikan sa tanang pagkadili makatarunganon,”²¹ mabination nga mihugas sa abugon nga tiil sa Iyang mga disipulo.²² Ang sama nga kaaghup usa ka talagsaong timaan nga kinaiya sa Ginoo isip sulugoon ug lider.

Si Jesus naghatag ug hingpit nga panig-ingnan sa matarung nga pagtubag ug andam nga pagdawat samtang Siya nag-antus sa grabe nga kasakit didto sa Getsemani.

““Ug sa paghiabut niya sa dapit, siya miingon [sa Iyang mga disipulo], Pag-ampo kamo aron dili kamo mahidalin-as ngadto sa panulay.

“Ug siya … miluhod, ug nag-ampo,

“Nga nag-ingon, Amahan, kon buot ka, kuhaa kining kopa gikan kanako: hinoon, dili ang akong pagbuot maoy matuman, kondili ang imo.”²³

Ang kaaghup sa Manluluwas niining mahangturong kamahinungdanon ug grabe kasakit nga kasinatian nagpakita alang sa matag usa kanato sa kaimportante sa pagbutang sa kaalam sa Dios ibabaw sa atong kaugalingon nga kaalam.

Ang pagkamakanunayon sa pagkaandam nga modawat sa Ginoo ug lig-on nga pagpugong sa kaugalingon parehong makapadasig ug mapuslanon alang kanatong tanan. Samtang usa ka grupo sa mga gwardiya sa templo ug mga kasundalohang Romano miabut sa Getsemani aron pagsakmit ug pagdakop ni Jesus, si Pedro mihulbot sa iyang espada ug miputol sa tuo nga dunggan sa sulugoon sa labawng sacerdote [high priest].²⁴ Ang Manluluwas dayon mihikap sa dunggan sa sulugood ug miayo kaniya.²⁵ Palihug timan-i nga Siya mitabang ug mipanalangin sa hayan modakop Kaniya gamit ang samang langitnong gahum nga makapugong unta sa pagdakop ug paglansang Kaniya sa krus.

Hunahunaa usab kon giunsa ang Agalon sa pagpasangil ug panghimaraut atubangan ni Pilato aron ilansang sa krus.²⁶ Si Jesus namahayag sa dihang Siya giluiban, ““Nagahunahuna ka ba nga dili ako makapangayo sa akong Amahan, ug nga dili siya makapadala karon dayon og mga manulonda nga kapin sa napulog duha ka mga legion?””²⁷ Bisan pa niana ang “Maghuhukom sa Kahangturan sa buhi ug sa mga patay”²⁸ sa sukwahi nga paagi gihukman atubangan sa usa ka temporaryo nga politikanhong tinudlo. “Ug [si Jesus] walay gitubag kaniya; tungod niana ang gobernador nahibulong og dako.”²⁹ Ang kaaghup sa Manluluwas gipakita sa Iyang disiplinado nga pagtubag, lig-on nga pagpugong sa kaugalingon, ug dili buot mogamit sa Iyang walay kinutubang gahum alang sa personal nga kaayohan.

Si Mormon miila sa kaaghup isip ang pundasyon diin gikan ang tanang espirituhanon nga mga kapasidad ug gasa.

“Busa, kon ang usa ka tawo adunay hugot nga pagtuo siya kinahanglan nga magbaton og paglaum; kay kon wala ang hugot nga pagtuo wala usab ang paglaum.

“Ug usab, ako mosulti nganha kaninyo nga siya dili makabaton sa hugot nga pagtuo ug paglaum, gawas nga siya magmaaghup, ug magmapainubsanon sa kasingkasing.

“Kon mao, ang iyang hugot nga pagtuo ug paglaum kawang, kay walay madawat sa atubangan sa Dios, gawas sa maaghup ug mapainubsanon nga kasingkasing; ug kon ang tawo magmaaghup ug magmapainubsanon sa kasingkasing, ug mokumpisal pinaagi sa gahum sa Espiritu Santo nga si Jesus mao ang Kristo, siya kinahanglan gayud adunay gugma nga putli; kay kon siya walay gugma nga putli, siya walay kapuslanan; busa siya kinahanglan gayud nga makabaton og gugma nga putli.”³⁰

Ang Manluluwas namahayag, “Bulahan ang mga maaghup: kay sila makapanag-iya sa yuta.”³¹ Ang kaaghup usa ka mahinungdanong aspeto sa diosnong kinaiya ug madawat ug mapalambo sa atong kinabuhi tungod ug pinaagi sa Pag-ula sa Manluluwas.

Mopamatuod ko nga si Jesukristo mao ang atong nabanhaw ug buhi nga Manunubos. Ug ako mosaad nga Siya mogiya, mopanalipod, ug molig-on kanato samtang kita naglakaw sa kaaghup sa Iyang Espiritu. Ako mopahayag sa akong sigurado nga pagsaksi niining mga kamatuoran ug mga saad sa sagrado nga pangalan ni Ginoong Jesukristo, amen.