Mosonoson me Tipetekison non Netip

Non ewe Testamen Sofo, sia kaeo usun emon anuon mi pisekisek ewe a eisini Jises, “Sense, met sokkun foffor murinno upwe fori pwe upwe kuna ewe manau ese much?”² Ewe Chon Amanau a akkom auroura pwe epwe anneasochisi ekkewe annuk. Mwirin ewe Masta a ngeni ewe anuon pwan ew mettoch mi auchea mi fich ngeni met mi murino me nonnomun.

“Jesus a apasa ngeni, Ika ka mochen unusoch, kopwe feinno o amomono pisekum meinisin o ngeni ekkewe aramas mi woungaw noum moni, iwe kopwe ne pisekisek non nang, iwe kopwe feito o fiti ei.

“Nge nupwen ewe anuon a rong ei sokkun, a niwinsefaninno non an noninen, pun i emon mi fakkun pisekisek.”³

Anono fengeni ponuwen ewe anuon mi pisekisek ngeni nonnomun Amulek, minne mi makketiw non ewe Puken Mormon. Amulek emon mwan mi atechofo me pisekisek fiti chommong aramasan me chiechian.⁴ A pwisin anapanap pwe i emon mwan a fen kokko fan chommong me ren Kot nge ese rongorong; emon mwan mi sinei ekkewe mettochun Kot nge a finata pwe esap sinei.⁵ Emon mwan mi och, Amulek a tupuno ren mettochun fonufan usun chok ewe anuon mi pisekisek non ewe Testamen Sofo.

Inamo ika a fen akkom apochokunano netipan, Amulek a anneasochisi mongungun emon chon nang, a etiwa ewe soufos Alma non imwan we, me awora tumun ngeni. A memef non pekin ngun fansoun an Alma churi me a kokko an epwe afanafana ewe kapas allim. Mwirin Amulek a nikitano “noun gold meinisin, me silver, me an kewe mettoch mi auchea … fan iten ewe kapasen Kot, [me a] ketiwengaw me ren ekkewe ir ra chiechian akkom me pwan me ren seman we me aramasan kewe.”⁶

Om ekiek pwe met popun mi sokkono ponuwan me ren ewe anuon mi pisekisek me Amulek?

Atun ew efeiengawen fansoun maun mi makketiw non ewe Puken Mormon, ew ekkesiwinin makken toropwe a fis nefinen Moronai, ewe kaptinin sounfiun ekkewe Chon Nifai, me Paoran, ewe sou apung mi nap me kepinan ewe fonu. Moronai, noun kewe sounfiu ra riaffou pokiten nafangawen aninis seni ewe government, a mak ngeni Paoran “non napanapan an apungu”⁷ me eitengawa i me chienan souemwen pwe ir mi tumunungaw, chipwang, me pwan chon afangema.⁸

Epwe fen mecheres an Paoran epwe oput Moronai me an eitengaw ese pung, nge ese. A ponuweni non kirekiroch me awewei ew ungeni ewe government minne Moronai ese sinei usun. Iwe mwirin Paoran a apasa:

“Nengni, ua apasa ngonuk, Moronai, pwe use pwapwa non ami kewe weiresin riaffou, ewer, a anetipengawa nguni. …

“… Non noum we toropwe ka fen esitaei, nge ese auchea; ngang use song, nge ua pwapwa non sufonun netipom.”⁹

Om ekiek met popun an Paoran tipepos ne ponuweni an Moronai we eitengawa?

Non mwichenapen mwichefen wonu maram a no, Preseten Russell M. Nelson a awewei an ponuweni an Presesten Thomas S. Monson tingor ne anneani, ekipwichi, me apwonueta ekkewe ennet mi nom non ewe Puken Mormon. A apasa: “Ua achocho ne apwonueta an aurour. Fiti pwan ekkoch foffor, ua makketiw met ewe Puken Mormon a, met a fori, met a apungano, met a affata, met a awewechu, me met a pwarata. Ai attonaochu ewe Puken Mormon non ena napanap a fen och mettoch mi weweoch me amemefoch! Ua pesei ngeni emon me emon ami.”¹⁰

Preseten Henry B. Eyring a pwan pesei auchean non manauan usun an Preseten Monson we tingor. A apasa:

“Ua fen anneani ewe Puken Mormon iteiten ran mi nap seni 50 ier. Ina minne ngang mi tongeni upwe ekieki pwe an Preseten Monson kewe kapas epwe fan iten emon me nukui. Nge, usun chommong ami, ua mefi an ewe soufos pesepes me an pwon a efisi ai upwe achocho. …

“Pungunon mi apwapwa ngeniei, me ngeni chommong ami, ina met ewe soufos a fen pwonei.”¹¹

Om nuku pwe met popun mi mwitir me ennet ar ponuweni an Preseten Monson we tingor me ren ekkei ruemon souemwenin an ewe Samon we Mwichefen?

Use apasa pwe an Amulek, Paoran, Preseten Nelson me Preseten Eyring ponuweni mi non pekin ngun ir pungunon ew chok nikinik usun Kraist. Ennetin, chommong napanap mi sokkono me foffor ra emwen ngeni ewe mirit non pekin ngun mi pwa non manauen ekkei fomon chon angang mi sufon. Nge ewe Chon Amanau me Noun soufos ra fen pwari ew nongonong auchea mi murino ngeni kich meinisin ach sipwe unusen weweiti me achocho ne anapano non manauach.

Ouse mochen apareni ekkewe nikinik ewe Samon a aea ne anapanapa pwisin I non ekkei uwokisin: “Oupwe angei osei o oupwe mwarei o oupwe kaeo seni ei, pun ngang mi mosonoson o tipetekison: iwe oupwe kuna ami ngaseno.”¹²

Mi auchea ngeni kich pwe ewe Chon Amanau a finata an epwe pesei mosonoson me nein ekkewe napanap me nikinik meinisin I mi fen tongeni finata.

Mi wor aurour usun chok non ew pwarata ewe Soufos Joseph Smith a angei non 1829. Ewe Samon a affata pwe sipwe kaeo seni I, me ausening ngeni An kapas, me fetan non mosonosonun Ngunun, iwe mwirin epwe wor ach kinamwe non I.¹³

Mosonoson ina ew napanapen ewe Chon Angasano me a pwano non ach pounuweni non tupwon, fang ngeni mochenin ewe Samon, me pochokunen aukuku mochenich. Ei nikinik a anisikich ne weweochuti ew me ew ponuwan Amulek, Paoran, Preseten Nelson, me Preseten Eyring.

Ren awewe, Preseten Nelson me Preseten Eyring ra ennetin me mwitir ponuweni an Preseten Monson pesepes ne anneani me kaeo ewe Puken Mormon. Inamo ir me ruemon ekkewe mwan ir mi angang non wiisen Mwichefen mi auchea me itefouno me ra fen anneani ekkewe pukefel non chommong ier, ra pwarano seni ar ponuweni pwe rese tipemwaramwar me ekieki pwe ir mi auchea.

Amulek a mochen etiwa mochenin Kot, a etiwa ew kokko ne afanafana ewe kapas allim, me nikiti nonnomun mi ekinamwe me nefian ngeni chiechian me an famini. Me Paoran a feioch ren weweoch me an auku mochenin ne foffor nap seni an aponuwa nupwen a awewei ngeni Moronai weiresin nonnomur kewe a fis seni pokiten ewe ungeni government.

Fan ekkoch sise kan weweiti ei nikinikin mosonoson usun Kraist non ach ei fonufan ikenai. Mosonoson mi pochokun, ese apwangapwang; mwokutukut, ese chipwang; pwaracho, ese saw; aukuk, ese nap; tekison, ese nuepas; me kisasew, ese namanam tekia. Emon aramas mi mosonoson ese songokai, ese chofona, ika anapano me mwitir esinna murinon ekkoch.

Nupwen tekison a kan fis ren ach anongonong won Kot me ewe mochenin An emwen me aninis fansoun meinisin, ew napanapen mosonoson mi sokkono ina ewe mochenin etiwa ne kaeo seni ewe Ngun mi Fel me seni aramas mi nikinikin nipwakingaw, ekis sinenap, ika ekis tipachem, ekkewe resap nom non wis mi auchea ika ekkewe rese nikinikin repwe fich ne aninis. Chechemeni usun Naaman, kaptinin noun ewe king kewe sounfiun Syria, a akkufu an namanam tekia me etiwa ewe aurour an noun we chon angang ne aneasochisi Elisha ewe soufos me nimeti inisin non ewe chonupupu Jordan fan fisu.¹⁴ Tekison ina ewe akkaewin eppet seni namanam tekia ewe a kan soun fis seni itefouno, wis, nemenem, pisekisek, me eingeing.

Mosonoson ew napanap a fis seni an emon mochen, ewe aean pungun finata mi pung, me achochon ach sipwe angei omusomusen ach tipis fansoun meinisin.¹⁵A pwan ew niffangen ngun mi fich ngeni ach sipwe kutta.¹⁶ Sipwe chechemeni, ekkewe popun ren minne ekkena niffang ra kawor, pwe sipwe atufichi me angang ngeni ekkewe noun Kot.¹⁷

Ren ach feito ren ewe Chon Amanau me tapweno mwirin, sia ekis me ekis anapano ach tufichin winiti usun I. Sia pochokununo me ren ewe Ngun mi Fel ren ach mirit ne auku kich me ren ew tipepos me nikinik pwetete. Ina, mi murino sipwe mosonoson ach sipwe winiti chon kunon ewe Masta nge esap chok och mettoch sipwe fori.

“Moses a kaeo ngeni tipachemen Eqypt kewe meinisin, iwe a winiti emon mwan mi tipachem non kapas me foffor.”¹⁸ Nge, i mi “fokkun tipetekison nap seni aramas meinisin won fonufan.”¹⁹ An mirit me tufich ra fen tongeni efisi an epwe namanam tekia. Nge, ewe napanap me niffangen mosonoson minne mi feioch ren a ekisano an namanam tekia non manauan me anapano an tufich ne apwonueta an Kot kewe popun.

Ekkewe nenien appirun mosonoson mi kon nap me auchea ra pwa non manauen pwisin ewe Chon Amanau.

Ewe Chon Angasano mi Nap, ewe a etekisonatiw inisin fan mettoch meinisin²⁰ me riaffou, puseni cha, me mano pwe “epwe nimeti seni kich foffor mi ngaw meinisin,”²¹ a pwetete ne tonu pechen ekkewe chon kaeo.²² Ena sokkun mosonoson an ewe Samon mi ew napanap mi sokkono I emon chon angang me souemwen.

Jises a awora ewe nenien appirun ach sipwe ponuweni non tupwon me mochen fangeta ren An ennetin riaffoun non Gethsemane.

“Nupwen a tori ewe neeni, a apasa [ngeni noun kewe chon kuno] Oupwe iotek pun ousap turutiw non sossot.

“A fotopukutiw … o iotek,

“A apasa Semei, ika ka mochen, kopwe angei ei kapen riaffou seni ei. Nge esap netipei, nge netipom epwe pwonueta.”²³

An ewe Chon Amanau mosonoson non ei fansoun mi fokkun auchea me ennetin ariaffou a pwar ngeni kich meinisin usun auchean ach sipwe ekieki pwe an Kot mirit mi nap seni pwisin ach.

An ewe Samon mochen fang fansoun meinisin me an pochokunen auku mochenin ra fokkun amwarar me murino ngeni kich meinisin. Nupwen ew mwichen chon masen tempel me sounfiun Rome ra feito non Gethsemane ar repwe turufi me kanapusei Jises, Peter a utau noun we ketinas me pokueno seningemwanin noun ewe pris mi nap we chon angang.²⁴ Ewe Chon Amanau a attapa seningan ewe chon angang me a echikareta.²⁵ Oupwe sinei pwe A anisi me efeiochu emon mwan a mochen kanapusei ren an aea ewe chok manamanen nang mi fen tongeni eppeti I seni an epwe ono me irapengesino.

Pwan ekieki met a fis nupwen ewe Masta a itengaw me kapung me mwen Pilate an epwe irapengesino.²⁶Jises a apasa fansoun ar afangemai “Kose sinei pwe ngang mi tongeni tingor aninnis seni Semei, iwe epwe muttir chok tinato rei nap seni engon me ruu mwichen sonufiun chon nang?”²⁷ Inamo, “Ewe Sou apung Esemuch ren ir ekkewe mi manau me pwan mano”²⁸ a fen sokkono pwe kapung me ren emon mi wiseni ew wis mi mochomoch non government. “Iwe [Jises] ese mochen ponuweni, iei minne ewe Kepina a fakkun nenneiruk ren.”²⁹ An ewe Chon Amanau mosonoson a pwano me ren an ponuweni, auku mochenin, me an ese mochen aea An manaman fan itan pwisin.

Mormon a awewei pwe mosonoson ina ewe nongonong seni minne tufichin ngun meinisin me niffang ra fis.

“Ina minne, ika a wor an emon aramas nuku mi auchea epwe wor an apinukunuk; pun me nukun nuku ese tongeni wor apinukunuk.

“Iwe pwan, nengeni ua apasa ngenikemi pwe i ese tongeni wor an nuku me apinukunuk, tiwenon chok epwe mosonoson me tipetekison non netip.

“Ika epwe ina, an nuku me apinukunuk mi namotmwan, pun ese wor emon a ketiw me mwen Kot, tiwenon chok ekkewe mi mosonoson me tipetekison non netip; iwe ika emon aramas mi mosonoson me tipetekison non netip, me pwarata me ren ewe manamanen ewe Ngun mi Fel pwe Jises I ewe Kraist, mi auchea pwe epwe wor an tong ennet; pun ika ese wor an tong ennet i mi namotongaw; ina minne mi auchea pwe epwe wor an tong ennet.”³⁰

Ewe Chon Amanau a apasa, “Ra feioch ir ekkewe mi tipetekison, pun repwe fonuweni fonufan.”³¹ Mosonoson ew auchean kinikinin ewe napanapen nang me sia tongeni angei me awora non manauach pokiten an ewe Chon Amanau Achasefan.

Ua pwarata pwe Jises Kraist I ach we Chon Angasano mi manausefan me mi manau. Me ua pwonei pwe I epwe emweni, tumunu me apochokuna kich nupwen sia fetan non mosonosonun Ngunun. Ua apasa ai ennetin pwarata usun ekkei ennet me pwon non ewe it mi pin Jises Kraist, amen.