Muaj lub Siab Mos Siab Muag thiab Txo Siab Txo Ntsws

Nyob hauv Phau Tshiab, peb kawm txog ib tug tub hluas nplua nuj uas nug Yexus hais tias, “Xib Hwb, yam twg yog yam zoo uas kuv yuav tsum ua, kuv thiaj tau txoj sia ntev dhawv mus ib txhis?”² Tus Cawm Seej ntuas nws kom nws coj raws li cov lus txib. Ces tus Xib Hwb hais ib yam dab tsi ntxiv rau tus tub hluas uas yeej tsim nyog hais rau tus no raws li nws xav tau thiab nws lub neej.

Yexus hais rau nws hais tias, Yog koj xav ua tus uas zoo kawg nkaus, koj cia li mus muab koj tej qhov txhia chaw muag huv tib si, thiab muab cov nyiaj ntawd faib rau cov neeg pluag, koj thiaj yuav yog tus uas nplua nuj nyob saum ntuj ceeb tsheej; tom qab ntawd, koj cia li tuaj nrog kuv mus.

“Thaum tus hluas ntawd hnov Yexus hais li no, nws nyuaj siab kawg thiab tawm lawm, rau qhov nws nplua nuj heev.”³

Cia li muab qhov uas tus tub hluas nplua nuj hais piv rau Amulej, raws li piav nyob hauv Phau Ntawv Maumoos. Amulej yog ib tug neeg uas txawj ua hauj lwm thiab vam meej thiab muaj kwv tij neej tsa thiab phooj ywg coob.⁴ Nws piav txog nws tus kheej hais tias Vajtswv twb hu nws ntau zaus thiab nws tsis kam mloog; nws yog ib tug uas paub txog Vajtswv tiam sis nws tsis xav lees tej ntawd.⁵ Nws yog ib tug neeg zoo, tiam sis Amulej yeej tso siab rau tej yam ntawm lub ntiaj teb zoo li tus tub hluas nplua nuj nyob hauv Phau Tshiab.

Txawm yog nws twb ua nws lub siab tawv qhawv dhau los, Amulej twb mloog tus tim tswv lub suab, tos txais tus yaj saub Amas nyob hauv nws lub tsev, thiab pub mov rau nws noj. Twb ua rau nws sab ntsuj plig tsim los thaum Amas nrog nws nyob thiab Vajtswv twb hu nws kom mus tshaj tawm txoj moo zoo. Ces Amulej “tso tseg tag nrho nws tej kub, thiab tej nyiaj dawb, thiab nws tej khoom muaj nuj nqis … los txais Vajtswv txoj lus, [thiab] nws txiv thiab nws cov kwv tij neej tsa thiab cov uas yog nws cov phooj ywg ua ntej ntawd tau xyeej nws.”⁶

Nej xav tias yog vim li cas tus tub hluas nplua nuj thiab Amulej ua tsis zoo ib yam?

Thaum lub sij hawm ua tsov ua rog nyob hauv Phau Ntawv Maumoos, muaj ob tug neeg uas sau ntawv ib leeg rau ib leeg, es ib tug yog Maulaunais, tus thawj tub rog ntawm cov Neeg Nifais pawg tub rog, thiab Pehaulas, tus thawj txiav txim thiab tswv xeev. Maulaunais, nws pawg tub rog raug txom nyem vim hais tias lub tseem fwv tsis pab lawv, es nws sau ntawv rau Pehaulas “kom cem [nws]”⁷ thiab liam nws thiab cov thawj coj hais tias lawv tsis txawj xav, lawv tub nkeeg, tsis quav ntsej, thiab twb yog neeg ntxeev siab.⁸

Yooj yim rau Pehaulas tu siab rau Maulaunais thiab tej kev uas nws liam tsis yog, tiam sis Pehaulas tsis xav li ntawd. Nws ua siab zoo teb hais tias muaj tib neeg uas ntxeev siab rau lub tseem fwv uas Maulaunais tsis paub txog. Ces Pehaulas hais tias:

“Saib seb, kuv hais rau koj, Maulaunais, hais tias kuv yeej tsis xyiv fab rau nej tej kev txom nyem loj, muaj tseeb tiag, qhov no ua rau kuv nyuaj siab heev. …

“Nyob hauv koj tsab ntawv koj tau hais hnyav rau kuv, tiam sis tsis ua li cas; kuv tsis npau taws, tiam sis zoo siab rau tej kev zoo ntawm koj lub siab.”⁹

Nej xav tias yog vim li cas Pehaulas teb zoo li ntawd thaum Maulaunais liam nws?

Nyob hauv lub tuam rooj sab laj rau lub hlis tas los, Thawj Tswj Hwm Russell M. Nelson piav txog qhov uas nws tau ua li cas thaum Thawj Tswj Hwm Thomas S. Monson caw nws kawm, xav txog, thiab ua raws li tej yam tseeb nyob hauv Phau Ntawv Maumoos. Nws hais tias, “Kuv tau sim ua raws li nws cov lus ntuas thiab. Kuj muaj ntau yam, tiam sis kuv tau txheeb tseg ob peb yam uas qhia tias Phau Ntawv Maumoos yog dab tsi, saib nws pom zoo rau dab tsi, saib nws tsis pom zoo rau dab tsi, saib nws ua tiav dab tsi, saib nws piav meej meej txog dab tsi, thiab saib nws nthuav tawm dab tsi. Saib Phau Ntawv Maumoos li ntawd tau tshoov kuv lub siab thiab pab kuv ntau heev! Kuv yaum kom nej txhua tus xav txog tej yam ntawd thiab.”¹⁰

Thawj Tswj Hwm Henry B. Eyring kuj hais txog Thawj Tswj Hwm Monson tej lus tseem ceeb npaum li cas rau nws lub neej. Nws hais tias:

“Kuv twb nyeem Phau Ntawv Maumoos txhua hnub tau 50 xyoo tawm. Yog li ntawd tej zaum tsim nyog kuv xav tias Thawj Tswj Hwm Monson hais rau lwm tus xwb. Tiam sis, ib yam li nej feem coob, kuv tau hnov tus yaj saub tej lus txhawb nqa thiab nws tej lus cog tseg caw kuv kom siv zog ntxiv. …

“Twb tau muaj raws li tus yaj saub cog lus rau kuv, thiab rau nej feem coob.”¹¹

Nej xav tias yog vim li cas ob tug thawj coj ntawm tus Tswv lub Koom Txoos tau ua raws nraim li Thawj Tswj Hwm Monson tej lus caw kom ua li ntawd?

Kuv tsis hais tias qhov uas Amulej, Pehaulas, Thawj Tswj Hwm Nelson thiab Thawj Tswj Hwm Eyring txoj kev muaj zog ntawm sab ntsuj plig yog los ntawm ib tug cwj pwm ntawm Yexus Khetos xwb. Plaub tug tub qhe zoo no los yeej muaj ntau yam cwj pwm thiab tej yam uas ua rau lawv sab ntsuj plig muaj zog hauv lawv lub neej. Tiam sis tus Cawm Seej thiab Nws cov yaj saub twb qhia txog ib tug cwj pwm tseem ceeb uas peb txhua tus yuav tsum to taub ntxiv thiab rau siab coj raws nraim kom muaj tus cwj pwm no hauv peb lub neej.

Thov cia li mloog seb tus Tswv tau piav txog Nws tus kheej li cas nyob hauv nqe vaj lug kub no: “[Vim kuv muaj siab mos siab muag thiab txo siab txo ntsws], nej cia li los kwv kuv tus quab thiab kawm tej uas kuv qhia, nej thiaj yuav tau so.”¹²

Peb kawm tau los ntawm qhov uas tus Cawm Seej tau xaiv kev muaj siab mos siab muag los ntawm tag nrho tej cwj pwm thiab tej yam zoo uas Nws yeej xaiv tau.

Ib tus yam ntxwv zoo li no los muaj nyob hauv ib zaj lus tshwm sim uas tus Yaj Saub Yauxej Xamiv txais thaum xyoo 1829. Tus Tswv hais tias, “Kawm los ntawm kuv, thiab mloog kuv tej lus; taug kev raws kuv tus Ntsuj Plig txoj kev siab mos siab muag, ces koj yeej yuav muaj kev kaj siab lug dhau los ntawm kuv.”¹³

Kev ua siab mos siab muag yog ib tug cwj pwm ntawm tus Txhiv Dim thiab yog qhov uas yus coj raws li kev ncaj ncees, txaus siab txo hwj chim, thiab tswj hwm yus tus kheej. Qhov no pab peb to taub ntxiv txog qhov uas Amulej, Pehaulas, Thawj Tswj Hwm Nelson, thiab Thawj Tswj Hwm Eyring tau ua li cas.

Piv txwv hais tias, Thawj Tswj Hwm Nelson thiab Thawj Tswj Hwm Eyring tau ua ncaj ncees ua raws nraim li Thawj Tswj Hwm Monson tej lus ntuas kom nyeem thiab kawm txog Phau Ntawv Maumoos. Txawm yog ob tug txiv neej no yog ob tug thawj coj tseem ceeb hauv lub Koom Txoos thiab tau kawm vaj lug kub tau ntau xyoo, qhov uas nkawd tau ua li no qhia tias lawv tsis xav tias nkawd tseem ceeb dua lwm tus.

Amulej txaus siab ua raws li Vajtswv lub siab nyiam, es nws tau ua raws li Vajtswv hu kom nws tshaj tawm txoj moo zoo, thiab tso nws tej yam khoom thiab cov kwv tij thiab cov phooj ywg tseg. Thiab Pehaulas tau koob hmoov kom pom meej thiab tswj hwm nws tus kheej nws thiaj li ua tau tej yam thaum nws piav rau Maulaunais txog tej teeb meem uas muaj los ntawm qhov uas tib neeg ntxeev siab rau lub tseem fwv.

Khetos tus cwj pwm uas yog kev muaj siab mos siab muag los tib neeg hauv lub ntiaj teb niaj hnub nim no pheej tsis to taub. Kev muaj siab mos siab muag yog kev muaj zog, tsis yog kev qaug zog; yog kev ua tej yam, tsis yog kev nyob twj ywm; kev ua siab loj, tsis yog kev ntshai, kev tswj yus tus kheej, tsis yog kev ua loj heev; kev txo hwj chim, tsis yog kev khav; thiab kev ua siab zoo, tsis yog kev ua li siab xav. Ib tug neeg uas muaj siab mos siab muag los yeej tsis yooj yim rau nws npau taws, khav theeb, los yog muab hlob heev, thiab nws yeej lees tias thaum lwm tus ua tej yam zoo.

Kev txo hwj chim txhais hais tias yus yuav tsum tso siab rau Vajtswv thiab xav tau Nws txoj kev coj thiab kev txhawb nqa, tiam sis kev muaj siab mos siab muag yog qhov uas yus sab ntsuj plig txawj kawm los ntawm tus Vaj Ntsuj Plig Dawb Huv thiab los ntawm tib neeg uas tej zaum zoo li tsis txawj, tsis laus, los yog tsis tau kawm ntawv npaum li yus, tej zaum nws tsis muaj ib txoj hauj lwm tseem ceeb, los yog tej zaum zoo li nws ua tsis taus ntau. Cia li nco ntsoov txog Na-amas, tus thawj tub rog hauv tus vaj ntxwv pawg tub rog nyob hauv Xilias, uas kov yeej nws txoj kev muab hlob thiab muaj siab mos siab muag mloog nws cov tub qhe tej lus ntuas thiab tau ua raws li tus yaj saub Elisas tej lus kom mus ntxuav hauv tus dej Yauladees xya zaus.¹⁴ Kev muaj siab mos siab muag yog kev pov hwm tseem ceeb tshaj uas pab kom txhob muab hlob uas los ntawm kev muaj koob muaj npe, kev muaj hwj chim, muaj nyiaj, thiab kev qhuas.

Kev muaj siab mos siab muag yog ib tug cwj pwm uas los dhau ntawm kev xav muaj, kev ua ncaj ncees ua raws li peb txoj kev ywj siab xaiv, thiab kev rau siab kom txais tau kev zam txim rau peb tej kev txhaum.¹⁵ Kuj yog ib lub txiaj ntsim ntawm sab ntsuj plig uas tsim nyog kom peb xav muaj.¹⁶ Tiam sis, peb yuav tsum nco ntsoov tias yog vim li cas Vajtswv yuav foom koob hmoov li no rau peb, yog vim peb yuav tsum pab thiab ua hauj lwm rau Vajtswv cov me nyuam.¹⁷

Thaum peb los cuag tus Cawm Seej thiab coj raws li Nws, peb haj yam txawj los ua neeg zoo li Nws. Tus Ntsuj Plig yuav muab hwj chim rau peb kom tswj tau peb tus kheej thiab coj cwj pwm coj tus tus. Yog li ntawd, peb hloov los ua neeg uas muaj siab mos siab muag vim peb yog tus Xib Hwb cov thwj tim thiab tsis yog peb lam ua xwb.

“Mauxes kawm paub cov neeg Iyiv tej kev txawj kev ntse huv tib si. Mauxes yog ib tug txawj ntse heev; nws ua yam twg los ua tau.”¹⁸ Tiam sis, nws “yog ib tug neeg txo hwj chim tshaj plaws tej neeg uas nyob hauv qab ntuj no huv tib si.”¹⁹ Ntshe nws tej kev txawj ntse thiab peev xwm yuav ua rau nws muab hlob. Tiam sis, tus cwj pwm thiab lub txiaj ntsim uas yog kev muaj siab mos siab muag uas Vajtswv foom koob hmoov rau nws pab nws tsis txhob khav txog nws tus kheej thiab ua rau Mauxes ua tau ib tug cuab yeej uas ua tau kom muaj raws li Vajtswv lub hom phiaj.

Tus yam ntxwv zoo tshaj plaws thiab muaj nqi tshaj plaws txog kev muaj siab mos siab muag yog los ntawm tus Cawm Seej Nws tus kheej.

Tus Txhiv Dim Zoo Kawg Nkaus uas “nqis qis tshaj txhua yam”²⁰ thiab raug txom nyem, los ntshav, thiab tuag kom “yuav ntxhuav peb tej kev txhaum huv tib si mus,”²¹ Nws twb ntxuav Nws cov thwj tim txhais ko taw uas los av tas.²² Kev muaj siab mos siab muag yog tus Tswv ib tug cwj pwm tseem ceeb vim nws yog ib tug tub qhe thiab tus thawj coj.

Yexus yeej coj tus yam ntxwv zoo kawg nkaus txog kev ua ncaj ncees thiab txaus siab ua raws li Vajtswv lub siab nyiam thaum Nws raug txom nyem loj kawg nkaus nyob hauv Khexemanes.

“Thaum lawv mus txog ped, Yexus hais rau [Nws cov thwj tim] hais tias, Nej yuav tsum thov Vajtswv, kev sim siab thiaj yuav los ntxias tsis tau nej.

“Thiab nws txhos caug ntua, … thiab thov Vajtswv,

“Hais tias, Txiv, yog koj pom zoo, thov koj muab lub khob no tshem ntawm kuv mus. Txawm yog li cas los koj tsis txhob ua raws li kuv lub siab nyiam, tiam sis ua raws li koj lub siab nyiam xwb.”²³

Qhov uas tus Cawm Seej muaj siab mos siab muag raug mob kawg nkaus kom ua qhov tseem ceeb heev no qhia rau peb txhua tus hais tias peb yuav tsum saib Vajtswv lub tswv yim rau nqi dua li peb lub tswv yim.

Qhov uas tus Tswv txaus siab ua raws li Vajtswv lub siab nyiam thiab txawj tswj Nws tus kheej ua rau peb xav tsis thoob thiab ua rau peb kawm tau. Thaum cov neeg tuav ntaj uas zov lub tuam tsev thiab cov Neeg Loos cov tub rog tuaj txog Khexemanes kom txhom thiab ntes Yexus, Petus siv nws rab ntaj muab tus pov thawj hlob tus tub qhe sab pob ntseg hlais tas.²⁴ Ces tus Cawm Seej kov tus tub qhe pob ntseg thiab kho nws.²⁵ Cia li paub hais tias lub hwj chim saum ntuj uas Nws siv kom ncav tes pab tus uas tej zaum yuav muab Nws ntes yog tib lub hwj chim uas pab tau Nws kom tsis txhob raug ntes thiab raug ntsia saum ntoo khaub lig.

Cia li xav tias tus Xib Hwb raug liam thiab raug cem thaum nws nyob ntawm Philaj ua ntej yuav muab nws ntsia saum ntoo khaub lig.²⁶ Thaum neeg ntxeev siab rau Nws, Yexus twb hais tias, “Koj tsis paub hais tias, yog kuv thov kuv Txiv, nws yeej yuav txib nws cov tim tswv coob dua kaum ob pawg txhiab los pab kuv tam sim no los?”²⁷ Tiam sis qhov txawv heev yog qhov uas “tus Txiav Txim uas Nyob Mus Ib Txhis ntawm cov muaj sia thiab cov tuag”²⁸ twb raug txiav txim los ntawm ib tug uas tib neeg tsa tau ib ntus xwb. “Tiam sis Yexus tsis teb ib los li, tus tswv xeev xav tsis thoob, xyov yog ua li cas Yexus thiaj tsis teb.”²⁹ Tus Cawm Seej txoj kev ua siab mos siab muag los pom tau los ntawm Nws txoj kev teb zoo, txoj kev tswj hwm Nws tus kheej, thiab qhov uas Nws tsis siv Nws lub hwj chim uas nyob mus ib txhis kom pab Nws tus kheej.

Mormon hais tias kev muaj lub siab mos siab muag yog lub hauv paus ntawm tag nrho tej txuj ci thiab tej txiaj ntsim ntawm sab ntsuj plig.

“Yog li ntawd, yog tias ib tug neeg muaj kev ntseeg nws yuav tsum muaj kev cia siab; vim tias yog tsis muaj kev ntseeg ces yeej muaj tsis tau kev cia siab.

“Thiab ntxiv, saib seb kuv hais rau nej tias nws twb muaj tsis tau kev ntseeg thiab kev cia siab, tsuas yog tias nws yuav ua siab mos siab muag thiab txo siab txo ntsws xwb.

“Yog tsis li ntawd, nws txoj kev ntseeg thiab txoj kev cia siab twb tsis muaj qab hau, vim twb tsis muaj ib tug uas Vajtswv pom zoo, tsuas yog cov uas muaj siab mos siab muag thiab txo siab txo ntsws xwb; thiab yog tias ib tug neeg muaj siab mos siab muag thiab txo siab txo ntsws, thiab lees los ntawm tus Vaj Ntsuj Plig Dawb Huv lub hwj chim tias Yexus yog tus Khetos, nws yuav tsum muaj kev siab hlub; vim tias yog nws tsis muaj kev siab hlub ces nws tsis muaj nuj nqis dab tsi; yog li ntawd nws yuav tsum muaj kev siab hlub.”³⁰

Tus Cawm Seej hais tias, “Cov uas muaj siab mos siab muag tau koob hmoov, vim lawv yuav tau lub ntiaj teb ua lawv tug.”³¹ Kev muaj siab mos siab muag yog ib qho tseem ceeb ntawm tej cwj pwm uas los saum ntuj los thiab peb txais tau thiab muaj tau ntxiv hauv peb lub neej vim muaj thiab yog los ntawm tus Cawm Seej txoj Kev Theej Txhoj.

Kuv ua tim khawv hais tias Yexus Khetos yog peb tus Txhiv Dim uas tau sawv rov los thiab muaj txoj sia nyob. Kuv cog lus tias Nws yuav coj peb txoj hau kev, pov hwm thiab txhawb peb lub dag zog thaum peb taug kev raws Nws tus Ntsuj Plig txoj kev siab mos siab muag. Kuv hais lus tim khawv txog tej yam tseeb thiab tej kev cog lus no los ntawm tus Tswv Yexus Khetos lub npe dawb ceev, amees.