Opampap oh mohngiong karakarahk

Nan Kadehde Kapw, kitail esehla duwen pwutak pwulopwul kepwehpwehu me idek rehn Sises, “Sounpadahk Mwahu, soangen wiewia mwahu da me I uhdahn pahn wia, pwe ien alehki mour soutuk?”²Sounkomouro mahsanihong, Keieu e pahn kapwaiada kosonned akan. Mwuri Kauno pil masanihong mehkot me inenen sairada.

“Sises mahsanihong, Ma ke men unsekla, kohwei oh netkihla ahmw kepwe kan koaros oh pweine kan ke ahpw kiong me semwehmwe kan oh e ahpw pahn mie ahmw pai nanleng: oh kohdo iangiehla.

“Mwahnakapwo lao rong mahsen pwukat, e ahpw kapehd toutoula patopatohla sang wasao: pwe mwahnakapw kepwehpweh men ih.”³

Karasahieng dahme pwutak pwulopwul kepwehpwehu wia ong ni dahme Amulek wia me mih nan Pwuken Mormon. Amulek wia aramas pwersek men me inenen pweida oh ah peneinei tohto oh kempoakepah pil tohto.⁴ E kawewehda pein ih me Kauno kin malipe pak tohto apw e kin pohnsehse; ohl emen me ese duwen Koht apw kin kahmahmki.⁵ Amulek wia ohl mwahu men ahpw mwohnkihla dipwsou kan en sampah me duwehtehte dahme pwutak pwulopwul kepwehpwehu wia nan Kadede Kapw.

Mehndahte ah mohngiong keptakai, Amulek peikiong mahsen en tohnlengo, e kasamwoh soukohp Alma ong nan imwehu, oh sewesehki dahme e anahne. E pirda ni pali ngehn ni en Alma pwarek ih oh apw alehda malipilip en kalohki rongamwahu. Eri Amulek pwilikihdi “nah kohl, oh silper, oh soahng koaros me e kesempwalki … pwehki mahsen en Koht, [oh pil] sekenikenlahr pahn kempoakepah kan oh pil ah pahpa oh ah peneinei kan.”⁶

Ahmw madmadau ia wekpeseng en wiewia en pwutak pwulopwul kepwehpwehu oh Amulek?

Ni ansou en mahwen keper kan me ntingdi nan Pwuken Mormon, kawelialihn kisinlikou kan nanpwungen Moroni, kapdin en sounpei en Nipahi kan, oh Pahoran, sounkopwung lapalap oh kepina en sahpwo. Moroni me nah sounpei kan mihmilahr nan kahpwal pwehki koperment ah sohte seweseirail, ntinglahng Pahoran “duwen soahng kei me e kapwukonki”⁷ oh karainlikamwih oh ienge sounkaweid kan me irail aramassalamalam, dangapaur, soukautih, oh pil kamahmkihla neirail aramas.⁸

E pahn mengei ong Pahoran en lingerngerkihda soangen karaun likamw me Moroni karaunehki, ahpw e sohte mwehl. E sapeng ni limpoak oh kawewehieng duwen mwekid en pelian koperment me Moroni sohte wehwehki. Pahoran nda:

“Kilang I ndahiong uhk, Moroni, me I sohte pereniki amwail mih nan kahpwal, mehlel, e katoutouiala pali ngeniet. …

“… Nan noumw kisin likou ke lipwlipwoare ie, ahpw I sohte wiahki mehkot, I sohte lingeringerki, ahpw I pereniki, mehlel en ahmw mohngiong.”⁹

Dahme ke medemedewe kahrepen Pahoran ah sohte mwehliki Moroni ah uhongirailo?

Nan Kapokon Lap en sounpwong weneu samwalahro, Presiden Russell M. Nelson kosoia me e pahn idawehn en Presiden Thomas S. Monson luhk en onopki, doandoaropwe, oh alasang dahme mehlel kan me mihmi nan Pwuken Mormon. E koasoia, “I song ien idahwen ah kaweid. Ehu me I pil wia, I wiahda list en dahkot Pwuken Mormon, dahme mehlel, dahme likamw, dahme pweidahr, dahme kamehlelpe, oh dahme kasansaldahr nan pwuhko. Ni ahnsou me I rapahki soang pwukat nan pwuken Mormon e kamarainiehda! I pekihda rehmwail en pil iang alasang.”¹⁰

Pil duwehte Presiden Henry B. Eyring, e kosoiahda uwen ah kesempwaliki nan ah mour pekpek en Presiden Monson. E koasoia:

“I kin wadek Pwuken Mormon rahn koaros daulihier sounpar 50. Eri I kak pein medewe me mahsen en Presiden Monson ongete aramas teikan. Ahpw, duwehte pali laud en kumwail, I kehn me sawas oh inou me soukohpo wiahu lukehiong ie pwe ien kak wie laudsang uwen me I wiewia. …

“Dahme soukohpo inoukiong kitail, mihmihier rehi oh pil pali totohn kumwail.”¹¹

Dahme ke medmedewe kahrepen kaun en mwomwodiso riemenet ara wauneki oh mwadangete kapwaiada pekpek en Presiden Monson?

I sohte nda me mwekid kehlail ni palingen en Amulek, Pahoran, Presiden Nelson, oh Presiden Eyring wiawikihda soangen wiewia mwahu en Krais teieu. Mehlel, wiepe tohto oh soahng kei me kakehlakada palingen en ohl wadawadpwukat me kin sansal nan arail mour. Ahpw Sounkomouro oh Sapwellime Soukohp kan kin nannantiongete soahng kesempwal akan me kitail koaros anahne me kitail pahn kak esehla oh koadoahngki pwe atail mour en kak keirda.

Menlau tehk soangen lepin mahsen kan me Kauno mahsenki pwe en kawewehda pein ih nan iren pwuhk sarawio: “Kumwail ale oh kapaikada ahi mehn wisiket, oh padahngki sangie, pwe I me opampap oh nan kapehd karakarahk: oh, kumwail ahpw pahn diar kommoalpen ngenimwail.”¹²

Kitail en ese, me Soukomouro pilada en mahsenki opampap sang nanpwungen wiewia mwahu kan oh wiewia mwakelekel kan.

Mie ehu kaweid mengei me Soukohp Joseph Smith alehdi sang nan ehu kaudial nan par 1829. Kauno masanih, “Eseiehla, oh rong ahi mahsen kan; aluhkih opampap en Ngeniet, oh ke pahn ahniki popohl sang rehi.”¹³

Opampap iei wiewia mwahu en Soundoaro oh e kin kasalehda atail wiewia pwung, atail kin men kapwaiada kupwuren Koht, oh me kitail kak kanengemah mehlel. Wiewia mwahu wet pahn sewesei kitail en kak wehwehkihla mwahu wiewiahn Amulek, Pahoran, Presiden Nelson, oh Presiden Eyring.

Ni karasepe, Presiden Nelson, oh Presiden Eyring momourki mour pwung oh mwadangete kapwaiada en Presiden Monson luhk en wadek oh onopki Pwuken Mormon o. Eri ohl akat koaros wie papahki pwukoah kesempwal nan Mwomwohdiso oh onopkiher pwuhk sarawi ansou reirei, ira kasalehda sang ni ara inengieng en kapwaiada oh idawehn kaweid en soukohp.

Amulek men kapwaiada kupwuren Koht, alehda luhk me kohieng pwe en padahki rongamwahuo, oh pwilikihdi ah dipwsou kesempwal akan oh ah peneinei kan. Oh Pahoran kapaikihda en kak wehwehki, oh kanengamah en wia mehkot sang ah pahn wia mehkot ansou me e kawehwehiong Moroni kahpwal akan me wie lalaudla sang arail kin uhong kopernment.

Wiewia mwahu en Krais me pid Opampap sohte nohn wehwe mwahu ong kitail rahn pwukat. Aramas opampap kinkehlail, ahpw kaidehn luwet; re kin mwekid, kaidehn pahpahsan, re kin eimah, kaidehn namenek; kanengemah, kaidehn nohn daulihla; re kin aktikitik, kaidehn liaktohrohr; oh re kin kadek, kaidehn tiahk suwed. Aramas opampap men sohte kin mwadangete lingerngerda, pohnmwahso, de aklapalap ahpw e kin mwadang en ponsehse pweidahn aramas teikan.

Aktikitik me kin kasalehda me kitail kin mwohniki Kauno oh kin anahne Sapwellimen Kauno kaweid oh sawas, ahpw wahn opampap kin weksang pwehki kitail kin esehla sang Ngehn Sarawio oh pil sang irail kan me sohte nohn koahiek, sohte skuhl laud, re sohte pil ahniki pwukoah kesempwal de ehu re sohte pil ahniki marain laud. Me duwehte Nahman, nein nahnmwarki en Siria kapdin en sounpei kau, me karakahkala oh ahpw alehda kaweid en nah laduo oh peikiong dahme soukohp Elisa ndahu en duhdu nan pilen Sordan pak isuh.¹⁴ Opampapla pahn doareikitaila sang atail maskunkihla pohnmwahso me kin kalapw pwilisang atail kin men ndandla, atail pwukoa kan, kepwehpwe, oh sang ni aramas ah kin kapingai kitail.

Opampap wiewia ehu me pahn kohsang ni ahmw inengieng, nannantiong wia me pwung, momour mwakelekel, oh nannantiong en alehdi mahkpen dipatail kan ansou koaros.¹⁵ Ni ansouohte e pil wia kisakis en palingehn ehume kitail kak kilang.¹⁶Kitail kak tamataman, me, kahrepen kisakis wet ah kohieng kitail, pwe kitail en kak paida oh sewese Sapwellimen Koht seri kan.¹⁷

Ni atail kin kohdo oh idawehnla Sounkomouro, kitail kin wie kekeirda oh ekis ekis kak en duwehla Ih. Kitail kin ale manaman sang rehn ngehno pwehn pein kaunkinkitailda kanengemah ni mwomw meleilei. Eri, pwe kitail en wiahla tohnpadahk en Kauno kitail pahn aktikitikla ahpw kaidehn ihte me kitail pahn wia.

Moses, “audaudkidahr soangen loalokong koaros enmehn Isip, oh wiahla ohl koahiek nin lokaia oh wiewia kan.”¹⁸Ahpw, ih ohl aktikitik men, me keieu aktikitik rehn aramas en sampah kan”¹⁹ Ah loalokong oh koahiek kak kahrehiong en pohnmwahso. Pwehki, wiewia oh kisakis en palingehno iei opampap me e kapaikihda me kihsang pohnmwahso nan ah mour oh kahrehiong Moses ah kak ahniki koahiek oh kak kapwaiada kupwuren Koht.

Mour en Sounkomouro me kasalehda karasaras keieu kesempwal en opamapap.

Sounkomour Lapalapo, iei “me ketdihdo wasa keieu karakarahk en sampah”²⁰ oh lokolok, nta keredi, oh pwoula “pwe en kamwakelehsang atail sapwung kan,”²¹ aktikitikla oh widen nehn Sapwellime tohnpadahngko.²² Soangen mwekid en opampap wet me pahn kasalehda Kauno nin duwen emen ladu men oh sounkaweid men.

Sises ketkihda karasaras keieu laud en wiahda dahme mwahu oh pil nantiong kapwaiada koasoandi lap ni ah weirengkilokolok mwuledek nan Ketsemeni.

“Oh ansou me e ketket wasao, E masanih ong [Sapwellime Tohnpadahko] Kapakap pwe kumwail dehr lohdiong nan kasongsong.

“Oh e … kelepwidi, oh kapakap,

“Mahsanih, Semei, ma komw kupwurki, ah komw ketkihwei sangie dahl wet: ahpw kaidehn nsenei, ahpw kupwuromwi en pweida.”²³

Opampap me Sounkomouro wia ni ansou me e ketin ale lokolok laud wia kasansal ong emen emen kitail kesempwalpen mwohnki Sapwellimen Koht kupwurokong sang pein atail loalokong.

Sapwellimen Kauno inengieng oh weliankitaildi wia doadoahk kesempwal wet wia mehkot kesempwal laud oh wia mehn doadoahk ong kitail koaros. Ni ansou me irail pwihn en sounpei en tehnpaso lel nan mwetuwel en Ketsemeni pwe irail en saliedi Sises, Piter usada nah kedlahs oh pelehki en Samworo Lapalap eh ladu, oh pelehsang salenge palimaun.²⁴ Sises eri ketin doahkehte salengen ohlo, kamwawihala.²⁵ Menlau tehk mahs me E ketin kapahwei oh kupwuramwahwihki aramas emen me song en saliedi manaman sarawiohte me kakete sinsile sang ah kolkoldi oh kalohpwualao.

Na pil medewehla mwomwen arail karaunlikamwe Kauno mwohn Pailet pwe en kalopwuala.²⁶ Sises mahsanih ansou me irail pangalahro “Kumwail leme me met I sohte kak kapakap ong Semeio, oh e pahn ketkiongie pwihn en tohnleng me tohtohsang eisek riau?”²⁷Eri, iet “Sounkopwung poatopoat en me momour oh melahr akan”²⁸ ahpw pakadeikadahr rehn sounkopwung me aramas pein pilada. “Oh [Sises] sohte ketin sapeng; mehndahte kepinahu ah lingerngerdahr.”²⁹ Sises ketin opampaplahte sohte sapeng irail ni arail kapkapeidak Ih, E kehlailkihte ah pali oh sohte men kasalehda Sapwellime manaman.

Mormon padahngki me opampap me wia poahsoan en koahiek oh kisakis en palingehn koaros.

“Eri, ma aramas emen ahniki pwoson e uhdahn anahne koapworopwor; pwe ma sohte pwoson sohte koapworopwor.

“Oh pilehu kapwurehiong, kilang I ndahieng kumwail me kumwail sohte kak ahniki pwoson ma sohte koapworopwor, ihte ma kumwail aktikitikla oh karakarahkiala amwail mohngiong kan.

“Ma iei, ah pwoson oh koapwoaroapwoar wia mehkot mwahl, pwe sohte emen me warohng uh mwohn Koht, ihte ma irail akan me e ahniki mohngiong aktikitik oh karakarahk oh wehkada sang ni manaman en Ngehn Sarawio me Sises iei ihme Krais, e pahn uhdahn limpoak; pwe ma sohte limpoak reh; sohte ih mehkot; Eri e uhdahn anahne en ahniki limpoak.”³⁰

Sounkomouro mahsanih, “Meid pai irail kan me aktikitik: pwe irail pahn sohsohki sampah.”³¹ Opampap wia mehkot kesempwal en sohso sarawio oh kak alahldi oh kekeirda nan atail mour pwehki sang ni Tomw en Sounkomouro.

I kadehdeh me Sises Krais iasadahr oh iei atail Sounkomour ieias. Oh I inoukiong kumwail me E pahn kaweid, doarehla, oh kakehlailih kitail ma kitail pahn weweidki karakarahk en Sapwellime Ngehno. I kapwilewei ahi kadehdeh en me mehlel pwukat oh inou kan ni mwahr sarawi en Kaun Sises Krais, amen.