Pagpangalagad sama sa Gibuhat sa Manluluwas

Pagkanindot nga panalangin ang magpuyo sa panahon sa nagpadayong pagpadayag gikan sa Dios! Samtang kita mahinamun nga nagpaabut ug dawaton sa hingpit ang “pagtuman sa tanang mga gisulti sa Dios,”¹ nga mahitabo ug moabut pinaagi sa gipanagna nga mga panghitabo sa atong panahon, giandam kita alang sa Ikaduhang Pag-anhi sa Manluluwas.²

Ug unsa pa ang mas maayong paagi sa pag-andam sa pagsugat Kaniya kay sa pagpaninguha nga mahimong sama Kaniya pinaagi sa mahigugmaong pagpangalagad sa usag usa! Ingon nga gitudlo ni Jesukristo sa Iyang mga sumusunod sa sinugdanan niini nga dispensasyon,“Kon kamo nahigugma kanako kamo mag-alagad kanako.”³ Ang atong serbisyo ngadto sa uban usa ka pagpakita sa pagkatinun-an ug sa gugma alang sa Dios ug sa Iyang Anak, si Jesukristo.

Usahay naghunahuna kita nga kinahanglang mobuhat kita og usa ka butang nga bililhon kaayo ug bayanihon aron “maihap” isip pagserbisyo sa atong mga silingan. Apan ang yano nga mga buhat sa serbisyo mahimong adunay lawom nga mga epekto sa uban—ingon man sa atong mga kaugalingon. Unsa ang gibuhat sa Manluluwas? Bisan og ang Iyang balaang mga gasa sa Pag-ula ug Pagkabanhaw—nga atong gisaulog niining nindot nga Dominggo sa Pagkabanhaw—“walay lain nga adunay labaw ka mahinungdanong impluwensya diha sa tanan kinsa nakapuyo na ug kinsa magpuyo pa dinhi sa yuta.”⁴ Apan Siya usab mipahiyom ni, nakigsulti uban ni, nakiglakaw kauban ni, naminaw ngadto ni, mihatag og oras alang ni, miawhag, mitudlo, mipakaon, ug mipasaylo. Managsama Niyang giserbisyohan ang pamilya ug mga higala, mga silingan ug dili mga kaila, ug gidapit Niya ang mga kaila ug mga minahal sa pagpahimulos sa buhong nga mga panalangin sa Iyang ebanghelyo. Kadtong “yano” nga mga serbisyo ug gugma naghatag og sumbanan alang sa atong pagpangalagad karon.

Samtang kamo adunay pribilehiyo sa pagbarug alang sa Manluluwas sa inyong pagpangalagad nga mga paningkamot, pangutan-a ang inyong kaugalingon, “Unsaon nako pagpakigbahin ang kahayag sa ebanghelyo ngadto niini nga tawo o pamilya? Unsa ang giaghat sa Espiritu nga akong buhaton?”

Ang pagpangalagad mahimong buhaton sa daghang nagkalain-lain nga mga paagi. Busa unsa ang panig-ingnan niini?

Ang pagpangalagad sama sa mga kapangulohan sa korum sa mga elder ug Relief Society nga mainampuong nagtambag mahitungod sa mga buluhaton. Kay sa mga lider nga naghatag lamang og gagmayng mga papel, kini sama sa nagtambag mahitungod sa mga indibidwal ug mga pamilya nga tawo samtang ang mga buluhaton gihatag ngadto sa mangalagad nga mga kaigsoonan. Kini sama sa nanglakaw, nag-uban og dula sa gabii, nagtanyag og serbisyo, o gani nagkuyog sa pagpangalagad. Kini sama sa personal nga pagduaw o nakigsulti diha sa telepono o nag-istorya online o nag-text. Kini sama sa naghatud og birthday card ug nag-abiba og dula sa soccer. Kini sama sa pakigbahin og kasulatan o kutlo gikan sa pakigpulong sa komperensya nga makahuluganon ngadto niana tawo. Kini sama sa pakighisgot og pangutana sa ebanghelyo ug pakigbahin sa pagpamatuod aron magdala og katin-awan ug kalinaw. Kini sama sa mahimong kabahin sa kinabuhi sa usa ka tawo ug mag-amuma kaniya. Kini sama usab sa interbyu sa pagpangalagad diin ang mga panginahanglan ug mga kalig-on gihisgutan sa mabination ug tukma nga paagi. Kini sama sa ward council nga nag-organisar aron sa pagtubag sa usa ka mas dako nga panginahanglan.

Kini nga matang sa pagpangalagad naglig-on sa usa ka sister kinsa mibalhin og pinuy-anan sa dihang ang iyang bana misugod og graduate school. Nga walay telepono nga magamit ug may batang gamay nga amumahan, naglibug siya diha sa bag-ong dapit, hingpit nga walay nahibaloan ug nag-inusara. Walay pasiuna nga pahibalo, usa ka Relief Society nga sister mituktok sa pultahan nga nagdala og usa ka parisang gamay nga sapatos alang sa masuso, gipasakay ang duha sa iyang sakyanan, ug gidala sa grocery. Mi-report ang mapasalamatong sister, “Siya ang nahimo nakong sandiganan!”

Ang tinuod nga pagpangalagad gipakita sa usa ka mas hingkod nga sister sa Africa kinsa gisugo sa pagpangita og sister nga dugay nang wala mosimba. Sa pag-adto niya sa panimalay sa sister, iyang nakita nga ang babaye gibun-og ug gikawatan, dihay gamay kaayo nga pagkaon, ug walay masul-ob nga sinina nga gibati niya nga dili angayan alang sa mga miting sa Simbahan ma-Dominggo. Ang babaye nga mangalagad kaniya nagdala og dunggan nga andam maminaw, bunga gikan sa iyang halaman, mga kasulatan aron basahon ug panaghigalaay. Ang “nawala” nga sister sa wala madugay misimba ug karon may calling na tungod kay nasayud siya nga gihigugma siya ug gihatagan og bili.

Tipunon ang mao nga mga paningkamot sa Relief Society ug sa karong giusab nga korum sa mga elder modala og panaghiusa nga makahatag og makatingala nga mga resulta. Ang pagpangalagad nahimong usa ka hinan-ay nga paningkamot aron sa pagtuman sa katungdanan sa priesthood sa “pagduaw sa balay sa matag sakop” ug sa “pagbantay diha sa simbahan sa kanunay, ug magpaduol ug maglig-on kanila,”⁵ ingon man sa pagkab-ot sa katuyoan sa Relief Society sa pagtinabangay og andam alang sa mga panalangin sa mahangturong kinabuhi.⁶ Magtrabaho og dungan ubos sa direksyon sa bishop, mga kapangulohan sa korum sa mga elder ug Relief Society makadasig samtang sila naninguha sa labing maayo nga mga paagi sa pagbantay ug pag-amuma sa kada tawo ug pamilya.

Tuguti ako sa paghatag kaninyo og usa ka ehemplo. Usa ka inahan nahiling nga adunay kanser. Wala madugay misugod siya sa pagpatambal, ug diha-diha dayon, ang mga sister sa Relief Society mitrabaho, nagplano unsaon nga labing makatabang sa iyang mga pagkaon, kasakyan sa higayon nga magpagpatambal, ug uban pang tabang. Kanunay siyang gibisitahan, gihatagan og makalipay nga pakig-uban. Sa samang higayon, ang korum sa Melchizedek Priesthood misugod sa paglihok. Gitrabaho nila ang pagdugang og inusab nga katulganan ug kaligoanan aron mas sayon ang pag-amuma sa masakiton nga sister. Ang young men mitrabaho sa pagtabang nianang mahinungdanong paningkamot. Ug ang young women miapil: malipayon nilang giplano sa tinud-anay ang kanunay nga pagpalakawlakaw sa iro kada adlaw. Samtang nanglabay ang panahon, mipadayon ang ward sa ilang serbisyo, nagdugang ug nagpahiuyon diin gikinahanglan. Kini tataw nga usa ka trabaho sa gugma, matag miyembro naghatag sa iyang kaugalingon, naghiusa sa pagpakita og pag-amuma sa tinagsa nga mga paagi nga mipanalangin dili lamang sa nag-antus nga sister apan sa kada miyembro sa iyang pamilya.

Human sa maisug nga paningkamot, sa katapusan ang sister namatay sa kanser ug gilubong. Ang ward ba nakaginhawa ug naghunahuna sa maayong pagkabuhat ug maayong pagkahuman nga trabaho? Wala, ang young women nagpadayon sa pagpalakawlakaw sa iro kada adlaw, ang mga korum sa priesthood nagpadayon sa pagpangalagad ngadto sa amahan ug sa iyang pamilya, ug ang mga sister sa Relief Society nagpadayon sa pagtabang diha sa gugma aron mapaniguro ang mga kalig-on ug mga panginahanglan. Mga kaigsoonan, kini mao ang pagpangalagad—kini ang paghigugma sama sa gibuhat sa Manluluwas!

Lain nga panalangin kabahin niining dinasig nga mga pahibalo mao ang oportunidad alang sa young women nga nag-edad og 14 ngadto sa 18 sa pag-apil sa pagpangalagad isip mga kauban sa mga sister sa Relief Society, ingon man sa young men nga ilang ka-edad nga nagserbisyo isip mga kauban sa mga naghupot sa Melchizedek Priesthood. Ang mga kabatan-onan makahimo sa pagpakigbahin sa ilang talagsaon nga mga gasa ug makatubo sa espiritwal nga paagi samtang sila kauban sa mga hamtong diha sa buhat sa kaluwasan. Ang pagpaapil sa mga kabatan-onan sa pagpangalagad nga mga buluhaton makadugang usab sa kasarang sa Relief Society ug sa mga korum sa mga elder sa pag-amuma sa uban pinaagi sa pagdugang sa gidaghanon sa mga miyembro kinsa moapil.

Samtang ako naghunahuna sa katingalahang batan-ong mga babaye nga akong nailhan, naghinam-hinam ako alang niadtong mga sister sa Relief Society kinsa makabaton og pribilehiyo nga mapanalanginan pinaagi sa kadasig, mga talento, ug espiritwal nga kadaling mobati sa usa ka batan-ong babaye samtang sila nagserbisyo kauban nila o sila ang nangalagad kanila. Ug ako sama kahimuot sa higayon nga ang young women matambagan ug matudloan ug mapalig-on sa ilang mga sister sa Relief Society. Kini nga oportunidad sa pag-apil sa pagtukod sa gingharian sa Dios mahimong usa ka dako kaayong kaayohan ngadto sa young women, nagtabang kanila nga mas maandam sa pagtuman sa ilang tahas isip mga lider sa Simbahan ug sa komunidad ug isip makaabag nga mga kauban sa ilang pamilya. Sama sa gipakigbahin ni Sister Bonnie L. Oscarson gahapon, ang young women “gusto nga moserbisyo. Nagkinahanglan silang masayud nga bililhon sila ug mahinungdanon sa buhat sa kaluwasan.”⁷

Sa tinuod, ang young women nangalagad na ngadto sa uban, nga wala sugoa o walay saba. Usa ka pamilya nga akong nailhan mibalhin og gatusan ka kilometro ngadto sa usa ka bag-ong dapit diin sila walay kaila. Sulod sa unang semana, usa ka 14 anyos ang panuigon nga batang babaye gikan sa ilang bag-ong ward mipakita diha sa ilang balay nagdala og plato sa biskwit, nag-abi-abi kanila niini nga dapit. Ang iyang inahan mapahiyumong nagbarug sa iyang luyo isip usa ka andam nga drayber, nagsuporta sa tinguha sa iyang anak nga babaye nga mangalagad.

Lain nga inahan nabalaka usa ka adlaw niana nga ang iyang16 anyos ang panuigon nga anak nga babaye wala sa panimalay sa naandang oras. Sa dihang sa katapusan ang batang babaye miabut, ang iyang inahan nangutana kaniya nga may pipila ka kabalaka kon diin siya gikan. Ang 16 anyos ang panuigon ingon og maulawong mitubag nga naghatud siya og bulak ngadto sa usa ka biyuda kinsa nagpuyo sa duol. Namatikdan niya nga ang mas hamtong nga sister masulub-on nga tan-awon ug naaghat sa pagbisita kaniya. Uban sa hingpit nga pagtugot sa iyang inahan, ang batan-ong babaye mipadayon sa pagbisita sa edad-idaran nga babaye. Nahimo silang suod nga managhigala, ug ang ilang nindot nga panag-uban mipadayon sa mga katuigan.

Kada usa niining batan-ong mga babaye, ug daghan pa nga sama kanila, makamatikod sa panginahanglan sa usa ka tawo ug motrabaho sa pagsulbad niini. Ang batan-ong mga babaye adunay kinaiyanhong tinguha sa pag-amuma ug sa pagpakigbahin nga mahimong mamaayo ang tumong pinaagi sa pagpangalagad nga makig-uban sa usa ka hingkod nga sister.

Dili igsapayan kon pila pay atong edad, kon atong hunahunaon sa unsang paagi ang pagpangalagad nga labing epektibo, mangutana kita, “Unsa ang iyang gikinahanglan?” Ubanan kana nga pangutana og usa ka sinserong tinguha sa pagserbisyo, kita niana giyahan sa Espiritu sa pagbuhat unsay makapabayaw ug makapalig-on sa tawo. Nakadungog ako og dili maihap nga mga istorya kabahin sa mga kaigsoonan kinsa napanalanginan pinaagi sa yanong buhat sa pag-apil ug sa pag-abi-abi diha sa simbahan, usa ka mahunahunaong mensahe diha sa text o email, usa ka personal nga pagkontak atol sa malisud nga panahon, usa ka imbitasyon sa pag-apil diha sa usa ka kalihokan sa grupo, o usa ka tanyag sa pagtabang sa usa ka mahagitong sitwasyon. Ang walay kapikas nga mga ginikanan, bag-ong mga kinabig, dili kaayo aktibo nga mga miyembro, mga biyuda og mga biyudo, o nagkalisud nga batan-on mahimong nagkinahanglan og sobra nga pagtagad ug unang tabang gikan sa tigpangalagad nga mga kaigsoonan. Ang pagtinakdoay tali sa mga kapangulohan sa korum sa mga elder ug sa Relief Society nagtugot sa tukma nga mga buluhaton nga pagahimoon.

Sa katapusan ang importante, nga ang tinuod nga pagpangalagad nabuhat og tagsa-tagsa uban ang gugma isip ang hinungdan. Ang bili ug ang ganti ug ang kahibulongan sa sinserong pagpangalagad mao nga kini sa tinuod makapausab og mga kinabuhi! Kon bukas ang atong mga kasingkasing ug andam sa paghigugma ug pag-apil, pag-awhag ug paghupay, ang gahum sa atong pagpangalagad dili kapugngan. Uban sa gugma isip ang hinungdan, mga milagro mahitabo, ug makakita kita og mga paagi sa pagdala sa atong “nawala” nga mga kaigsoonan ngadto sa tibuok nga pagdawat sa ebanghelyo ni Jesukristo.

Ang Manluluwas mao ang atong panig-ingnan sa tanan—dili lamang sa unsay kinahanglan natong buhaton apan nganong kita kinahanglan nga mobuhat niini.⁸ “Ang Iyang kinabuhi dinhi sa yuta maoy [usa ] ka pagdapit kanato—sa pagpataas og gamay sa atong mga pagtan-aw sa pagkalimot sa atong kaugalingon nga mga problema ug [sa] pagtabang ngadto sa uban.”⁹ Samtang atong gidawat ang oportunidad nga mangalagad sa tibuok kasingkasing ngadto sa atong mga kaigsoonan, mapanalanginan kita nga mahimong mas lunsay sa espirituhanong paagi, mas mahiuyon sa kabubut-on sa Dios, ug mas makasabut sa Iyang plano sa pagtabang sa kada usa nga mobalik ngadto Kaniya. Mas dali kita nga makaila sa Iyang mga panalangin ug mahinamong molugway niadtong mga panalangin ngadto sa uban. Mokanta ang atong mga kasingkasing og dungan sa atong mga tingog:

Hinaut nga ato untang ipakita ang atong pasalamat ug gugma alang sa Dios pinaagi sa pagpangalagad uban ang gugma ngadto sa atong mahangturong mga kaigsoonan.¹¹ Ang resulta mao ang panaghiusa sa pagbati sama sa natagamtam sa mga katawhan sa karaang Amerika 100 ka tuig human sa pagpakita sa Manluluwas diha sa ilang yuta.

“Ug nahinabo nga walay panagbingkil … tungod sa gugma sa Dios nga anaa sa mga kasingkasing sa mga katawhan.

“… Ug wala nay mga kasina, ni panagbangi, ni kagubot, … ug sa pagkamatuod wala nay mga katawhan nga labaw pa ka malipayon sa tanan nga mga katawhan nga gilalang sa kamot sa Dios.”¹²

Malipayon akong personal nga mopamatuod nga kining pinadayag nga mga kausaban dinasig sa Dios ug nga, samtang atong hingpit nga gidawat kini uban sa andam nga mga kasingkasing, mahimo kitang mas andam sa pagsugat sa Iyang Anak, si Jesukristo , sa Iyang pag-anhi. Kita mas duol nang mahimo nga mga katawhan sa Zion ug bation nato ang sobrang hingpit nga kalipay uban niadtong kinsa atong natabangan subay sa agianan sa pagkadisipulo. Nga kita unta mobuhat niini mao ang akong kinasingkasing ug mapainubsanong pag-ampo diha sa ngalan ni Jesukristo amen.