Txhawb Pab Zoo Li tus Cawm Seej Ua

Yeej yog ib txoj koob hmoov zoo kawg uas peb nyob hauv ib lub caij nyoog uas txais tau kev tshwm sim los ntawm Vajtswv tsis tu ncua! Thaum peb saib rau yav tom ntej thiab muab siab npuab rau thaum yuav “muaj ib puas tsav yam txum tim rov qab los,”¹ uas twb los thiab tseem yuav los ntawm tej yam uas cov yaj saub qhia txog peb lub caij no, peb npaj siab rau tus Cawm Seej txoj Kev Los Zaum Ob.²

Thiab tsis muaj ib txoj kev npaj ntsib Nws uas zoo npaum li kev rau siab hloov los ua neeg zoo li Nws dhau ntawm qhov uas ib leeg txhawb pab ib leeg! Zoo li Yexus Khetos qhia cov uas coj raws li Nws thaum pib lub caij nyoog tso txoj cai no, “Yog [nej] hlub kuv [nej] yuav tsum ua hauj lwm rau kuv.”³ Peb tej hauj lwm pab lwm tus yeej qhia txog peb txoj kev ua thwj tim thiab peb txoj kev ris txiaj thiab txoj kev hlub rau Vajtswv thiab Nws Leej Tub, Yexus Khetos.

Tej lub sij hawm peb xav tias peb yuav tsum ua ib yam loj heev thiab tseem ceeb thiaj “muaj cai” hais tias peb tau pab peb cov neeg zej zog. Tiam sis tej yam me me uas peb ua kom pab lwm tus yeej muaj hwj huam heev rau lwm tus—tsis hais peb tus kheej los yog. Tus Cawm Seej tau ua dab tsi? Dhau los ntawm Nws ob lub txiaj ntsim zoo kawg nkaus uas yog txoj Kev Theej Txhoj thiab txoj Kev Sawv Rov Los—uas peb ua koob tsheej txog thaum hnub Easter Sunday no—“tsis muaj leej twg uas muaj hwj chim hloov tau tib neeg lub siab tsis hais tag nrho cov uas tau ua neej nyob yav tas los thiab cov uas yuav ua neej nyob yav tom ntej nyob hauv lub ntiaj teb.”⁴ Tiam sis Nws kuj tau luag nyav, sib tham, taug kev, mloog, siv sij hawm, yaum, qhia, pub mov thiab zam txim rau lwm tus. Nws tau ua hauj lwm pab tsev neeg thiab phooj ywg, neeg zej zog thiab cov neeg qhuas ib yam, thiab Nws caw cov uas Nws paub thiab hlub kom txais tau cov koob hmoov uas los ntawm Nws txoj moo zoo. Tej yam “me me” uas ua kom pab lwm tus thiab hlub lawv no yeej yog ib tug yam ntxwv rau peb txoj kev txhawb pab niaj hnub no.

Thaum nej muaj cib fim sawv tus Cawm Seej cev ua hauj lwm txhawb pab, cia li nug nej tus kheej, “Kuv yuav ua li cas kom qhia txog txoj kev kaj ntawm txoj moo zoo rau tus neeg los yog tsev neeg no? Tus Ntsuj Plig tshoov kuv lub siab kom kuv ua dab tsi?”

Yus yeej ua tau ntau yam kom txhawb pab lwm tus. Yog li ntawd ces yuav zoo li cas?

Kev txhawb pab yog thaum pawg txwj laug thiab Koom Haum Niam Tsev pawg thawj tswj hwm thov Vajtswv sib tham txog qhov uas yuav txib li cas. Tsis yog cov thawj coj muab cov ntawv rau yus xwb, kev txhawb pab yog kev sib tham txog cov neeg thiab tsev neeg thaum muab kev txib rau cov nus thiab cov viv ncaus mus txhawb pab. Kev txhawb pab yog thaum yus nrog ib tug neeg mus kev, koom ua ke kom ua si, muab kev pab rau nws, los yog nrog nws mus pab lwm tus ua ke. Kev txhawb pab yog kev mus xyuas ib tug los yog kev sib tham hauv xov tooj los yog sib tham online los yog ntaus ntawv text rau nws. Kev txhawb pab yog kev muab ib daim ua koob tsheej txog ib tug hnub yug thiab zoo siab qw kom txhawb nqa nws thaum nws ncaws pob. Kev txhawb pab yog thaum yus hais ib nqe vaj lug kub los sis ib zaj los ntawm lub rooj sab laj uas xav tias muaj nqi rau tus neeg ntawd. Kev txhawb pab yog kev sib tham txog ib lo lus nug txog txoj moo zoo thiab kev hais lus tim khawv kom ib tug paub meej thiab nyob kaj siab lug. Kev txhawb pab yog kev muaj feem nrog ib tug lub neej thiab kev saib xyuas nws. Kuj yog kev sib tham txog kev txhawb pab uas yog lub sij hawm uas yus sib tham raws li kev tsim nyog txog tej yam uas ib tug xav tau thiab nws tej kev muaj zog. Kev txhawb pab yog thaum pawg ntseeg pawg sab laj yuav npaj tej yam loj thaum muaj neeg xav tau.

Kev txhawb pab zoo li no twb ntxiv dag zog rau ib tug viv ncaus uas tsiv tsev mus deb heev thaum nws tus txiv pib kawm ntawv qib siab graduate school. Vim tsis muaj xov tooj thiab muaj ib tug me nyuam mos liab, nws tsis paub qhov chaw tshiab uas nws nyob lawm, nws nyuaj siab thiab kho siab heev. Ib tug viv ncaus hauv Koom Haum Niam Tsev tau tuaj txog nws lub qhov rooj nqa ib nkawm khau me me rau tus me nyuam mos liab, thauj tus niam tsev thiab tus mos liab hauv nws lub tsheb mus nrhiav ib lub taj laj yuav khoom noj. Tus viv ncaus uas txais kev pab qhia tias, “Tus viv ncaus no yeej cawm kuv txoj sia!”

Kev txhawb pab tiag tiag yeej zoo li ib tug viv ncaus laus nyob hauv Afikas uas raug txib mus nrhiav ib tug uas tsis tau koom kev sib ntsib hauv lub Koom Txoos ntev lawm. Thaum nws mus txog tus poj niam lub tsev, nws kawm hais tias luag ntaus tus poj niam thiab nyiag nws cov nyiaj, nws tsis muaj mov noj pes tsawg, thiab tsis muaj khaub ncaws uas nws xav tias tsim nyog hnav rau kev sib ntsib hauv lub Koom Txoos thaum hnub Sunday. Tus viv ncaus uas txais kev txib mus txhawb pab no tau mloog nws, muab zaub los ntawm nws lub vaj rau nws noj, nyeem vaj lug kub rau nws thiab ua nws tus phooj ywg. Tus poj niam uas “tsis tuaj” mas tsis ntev nws tau rov qab los koom lub koom txoos thiab tam sim no muaj hauj lwm ua vim nws paub tias muaj neeg hlub nws thiab saib nws rau nqi.

Qhov uas peb muab tej hauj lwm hauv lub Koom Haum Niam Tsev koom nrog pawg txwj laug uas tau kho dua tshiab yuav ua rau peb koom siab koom ntsws peb thiaj yuav ua tau tej yam zoo kawg nkaus. Kev txhawb pab yog kev koom siab ua hauj lwm kom muaj raws li tej dej num pov thawj hwj uas yog “mus xyuas txhua tus mej zeej tom tsev,” thiab “saib xyuas cov ntseeg txhua lub sij hawm, thiab nyob nrog lawv thiab txhawb lawv lub zog,”⁵ thiab yuav ua tau lub Koom Haum Niam Tsev lub hom phiaj kom ib leeg pab ib leeg npaj rau cov koob hmoov ntawm txoj sia nyob mus ib txhis.⁶ Thaum lawv ua hauj lwm ua ke raws li tus npisov qhia, pawg txwj laug thiab Koom Haum Niam Tsev pawg thawj tswj hwm yuav txais kev tshoov siab thaum lawv nrhiav kev zoo tshaj plaws saib xyuas thiab pab txhua tus neeg thiab tsev neeg.

Cia kuv qhia ib qho piv txwv rau nej. Ib tug niam tsev muaj mob cancer. Tsis ntev ces nws pib ua kev kho mob, thiab tom qab kiag ntawd, cov viv ncaus hauv Koom Haum Niam Tsev pib ua hauj lwm, kom paub yuav npaj li cas pab ua mov, thauj nws mus thaum teem sij hawm kho mob, thiab ua lwm yam txhawb nqa nws. Lawv tuaj xyuas tsis tu ncua, pab kom nws zoo siab. Tib lub sij hawm ntawd, pawg Pov Thawj Hwj Mekixedes pib ua hauj lwm thiab. Lawv tau ua hauj lwm kho ib chav pw thiab chav da dej kom ua yooj yim dua rau tus poj niam mob tsev neeg tu nws. Cov tub hluas twb siv tes thiab nraub qaum koom tes ua tej hauj lwm tseem ceeb ntawd. Thiab cov ntxhais hluas tau pab thiab: lawv twb rau siab coj tus aub mus taug kev txhua hnub. Thaum lub sij hawm dhau mus, pawg ntseeg ntawd twb pab nws ntxiv, es lawv tau kho tej yam thaum twg yuav tsum ua. Yeej yog ib txoj hauj lwm los ntawm kev hlub, txhua tus mej zeej twb pub nws tus kheej, koom siab koom ntsws saib xyuas uas foom koob hmoov rau tus poj niam uas raug txom nyem no thiab txhua tus nyob hauv nws tsev neeg.

Tom qab nws rau siab tawm tsam, qhov mob cancer tau kov yeej tus viv ncaus no es nws twb tso lub ntiaj teb no tseg. Pawg ntseeg ntawd puas txaus siab thiab xav tias lawv twb tau ua zoo lawm thiab tsis tas ua ntxiv? Tsis yog li ntawd, cov ntxhais hluas tseem tau coj tus aub mus taug kev txhua hnub, tej pawg pov thawj hwj tseem tau txhawb pab tus txiv tsev thiab nws tsev neeg, thiab cov viv ncaus hauv Koom Haum Niam Tsev tseem ncav tes nrog kev hlub seb leej twg muaj dag zog pab tau thiab tsev neeg xav tau dab tsi. Cov nus thiab cov viv ncaus, nov yog kev txhawb pab—nov yog kev hlub zoo li tus Cawm Seej hlub!

Ib txoj koob hmoov ntxiv los ntawm tej kev tshaj tawm no yog lub cib fim rau cov ntxhais hluas uas muaj 14 xyoo mus txog 18 xyoo ua khub rau cov viv ncaus hauv lub Koom Haum Niam Tsev mus txhawb pab lwm tus, ib yam li cov tub hluas uas muaj hnub nyoog zoo ib yam yuav ua khub rau cov txiv neej uas tuav lub Pov Thawj Hwj Mekixedes mus txhawb pab lwm tus. Cov tub hluas ntxhais hluas siv tau lawv tej txiaj ntsim thiab loj hlob ntawm sab ntsuj plig thaum lawv koom tes nrog cov laus ua txoj hauj lwm ntawm kev cawm seej. Qhov uas cov tub hluas ntxhais hluas yuav koom ua kev txhawb pab no kuj yuav ua rau lub Koom Haum Niam Tsev thiab pawg txwj laug pab tau neeg coob ntxiv vim yuav muaj cov mej zeej ntxiv uas koom tes ua hauj lwm li no.

Thaum kuv xav txog cov ntxhais hluas zoo uas kuv tau paub, ua rau kuv zoo siab heev rau cov viv ncaus hauv lub Koom Haum Niam Tsev uas yuav muaj cib fim tau koob hmoov los ntawm cov ntxhais hluas kev zoo siab, tej txuj ci, thiab kev txawj hnov tus ntsuj plig thaum lawv ua hauj lwm ua ke los yog txais lawv txoj kev txhawb pab. Thiab kuv kuj zoo siab kawg vim cov ntxhais hluas no yuav muaj cib fim kawm thiab txais dag zog los ntawm lawv cov viv ncaus nyob hauv lub Koom Haum Niam Tsev. Lub cib fim kom koom nrog kev txhim tsa Vajtswv lub nceeg vaj no yuav pab cov ntxhais hluas heev, vim yuav pab lawv npaj siab ua raws li lawv tej hauj lwm ua thawj coj hauv lub Koom Txoos thiab zej zog thiab txawj ua tej yam pab lawv tsev neeg. Zoo li Viv Ncaus Bonnie L. Oscarson qhia nag hmo, cov ntxhais hluas “xav pab lwm tus. Lawv xav paub hais tias peb saib lawv rau nqi thiab yuav tsum muaj lawv kom ua tau txoj hauj lwm cawm seej no.”⁷

Muaj tseeb tiag, cov ntxhais hluas ib leeg txhawb pab ib leeg tam sim no, tsis tas txib lawv los yog qhuas lawv. Kuv paub ib tsev neeg uas tsiv tsev ntau pua mais mus rau ib qho chaw uas lawv tsis paub leej twg. Thawj lub lim tiam lawv nyob ntawd, ib tug ntxhais hluas uas muaj 14 xyoos los ntawm lawv pawg ntseeg tshiab tuaj txog ntawm lawv lub qhov rooj nqa qhaub noom, tos txais lawv los rau thaj tsam ntawd. Nws niam txaus siab tsav tsheb thauj nws tuaj, nws txhawb nqa nws tus ntxhais txoj kev xav mus txhawb pab.

Muaj ib hnub ib tug niam tsev ntxiv txhawj vim nws tus ntxhais uas muaj 16 xyoo tseem tsis tau los tsev raws li lub sij hawm nws yeej los. Thaum tus ntxhais hluas los txog tsev, tus niam tsev chim me ntsis nug nws seb nws nyob qhov twg. Tus ntxhais hluas uas muaj 16 xyoo ntawd teb hais tias nws twb nqa ib lub paj rau ib tug poj ntsuam uas nyob ze. Nws tau pom tias tus poj laug kho siab thiab txais kev tshoov siab mus xyuas nws. Tus niam tsev pom zoo tag nrho, es tus ntxhais hluas tau mus xyuas tus poj laug ntxiv. Nkawd ua phooj ywg zoo, thiab nkawd twb sib raug zoo tau ntau xyoo.

Ob tug ntxhais hluas no, thiab ntau tus ntxiv zoo ib yam li nkawd, pom ib tug neeg uas xav tau kev pab thiab tau ua hauj lwm kom pab tau nws. Cov ntxhais hluas xav xav saib xyuas thiab qhia lwm tus uas ib tug poj niam laus coj tau thaum ua kev txhawb pab ua ke.

Txawm yog peb muaj hnub nyoog li cas los, thaum peb xav txog qhov uas peb yuav ua kev txhawb pab li cas kom zoo tshaj plaws, peb yuav tsum nug hais tias, “Nws xav tau dab tsi?” Thaum peb nug lo lus no thiab xav pab lwm tus tiag tiag, ces tus Ntsuj Plig yuav coj peb mus ua tej yam uas yuav txhawb nqa thiab ntxiv dag zog rau tus neeg uas xav tau kev pab ntawd. Kuv twb hnov ntau zaj txog cov nus thiab cov viv ncaus uas tau koob hmoov los ntawm ib yam me me uas lwm tus mej zeej ua kom txais tau lawv nyob hauv lub tsev koom txoos, xa email los yog ib nqe lus text, nrog lawv sib tham thaum lawv nyuaj siab, caw lawv mus koom nrog kev ntxim saib ntxim ua, los yog xav muab kev pab thaum muaj teeb meem. Cov niam tsev uas tsis muaj tus txiv, cov neeg hloov siab los ntseeg tshiab, cov mej zeej uas tsis tshua muab siab rau ntseeg, cov poj ntsum thiab yawg ntsuag, los sis cov tub hluas ntxhais hluas uas muaj teeb meem ntshe tej zaum cov nus thiab cov viv ncaus uas mus txhawb pab yuav tsum tsom ntsoov rau lawv thiab pab lawv ntxiv. Yog pawg txwj laug thiab Koom Haum Niam Tsev pawg thawj tswj hwm sib koom tes ces lawv yuav paub txib li cas.

Txawm tau hais li cas los, yuav ua tau kev txhawb pab tiag tiag thaum ib leeg muaj kev hlub pab ib leeg. Qhov muaj nqi thiab qhov txuj ci tseem ceeb los ntawm kev txhawb pab tiag tiag yog qhov uas pauv tau lwm tus lub neej! Thaum peb qhib peb lub siab thiab txaus siab hlub lwm tus, txhawb nqa thiab nplij lawv lub siab, ces tsis muaj leej twg cheem tau peb txoj kev txhawb pab. Thaum peb muaj siab hlub lwm tus, yuav muaj tej txuj ci tseem ceeb, thiab peb yuav nrhiav kev coj peb cov viv ncaus thiab cov nus uas “poob zoo lawm” los rau Yexus Khetos txoj moo zoo.

Tus Cawm Seej yog peb tus yam ntxwv txog txhua yam—tsis yog hais txog tej yam peb yuav tsum ua xwb tiam sis vim li cas peb thiaj li yuav tsum ua li ntawd.⁸ “Nws lub neej nyob hauv lub ntiaj teb no yog kev caw peb—kom tsa peb qhov muag siab dua, kom peb tsis txhob nco txog peb tej teeb meem thiab [kom] peb ncav tes pab lwm tus.”⁹ Thaum peb lees yuav lub cib fim kom txhawb pab peb cov viv ncaus thiab cov nus kawg siab kawg ntsws, peb txais tau koob hmoov kom peb sab ntsuj plig muaj zog, paub zoo dua txog Vajtswv lub siab nyiam, thiab haj yam txawj to taub Nws txoj hau kev kom peb txhua tus rov qab mus cuag Nws. Peb yuav paub zoo dua txog Nws cov koob hmoov thiab yuav xav muab cov koob hmoov ntawd rau lwm tus. Peb lub siab yuav koom ua ke hu nkauj nrog ib lub suab hais tias:

Xav kom peb qhia txog peb txoj kev ris txiaj thiab kev hlub rau Vajtswv thaum peb txhawb pab peb cov viv ncaus thiab cov nus nrog kev hlub nyob mus ib txhis.¹¹ Yog ua li ntawd ces peb yuav koom siab koom ntsws ib yam li cov neeg nyob hauv Amelikas puag thaum ub 100 xyoo tom qab tus Cawm Seej tshwm sim hauv lawv lub teb chaws.

“Thiab tau muaj tias twb tsis muaj kev sib cav sib ceg nyob hauv thaj av, vim yog Vajtswv txoj kev hlub uas nyob hauv cov neeg lub siab.

“… Twb tsis muaj tej kev xav tau luag tug, los sis tej kev sib cav sib ceg, … thiab tseeb tiag ntshe twb tsis tau muaj ib co neeg uas yuav zoo siab tshaj nyob hauv tag nrho cov neeg uas Vajtswv txhais tes tau tsim los.”¹²

Kuv zoo siab ua tim khawv hais tias Vajtswv tau tshoov cov yaj saub lub siab qhia txog tej kev tshwm sim no thiab, thaum peb muab siab npuab tej yam no, peb yuav haj yam npaj siab ntsib Nws Leej Tub, Yexus Khetos, thaum Nws los. Peb yuav hloov los ua ib co neeg Xi-oos thiab peb yuav muaj kev xyiv fab loj kawg nkaus nrog rau cov uas peb tau pab thaum peb taug kev ua cov thwj tim. Kuv rau siab thiab txo hwj chim thov kom peb yuav ua li no los ntawm Yexus Khetos lub npe, amees.