Olisechakl el Diuai a Osobel

Ng meral mengasireng el klengeltengat el de kiei ra taem el melemolem el ngar er ngii a ocholt ra Dios!Uaiseiel dongichiil el kirel e durrekodel ra “olutel a rokui el tekoi,”¹ el ngii a mla mekedmokl e dirk mo mekedmokl el okiu a ulaoch el tekoi el ngii a dubech er a temed, sei e kid a mengedmokl er kid el kirel sel el Ongeru Lemei a Osobel.²

E ngera lemuut el ungil rolel el dongedmokl el mo olsiuekl er Ngii ra de blak a rengud el mouai Ngii el okiu a beltikelreng el omesiou el mora tang! A Jesus Kristo ra lolsisechakl er a roltirakl er Ngii ra uchelel a olutel, “Alsekum kau a betik a rengum er ngak e kau a kirem el mesiou er ngak.”³ A siunged el mora rebebil a olechotel a oltireklel me a dirrek el omereng el saul me a beltikelreng el mora Dios me a Ngelekel, Jesus Kristo.

Sel bebil er a taem e kede omdasu el kmo ng kired el rullii a klou e mengasireng el mo “obasech” el dosiou ra retonari er kid. Engdi mekekerei el omeruul el kirel a omesiou a sebechel ngar er ngii a ngellitel el ngedechel el mora rebebil—el osisiu el merkid. Ngera ng rirellii a Osobel? Ng okiu a chedaol sengk er Ngii ra Tngakireng ma Okiis ra Kodall—el ngii a dongemedaol er tia el klebokel el Sandei ra Baskua—“ng diak a ngodech el ngarngii a kmal ngellitel el blsiul [el mora] rokui el mla kiei e dirk mo kiei er tia el beluulechad.”⁴ E ngdi Ngii a dirrek el ouklikm, milngedecheduch, milrael, ulerrenges, chiloit a temel, ulemekduch, ulsisechakl, ulemekang, e dirrek el uluusubes. Ng milesiou ra telungalek me a resechelei, retonari ma diak el kaudengei el di osisiu, e milngemedaol ra rekmeed er ngii me a betik ra rengul el chad el mo oldeu ra mengasireng klengeltengat ra ebangkelio er Ngii. Aike el “mekekerei” el omeruul el mesiou ma beltikelreng a mo olechotel a telengtengil a osichekled er chelechang.

El uaiseiel ngarngii a techellem el mo ometechei ra Osobel ra omelasem er kemiu el olsisechakl, moker er kau, “Ng mekerang ak kumerk ra llemesel a ebangkeliolobengkel a tang ma lechub eng telungalek? Ngerang omekllomes er ngak a Chedaol Reng el mo meruul?”

Olisechakl a sebechel mekedmokl el okiu a betok el kakerous el teletael. Meng uangera olechotel?

A olechotel a olisechakl a di uai sel el re cheldebechel ra re elders me a merredelel er a Chelechad er a Rolngeseu a sel loluluuch el kirel a omelib ra ruoll el tekoi. Bai diak el ua re merredel el di merrous a mekekereiel babier, ng diuai sel lolib el kirir a tang me a dirrek el telungalek el ileakl el ruoll el tekoi a bo lebesterir a rolsisechakl el rodam ma rodos. Ng di ua sel bo dorael, dmak el rokui el mora klekool se el kebesengei, odars a omesiou, malechub e kede dmak el mesiou. Ng di ua se el doldingel a mad me a lechub e kede mengedecheduch ra dengua, kau chat el online ma dirrek el outext. Ng di ua se el domechei a babier ra tansiobi me a dirrek el choieng al temel a klekool ra soccer. Ng di ua sel el kaiuecholt a chedaol llechukl me a lechub eng tekoi el mengai ra cheldecheduch ra klou el ongdibel el ngii a ngarngii a belkul el mora tang. Ng di ua sel dosaod a ker ra ebangkelio e dirrek el olecholt a olechotel a klaumerang el mo uchul a bleketakl me a budech. Ng di ua sel bom ulsiseb ra klengar ra tang e momekereu er ngii. Ng di ua sel ngarngii a nger ma ker el kirel a omesiou el ngii a usbechall ma klisiich a selaod el ngara ungil e tabesul el omeruul. Ng di ua merredelel a ward a oungerachel el mo mengedmokl er tir el mo omtech ra klou el ngesou.

Tia el teletael ra olisechakl a smilsichii a tara odos el ngii a millukl el mora basio el cheroid ra blil ra bocha el temel a bechil el omuchel ra daingak. E kal oureor dengua ma dirrek el ngarngii a tolechoi el osiou er ngii, ng milechesuar el kmo ng dimlak el tabesul a delengcheklel er tia el beches el kiei er ngii, e mle uriid e di ngii. Dimlak a uchei el uleklatk, ea tara odos ra Cheldebechel er a Rolngeseu a mledum ra chesmerel lolab a teblo el orecherel a ngelekel tolechoi, ngoititerir el terung el ngmasch ra mlai, e ngiltiterir el mo omechar a lousbech ra stoang. Ngka el mesaul a rengul odos a millekoi, “A klengar ngak a mlara chereuel a chimal!”

A merang el olisechakl a mocholtel okiu a tara klou el odos el ngara Africa el ngii a miltutkl el mo osiik ra tara odos ra Ikelesia el meketeket el diak el teloi ra miting ra Ikelesia. Sera lebocha ra blil ngika el odos, eng milsa el uasei ngika el redil a mla mechelebed e murechorch a kloklel, di mle mekesai a kall el longang, e dimlak a ta el bilel e ulemechesiu el kmo ng dimlak el chatter el kirel a miting ra Ikelesia sel Sandei. Ngika el redil el miltutkl el mo olisechakl er ngii a mle kldmokl el mo orrenges, ulab ayasai el mla er a sersel, chedaol llechukl el bo longuiu, me a klsechelei. Ngke el mle “dibus” el odos a uriul e ng liluut el mei ra ikelesia e chelechang eng olab a okedong leng medengei el kmo ng ngarngii a klaubeltikelreng el morngii e dirrek el ulsbechall.

A uldekial a omelasm el ua omeruul el okiu a Chelechad er a Rolngeseu el obengkel tia el ngarngii er chelechang el telengtengil a chechelechad er a re elders a mo oldak a reng e mo omekdubech a mengasireng el omeruul. Olisechakl a mo tara omesmechokl el melasem el kudmokl a ngerchelel a priesthood el mo “oldingel ra blirir a rechad ra ikelesia” e dirrek el mo “mengkerengel a ikelesia ra bek el taem, e mo obengterir e melisiich er tir,”⁵ e dirrek el mo kudmeklii se el moktek ra Chelchad ra Rolngeseu el mo olengeseu ra tang e mengedmokl er tir el kirel klengeltengat er a diak a ulebengelel klengar.⁶ Dmak el oureor el ngara cheungel a derderel a bisob, cheldebechel ra re elders ma omerredel ra Chelchad er a Rolngeseu a sebechir el metik a omekllomes se el losiik a kot el ungil rolel el longkar e lomekerreu ra tang ma dirrek el telungalek.

Mei ek beskemiu a tara okesiu. A ta ra chedil a miltik el kmo ng smecher el kasinoma. Ng di mle tekib eng omuchel el ngara osongel el omekungil, e di mle mereched, e a rodos ra Chelchad er a Rolngeseu a mlo oureor, el melib a kmo te mekera e mo kot el tabesul el olengeseu el kirel a blengur, olidiuul el mora osengelel ra ukeruul, ma bebil er a ngeseu. Te mle blechoel oldingel er ngii, e omsa a ungil ongelaod. Osisiu el taem, ea chelechad ra Melchizedek Priesthood di mle mereched el louedikel. Te ululngeseu el omekedechor er a tara delmerab ma diong el mo rullii meng beot a lolengeseu er ngika el smecher el odos. A rengeasek el sechal a uleldars a temir el mo oureore mo uldimukl er tia el klou a belkul ureor. Ma rengeasek el dil mete mlo ulsiseb el olengeseu: te mle dmeu a rengrir el melib a temir el blak a rengrir el merael er a bilis ra bek el sils. Cherengel a taem, ea ward a milemolem a ngelsuir, melechel e mengodech alsekum eng kirel. Ng mle bleketakl el omesiou ra beltikelreng, a tang el chad ra ikelesia el mengoit a temir, el dmak el olecholt a klaukerreu el ileaklel omeruul el ngii a diak el di lomekngeltengat er ngika el chuarm el odos, ng dirrek el mora ta el chedal a telungalek er ngii.

A uriul ra blakelreng el omeruul, ngike el odos a milrekong e mlad ra secherel kasinomae mlo ra ulengull. A ward te mlo melechesuar el kebekakl el uchul sel berraod el olengeseu a mla mora ulebengelel?Ng diak, a rengeasek el dil a milemolem el merael ra bilis ra bek el sils, chelchad ra priesthood mete milemolem el olisechakl ra chedam ma telungalek er ngii, ma Chelchad ra Rolngeseu mete milemolem el oldars a ngesou el okiu a beltikelreng el omeketakl a klisiich me a ngidil lousbech. Rodam me a rodos, tia a olisechakl—tia a oubeltikelreng el di ua Osobel!

A tara klengeltengat ra ika el omekllomes el sbedall a techall el mora rengeasek el dil el teruich ma eua el mo teruich ma eai a rekrir el mo teloi el ngara olisechakl e chelmengir a rodos ra Chelchad er a Rolngeseu, el di uai a rengeasek el sechal el di ua meklungir el ngara olisechakl el chelmengir a rolab a Melchizedek Priesthood. A rengeasek a sebechir el olecholt a tokubets el sengk er tir el mukeroul a chedaol tekoi er a rengrir sel losiou el lobengterir a remeklou el kirel a ureor ra mo suobel. Olsiseb ra rengeasek ra tekoi ra olisechakl a sebechel dirrek el kilungii a cherrengel a Chelchad er a Rolngeseu me a dirrek el cherengelel a re elders el mo omekereu er a rebebil sel sekum e te kilungii a klungel a rechad ra ikelesia el mo teloi er tir.

Sel bo kumdasu el kirir a remellomes a rengrir el rengeasek el dil el bla kudengelterir, ak kmal mo ousemeriar el kirir tirke el odos ra Chelchad er a Rolngeseu el tir a mo er ngii a techellir el mo mukngeltengat el okiu a klemeriar el reng ra rengeasek el dil, duch er tir, me a dirrek el okedeldaol el chedaol tekoi ra rengrir e losiou el dmak el obengterir malechub e te olisechakl el mo er tir. E ngak a dirrek el osisiu el dmeu a renguk ra techall el rengeasek el dil a bo el sebechir el bo lorrenges e le mosisechakl e dirrek el bo le mesisiich el okiu a rodos ra Chelchad er a Rolngeseu. Tia el techall el mo teloi el omerk ra rengedel a Dios a mo klou el klungiaol el mora rengeasek el dil, olengeseu el ungil mengedmokl er tir el mo kudmokl a ngerchelir el mengeteklel a Ikelesia me a dirrek el bouai e osisiu el mo olengeseu el chedal a telungalek er tir. Uaikel ble louchais er kid a Sister Bonnie L. Oscarson er a chelii, rengeasek el dil a “sorir el ngara omesiou. Te kirir el medengei el kmo te mekreos e meklou a ultutelir el kirel a ureor ra mo suobel!”⁷

Ng klemerang, a rengeasek el dil a oketa di tir el olisechakl ra rebebil, el diak el ultuil ra keltukel el okedong el mo mesiou. A tara telungalek el kudengelterir a millukl el betok el dart el maelel mora beches el basio el tir a dimlak a ta el chad el lodengelterir. Ng di mle se el chelsel a kot el sandei, ea teruich ma eua rekil el redil ra beches el ward er tir a dilum ra tuangel ra blirir el oba belatong el ngarngii a cookies er ngii, el outnged er tir el mer tia el basio. A delal a dilchor el klikmechur er rullel el luleltak er ngii,e oldubech a soal a rengul a ngelekel el olisechakl.

A tara chedil a mle suebek a rengul ra tara sils el teruich ma elolem a rekil ngelekel redil a dimlak el belrei ra blechoel el temel me remei.Tia ra lemei ngika el dil, ea delal a uleker er ngii a bebil ra ker el lobengkel a sebekreng el kirel a kmo ng mlar ker. Ngika el teruich ma elolem a rekil a kiled eng mo medakt a uluuchais el kmo nguleba bung el mo omsa a melakl el dil el kiliei er a bita er tir. Ng ulemes er ngika el klou el odos el kora di ngii el tang e ulmelchesiu el kmo ng kirel mo oldingel er ngii. Loba a kengei ra delal, ngika el ngeasek el dil a milemolem el oldingel er ngika el mechas. Te mlo ungil kausechelei, e a klebokel el osongelir a milemolem el melai a rak.

A derta er tirka el rengeasek el dil, me a dirrek el betok el uaitir, a mesa tang el ousbech a ngesou e mo oureor el kutmeklii. A rengeasek el dil a ngarngii a sengk er tir el sorir el omekereu e olecholt el ngii a sebechel el ungil omekrael el okiu a olsisechakl el dmak el obengterir a remeklou el rodos.

Ng diak el belkul a rekid, el bo de ultuil ra kmo ng mekera a de kot el mo ungil olisechakl, kede oker, “Ngera [ngii] a lousbech?” Uldekialtia el ker lobengkel a meral blak el reng el mo mesiou, e kid a bo longetikaik er kid a Chedaol Reng el mo meruul a tekoi el ngii a mo mesebechakl e melisiich ra tang. Ak mla remenges a betokel cheldecheduch el kirir a rodam me a rodos el tir a mukngeltengat el okiu a beot el uldak me a outkeu ra ikelesia, delebedebek el tengami el okiu a email me a text, ma dirrek el kuk di odingel ra tang ma tang er a meringel el taem, omengemedaol el mo teloi ra klekool ra cheldebechel, malechub eng odars a ngesou el mora meringel el teletael el duubech. Mesobil el chedam ma lechub eng chedil, beches el bult el chad ra ikelesia, diak el blechoel mera ikelesia el chad ra ikelesia, mesobil, me a lechub e te rengeasek el ngara ringel el tir a ousbech a ngesou me a dirrek el klou a ultutelel el ngesou er a olisechakl el okiu a rodam ma rodos. A omeketakl ra delongelel a cheldebechel ra re elders me a merredelel a Chelchad er a Rolngeseu a uchul meng ngarngii a sel kmal bleketakl el okedong el mo mekedmokl.

Uaika el mla medung e mekedmokl, a meral olisechakl a kau dersta el mekedmokl el okiu a beltikelreng el ngii a melisiich a reng. A belkul ma klungiolel me a ongasireng er a blakelreng el olisechakl a uase ngii a mera el mengodech a klengar! Sel sekum e kede mok a rengud e kongei el oubeltikelreng e oldak, oldubech e mengelaod, e a klisichel a osisechekled a mo diak el mesim. Loba beltikelreng el omekduch a reng, a ongasireng el omeruul a mo er ngii, e kid a mo metik a roled el bo el sebeched el ngoititerir a re “dibus” el odam ma rodos el mei er tia el uldekial a rokui el mo dmak e oldeu ra ebangkelio ra Jesus Kristo.

A Osobel a olechotel a rokui el tekoi—diak el di el kirel aike el ngii a kired el meruul ng dirrek el uase ngera me a uchul me kede meruul er ngii.⁸  “A klengar er Ngii er tial beluulechad a [mle] mengemedaol er kid—el mo olterkokl a moktek er kid el mo telkib el ngarbab, el mo obes a ringeled e [mo] melasem el olengeseu ra rebebil.”⁹ Sel de kengei er a techall el meral ngarngii er a rengud el mo olisechakl er a rodam ma rodos er kid, e kid a mo mukngeltengat el lemuut el mo oikab a chedaol tekoi ra rengud, mo ngara tang el obengkel a telbilel a Dios,e dirrek el mo ngarngii a klemedengei er kid el kirel a Uldesuel el mo olengeseu er a tang el mo lemuut el mo er Ngii. Kede dirrek el mo klou el kldmokl el mo medengei a klengeltengat er Ngii e mo semeriar el mo oldars aikel klengeltengat el mora rebebil. A rengud a mo mengitakl el dmak lobengkel a omelekinged:

Mei medebo dolecholt a omereng el saul me a beltikelreng el mora Dios el okiu a olisechakl el oba beltikelreng el mora diak a ulebengelel a rodam ma rodos er kid.¹¹ Sel kekka er a uldak el reng er rechad er a Merikel er a ngara mong el taem el tir a le oldeu er dart el rak e a uriul er a Osobel e mo chemolt er a belulir.

“Meng mlo lengelakl el diak a omtok … leng uchul a beltkil a rengul a Dios el ngar er a rengrir tirka el chad.

“… Meng di mlak a klauchechei, malechub eng kelsib el reng, e diak a tar tirkel chad el diak el ngar a deureng el mo uai tirkel chad el tir a mo meob el lokiu a chimal a Dios.”¹²

Ak ungil a renguk el ouchais ra kmeed ra renguk el sioning er ngak el kmo aika el mengodech el ocholt a llomes el mengai ra Dios e uaisei, el sel doldeu el olab a blakelreng, e kid a mo ungil kldmokl el mo mesa Ngelekel, Jesus Kristo, ra luut er Ngii. Kede mo kmeed el mo chedal a Zion e mo melchesuar a diak a ulebengelel deureng lobengterir tirke el tir a de ngilsuterir er tia el omerolled el chad ra oltirakl. Bo doruul a sei a kmal ongtik el oba ngariou el reng el nglunguuch el oba ngklel a Jesus Kristo, amen.