Txhawb Pab nrog Vajtswv lub Hwj Chim thiab txoj Cai

Kuv cov kwv tij uas kuv hlub, ua nej tsaug rau nej txoj kev teev tiam tus Tswv thiab Nws txoj hauj lwm dawb huv. Kuv yeej xyiv fab nrog nej nyob no. Thawj Pawg Thawj Tswj Hwm tshiab no ua nej tsaug rau nej tej kev thov Vajtswv thiab nej txoj kev txhawb nqa pom zoo. Peb ua nej tsaug rau nej lub neej thiab nej tej hauj lwm rau tus Tswv. Nej txoj kev rau siab ua nej tej dej num thiab nej txoj kev ua siab dawb pab lwm tus yeej tseem ceeb heev thaum nej ua nej tej hauj lwm hauv lub Koom Txoos ib yam li tej ntawd yeej tseem ceeb rau peb thiab. Vim kuv tau ua hauj lwm tas kuv lub neej hauv lub Koom Txoos no, kuv tau kawm hais tias qhov uas yus pab lwm tus qhov twg los tsis ua li cas. Tus Tswv xav tias qhov uas muaj nqi yog qhov uas yus ua hauj lwm li cas.

Kuv ris Thawj Tswj Hwm Thomas S. Monson txiaj, nws yog ib tug yam ntxwv rau kuv tau 50 xyoos. Thiab kuv qhuas nws ob tug pab cuam, Thawj Tswj Hwm Henry B. Eyring thiab Thawj Tswj Hwm Dieter F. Uchtdorf. Kuv qhuas nkawd vim yog nkawd tej hauj lwm rau tus Tswv thiab Nws cov yaj saub. Ob tug tub qhe no twb tau txais kev txib ua lwm yam. Nkawd tseem muaj zog thiab rau siab ua hauj lwm. Kuv hwm thiab hlub nkawd ob leeg.

Yeej yog ib txoj koob hmoov zoo kawg uas peb ua hauj lwm hauv tus Tswv lub Koom Txoos tseeb uas muaj txoj sia nrog rau Nws txoj cai thiab lub hwj chim. Qhov uas tau muab Vajtswv lub pov thawj hwj txum tim rov qab los, tsis hais cov yuam sij ntawm lub pov thawj hwj los yog, qhib tej koob hmoov ntawm sab ntsuj plig zoo tshaj plaws rau Haiv Neeg Ntseeg hauv Hnub Nyoog Kawg uas tsim nyog. Peb pom cov poj niam, cov txiv neej thiab cov me nyuam nyob thoob plaws lub ntiaj teb txais tau cov koob hmoov no.

Peb pom cov poj niam rau siab ntseeg uas to taub lub hwj chim uas muaj los ntawm lawv tej hauj lwm thiab los ntawm lawv vaj txiaj ntsim thiab lwm yam kab ke hauv lub tuam tsev. Cov poj niam no paub hu kom tau lub ntuj ceeb tsheej tej hwj chim kom pov hwm thiab ntxiv dag zog rau lawv tus txiv, lawv cov me nyuam, thiab lwm tus uas lawv hlub. Lawv yog cov poj niam uas lawv sab ntsuj plig muaj zog es lawv tsis ntshai coj, qhia, thiab txhawb pab thaum lawv ua lawv tej hauj lwm nrog Vajtswv lub hwj chim thiab txoj cai!¹ Kuv ua Vajtswv tsaug rau lawv!

Zoo ib yam li ntawd, peb pom cov txiv neej uas rau siab ntseeg uas tsim nyog siv lawv tej txiaj ntsim vim lawv yog cov uas tuav lub pov thawj hwj. Lawv coj thiab ua hauj lwm los ntawm kev txi raws li tus Tswv txoj kev nrog kev hlub, kev ua siab zoo, thiab ua siab ntev. Lawv foom koob hmoov, coj, pov hwm, thiab txhawb lwm tus lub zog los ntawm lub hwj chim ntawm lub pov thawj hwj uas lawv muaj. Lawv ua tej txuj ci tseem ceeb rau cov uas lawv pab thaum lawv tseem pov hwm lawv txoj kev sib yuav thiab lawv tsev neeg. Lawv tso kev phem tseg thiab yog cov txwj laug uas muaj hwj chim nyob hauv Ixayees.² Kuv ua Vajtswv tsaug rau lawv!

Nim no, kuv xav hais me ntsis txog ib yam uas kuv txhawj txog. Yog li no: Peb cov kwv tij thiab cov muam coob tsis to taub tag nrho txog lub ntsiab ntawm lub hwj chim thiab txoj cai pov thawj hwj. Lawv ua tej yam zoo li lawv xav ua kom lawv tus kheej txaus siab thiab ua raws li lawv lub siab nyiam xwb es tsis siv Vajtswv lub hwj chim kom foom koob hmoov rau Nws cov me nyuam.

Kuv ntshai hais tias peb cov kwv tij thiab cov muam tsis to taub txog tej txiaj ntsim uas lawv txais tau.³ Ua piv txwv hais tias, peb cov kwv tij ib txhia ua zoo li lawv tsis to taub tias lub pov thawj hwj yog dab tsi thiab ua rau lawv txawj ua dab tsi. Cia kuv qhia ob peb yam piv txwv rau nej.

Tsis ntev tas los, kuv tau mus rau kev sib ntsib txais lub cim nco txog es ib tug me nyuam mos liab yuav txais ib lub npe thiab nws txiv txoj kev foom koob hmoov rau nws. Tus txiv tsev hluas puag nws tus me nyuam mos liab, muab ib lub npe rau nws, ces hais kev thov Vajtswv uas zoo kawg. Tiam sis nws tsis tau foom koob hmoov rau tus me nyuam ntawd. Tus me ntxhais mos liab ntxim hlub ntawd tau ib lub npe tiam sis tsis tau ib txoj koob hmoov! Tus txwj laug ntawd tsis tau paub tias kev thov Vajtswv thiab kev foom koob hmoov los ntawm lub pov thawj hwj txawv li cas. Nrog nws lub hwj chim thiab txoj cai pov thawj hwj, nws foom koob hmoov rau nws tus me nyuam los tau, tiam sis nws tsis tau ua li ntawd. Kuv xav tias, “Yeej yog ib lub cib fim uas tau ploj mus!”

Cia kuv hais ob peb yam piv txwv ntxiv. Peb paub txog cov kwv tij uas muab cov poj niam tsa ua cov thawj coj thiab xib hwb hauv lub Koom Haum Me Nyuam Yaus, Koom Haum Ntxhais Hluas, los yog Koom Haum Niam Tsev tiam sis tsis foom koob hmoov rau lawv—foom koob hmoov rau lawv kom muaj hwj chim ua tej hauj lwm uas Vajtswv hu lawv ua. Lawv tsuas hais lus ntuas thiab tej lus qhia rau lawv xwb. Peb pom ib tus txig tsev tsim nyog uas tsis siv lub pov thawj hwj foom koob hmoov rau nws tus poj niam thiab me nyuam thaum lawv yeej xav tau qhov ntawd. Twb tau muab lub hwj chim pov thawj hwj txum tim rov qab los rau hauv lub ntiaj teb, tiam sis cov kwv tij thiab cov muam feem ntau raug tej kev txom nyem loj heev hauv lub neej no es lawv tsis txais ib txoj koob hmoov pov thawj hwj ib zaug li. Yeej yog kev tu siab heev! Yog kev tu siab uas peb tshem tau.

Cov kwv tij, peb tuav Vajtswv lub pov thawj hwj dawb huv! Peb muaj Nws txoj cai foom koob hmoov rau Nws cov neeg. Cia li xav txog qhov uas tus Tswv qhia rau peb thaum Nws hais tias, “[Nej] foom koob hmoov rau tus twg los kuv yuav foom koob hmoov rau tus ntawd.”⁴ Yog peb lub txiaj ntsim uas peb ua tau tej yam los ntawm Yexus Khetos lub npe kom foom koob hmoov rau Vajtswv cov me nyuam raws li Nws lub siab nyiam rau lawv. Ceg txheem ntseeg cov thawj tswj hwm thiab cov npisov, thov kom nej ua tib zoo qhia txhua tus mej zeej hauv tej pawg pov thawj hwj uas nej saib xyuas kom lawv to taub foom koob hmoov pov thawj hwj rau lwm tus—tsis hais qhov uas lawv yuav tsum ua neeg tsim nyog thiab npaj lawv sab ntsuj plig kom siv tau Vajtswv lub hwj chim tag nrho.⁵

Rau nej cov kwv tij uas tuav lub pov thawj hwj, kuv caw nej yaum cov mej zeej kom ua raws li lawv tej kev khi lus, yoo mov thiab thov Vajtswv, kawm cov vaj lug kub, teev tiam hauv lub tuam tsev, thiab ua Vajtswv cov txiv neej thiab cov poj niam ua hauj lwm nrog rau kev ntseeg. Peb pab tau txhua tus muaj lub qhov muag uas tsom ntsoov rau kev ntseeg hais tias kev mloog lus thiab kev ncaj ncees yuav pab lawv nyob ze Yexus Khetos dua ntxiv, cia lawv muaj tus Vaj Ntsuj Plig Dawb Huv nrog nraim lawv nyob, thiab muaj kev xyiv fab hauv lawv lub neej!

Ib qho uas yeej yuav muaj nyob hauv tus Tswv lub Koom Txoos uas tseeb thiab muaj txoj sia yog qhov uas yuav muaj tus txheej txheem kom coj txoj kev txhawb pab Vajtswv cov me nyuam thiab lawv tsev neeg.⁶ Vim yog Nws lub Koom Txoos, peb cov uas yog Nws cov tub qhe yuav txhawb pab rau ib tug dhau ib tug, ib yam li Nws tau ua.⁷ Peb yuav txhawb pab lawv los ntawm Nws lub npe, nrog Nws lub hwj chim thiab txoj cai, thiab nrog Nws txoj kev ua siab zoo.

Ib zaug nyob hauv Boston 60 xyoo tas los tau qhia kuv hais tias kev txhawb pab ib tug neeg xwb yuav muaj hwj huam npaum li cas. Thaum ntawd kuv yog ib tug kws phais mob nyob hauv Massachusetts General Hospital—kuv tau ua hauj lwm txhua hnub, ob peb hmo txhua lub lim tiam, thiab ob peb weekend txhua lub hlis. Kuv tsis tau muaj sij hawm ntau rau kuv tus poj niam, peb plaub tug me nyuam, thiab kev mus rau lub Koom Txoos. Txawm li ntawd los, peb ceg ntseeg tus thawj tswj hwm tau txib kuv mus xyuas Wilbur thiab Leonora Cox lub tsev vim nws cia siab tias Tij Laug Cox yuav rov qab muaj siab rau ntseeg lub Koom Txoos. Nws thiab Leonora twb tau ua kev sib khi hauv lub tuam tsev.⁸ Tiam sis Wilbur tseem tsis tau koom tau ntau xyoo lawm.

Kuv tus khub thiab kuv wb mus rau nkawd tsev. Thaum wb mus hauv, Muam Cox zoo siab tos txais wb,⁹ tiam sis Tij Laug Cox mus kiag rau hauv lwm hoob thiab kaw qhov rooj.

Kuv mus rau lub qhov rooj khob qhov rooj. Tom qab ib me pliag, kuv hnov suab yau yau hais tias, “Nkag los.” Kuv qhib qhov rooj pom Tij Laug Cox zaum rau ntawm ib co tshuab xa xov tooj cua tawm. Nyob hauv chav me me ntawd, nws cia li muab ib tug luam yeeb loj ua cig. Kuv yeej paub tias nws tsis tshua xav nrog kuv tham.

Kuv saib ib ncig thiab hais rau nws hais tias, “Tij Laug Cox, kuv yeej ib txwm xav kawm txog kev xa xov tooj cua tawm. Koj puas kam qhia kuv? Thov txim kuv tsis tshua muaj sij hawm nyob hmo no, tiam sis koj puas kam kuv rov qab tuaj?”

Nws tos ib me pliag ces nws hais tias kuv tuaj los tau. Ces yog qhov pib ntawm ib txoj kev ua phooj ywg zoo. Kuv tau rov qab tuaj thiab nws qhia kuv. Kuv pib hlub thiab saib nws rau nqi. Tom qab ntawd kuv mus xyuas nws ob peb zaug, ces kuv pom qhov zoo ntawm tus txiv neej no. Wb tau ua phooj ywg zoo heev, thiab wb ob tug khub uas nyob mus ib txhis. Ces, thaum sij hawm dhau mus, kuv tsev neeg tau tsiv tsev. Cov thawj coj hauv pawg ntseeg ntawd tseem tau txhawb nqa tsev neeg Cox.¹⁰

Yim xyoo tom qab thawj thawj zaug kuv mus xyuas nws, tau tsim Ceg Txheem Ntseeg Boston.¹¹ Nej puas paub leej twg yog ceg txheem ntseeg ntawd thawj tus thawj tswj hwm? Yog mas! Tij Laug Cox! Tom qab ntawd, nws kuj ua hauj lwm ua qhov chaw tshaj tawm txoj moo zoo tus thawj tswj hwm thiab ib lub tuam tsev tus thawj tswj hwm.

Ntau xyoo tom qab ntawd, thaum kuv yog ib tug hauv Pawg Kaum Ob tug Thwj Tim lawm, kuv txais kev txib mus tsim ib ceg txheem ntseeg tshiab nyob hauv Sanpete County, Utah. Thaum kuv ua xam phaj, ua rau kuv xav tsis thoob vim kuv rov qab ntsib dua kuv tus phooj ywg Tij Laug Cox! Kuv txais kev tshoov siab hu nws ua ceg txheem ntseeg tshiab tus yawg suab. Tom qab kuv muab nws tsa, wb sib khawm thiab quaj. Tib neeg nyob hauv chav ntawd xav paub vim li cas ob tug txiv neej laus quaj. Tiam sis wb twb paub vim li cas. Thiab Muam Cox paub thiab. Wb quaj vim wb xyiv fab heev! Wb tau nco txog lub sij hawm 30 xyoo tas los, ib hmo nyob hauv nkawd lub tsev, thaum pib muaj kev sib hlub thiab kev hloov siab lees txim.

Zaj no tsis tau tas li ntawd. Tij Laug thiab Muam Cox tsev neeg loj tuaj muaj 3 tug me nyuam, 20 tus xeeb ntxwv thiab cov xeeb ntxwv muaj 54 tus me nyuam. Tsis tas li ntawd nkawd twb pab cov tub txib coob, ntau txhiab nyob hauv lub tuam tsev, thiab ntau tus ntxiv uas tau txais cov koob hmoov yawg suab los ntawm Wilbur Cox txhais tes. Nws thiab Leonora lub hwj huam los yuav muaj mus txog ntau tiam neeg nyob thoob plaws lub ntiaj teb.

Tej yam zoo li tau muaj los nrog Wilbur thiab Leonora Cox los muaj txhua lub lim tiam—cia siab hais tias, muaj txhua hnub—nyob hauv lub Koom Txoos no. Tus Tswv Yexus Khetos cov tub qhe uas rau siab yeej ua Nws tej hauj lwm, nrog rau Nws lub hwj chim thiab txoj cai.

Cov kwv tij, peb muaj cib fim qhib qhov rooj, foom koob hmoov pov thawj hwj rau neeg, kho neeg lub siab, ris tej nra, txhawb nqa tej zaj lus tim khawv, cawm txoj sia, thiab coj kev xyiv fab los rau hauv Haiv Neeg Ntseeg hauv Hnub Nyoog Kawg lub tsev—tag nrho tej no vim peb tuav Vajtswv lub pov thawj hwj. Peb yog cov txiv neej uas Vajtswv “tau hu thiab npaj lawv txij thaum ntuj tsim teb raug los raws li Vajtswv txoj kev paub ua ntej, vim yog [peb] txoj kev ntseeg heev thiab tej hauj lwm zoo.”¹²

Hmo no kuv caw nej nrog kuv sawv ntsug ua ib pawg kwv tij uas nyob mus ib txhis. Thaum kuv hais nej pawg pov thawj hwj, thov nej sawv thiab nyob li ntawd. Cov dikas, cia li sawv! Cov xib hwb, cia li sawv! Cov pov thawj! Cov npisov! Cov txwj laug! Cov pov thawj hlob! Cov yawg suab! Cov Xya Caum! Cov Thwj Tim!

Nim no, cov kwv tij, nej puas kam nyob li ntawd thiab hu nkauj nrog peb pawg hu nkauj hu tag nrho peb nqe ntawm zaj nkauj “Rise Up, O Men of God.”¹³ Thaum nej hu nkauj, cia li xav txog nej tej dej num hauv Vajtswv pawg tub rog uas muaj zog kom pab npaj neeg ntiaj teb rau tus Tswv txoj Kev Los Zaum Ob. Nov yog qhov uas Vajtswv txib peb ua. Nov yog peb lub sam xeeb. Kuv hais lus tim khawv li no los ntawm Yexus Khetos lub npe, amees.