ការបម្រើដោយព្រះចេស្ដា និងសិទ្ធិអំណាចពីព្រះ
ពួកយើងនឹងបម្រើនៅក្នុងព្រះនាមរបស់ទ្រង់ ដោយព្រះចេស្ដា និងសិទ្ធិអំណាចរបស់ទ្រង់ ហើយដោយសណ្ដានចិត្តល្អដែលពោរពេញដោយក្ដីស្រឡាញ់របស់ទ្រង់ ។
បងប្អូនប្រុសជាទីស្រឡាញ់ អរគុណចំពោះការលះបង់របស់បងប្អូនចំពោះព្រះអម្ចាស់ និងកិច្ចការដ៏បរិសុទ្ធរបស់ទ្រង់ ។ វាគឺជាអំណរដ៏ពិតដើម្បីនៅជាមួយបងប្អូន ។ ក្នុងនាមជាគណៈប្រធានទីមួយថ្មី ពួកយើងអរគុណចំពោះការអធិស្ឋានរបស់បងប្អូន និងការខិតខំគាំទ្ររបស់បងប្អូន ។ ពួកយើងមានអំណរគុណចំពោះជីវិត និងការបម្រើរបស់បងប្អូនចំពោះព្រះអម្ចាស់ ។ ការលះបង់របស់បងប្អូនចំពោះកាតព្វកិច្ច និងការបម្រើដែលពុំគិតពីខ្លួនឯងនៅក្នុងការហៅរបស់បងប្អូនគឺមានសារៈសំខាន់ដូចជាការហៅរបស់ពួកយើងផងដែរ ។ តាមរយៈការបម្រើពេញមួយជីវិតនៅក្នុងសាសនាចក្រនេះ ខ្ញុំបានរៀនដឹងថា វាមិនសំខាន់ថាយើងបម្រើនៅ កន្លែង ណាឡើយ ។ អ្វីដែលព្រះអម្ចាស់យកព្រះទ័យបំផុតនោះគឺ របៀប ដែលយើងម្នាក់ៗបម្រើទៅវិញទេ ។
ខ្ញុំសូមថ្លែងអំណរគុណដ៏ជ្រាលជ្រៅចំពោះប្រធាន ថូម៉ាស អេស ម៉នសុន ដែលជាគំរូរបស់ខ្ញុំអស់រយៈពេលជាង ៥០ ឆ្នាំ ។ និងទីប្រឹក្សារបស់លោក ប្រធាន ហិនរី ប៊ី អាវរិង និង ប្រធាន ឌៀថើរ អេស្វ អុជដូហ្វ ខ្ញុំសូមកោតសរសើរដ៏ខ្ពង់ខ្ពស់ ។ ខ្ញុំសរសើរពួកលោកចំពោះការបម្រើរបស់ពួកលោកថ្វាយព្រះអម្ចាស់ និងពួកព្យាការីរបស់ទ្រង់ ។ អ្នកបម្រើដ៏លះបង់ទាំងពីររូបនេះបានទទួលការចាត់តាំងថ្មី ។ ពួកលោកបន្ដបម្រើដោយមោះមុត និងប្ដេជ្ញាចិត្ត ។ ខ្ញុំគោរព និងស្រឡាញ់ពួកលោកទាំងពីរ ។
វាគឺជាពរជ័យដ៏អស្ចារ្យដើម្បីបម្រើនៅក្នុងសាសនាចក្រពិត និងសកម្មរបស់ព្រះអម្ចាស់ដោយនូវសិទ្ធិអំណាច និងអំណាចរបស់ទ្រង់ ។ ការស្ដារឡើងវិញនៃបព្វជិតភាពរបស់ព្រះ រួមទាំងកូនសោបព្វជិតភាព បានបើកទ្វារទៅកាន់ពរជ័យដ៏មហិមាបំផុតខាងវិញ្ញាណសម្រាប់ពួកបរិសុទ្ធដែលមានភាពសក្ដិសម ។ ពួកយើងបានមើលឃើញពរជ័យទាំងនោះចាក់ស្រោចទៅលើ ស្ត្រី បុរស និងកុមារទាំងឡាយនៅទូទាំងពិភពលោក ។
ពួកយើងបានមើលឃើញស្ត្រីស្មោះត្រង់ដែលយល់អំពីអំណាចដែលមានជាប់ជាមួយនៅក្នុងការហៅរបស់ពួកគេ និងនៅក្នុងអំណោយទានពិសិដ្ឋ និងពិធីបរិសុទ្ធដទៃទៀតក្នុងព្រះវិហារបរិសុទ្ធ ។ ស្ត្រីទាំងនេះដឹងអំពីរបៀបដើម្បីទាញយកព្រះចេស្ដានៃស្ថានសួគ៌មកការពារ និងពង្រឹងដល់ស្វាមីរបស់ពួកគេ កូនៗ និងមនុស្សដទៃទៀតដែលពួកគេស្រឡាញ់ ។ ទាំងនេះគឺជាស្ត្រីរឹងមាំខាងវិញ្ញាណ ដែលបានដឹកនាំ បង្រៀន និងបម្រើដោយពុំភ័យខ្លាចនៅក្នុងការហៅរបស់ពួកគេដោយអំណាច និងសិទ្ធិអំណាចរបស់ព្រះ !១ ខ្ញុំមានអំណរគុណចំពោះពួកគេណាស់ !
ដូចគ្នានេះផងដែរ ពួកយើងបានមើលឃើញបុរសស្មោះត្រង់ដែលរស់នៅតាមឯកសិទ្ធិរបស់ពួកគេក្នុងនាមជាអ្នកកាន់បព្វជិតភាព ។ ពួកគេបានដឹកនាំ និងបម្រើដោយការលះបង់តាមរបៀបរបស់ព្រះអម្ចាស់ដោយសេចក្ដីស្រឡាញ់ សណ្ដានចិត្តល្អ និងការអត់ធ្មត់ ។ ពួកគេប្រទានពរ ដឹកនាំ ការពារ ហើយពង្រឹងដល់អ្នកដទៃដោយអំណាចនៃបព្វជិតភាពដែលពួកគេកាន់ ។ ពួកគេបាននាំអព្ភូតហេតុមកលើអ្នកទាំងឡាយដែលពួកគេបម្រើ ខណៈដែលពួកគេរក្សាអាពាហ៍ពិពាហ៍ និងក្រុមគ្រួសាររបស់ពួកគេផ្ទាល់ដោយសុវត្ថិភាព ។ ពួកគេបដិសេធសេចក្ដីអាក្រក់ ហើយជាអែលឌើរដ៏ខ្លាំងក្លានៅក្នុងអ៊ីស្រាអែល ។២ ខ្ញុំអរគុណចំពោះពួកគេបំផុត !
ឥឡូវ ខ្ញុំសូមថ្លែងពីកង្វល់មួយបានឬទេ ? កង្វល់នោះគឺ ៖ មានបងប្អូនប្រុសស្រីជាច្រើននៅពុំទាន់យល់ដឹងបានពេញលេញអំពីគោលគំនិតនៃអំណាចបព្វជិតភាព និងសិទ្ធិអំណាច ។ ពួកគេធ្វើដូចជាពួកគេស្កប់ស្កល់នឹងបំណងប្រាថ្នា និងការស្រេកឃ្លានដ៏អត្មានិយមផ្ទាល់ខ្លួនរបស់ពួកគេជាជាងប្រើអំណាចរបស់ព្រះដើម្បីផ្តល់ពរដល់បុត្រាបុត្រីរបស់ទ្រង់ ។
ខ្ញុំខ្លាចថាមានបងប្អូនប្រុសស្រីជាច្រើនពុំចាប់យកឯកសិទ្ធិទាំងឡាយដែលអាចនឹងជារបស់ខ្លួននោះ ។៣ បងប្អូនប្រុសរបស់យើងមួយចំនួន ធ្វើដូចជាពួកគាត់ពុំយល់ថា បព្វជិតភាពជាអ្វី ហើយតើវាអាចឲ្យពួកគេធ្វើអ្វីខ្លះនោះទេ ។ ខ្ញុំសូមផ្តល់ដល់បងប្អូននូវឧទាហរណ៍ជាក់លាក់មួយចំនួន ។
កាលពីពេលកន្លងទៅ ខ្ញុំបានចូលរួមក្នុងការប្រជុំសាក្រាម៉ង់មួយ ដែលមានទារកថ្មីម្នាក់ទទួលការដាក់ឈ្មោះ និងប្រសិទ្ធពរមកពីឪពុក ។ ឪពុកវ័យក្មេងបានបីទារកដ៏មានតម្លៃរបស់គាត់នៅក្នុងដៃដាក់ឈ្មោះដល់នាង បន្ទាប់មកបានធ្វើ ការអធិស្ឋានយ៉ាងល្អមួយ ។ ប៉ុន្តែគាត់ ពុំ បានប្រសិទ្ធិពរដល់ទារកនោះទេ ។ ទារិកាដ៏គួរឲ្យស្រឡាញ់នោះទទួលបានឈ្មោះ ប៉ុន្តែពុំទទួលបានការប្រសិទ្ធពរទេ ! អែលឌើរជាទីស្រឡាញ់នោះពុំបានដឹងពីភាពខុសគ្នារវាងការអធិស្ឋាន និងការប្រសិទ្ធពរបព្វជិតភាពទេ ។ ដោយនូវសិទ្ធិអំណាច និងអំណាចបព្វជិតភាព គាត់អាចប្រទានពរដល់ទារករបស់គាត់ ប៉ុន្តែគាត់ពុំបានប្រសិទ្ធពរទេ ។ ខ្ញុំបានគិតថា « នោះជាការបាត់បង់ឱកាសដ៏ធំ ! »
ខ្ញុំសូមលើកពីឧទាហរណ៍មួយចំនួនទៀត ។ ពួកយើងស្គាល់បងប្អូនប្រុសដែលបានញែកចេញដល់ថ្នាក់ដឹកនាំ និងគ្រូបង្រៀនថ្នាក់បឋមសិក្សា ថ្នាក់យុវនារី ឬសមាគមសង្ក្រោះ ប៉ុន្តែពុំបានប្រសិទ្ធពរពួកគេ—ប្រសិទ្ធពរពួកគេឲ្យមានអំណាចដើម្បីបំពេញការហៅរបស់ពួកគេទេ ។ ពួកគេបានផ្ដល់តែការដាស់តឿន និងការណែនាំតែប៉ុណ្ណោះ ។ ពួកយើងមើលឃើញឪពុកសក្ដិសមមួយរូបពុំបានផ្ដល់ការប្រសិទ្ធពរបព្វជិតភាពដល់ភរិយា និងកូនៗរបស់គាត់ នៅពេលដែលពួកគេត្រូវការយ៉ាងខ្លាំងនោះទេ ។ អំណាចបព្វជិតភាពត្រូវបានស្ដារឡើងវិញមកកាន់ផែនដីនេះ ហើយប៉ុន្តែមានបងប្អូនប្រុសស្រីជាច្រើនណាស់ដែលបានឆ្លងកាត់ការសាកល្បងដ៏លំបាកនៅក្នុងជីវិតដោយពុំបានទទួលបានការប្រសិទ្ធពរបព្វជិតភាពដ៏ពិតមួយ ។ ឱនោះជាសោកនាដកម្មអ្វីម៉្លេះ ! នោះជាសោកនាដកម្មដែលយើងអាចលុបបំបាត់បាន ។
បងប្អូនប្រុសអើយ យើងកាន់បព្វជិតភាពបរិសុទ្ធរបស់ព្រះ ! យើងមានសិទ្ធិអំណាចរបស់ទ្រង់ដើម្បីប្រសិទ្ធពរដល់រាស្ត្ររបស់ទ្រង់ ។ ចូរគិតអំពីការអះអាងដ៏អស្ចារ្យដែលព្រះអម្ចាស់បានប្រទានដល់យើង នៅពេលទ្រង់មានបន្ទូលថា « អ្នកណាក៏ដោយដែលអ្នកឲ្យពរ នោះយើងនឹងប្រទានពរឲ្យដែរ » ។៤ វាគឺជាឯកសិទ្ធិរបស់យើងដើម្បីធ្វើកិច្ចការនៅក្នុងព្រះនាមនៃព្រះយេស៊ូវគ្រីស្ទដើម្បីប្រទានពរដល់កូនចៅរបស់ព្រះស្របតាមព្រះទ័យរបស់ទ្រង់សម្រាប់ពួកគេ ។ ប្រធានស្ដេក និងប៊ីស្សពទាំងឡាយ សូមប្រាកដថា សមាជិកកូរ៉ុមគ្រប់រូបដែលស្ថិតនៅក្រោមការគ្រប់គ្រងរបស់ប្រធាន បានយល់អំពីរបៀបផ្ដល់ការប្រសិទ្ធពរបព្វជិតភាព—រួមទាំងភាពសក្ដិសមផ្ទាល់ខ្លួន និងការរៀបចំខាងវិញ្ញាណដែលតម្រូវឲ្យមានដើម្បីទូលសូមអំណាចរបស់ព្រះបានពេញលេញ ។៥
ចំពោះបងប្អូនប្រុសដែលកាន់បព្វជិតភាព ខ្ញុំសូមអញ្ជើញបងប្អូនឲ្យបំផុសគំនិតសមាជិកឲ្យរក្សាសេចក្ដីសញ្ញារបស់ពួកគេ តមអាហារ និងអធិស្ឋាន សិក្សាព្រះគម្ពីរ ថ្វាយបង្គំនៅក្នុងព្រះវិហារបរិសុទ្ធ ហើយបម្រើដោយសេចក្ដីជំនឿក្នុងនាមជាបុរស និងស្ត្រីរបស់ព្រះ ។ ពួកយើងអាចជួយមនុស្សទាំងអស់ឲ្យមើលឃើញដោយកែវភ្នែកនៃសេចក្ដីជំនឿថា ការគោរពប្រតិបត្តិ និងសុចរិតភាពនឹងនាំពួកគេខិតទៅកាន់តែជិតនឹងព្រះយេស៊ូវគ្រីស្ទ អនុញ្ញាតពួកគេឲ្យរីករាយនឹងភាពជាដៃគូនៃព្រះវិញ្ញាណបរិសុទ្ធ ហើយទទួលបទពិសោធន៍អំណរនៅក្នុងជីវិត !
សញ្ញាសម្គាល់នៃសាសនាចក្រពិត និងសកម្មរបស់ព្រះអម្ចាស់ ជានិច្ចកាល នឹងត្រូវបានរៀបចំ បានដឹកនាំការខិតខំទៅរកការបម្រើដល់បុត្រាបុត្រីរបស់ព្រះ និងក្រុមគ្រួសាររបស់ពួកគេម្នាក់ៗ ។៦ ដោយសារនេះគឺជាសាសនាចក្ររបស់ទ្រង់ ពួកយើងក្នុងនាមជាអ្នកបម្រើរបស់ទ្រង់នឹងបម្រើដល់មនុស្សម្នាក់ៗដូចជាទ្រង់បានធ្វើ ។៧ ពួកយើងនឹងបម្រើនៅក្នុងព្រះនាមរបស់ទ្រង់ ដោយព្រះចេស្ដា និងសិទ្ធិអំណាចរបស់ទ្រង់ ហើយដោយសណ្ដានចិត្តល្អដែលពោរពេញដោយក្ដីស្រឡាញ់របស់ទ្រង់ ។
មានបទពិសោធន៍មួយ ដែលខ្ញុំមានច្រើនជាង ៦០ ឆ្នាំកន្លងទៅនៅទីក្រុង បូស្ដុន បានបង្រៀនខ្ញុំយ៉ាងមានអំណាចអំពីឯកសិទ្ធិនៃការបម្រើម្នាក់នឹងម្នាក់ ។ ពេលនោះខ្ញុំជាពេទ្យវះកាត់ក្នុងមូលដ្ឋាននៅមន្ទីរពេទ្យ ម៉ាសាឈូសេត—ប្រចាំការរាល់ថ្ងៃទាំងយប់ទាំងចុងសប្ដាហ៍ ។ ខ្ញុំមានពេលតិចតួចសម្រាប់ភរិយាខ្ញុំ និងកូនបួននាក់របស់យើង និងសកម្មភាពក្នុងសាសនាចក្រ ។ យ៉ាងណាក៏ដោយ ប្រធានសាខារបស់យើងបានចាត់ខ្ញុំឲ្យទៅសួរសុខទុក្ខផ្ទះរបស់ វិលបើរ និង លេអូណូរ៉ា ខុក ដោយសង្ឃឹមថាបងប្រុស ខុក នឹងអាចត្រឡប់មកសកម្មនៅក្នុងសាសនាចក្រវិញ ។ គាត់ និង លេអូណូរ៉ា បានផ្សារភ្ជាប់នៅក្នុងព្រះវិហារបរិសុទ្ធ ។៨ ប៉ុន្តែ វិលបើរ ពុំបានចូលរួមអស់ជាច្រើនឆ្នាំមកហើយ ។
ដៃគូរបស់ខ្ញុំ និងខ្ញុំបានទៅផ្ទះរបស់ពួកគេ ។ នៅពេលយើងទៅដល់បងស្រី ខុក បានស្វាគមន៍ពួកយើងយ៉ាងកក់ក្ដៅ ៩ ប៉ុន្តែបងប្រុស ខុក បានដើរទៅបន្ទប់ផ្សេងទៀត ហើយបិទទ្វារទាំងគម្រោះគម្រើយ ។
ខ្ញុំបានទៅគោះទ្វារដែលបិទនោះ ។ មួយសន្ទុះក្រោយមក ខ្ញុំបានស្ដាប់ឮសំឡេងថា « ចូលមក » ។ ខ្ញុំបានបើកទ្វារក៏ឃើញបងប្រុស ខុក អង្គុយនៅជិតឧបករណ៍វិទ្យុកម្សាន្តដែលដាក់ជាជួរ ។ នៅក្នុងបន្ទប់តូចនោះ គាត់បានលើកខ្សៀរជក់បារីឡើង ។ ច្បាស់ណាស់ថា ការទៅសួរសុខទុក្ខរបស់ខ្ញុំពុំស្វាគមន៍ទេ ។
ខ្ញុំបានមើលជុំវិញបន្ទប់ដោយភាពភ្ញាក់ផ្អើល ហើយនិយាយថា « បងប្រុស ខុក ខ្ញុំតែងតែចង់រៀនបន្ថែមអំពីរបៀបដែលវិទ្យុដំណើរការ ។ តើបងអាចបង្រៀនខ្ញុំអំពីវាបានទេ ? សូមទោស ខ្ញុំពុំអាចនៅយូរបានទេយប់នេះ ប៉ុន្តែខ្ញុំអាចត្រឡប់មកវិញនៅពេលក្រោយបានទេ ? »
គាត់ស្ទាក់ស្ទើរមួយសន្ទុះ បន្ទាប់មកគាត់និយាយថា បាន ។ នោះគឺជាការចាប់ផ្តើមនៃការក្លាយជាមិត្តដ៏ល្អ ។ ខ្ញុំបានត្រឡប់ទៅវិញ ហើយគាត់បានបង្រៀនខ្ញុំ ។ ខ្ញុំចាប់ផ្ដើមស្រឡាញ់ ហើយចូលចិត្តគាត់ ។ តាមរយៈការទៅសួរសុខទុក្ខជាញឹកញាប់ ភាពអស្ចារ្យនៃបុរសនេះបានលេចឡើង ។ ពួកយើងបានក្លាយជាមិត្តដ៏ល្អនឹងគ្នា ដូចជាដៃគូដ៏អស់កល្បជានិច្ចជាទីស្រឡាញ់របស់យើងផងដែរ ។ ពេលវេលាបានកន្លងទៅ គ្រួសាររបស់យើងបានផ្លាសទៅឆ្ងាយ ។ ថ្នាក់ដឹកនាំក្នុងមូលដ្ឋានបានបន្ដបីបាច់ដល់គ្រួសារ ខុក ។១០
ប្រហែលជាប្រាំបីឆ្នាំបន្ទាប់ពីការទៅសួរសុខទុក្ខលើកទីមួយមកស្ដេកប៊ូស្ដុនបានបង្កើតឡើង ។១១ តើបងប្អូនអាចស្មានថា នរណាជាប្រធានស្ដេកទីមួយទេ ? មែនហើយ ! គឺបងប្រុស ខុក ! អំឡុងឆ្នាំបន្តបន្ទាប់ គាត់ក៏បានបម្រើជាប្រធានបេសកកម្ម និងប្រធានព្រះវិហារបរិសុទ្ធ ។
ជាច្រើនឆ្នាំក្រោយមក ក្នុងនាមជាសមាជិកនៃកូរ៉ុមនៃពួកដប់ពីរនាក់ ខ្ញុំត្រូវបានចាត់ឲ្យបង្កើតស្ដេកថ្មីនៅ សានផេធី ខោនធី រដ្ឋយូថាហ៍ ។ អំឡុងពេលការសម្ភាសន៍ជាធម្មតា ខ្ញុំភ្ញាក់ផ្អើលទាំងរីករាយដើម្បីជួបនឹងមិត្តជាទីស្រឡាញ់របស់ខ្ញុំបងប្រុស ខុក ម្ដងទៀត ! ខ្ញុំទទួលអារម្មណ៍ឲ្យហៅគាត់ធ្វើជាលោកអយ្យកោស្ដេកថ្មី ។ បន្ទាប់ពីខ្ញុំបានតែងតាំងគាត់រួចហើយពួកយើងបានឱបគ្នា ហើយបានយំ ។ មនុស្សនៅក្នុងបន្ទប់បានងឿងឆ្ងល់ថា ហេតុអ្វីបុរសទាំងពីរនាក់នេះយំដូច្នេះ ។ ប៉ុន្តែពួកយើងដឹង ។ ហើយបងស្រីខុក បានដឹង ។ ទឹកភ្នែករបស់យើងគឺជាទឹកភ្នែកនៃអំណរ ! ពួកយើងចងចាំដោយស្ងប់ស្ងាត់អំពីដំណើរនៃក្ដីស្រឡាញ់ និងការប្រែចិត្តដ៏អស្ចារ្យដែលបានចាប់ផ្ដើមកាលពីជាង ៣០ ឆ្នាំកន្លងទៅ នាយប់មួយនៅក្នុងផ្ទះរបស់ពួកគាត់ ។
ដំណើររឿងពុំបានបញ្ចប់នៅត្រង់នោះទេ ។ គ្រួសាររបស់បងប្រុស និងបងស្រី ខុក មានកាន់តែធំឡើងៗដែលមានកូន ៣ នាក់ ចៅ ២០ នាក់ និងចៅទួត ៥៤ នាក់ ។ បន្ថែមពីលើនោះឥទ្ធិពលរបស់ពួកគេបានមានទៅលើអ្នកផ្សព្វផ្សាយសាសនារាប់រយនាក់ រាប់ពាន់នាក់ច្រើនទៀតនៅក្នុងព្រះវិហារបរិសុទ្ធ និងរាប់ពាន់នាក់ទៀតដែលបានទទួលពរជ័យអយ្យកោនៅក្នុងដៃរបស់ វិលបើរ ខុក ។ ឥទ្ធិពលរបស់គាត់ និង លេអូណូរ៉ា នឹងបន្ដមានឥទ្ធិពលទៅលើមនុស្សជាច្រើនជំនាន់នៅទូទាំងពិភពលោក ។
បទពិសោធន៍ជាច្រើនដូចបទពិសោធន៍ជាមួយនឹង វិលបើរ និង លេអូណូរ៉ា ខុក នេះមានកើតឡើងជារៀងរាល់សប្ដាហ៍—សង្ឃឹមថា រាល់ថ្ងៃ—នៅក្នុងសាសនាចក្រនេះ ។ ពួកអ្នកបម្រើដ៏លះបង់របស់ព្រះអម្ចាស់ព្រះយេស៊ូវគ្រីស្ទអនុវត្តកិច្ចការរបស់ទ្រង់ ដោយព្រះចេស្ដា និងសិទ្ធិអំណាចរបស់ទ្រង់ ។
បងប្អូនប្រុស មានទ្វារជាច្រើនដែលយើងអាចបើក មានពរជ័យបព្វជិតភាពជាច្រើនដែលយើងបានផ្ដល់ឲ្យ មានដួងចិត្តជាច្រើនដែលយើងអាចព្យាបាល បន្ទុកជាច្រើនដែលយើងអាចលើក ទីបន្ទាល់ជាច្រើនដែលយើងអាចពង្រឹង ជីវិតជាច្រើនដែលយើងអាចសង្គ្រោះ ហើយអំណរដែលយើងអាចនាំទៅក្នុងគេហដ្ឋានរបស់ពួកបរិសុទ្ធថ្ងៃចុងក្រោយ—ទាំងអស់នេះដោយសារតែយើងកាន់បព្វជិតភាពរបស់ព្រះ ។ យើងគឺជាបុរសដែលត្រូវបាន « ហៅ ហើយរៀបចំទុក ចាប់តាំងពីកំណើតលោកិយមក ស្របតាមបុព្វវិជ្ជានៃព្រះ ដោយសារសេចក្ដីជំនឿដ៏លើសលប់ និងកិច្ចការដ៏ល្អទាំងឡាយ [ របស់យើង ] » ដើម្បីធ្វើកិច្ចការនេះ ។១២
នាយប់នេះខ្ញុំសូមអញ្ជើញបងប្អូនក្រោកឈរឡើងជាមួយនឹងខ្ញុំនៅក្នុងភាពជាបងប្អូនប្រុសដ៏អស់កល្បជានិច្ចដ៏មហិមារបស់យើង ។ នៅពេលខ្ញុំហៅតំណែងបព្វជិតភាពរបស់បងប្អូន សូមក្រោកឈរ ហើយបន្ដឈរ ។ ឌីកុនសូមក្រោកឈរ ! គ្រូសូមក្រោកឈរ ! ពួកសង្ឃ ! ប៊ីស្សព ! អែលឌើរ ! សង្ឃជាន់ខ្ពស់ លោកអយ្យកោ ! ពួកចិតសិបនាក់ ! ពួកសាវក !
ឥឡូវបងប្អូនប្រុស តើបងប្អូនយល់ព្រមបន្ដនៅឈរ ហើយចូលរួមច្រៀងនឹងយើងនៅក្នុងការច្រៀងទាំងបីវគ្គក្នុងបទ « Rise Up, O Men of God » ឬទេ ?១៣ នៅពេលបងប្អូនច្រៀង ចូរគិតអំពីកាតព្វកិច្ចរបស់បងប្អូនក្នុងនាមជាកងទ័ពដ៏អស្ចារ្យរបស់ព្រះ ដើម្បីជួយរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់ ។ នេះគឺជាទំនួលខុសត្រូវរបស់យើង ។ នេះគឺជាឯកសិទ្ធិរបស់យើង ។ ខ្ញុំថ្លែងទីបន្ទាល់ដូច្នោះ ក្នុងព្រះនាមនៃព្រះយេស៊ូវគ្រីស្ទ អាម៉ែន ។