Pigpig u dakaen Gelngin nge Mat’awon ku Got

Pi walageg nib t’uf, kamagaergaed ko thamgily rom ngak Somoel nge muruwel nib thothup rok. Kug faflaen’ ningu mukun ngomed. Gamaed e bin Somm’on e Presidency nib be’ech, gamadba pinning e magaer ngomed ni fan e meybil romed nge ayuw romed. Gamadba pinning e magaer ni fan e yafos romed nge pigpig romed ngak Somoel. E tiyaen’med ko muruwel romed nge pigpig romed e ba gaa’fan ko calling romed ni woed rogon pi calling roamed. U dakaen e yafos ni pigpig ulan fare Galasia, Kug fil ni dariy’ fan e gin ningan pigpignog riy. Somoel ba’adag urrogon bee’ ninge pigpignog ngay.

Gube pinning e magaer nib gaa’ ngak President Thomas S. Monson, ni ke mang e fagar rog ko 50 e duw. Ma ngak gali counselor rok, President Henry B. Eyring nge President Dieter F. Uchtdorf, Gube yoeg e tayfan rog ngorow. Gube pinning e magaer ni fan e pigpig rorow ngak e Somoel nge pi profet Rok. Gali tapigpig nib tiyaen’row kar thapegew e muruwel nib be’ech. Yowma thamgiliy ningar pigpignigew u ta’abrogon ko tiyaen’row nib fel’. Gube tayfan ngorow ma guba a’dag ngorow.

Ba ma’ang’ang taw’ath ningan pigpignog ulan fare Galasia nib riyul’ e ba fos rok Somoel u dakaen e gelngin nge matawaen Rok. Fulweg ko fare priesthood ku Got, arragon fapi kiy ko priesthood, ma bing e wo’en ngak mat’aw i Gidii’en Got ko Tin Tomur e Rran urngin e taw’ath ko tin ya’el e ban’en. Gadadba guy fapi taw’ath nem nibe pu’oeg ngak fapi ppin, mo’on, nge bitir u longob nu fayleng.

Gadadba guy michaen’ i ppin ni yaedma nang fan e gelngiy ko pi koling roraed ma ulan fare endowment nge reb e gam’ing ko tempel. Fapi ppin ney yaedma nang urrogo ningar ngongoliy e gelngin ko tharmiy ningar matangiyed mar gelnoged e figirnginraed, bitir roraed, ma reb e gidii’ u fithik e t’ufeg. Yaed i ppin nib gaa gelngin e ya’el roraed ni yaedma powiy’ed, filed, mar machibgaed ni dariy tamra’ raed ko pi koling roraed u dakaen e gelngin nge mat’awan ku Got!¹ Kug falflaen’ ni fan raed!

Woed rogon, gube guy e mo’on nib michaen’ ni yaedma thapeg e taw’ath ko gidii’ ko priesthood. Yaedma pow’iy ma pigpignog u rrogon ni ba’adag Somoel ni t’ufeg, gol, nge gumaen’. Yaedma taw’athnag, powiy’ed, matangiyed, mar gelniged reb e gidii’ u dakaen e gelnginraed ko priesthood. Yaedma muruweliy e tin ma’ang’ang ngak e gidii’ roraed mar matangiyed e mabgol nge tabinaew roraed. Yaedma pii’ keru’raed ngak e tin kireb ningar manged e elder ku Israel nib gelbugwaenraed.² Kug falflaen’ ni fan raed!

Chiney, rayog Ningu yoeg e koel chiya’? Ni: Bo’or e walagegdaed nib mo’on nge ppin dar nanged fan e machib ko gelngin nge mat’awan ko priesthood. Yaedba ngongoliy ningar mugu’uliyed e tiroraed nib si’in ndar ngongoliyed e gelngin Got ninge taw’athnag e bitir Rok.

Kug tamra’ ni yo’or e walageg nib mo’on nge ppin dar nanged fan e tin fla’ab ningar fanayed.³ Boech e walagdaed, ni sasun, ni yead be ngongoliy ni dar nanged fan e priesthood fa tin rayog ninge rrin’ed. Gura yoeg boech e fanow ningam nang fan.

Boech e ngiyal’ kafram, Kug waen nga mo’olung ko sacrament ngaram ningan kunuy ma pii’ fithingan ngak e madway ma papa’ nira yibliynag ngay. Fare papa’ nib be’ech ke koel fare madway u paa’, me kunuy nge pii’ fithingan ngak, make yoeg e meybil nib fel’. Macahne dabki pii’ fare madway e taw’ath. Fare madway nib ppin ke thapeg e fithingan machane gathi e taw’ath! Fare elder nem dabki nang fan e tin thilngin ko e meybil nge taw’ath ko priesthood. Udakaen e gelngin nge mat’awaen ko priesthood rok, rayog ninge taw’athnog fare madway, machane dabke rrin’. Ke thimur e tin fel’!

Gube yoeg reb e fanow. Gadadma nang mornga’agen boech e walagen nima yibliynag e ppin ko Primary, Young Women, fa tiyugang’ nge sensey ko Relief Society machane dar taw’athnagraed ningar thapeged e gelingraed ningar mugu’uliyed e calling roraed. Yaedma yoeg e fanow nge powiy ngoraed. Gamadma nang e chitamangin nib mat’aw dabke pii’ e le’engin fa bitir e taw’ath ko priesthood nap’an nib t’uf ngoraed. Kan fulweg e gelngin ko priesthood nga fayleng, machane bo’or e walagen nib mo’on fa ppin ra yaen nga dibchay nib almarin ma dariy’ e taw’ath ko priesthood nib riyul’ roraed. I’ir e ban’en nib kirebaen’! Tin kirebaen’ rayog ningad gelnoged.

Pi walageg, bay e priesthood nib thothup rodad ke yib ku Got. Bayi mat’awaendaed ni Ke pii’ ningad taw’athnaged e gidii’ Rok. Mu lemnag mornga’agen e thin ni ke pii’ Somoel ngodad nap’an Ke yoeg, ni en ningad taw’athnaged ngak ira taw’athnog ngak.”⁴ Pi stake president nge pi bisof, ngam ngongoliy ni urngin e chongin ko pi mu’ulung romed ma nanged fan urrogon ningar pii’ed e taw’ath ko priesthood—arragon e tin mat’aw ma taermedliy nib t’uf ninge thapege gelngin Got nib polo’.⁵

Ngak urngin e walageg ko priesthood, Gube pinningmed ningam gay fel’laniyaen’raed e chongin romed ningar folgaed fapi michmicheg, balaynag abich roraed mar meybilgaed, filed fare babyor nib thothup, liyoergaed ulane tempel, mar pigpigniged ufithik e mich ni yaed e mo’on nge ppin ku Got. Rayog ningad ayuweged urngin ningar filed udakaen e mich e mafol nge mat’aw ra chuchugurnagraed ngak Yesus Kristus, ma gay e rogon ngoraed ningar falflaen’ ko e ayuw ko fare Kan ni Thothup, mar falflaen’gaed ko yafos roraed.

Bay e pow ko fare Galasia nib riyul’ mab fos rok Somoel ni’ir ningan yarmiy, ma powiy’ ninge ayuweg e bitir nib urngin ku Got nge pi tabinaew roraed.⁶ Bachan i’ir e Galasia Rok, gadad gubin e pigpig Rok thingar ningad ayuwegraed, woed rogon Ke rrin’.⁷ Gadadra ayuweg u dakaen e fithingan Rok, ko gelngin nge mat’awan Rok, nge udakaen e laniyaen’ Rok ko t’ufeg mab gol.

Bayi ban’en ni ke buch Ngog 60 e duw u faram u Boston nike fil ngog mornga’agen e gelgniy ko ayuweg ngak reb e gidii’. Kug mang e resident surgeon ulan fare Massachusetts General Hospital—kug muruwel urngin e rran, ma boech e nep me yaen, ma boech e wikind ma yaen. Chinyal’ rog ko le’engig, delip e bitir romow, fa pigpig ko Galasia. Machane, e branch president ke pinningeg ningu yaen nga tabinaew ko Wilbur nge Leonora Cox ningu pinning Brother Cox ningue sulweg nga Galasia. Kar m’agew paa’ ulane tempel.⁸ Machane Wilbur dabki un e mu’ulung ko n’uw nap’an.

Kug warow Gag nge companion rog nga tabinaew rorow. Nap’an kug warow u langin, Sister Cox ke pinning e mogethin ngomow nib fel’ rogon,⁹ machane Brother Cox ke chuw ma yaen nga reb e singil ma ning e maab.

Kug waen ngak fare maab nib ning mug tugtuguy riy. Chinyal’, Kug rung’ag e “Moy.” Kug bing fare maab mug guy Brother Cox nibe paer nga chiya’ u lukngun boech e radio equipment. Ke yik e cigar. Arragon, e sabethin ni dabun.

Kug sap nga singil nem kug balyangaen’ mug gog, “Brother Cox, Guba a’dag ningu fil ko radio ko n’uw nap’an. Rayog ningam fil ngog ni urrogon? Sirow’ ni dabiyog Ningu soen daba’, machane rayog ningu gub reb e ngiyal’?”

Ke soen ko chingyal’, me fulweg arragon. Ke tabab e fagar nib fel’ rogon. Kug sulweg ngak make fil ngog. Kug tabab ningu t’ufeg mug tayfan ngak. Udakaen boech e sabathin, ke yib e tin fel’ ko mo’on ngem. Kug mangew e fagar nib fel’, ma le’enginmow kar mangew fagar. Ma, tomuren boech e ngiyal’, e tabinaew rog ke yaen nga bang. Reb e tiyugang’ ko galasia kar athamgiliyed ningar ayuweg fare tabinaew ni Cox.¹⁰

Tomuren merub e duw ko fare bin somm’on e sabathin nem, kan yarmiy fare Boston Stake.¹¹Mini’ ni ke mang fare bin somm’on e stake president? Arragon! Brother Wilbur Cox! Tomuren boech e duw, ke pigpig ninge mang e mission president nge tempel president.

Boech e duw ni tomuren, nap’an kug chongin e Ulung i Ragag nga L’agruw, Ke pinningeg ni ngu yarmiy e stake nib be’ech u Sanpete County, Utah. Nap’an boech e mu’ulung, Kug falflaen’ ni kug mada’nag e fagar nib t’uf rog Brother Cox! Kug thamiy ni thingar ningu pinning ir ninge mang e stake patriarch nib be’ech. Tomuren kug yibliynag ngak, kug gamuchmuchgow map luwanmow. Boech e gidii’ u singil nem kar lemniged mang fan e mo’on ba yoer. Machane gamow ma nang. Nge Sister Cox ma nang. Yoer romow ni fan e falfalen’mow! Kug pugurrangow e milekag rok ko t’ufeg nge kalngaen’ ni ke tabab 30 e duw u faram, nap’an reb e nep u tabinaew rorow.

Daki tungun ko yar nem. Tabinaew ko Brother nge Sister Cox bayi 3 e bitir riy, 20 pifak pfak row, nge 54 pifak pfak pfrak row. Kar ayuwegew bo’or ni biyu’ e missionary, nge biyu’ e gidii’ ulan fare temple, nge bo’or udakaen e taw’ath ko patriarch udakaen e paa’angin Wilbur Cox. Ngongol Rok nge Leonora ra athamgil nga manemus olongob e fayleng.

Chepin ni woed rogon Wilbur nge Leonora Cox ma buch urngin e wik—gube athapeg, urngin e rran—ulane Galasia ney. Tapigpig nib michaen’ ku Somoel i Yesus Kristus ba mugu’uliy e muruwel Rok, u dakaen e gelngin nge mat’awaen Rok.

Pi walageg, bay bo’or e maab ningam bing, taw’ath ko priesthood ningam pii’, gum’racha’ ningam golnag, tin gafgow ningam awyuweg, ma mich ningam gelong, yafos ningam thap, ma falflaen’ ningam pii’ ngak e tabinaew ko e Gidii’en Got ko Tin Tomur e Rran—bachan bay fare priesthood rok Got rodad. Gadad gubin e mo’on ni kan “piningraed min yarmiy raed u nap’an nni sunmiy e fayleng u rogon fare nangaen’ ku Got ni bay nga m’on, ya bachan e mich [rodad] nib gel,” ningad rrin’ed e re muruwel ney.¹²

Daba’ Gube pinningmed ningam sak’iygaed ngalang u ta’abang ko ulung nib gaa’ ko walagen. Nap’an gube pinning e office ko priesthood rom, wenig ningam sak’iy ngalang ngam athamgil. Deacon, mu sak’iy! Teacher, mu sak’iy! Priest! Bishop! Elder! High Priest! Patriarch! Medlipi Ragag! Apostle!

Chiney, walagen, ngam thamgiliy ko sak’iy ngam un ko choir ningad yin’ed delip e guruy ko “Rise Up, O Men of God .”¹³ Nap’an nam yin’ed e tan, mu lemniged mornga’agen e muruwel rom ko ulungi salthaw nib gaa’ ku Got ningam taermedliy e fayleng ney ni fan e bin L’agruw e Wub ku Somoel. Aray e muruwel rodad. Aray e mat’awaendaed. Gube pii’ e m’ag udakaen e fithingan ku Yesus Kristus, amen.