Pwan Ew Ran Nusun

Non ekkewe ier a no, chienei we a nouni emon monukon amen murino a eita ngeni Brigham. Mwirin an we uputiw, Brigham a uri eu sokun semwen itan Hunter syndrome, mi fokkun anoninen pokiten ei semwen a uri esapw tongeni epwe manauatam. Eu ran nupwen Brigham me an we famini ra no kunou ren ewe tempel, Brigham a apasa eu kapas; a apasa fan ruu, “Eu nusun ran.” Sorotan chok ewe ran, Brigham a mano.

Fan ekkoch ua kan no kunou ren soman Brigham we, me iteiten ran ukan no, ua fokkun chechemeni ewe kapas “eu nusun ran.” Ukan retin ekieki ika epwe ifa wewen, ifa ukukun an epwe anisi manauei ai upwe sinei pwe a chok eu nusun ranin manau ei. Ifa usun ai upwe tumunu punuwei, me nei kewe, me ekkoch? Ifa ukukun ai upwe engino me tipetekison ngeni? Ifa usun ai upwe tumunu inisi? Ifa usun ennetin ai upwe iotek me kaeo ekkewe pukefel? Ua nuku pwe mi wor eu an are fen eu kokot ngeni kich an epwe wor rech “eu nusun ran” epwe fat—me sipwe sinei pwe aea ochu ach fansoun mi wor rech.

Non ewe Testamenin Nom sia aneani usun porousen Hezekiah, ewe kingen Suda. Ewe soufos Aisea a ereni Hazakiah pwe manauan achok arapakan epwene much. Nupwen a rong an ewe soufos kapas, Hazekiah a poputa ne iotek, tingor, ren unusen netipan. Ren ei popun, Kot a apachata 15 ierin manauen Hezekiah. (Nengeni Isaiah 38:1–5.)

Ika pwe kich mi pwan sinei pwe a chok fansoun mochomoch manauach, sipwe pwan tufichin tingor an epwe tamono fan iten metekewe mi auchea ach sipwe fori.

Pokiten fansoun ewe Samon, non An tipachem, a finata epwe ngeni emon me emon kich, eu mettoch sia fen sinei: pwe kich meinisin mi wor ngeni kich “ikenai” ren manauach, me ewe kii ach sipwe fori ach kewe fansoun epwe unusoch ren ach sipwe asoreni.

Ewe Samon a apasa, Iwe nengeni, iei sia eita ngeni ikenai tori ewe fansoun wareton ewe Noun Aramas, me pwarata pwe iei ewe ranin asor (Nengeni D&C 64:23; apechekunan mi kapachenong).

Ewe kapas asor a feito seni ewe kapasen Latin sacer, wewen pwe “pin,” me facere, wewen pwe “fori,” non eu kapas fori mettoch mi pin, ar repwe itefouno me menin.

“Asor a ngeni kich ekkewe feiochun nang” (“Praise to the Man,” Hymns, no. 27).

Ifa anen ach sipwe asoreni an epwe aunusachu manauach me efeiochu kich?

Aewin, an emon me emonpwisin asor a apochokuna kich me ait ngeni kich ekkewe mettoch mi auchea sipwe asoreni.

Non ekkewe ier ra no non Ranin Echikefen, emon sister tota won nenian afanafan me a apasa an kapasen pwarata. A nonom non ewe neni itan Iquitos, non kinikinin Peruvian Amazon. A apasa pwe seni ewe fansoun a paptais, a ekipwichi non ekiekin pwe fan eu epwe angei an efeioch me non ewe tempel Lima, Peru. A fokkun nukuchar ne watiw an asor me isois noun mwoni non fitu ier.

Unusen pwapwan netipan ren an a feinno ngeni ewe tempel me angei ekkewe efeioch mi pin a apasa non an kapas: Ikenai ua tongeni apasa pwe ua moneta ngeni mettoch meinisin. Ngang emon fefin mi unusen pwapwa me non ei fonufan; ua isois mwoni, ami ouse sinei ifa tamen ai isois mwoni, ai upwe no ngeni tempel, me mwirin fisu ran won ewe chonupupu me 18 awa ai fiti bus, ai ua keran ipweri imwen ewe Samon we. Nupwen ai we ua suseni ena neni mi pin, ua apasa ngeni ei, usapw tongeni ai upwe mut ngeni och mettoch epwe atowawa seni ei ekkewe pwon ua fen fori; esapw tongeni epwe nus mwan. Iei och mettoch amen unusen auchea!”

Ua kaeo seni fefinei ei amen uren murino pwe an emon me emon asor a tongeni apochokuna kich ach pungun finata me ekiek. An emon me emon asor a anisi ach foffor, ach pochokun, me ach pwon mi pin, me a ngeni kich wewen mettoch mi pin.

Oruen, ekkewe asor sia fori fan iten ekkoch, me ekkoch ra fori fan itach, a efeiochu kich meinisin.

Nupwen ai we kan susukun non ewe sukunen ngii, mwonien am we nenien sukun ese kon watte. Mi chok kisikis mi nafangaw ngeni met mi auchea ngeni kem non eu me eu ran.

Ua chechemeni non ewe ier ai we ua keran poputa non ewe nenien kaeo pekin reirei; nge a fokkun auchea an epwe unus piseki pisekin mete upwe ani sukun me mwen ai upwe poputa. Inei kewe me semei ra isoni ewe efou mwoni ren piseki kewe ne sukun. Nge non eu pwinin och watten mettoch a fis. Aua no aupwene mwoni piseki kewe nge aua kuna pwe ewe mwoni a chok naf ngeni eu pea utut— ese pwan naf ngeni och me nukun. Iwe ai ua niwiniti imw non pon me ua fokkun netipengaw pwe ua ekieki nge usapw chiwen no ngeni ai sukun. Nge, mwirin chok, inei we a kori ei “Taylor, feito; sano.”

Ai wa no ngeni ekkewe neni a wor ia sitowa ikewe amen chommong nenien amomo iering me mwaramwar. Nupwen am aiua tori eu me nein ekkewe sitowa, inei we a wau an we pwes mi chok kukun mi arau a nom efoch nana kolt non amen ningoch mi mak won, “Ngeni nei we nengin mi achengicheng seni semom.” Ena nana semei we chinap a ngeni inei we non eu ranin uputiwan. Iwe, ua kuna an a amomono.

Nupwen inei we a angei ewe mwoni, a ereniei, “Ika pwe iei eu mettoch ua sinei pwe mi murino, ua sinei kopwe emon chon aninis ren pekin ngii. Feino kono mwoni ekkewe mettoch meinisin a namot ngonuk.” Iei komwan ekieki ika met sokkun chon sukun ua winiti mwirin met mi fis ngeni ei? Ua wesen mochen upwe emon mi murino me mwitir ne awesi ai kaeo pwe pokiten ngang mi sinei pwe ukukun nonon ewe asor a fori.

Ua kaeo pwe ewe achkewe asor ekkewe ramen tongei kich ra fori ngeni kich a usun chok minefon en konik mi pat me nukanapen en fonupon. Ei sokkun asor a ngeni kich epinukunuk me pochokun.

Aunungatin, sokkun asor sia fori mi kukun a nono ngeni an ewe Noun Kot we asor.

Ifan ukukun auchean ewe nana kolt a nono ngeni auchean ewe asoran ewe Noun Kot? Ifa usun ach sipwe eningano ewe asoren fangono? Iteiten ran sipwe chechemeni pwe mi wor eu nusun ranin manauach me nukunuk. Amulek a apasa. “Ewer, ua mochen pwe oupwe feito me ousapw chiwen apochokunano netipemi; pun nengeni; iei ewe fansoun me ewe ranin ami chon amanau; iwe ina mine ika oupwe aier me ousapw apochokunano netipemi, ewe kokkoten manau ngaseno mi auchea epwe mwitir kawor ngeni kemi” (Alma 34:31). Non pwan eu kapas, ika pwe sia asora ngeni ewe Samon ewe asoren unusen netipach me unusn ngunuch, mwitir chok ekkewe feiochun ewe kokkotun pwapwa epwe ningeno non manauach.

Ewe kokkotun angasano a namot ach sipwe kinisou ngeni ewe asoren fangono manau an Jises Kraist. Usun Met ii Jises a pusin awewei ngeni kich, ewe asoren mi echimwa I, pwisin Kot, ewe mi tekia, epwe chechech ren mettek, me kus cha me won unusan inisin, me riaffou non inis me ngun, me amwo esap ani ewe kap mi kipwin, me niuokusetiw seni (Nengeni D&C 19:18).

Me pokiten ei asor, mwirin fori ewe tetenin aier ren unusen netipach, iwe sia tongeni mefi pwasetan ach kewe nipwakingaw me tipis a musono. Ennetin, tipengaw, sau, metek, riaffou, me tipemwaramwar epwe siwin ngeni fatochun weweoch, pwapwa, kinamwe, me epinukunuk.

Non na chok fansoun, nupwen sia eningano me mengiin me kinisou ren An we asor, sia tongeni angei eu watten memef ach sipwe winiti noun Kot semirit mi murino, ach sisapw chiwen fori tipis, me aponueta pwon mi pin nap seni akomw.

Iwe, usun Enos mwirin chok an a angei omusomusen an tipis, sipwe pwisin mefi chengen ren ach sipwe ani asor me mefi usun mochenin pwich kewe me fefinach (nengeni Enos 1:9). Iwe sipwe fokkun unusen chengen non iteiten “eu nusun ran” ne tapweno mwirin ewe tingor Preseten Howard W. Hunter a ngeni kich nupwen a apasa: “Epichi ekkewe chourek. Kutta chiechiom kewe mi moruk. Nikitano tipemwaramwar nge siwini ngeni nukunuk. … fori angangen umoumoch. Apochokuna ekkewe serafo. Pwarano om wenechar non kapas me foffor. Aponueta om pwon. Kosapw tipitip mwan. Omusano ekkewe chon koput. Omusomus. Achocho ne weweiti. Anapano om aninis ngeni ekkoch. Ekieki akom ekkoch. Aramas och. Umoumoch. Takirikir. Anapano om kinisou. Etiwaochu aramas. Apwapwai semirit. … enenen ne apasa ukukun om tong iteitan. (Teachings of Presidents of the Church: Howard W. Hunter [2015], 32; adapted from “What We Think Christmas Is,” McCall’s, Dec. 1959, 82–83).

Anean amwo sipwe amosowa ach kei fansoun ren foffor me pochokun ren an emon me emon asor me ewe asor sia fori ngeni me angei seni ekkoch. Me non ewe eu an mi murino sipwe chengen me pwapwa ren ewe asor mine ewe Noun Anaemon a fang ngeni kich; ewer ena pwapwa ewe mi afat nupwen sia anea an Atam we turutiw pwe aramas, meinisin—repwe—mefi, pwapwa (nengeni 2 Nifai 2:25). Ena pwapwa mi wesewesen ennet a chok fis pokiten ewe asor me Achasefan an ewe Chon Amanau Jises Karaist a fori.

Iei ai iotek pwe sipwe tapweno mwirin Ii, pwe sia nuku non ii, pwe kich mi tongei, me kich mi mefi ewe tong a fis pokiten An we asoreni iteiten fansoun mi wor ach fansoun ne manau non eu nusun ran. Non iten Jises Kraist, amen.