អំណោយទានដ៏មានតម្លៃមកពីព្រះ
ជីវិតអាចពោរពេញដោយសេចក្ដីជំនឿ អំណរ សុភមង្គល សេចក្ដីសង្ឃឹម និងសេចក្ដីស្រឡាញ់ នៅពេលយើងអនុវត្តសេចក្ដីជំនឿដ៏ពិតប្រាកដក្នុងកម្រិតតិចតួចបំផុតទៅលើព្រះគ្រីស្ទ ។
បងប្អូនប្រុសស្រី យើងទើបតែបានចូលរួមនៅក្នុងជំនុំមុតមាំមួយ ជាការអនុវត្តមួយដែលអាចត្រូវបានឆ្លុះបញ្ចាំងទៅព្រះគម្ពីរប៊ីបវិញ នៅពេលសាសន៍អ៊ីស្រាអែលកាលពីបុរាណបានប្រមូលផ្ដុំគ្នា ដើម្បីទទួលបានវត្តមានរបស់ព្រះអម្ចាស់ ហើយសាទរចំពោះព្រះពររបស់ទ្រង់ ។១ យើងមានឯកសិទ្ធិដើម្បីរស់នៅក្នុងគ្រាមួយដែលការអនុវត្តពីបុរាណនេះត្រូវបានស្ដារឡើងវិញតាមរយៈព្យាការីយ៉ូសែប ស្ម៊ីធ ។២ ខ្ញុំសូមលើកទឹកចិត្តបងប្អូនឲ្យកត់ត្រានៅក្នុងសៀវភៅកំណត់ហេតុផ្ទាល់ខ្លួននូវអារម្មណ៍ដែលបងប្អូនមានស្ដីពីឱកាសដ៏ពិសិដ្ឋបំផុតនេះដែលបងប្អូនបានចូលរួម ។
ថ្មីៗនេះ យើងបានលាមិត្ត និងព្យាការីជាទីស្រឡាញ់របស់យើងគឺប្រធានថូម៉ាស អេស ម៉នសុន ។ ទោះជាយើងទាំងអស់គ្នានឹកដល់លោកក្ដី ក៏យើងមានអំណរគុណយ៉ាងជ្រាលជ្រៅដែលព្រះអម្ចាស់បានហៅព្យាការីថ្មីមួយរូបគឺប្រធាន រ័សុល អិម ណិលសុន ឲ្យធ្វើជាអធិបតីលើសាសនាចក្ររបស់ទ្រង់ដែរ ។ តាមលំដាប់លំដោយមួយ ឥឡូវនេះបានចាប់ផ្ដើមទំព័រថ្មីមួយនៅក្នុងប្រវត្តិសាស្ត្រសាសនាចក្ររបស់យើង ។ នេះគឺជាអំណោយទានដ៏មានតម្លៃមួយមកពីព្រះ ។
នៅពេលយើងម្នាក់ៗបានគាំទ្រប្រធាន ណិលសុនដោយការលើកដៃរបស់យើង នោះយើងបានឈរជាសាក្សីចំពោះព្រះ ហើយបានទទួលស្គាល់ថា លោកគឺជាអ្នកបន្តតំណែងដ៏ពេញសិទ្ធិរបស់ប្រធានម៉នសុន ។ ដោយការលើកដៃរបស់យើង យើងបានសន្យាថា នឹងស្ដាប់តាមប្រសាសន៍របស់លោក នៅពេលលោកទទួលការដឹកនាំមកពីព្រះអម្ចាស់ ។
ព្រះអម្ចាស់បានមានបន្ទូលដូច្នេះ ៖
« អ្នកត្រូវស្តាប់តាមគ្រប់អស់ទាំងពាក្យសម្ដី និងបញ្ញត្តិទាំងឡាយរបស់លោកដែលលោក [ មានន័យថា ប្រធានសាសនាចក្រ ] នឹងឲ្យដល់អ្នកនៅពេលលោកបានទទួលពាក្យទាំងនោះ …
ដ្បិតពាក្យសម្ដីរបស់លោកនោះហើយ អ្នកនឹងបានទទួល ហាក់ដូចជាបានមកពីព្រះឱស្ឋរបស់យើងផ្ទាល់ ដោយសេចក្ដីអត់ធន់ និងសេចក្ដីជំនឿគ្រប់យ៉ាង » ។៣
ខ្ញុំបានស្គាល់ព្យាការីថ្មីរបស់យើងអស់រយៈពេលជាង ៦០ ឆ្នាំហើយ ។ ខ្ញុំបានបម្រើជាមួយលោកនៅក្នុងកូរ៉ុមនៃពួកដប់ពីរនាក់អស់រយៈពេល ៣៣ ឆ្នាំ ហើយខ្ញុំធ្វើជាសាក្សីថា ព្រះហស្តរបស់ព្រះម្ចាស់បានរៀបចំលោកដើម្បីក្លាយជាសាវកជាអធិបតី និងជាព្យាការីរបស់យើង ដើម្បីបម្រើគ្រប់កូនសោនៃបព្វជិតភាពដ៏បរិសុទ្ធនៅលើផែនដី ។ សូមឲ្យយើងម្នាក់ៗគាំទ្រលោក និងទីប្រឹក្សារបស់លោកទាំងស្រុង ហើយធ្វើតាមការដឹកនាំរបស់ពួកលោក ។ យើងក៏សូមស្វាគមន៍យ៉ាងកក់ក្ដៅដល់អែលឌើរ ហ្កង និងអែលឌើរ សូរ៉េស ជាសមាជិកក្នុងកូរ៉ុមនៃពួកសាវកដប់ពីរនាក់ដែរ ។
បន្ទាប់ពីការមានព្រះជន្មរស់ឡើងវិញរបស់ព្រះយេស៊ូវ ជាព្រឹត្តិការណ៍មួយដែលយើងអបអរសាទរនៅចុងសប្ដាហ៍នៃបុណ្យអ៊ីស្ទើរដ៏រុងរឿងនេះ ទ្រង់បានបង្ហាញអង្គទ្រង់ដល់ពួកសិស្សរបស់ទ្រង់ ហើយមានបន្ទូលថា « សូមឲ្យអ្នករាល់គ្នាបានប្រកបដោយសេចក្តីសុខសាន្ត ខ្ញុំចាត់អ្នករាល់គ្នាឲ្យទៅ ដូចជាព្រះវរបិតាបានចាត់ឲ្យខ្ញុំមកដែរ » ។៤ សូមកត់សម្គាល់អំពីសកម្មភាពដែលមានពីរជំហាន—ព្រះចាត់ព្រះរាជបុត្រាទ្រង់ឲ្យមក ។ ព្រះរាជបុត្រាចាត់ពួកអ្នកបម្រើរបស់ទ្រង់—ជាបុរស និងស្ត្រីដែលមានជីវិតរមែងស្លាប់—ឲ្យសម្រេចកិច្ចការរបស់ទ្រង់ ។
យើងមិនគួរភ្ញាក់ផ្អើលឡើយ ដោយដឹងថា បុគ្គលទាំងឡាយដែលបានហៅឲ្យធ្វើកិច្ចការរបស់ព្រះអម្ចាស់ពុំមែនជាមនុស្សល្អឥតខ្ចោះនោះ ។ ដំណើររឿងនៅក្នុងបទគម្ពីរបានរៀបរាប់លម្អិតនូវព្រឹត្តិការណ៍អំពីបុរស និងស្ត្រីដែលព្រះបានហៅដើម្បីសម្រេចកិច្ចការដ៏ធំមួយ—ជាបុត្រាបុត្រីដ៏ល្អរបស់ព្រះវរបិតាសួគ៌នៃយើង បានហៅឲ្យបម្រើនៅក្នុងការចាត់តាំងរបស់ពួកគេក្នុងសាសនាចក្រ ដោយខិតខំធ្វើអស់ពីលទ្ធភាព ប៉ុន្តែគ្មានពួកគេណាម្នាក់ល្អឥតខ្ចោះនោះទេ ។ វាក៏ពិតចំពោះយើងនាពេលបច្ចុប្បន្ននេះផងដែរ ។
ដោយដឹងអំពីភាពទន់ខ្សោយ និងកំហុសរបស់មនុស្ស តើយើងដើរឆ្ពោះទៅមុខដោយគាំទ្រ ហើយជួយគ្នាទៅវិញទៅមកតាមរបៀបណា ? វាចាប់ផ្ដើមដោយសេចក្ដីជំនឿ—សេចក្ដីជំនឿដ៏ពិតស្មោះត្រង់លើព្រះអម្ចាស់ព្រះយេស៊ូវគ្រីស្ទ ។ សេចក្ដីជំនឿលើព្រះអង្គសង្គ្រោះគឺជាគោលការណ៍ទីមួយនៃគោលលទ្ធិ និងដំណឹងល្អនៃព្រះគ្រីស្ទ ។
ច្រើនឆ្នាំកន្លងទៅ ខ្ញុំបានទៅទស្សនកិច្ចដែនដីបរិសុទ្ធ ។ កាលយើងបើកឡានទៅក្បែរដើមម៉ាសថាត នាយកមជ្ឈមណ្ឌលប៊ី.វ៉ាយ.យូ.យេរូសាឡិមបានសួរខ្ញុំថា តើខ្ញុំធ្លាប់ឃើញគ្រាប់ពូជម៉ាសថាតដែរឬទេ ។ ខ្ញុំមិនធ្លាប់ឃើញទេ ដូច្នេះយើងក៏បានឈប់ឡាន ។ គាត់បានបង្ហាញខ្ញុំនូវគ្រាប់ពូជទាំងនោះមកពីដើមម៉ាសថាត ។ វាតូចខ្លាំងណាស់ ។
បន្ទាប់មក ខ្ញុំបាននឹកចាំអំពីការបង្រៀនរបស់ព្រះយេស៊ូវថា « ដ្បិតខ្ញុំប្រាប់ជាប្រាកដថា បើមានសេចក្តីជំនឿដូចគ្រាប់ពូជមួយយ៉ាងល្អិត នោះអ្នករាល់គ្នាអាចនឹងនិយាយទៅភ្នំនេះថា ចូររើចេញពីទីនេះទៅទីនោះចុះ នោះនឹងបានដូច្នោះ ហើយក៏គ្មានការអ្វីដែលអ្នករាល់គ្នាធ្វើមិនកើតនោះទេ » ។៥
បើយើងមានសេចក្ដីជំនឿដូចជាគ្រាប់ពូជតូចមួយ នោះព្រះអម្ចាស់អាចជួយយើងឲ្យរើភ្នំនៃការបាក់ទឹកចិត្ត និងការសង្ស័យនៅក្នុងកិច្ចការដែលមាននៅពីមុខយើង កាលយើងបម្រើជាមួយនឹងកូនចៅរបស់ព្រះ រួមបញ្ចូលទាំងសមាជិកគ្រួសារ សមាជិកសាសនាចក្រ និងអស់អ្នកដែលពុំមែនជាសមាជិកសាសនាចក្រផងដែរ ។
បងប្អូនប្រុសស្រី ជីវិតអាចពោរពេញដោយសេចក្ដីជំនឿ អំណរ សុភមង្គល សេចក្ដីសង្ឃឹម និងសេចក្ដីស្រឡាញ់ នៅពេលយើងអនុវត្តសេចក្ដីជំនឿដ៏ពិតប្រាកដក្នុងកម្រិតតិចតួចបំផុតទៅលើព្រះគ្រីស្ទ—សូម្បីតែជាសេចក្ដីជំនឿប៉ុនគ្រាប់ពូជម៉ាសថាតតូចមួយក្តី ។
អែលឌើរ ចច អេ ស្ម៊ីធ បាននឹកឃើញពាក្យទូន្មានមួយចំនួនដែលប្រធាន យ៉ូសែប ស៊្មីធ បានផ្ដល់ឲ្យលោកថា ៖ « លោកបានប្រាប់ខ្ញុំថា ខ្ញុំមិនគួរបាក់ទឹកចិត្តឡើយ មិនថាជុំវិញខ្លួនខ្ញុំមានការលំបាកប៉ុណ្ណានោះទេ ។ បើខ្ញុំត្រូវលិចលង់ចូលទៅក្នុងបាតរណ្ដៅ ណូវ៉ា ស្កូទៀ ដ៏ជ្រៅបំផុត ហើយភ្នំធំៗទាំងអស់បានសង្កត់មកលើខ្ញុំក្ដី ក៏ខ្ញុំមិនគួរបាក់ទឹកចិត្តឡើយ ប៉ុន្តែត្រូវតោងឲ្យជាប់ អនុវត្តសេចក្ដីជំនឿ ហើយបន្តមានចិត្តក្លាហាន ហើយនៅទីបំផុត ខ្ញុំនឹងបានក្រោកចេញ ហើយឈរនៅលើកំពូលនៃគំនរនោះ » ។៦
យើងគួរចងចាំការប្រកាសរបស់ប៉ុលថា « ខ្ញុំអាចនឹងធ្វើគ្រប់ទាំងអស់បាន ដោយសារព្រះគ្រីស្ទដែលទ្រង់ចម្រើនកម្លាំងដល់ខ្ញុំ »។៧ ការដឹងអំពីរឿងនេះគឺជាអំណោយទានដ៏មានតម្លៃមួយទៀតមកពីព្រះ ។
បន្ថែមពីលើអំណោយទានទាំងឡាយដែលខ្ញុំបានលើកឡើង វាមាននូវអំណោយទានជាច្រើនទៀត ។ ឥឡូវនេះ ខ្ញុំគ្រាន់តែនិយាយអំពីអំណោយទានតែពីរបីប៉ុណ្ណោះ—អំណោយទាននៃថ្ងៃឈប់សម្រាក ពិធីសាក្រាម៉ង់ ការបម្រើដល់មនុស្សដទៃ និងអំណោយទានដែលមិនអាចប្រៀបផ្ទឹមបានមកពីព្រះគឺព្រះអង្គសង្គ្រោះរបស់យើង ។
អនុភាពនៃថ្ងៃឈប់សម្រាកគឺដើម្បីដកពិសោធន៍នៅក្នុងព្រះវិហារ និងនៅផ្ទះនូវភាពរីករាយ អំណរ និងអារម្មណ៍កក់ក្ដៅពីព្រះវិញ្ញាណនៃព្រះអម្ចាស់ដោយគ្មានការអូសទាញណាមួយឡើយ ។
មានមនុស្សជាច្រើនបណ្ដោយឲ្យខ្លួនពួកគេចំណាយពេលយ៉ាងច្រើនលើអ៊ិនធើរណែតជាមួយឧបករណ៍ចល័តរបស់ពួកគេ—ជាអេក្រង់ដែលបំភ្លឺមុខពួកគេទាំងយប់ទាំងថ្ងៃ និងការដាក់កាសស្ដាប់នៅក្នុងត្រចៀកដែលរារាំងពួកគេមិនឲ្យឮសំឡេងតូចរហៀងរបស់ព្រះវិញ្ញាណ ។ បើយើងគ្មានពេលចេញឆ្ងាយពីឧបករណ៍ទាំងនោះទេ យើងអាចនឹងខកខាននូវឱកាសស្ដាប់ឮព្រះសូរសៀងរបស់ទ្រង់ដែលមានបន្ទូលថា « ចូរបង្អង់សិន ហើយឲ្យបានដឹងថា យើងជាព្រះ » ។៨ ឥឡូវនេះ ការទាញយកប្រយោជន៍ពីភាពជឿនលឿននៃបច្ចេកវិទ្យាដែលបំផុសគំនិតមកពីព្រះអម្ចាស់គឺមិនមែនជារឿងខុសឆ្គងទេ ប៉ុន្តែយើងត្រូវតែវៃឆ្លាតនៅក្នុងការប្រើប្រាស់វា ។ ចូរចងចាំអំពីអំណោយទាននៃថ្ងៃឈប់សម្រាក ។
ពរជ័យនៃការទទួលសាក្រាម៉ង់នៅក្នុងការប្រជុំពិធីសាក្រាម៉ង់ពុំត្រូវក្លាយជាទម្លាប់ ឬគ្រាន់តែជាអ្វីមួយដែលយើងធ្វើនោះឡើយ ។ វាមានរយៈពេលតែ ៧០ នាទីប៉ុណ្ណោះក្នុងមួយសប្ដាហ៍ កាលយើងផ្អាក ហើយស្វែងរកភាពសុខសាន្ត អំណរ និងសុភមង្គលឲ្យកាន់តែច្រើននៅក្នុងជីវិតរបស់យើង ។
ការទទួលទានសាក្រាម៉ង់ និងការរំឭកចាំសេចក្ដីសញ្ញារបស់យើងគឺជាសញ្ញាមួយរបស់យើងចំពោះព្រះអម្ចាស់ថា យើងនឹងចងចាំទ្រង់ជានិច្ច ។ ដង្វាយធួនរបស់ទ្រង់គឺជាអំណោយទានដ៏មានក្ដីមេត្តាមួយមកពីព្រះ ។
ឯកសិទ្ធិនៃការបម្រើដល់កូនចៅរបស់ព្រះវរបិតាសួគ៌គឺជាឱកាសផ្សេងមួយទៀតដើម្បីធ្វើតាមគំរូនៃព្រះរាជបុត្រាស្ងួនភ្ញារបស់ទ្រង់តាមរយៈការបម្រើដល់គ្នាទៅវិញទៅមក ។
ឱកាសបម្រើខ្លះគឺជាឱកាសផ្លូវការ—ដូចជានៅក្នុងគ្រួសាររបស់យើង ការហៅរបស់យើងក្នុងសាសនាចក្រ និងការចូលរួមរបស់យើងក្នុងការបម្រើដល់សហគមន៍ ។
សមាជិកសាសនាចក្រ—ទាំងបុរស និងស្ត្រី—មិនគួរមានចិត្តស្ទាក់ស្ទើរដើម្បីឈរឈ្មោះសម្រាប់តួនាទីសាធារណៈនៅកម្រិតណាមួយក្នុងរដ្ឋាភិបាលដែលពួកគេរស់នៅឡើយ បើពួកគេចង់ធ្វើដូច្នោះ ។ សំឡេងរបស់យើងគឺចាំបាច់ណាស់នៅសព្វថ្ងៃនេះ ហើយវាសំខាន់នៅក្នុងសាលារៀន ទីក្រុង និងប្រទេសរបស់យើង ។ នៅទីណាដែលមានលទ្ធិប្រជាធិបតេយ្យ ក្នុងនាមជាសមាជិក យើងមានកាតព្វកិច្ចបោះឆ្នោតរើសបុរសស្ត្រីដែលគួរឲ្យគោរពជាអ្នកដែលមានឆន្ទៈចង់បម្រើ ។
ឱកាសជាច្រើនដើម្បីបម្រើគឺពុំមែនជាឱកាសផ្លូវការទេ—គ្មានការចាត់តាំង—ហើយវាកើតមានកាលយើងឈោងទៅជួយមនុស្សដទៃដែលយើងជួបនៅក្នុងដំណើរនៃជីវិតនេះ ។ ចូរចងចាំថា ព្រះយេស៊ូវបានបង្រៀនដល់អ្នកប្រាជ្ញខាងច្បាប់ថា យើងគួរស្រឡាញ់ព្រះ និងអ្នកជិតខាងរបស់យើងឲ្យដូចជាខ្លួនយើងផ្ទាល់ ដោយយកសាសន៍សាម៉ារីល្អធ្វើជាឧទាហរណ៍ ។៩
ការបម្រើធ្វើឲ្យយើងយល់អំពីជីវប្រវត្តិ និងការងារបម្រើរបស់ព្រះគ្រីស្ទ ។ ទ្រង់បានយាងមកបម្រើដូចដែលបទគម្ពីរបង្រៀនថា « ដូចជាកូនមនុស្សបានមក មិនមែនឲ្យគេបម្រើលោកទេ គឺនឹងបម្រើគេវិញ ហើយនឹងឲ្យជីវិតខ្លួនទុកថ្លៃលោះមនុស្សជាច្រើនផង » ។១០
ពេត្រុសអាចនឹងផ្ដល់ការពិពណ៌នាដ៏ល្អបំផុតចំពោះការងារបម្រើក្នុងជីវិតរមែងស្លាប់របស់ព្រះអង្គសង្គ្រោះនៅក្នុងពាក្យប្រាំម៉ាត់ នៅពេលលោកហៅព្រះយេស៊ូវថាជាអង្គដែល « យាងចុះឡើងធ្វើការល្អ » ។១១
ព្រះអម្ចាស់យេស៊ូវគ្រីស្ទគឺជាអំណោយទានដ៏មានតម្លៃបំផុតរបស់យើងដែលបានមកពីព្រះ ។ ព្រះយេស៊ូវមានព្រះបន្ទូលថា « ខ្ញុំជាផ្លូវ ជាសេចក្តីពិត ហើយជាជីវិត បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ » ។១២
នីហ្វៃបានចាប់យកចំណុចសំខាន់អំពីព្រះអង្គសង្គ្រោះ នៅពេលលោកបានប្រកាសថា « យើងនិយាយអំពីព្រះគ្រីស្ទ យើងអររីករាយក្នុងព្រះគ្រីស្ទ យើងផ្សាយអំពីព្រះគ្រីស្ទ យើងព្យាករអំពីព្រះគ្រីស្ទ ហើយយើងសរសេរ ស្របតាមពាក្យព្យាករទាំងឡាយរបស់យើង ដើម្បីឲ្យកូនចៅយើងអាចដឹងថា តើត្រូវស្វែងរកប្រភពណាមួយ ដើម្បីឲ្យបានផ្ដាច់បាបរបស់ពួកគេ។ » ។១៣ យើងត្រូវតែរក្សាព្រះគ្រីស្ទជាស្នូលនៃជីវិតរបស់យើងនៅគ្រប់ពេល និងគ្រប់ទីកន្លែង ។
យើងគួរចងចាំថា ព្រះនាមទ្រង់ត្រូវបានដាក់បង្ហាញនៅកន្លែងថ្វាយបង្គំរបស់យើង យើងជ្រមុជទឹកនៅក្នុងព្រះនាមទ្រង់ ហើយយើងទទួលបានពិធីបញ្ជាក់ បានតែងតាំង បានទទួលអំណោយទានពិសិដ្ឋផ្ទាល់ខ្លួន ហើយបានផ្សារភ្ជាប់នៅក្នុងអាពាហ៍ពិពាហ៍នៅក្នុងព្រះនាមរបស់ទ្រង់ ។ យើងទទួលទានសាក្រាម៉ង់ ហើយសន្យាលើកដាក់មកលើខ្លួនយើងនូវព្រះនាមទ្រង់—ហើយក្លាយជាពួកគ្រិស្តសាសនិកពិត ។ ជាចុងក្រោយ យើងត្រូវបានសុំនៅក្នុងពាក្យអធិស្ឋានសាក្រាម៉ង់ឲ្យ« ចងចាំទ្រង់ជានិច្ច » ។១៤
នៅពេលយើងត្រៀមខ្លួនសម្រាប់ថ្ងៃអាទិត្យបុណ្យអ៊ីស្ទើរនៅថ្ងៃស្អែក ចូរយើងចងចាំថា ព្រះគ្រីស្ទគឺខ្ពស់បំផុត ។ ទ្រង់គឺជាចៅក្រមដ៏សុចរិត ជាព្រះគាំទ្រដ៏ស្មោះត្រង់របស់យើង ជាព្រះប្រោសលោះដ៏មានពរ ជាអ្នកគង្វាលដ៏ល្អ ជាព្រះមែស៊ីដែលបានសន្យា ជាមិត្តដ៏ពិត និងជាអ្វីៗច្រើនទៀត ។ ទ្រង់ពិតជាអំណោយទានមួយដ៏មានតម្លៃបំផុតមកពីព្រះវរបិតារបស់យើងសម្រាប់យើងគ្រប់គ្នា ។
នៅក្នុងភាពជាសិស្សរបស់យើង យើងមានតម្រូវការ កង្វល់ និងការចាត់តាំងជាច្រើន ។ ប៉ុន្តែសកម្មភាពខ្លះត្រូវតែជាមូលដ្ឋានគ្រឹះជានិច្ចនៃសមាជិកភាពរបស់យើងក្នុងសាសនាចក្រ ។ ព្រះអម្ចាស់បង្គាប់ថា « ហេតុដូច្នោះហើយ ចូរមានចិត្តស្មោះត្រង់ចុះ ចូរឈរនៅក្នុងតំណែងដែលយើងបានតែងតាំងដល់អ្នក ចូរជួយ អ្នកទន់ខ្សោយ ចូរលើក ដៃដែលរោយ ហើយចូរចម្រើនកម្លាំង ដល់ក្បាលជង្គង់ដែលញ័រផង » ។១៥
នេះគឺជាសកម្មភាពរបស់សាសនាចក្រ ! នេះគឺជាសាសនាដែលបរិសុទ្ធ ! នេះគឺជាដំណឹងល្អនៅក្នុងអត្ថន័យពិតរបស់វា នៅពេលយើងជួយលើក ហើយចម្រើនកម្លាំងដល់អ្នកដែលមានសេចក្ដីត្រូវការខាងវិញ្ញាណ និងខាងសាច់ឈាម ! ការធ្វើកិច្ចការនេះតម្រូវឲ្យយើងទៅសួរសុខទុក្ខពួកគេ ហើយជួយដល់ពួកគេ ១៦ ដើម្បីឲ្យទីបន្ទាល់អំពីសេចក្ដីជំនឿរបស់ពួកគេលើព្រះវរបិតាសួគ៌ និងព្រះយេស៊ូវគ្រីស្ទ ព្រមទាំងដង្វាយធួនរបស់ទ្រង់នឹងត្រូវបានស្ថាបនាយ៉ាងរឹងមាំនៅក្នុងដួងចិត្តរបស់ពួកគេ ។
សូមឲ្យព្រះអម្ចាស់ជួយ ហើយប្រទានពរដល់យើងឲ្យរក្សាអំណោយទានដ៏មានតម្លៃជាច្រើនរបស់យើងដែលបានមកពីព្រះ រួមមានទាំងសមាជិកភាពរបស់យើងនៅក្នុងសាសនាចក្ររបស់ទ្រង់ដែលបានស្តារឡើងវិញ ។ ខ្ញុំសូមអធិស្ឋានថា យើងនឹងពោរពេញដោយសេចក្ដីស្រឡាញ់ចំពោះបុត្រាបុត្រីរបស់ព្រះវរបិតាសួគ៌ ហើយអាចមើលឃើញសេចក្ដីត្រូវការរបស់ពួកគេ ហើយមានឆន្ទៈដើម្បីឆ្លើយសំណួរ និងកង្វល់របស់ពួកគេអំពីដំណឹងល្អតាមរបៀបច្បាស់លាស់ ហើយមានសន្ដានចិត្តល្អ ដែលវានឹងបង្កើនការយល់ដឹង និងអំណរគុណចំពោះគ្នា ។
ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះអង្គសង្គ្រោះរបស់យើង ។ អ្វីដែលយើងនឹងត្រូវបានបង្រៀននៅក្នុងសន្និសីទទូទៅនេះកើតមានចំពោះយើងតាមរយៈការបំផុសគំនិតមកពីពួកសាវក និងពួកព្យាការី មកពីពួកអ្នកមានសិទ្ធិអំណាចទូទៅ និងថ្នាក់ដឹកនាំដែលជាស៊ីស្ទើរ ដែលជាពួកអ្នកកាន់តំណែងទូទៅក្នុងសាសនាចក្រ ។ សូមឲ្យអំណរ និងភាពសុខសាន្តរបស់ព្រះអម្ចាស់កើតមានចំពោះយើងម្នាក់ៗ នេះគឺជាការអធិស្ឋានដ៏រាបសារបស់ខ្ញុំ ក្នុងព្រះនាមនៃព្រះអម្ចាស់យេស៊ូវគ្រីស្ទ អាម៉ែន ៕