Kesiokel el Sengk el mlara Dios

Rodam ma rodos, kede dirke mlo merek el ngara cheledaol el longdibel, tial lomeruul el mla rengii ra taem ra Bibilia er sera ngara mong ra Israel le keldibel el mo melchesuar ra Rubak el ngara delongelir e oldeu er ngii el klengeltengat.¹ Ng techeled el kiei ra taem el tial uodel el lomeruul a mla moluut lokiu a Profet Joseph Smith.² A kulsingch er kemiu me mrekord e ra babilngiu a ikel blo molchesuar el kirel tial kot el chedaol el teletael el bla rengii.

Ngideliseb, e kede milmesumech e ra tokubets el sechelid e profet el, President Thomas S. Monson. Ma altang e kede rokui loureng er ngii, e kede oba dmolech e lomereng el saol el Rubak a mla mekedongii a beches el profet, President Russell M. Nelson, el mo btelul a Ikelesia er Ngii. Me ngokiu a klebechel el rael e kede mla muchel e ra beches el bades ra chelsel a reksi ra Ikelesia. Tiang a kesiokel el sengk el mla ra Dios.

Sera doterkeklii a President Nelson ra doldars chimad, e kede kilngei el lochotid el sioning ra medal a Dios e kilngei el kmo ngii e a meral loltechil a President Monson. Ngulkiu a mlodars el chimad, e kede mle yaksok el mo oltirakl a lolekoi sel lolai a ulekrael el mla ra Dios.

A Rubak a mla melekoi el kmo:

Ko moltirakl a rokui el ngii [belkul ngkel President e ra Ikelesia] a le dung el tekoi ma llach el ngii a mo meskemiu e ikel lolai… ;

“A tekingel el bom ngai, a di uai e a le tilobed e ra ngerek, el moba kelou el reng ma klaumerang.”³

A kungil medengelii ngkal beches el profet e president el mla ngelakl er a okolem el rak. Aki mla dmak loureor el ngara Chelechad er a Teruich me a Terung el apostol el mla mo okedei el rak, me a ngak a sioning el kmo a Rubak a ngarngii a chimal el milngetmokl er ngii elmo bderrir a re apostol e profet el lomtebechel a rokui el kisel a priesthood ra beluulechad. A kuureng me de bekl el chad el mui el kongei e oldubech er ngii ma re counselors er ngii el dotirakl a ikel rolir. Kede dirrek el loutkeu ra Elder Gong me a Elder Soares el mo chedal a Chelechad e ra re Teruich ma terung el Apostol.

Uriul e ra Jesus ra le Bekiis ra Kodall, sel blekeradel a klebokel el doldeu a rengud er tial merael mei el Baskua, eng mlo chemolt el mora re Mesiungel e melekoi, “Budech lobengkemiu: le Demak el luldureklak, me ngak mak mol durech er kemiu.”⁴ Ka betebengii a omeruul el lerung a ngerchelel—A Dios odureklii a Ngelekel. A Ngelekel odurukelterir a re Mesiungel—eldi chad el sechal ma redil—elmo mengetmokl e ra Urerir.

Ngdiak el kired elmo rau a rengud elmo medengei el kmo tirkel derta el chad el mlo kedong elmo mengetmokl a urrellel a Rubak a diak el cherungel. A cheldecheduch el ngara chedaol llechukl a meketakl a tekoi el kirir a re sechal ma redil el mlo kedong e ra Dios elmo mengetmokl ra klou el lureor—mekedung el ngelekel a Demad ra Babeluadesel mlo kedong elmo mesiou a ikel ngerchelir ra Ikelesia, elmo ra bkul rebab el sebechir, el ka tar er tir el cherrungel. Ng diosisiu el blekeradel el me rekid.

Meke de mlechell el ngar ngii a chelitechetud ma ngesengesed, me kede mekerang e merael bedul luchei el ketkakl e dmak el kaingeseu? Ngo muchel e lokiu ra klaumerang—meral, klemerang el klaumerang el ngara Rubak el Jesus Kristo. A klaumerang el delalem e ra Osobel a a kot el lechul a osisecheklel ma ebangkelio ra Kristo.

Sesei el rrak ra memong, e ak mlo oldingel e ra Chedaol el Beluu. Ma ki ulemekall lengelakl e ra sers ra meringel, e ngikal loungerachel e ra BYU Jerusalem Center a uleker el ta el bla kisang a tane ra meringel. E direkak, maki mle stob. Meng ngulecholt er ngak a tane el mlara dellomel el meringel. Aikang a meral limis el mekekerei.

E ak lotkii a Jesus e lolsisechakl: “Mak beches el louchais er kemiu, alsekum eng ngarngii a klaumerang er kemiu el ua meklungel a tane ra meringel, e mdur ngikal rois, Bekiis er chelechang el mo recheroid; eng mo dibus; e diak a tekoi elmo metarchebesul el kirem.”⁵

Alsekum eng ngarngii a klaumerang er kid el ua tane era meringel, e a Rubak a sebechel ngosukid el choroid a metacherbesul longarm e ra reng ma dou mededenger e ra ikel ketmekiil el ngar medad er sel dosiou lobengterir a rengelek a Dios, luldimukl e ra re chad ra telungalk, rechad e ra ikelsia, me tirkel direkak el bol chedal a Ikelesia.

Rodam ma rodos, a klengar a sebechel mo mui ra klaumerang, deurreng, lungil a rengud, dourureng, ma beltik el reng sel douedikel er sel kot el kekerei el klungel a meral klaumerang lultuil e ra Kristo— ua kekerei el tane ra meringel ra klaumerang.

Elder George A. Smith a medengei a bebil ra osisechakl el Profet Joseph Smith a milsang: “Ng silbedak el diak el kirek elmo mechitechut a renguk, ngidil chetiteuokel el bo kulchesuar. Alsekum mak ngobeit el morsel berteklel a Nova Scotia e a ikel rokui el Rocky Mountains a doklak, eng diak bok mesaol a renguk engdi kutekangel, mesisiich el loumerang, e kulmolem el blak a renguk e ngak a ultebechel elmo mesisiich ra ongarm e ra ulebongel.”⁶

Kede mo melatk a le dilung a Paulus: “Ng sebechek el remuul a rokui el tekoi e lokiu a Kristo elmo smisichak.”⁷ Sel dodengelii tiang a tara kesiokel el sengk e ra Dios.

A bebil ra ikel sengk el blak basech, eng ngarngii a lmuut el betok. A kuchais er chelechang a bebilel—sengk e ra Chedoal sils, sakrament, mesiou ra rechad, mesel diak a metechir el sengk el mlara Dios e ra Osebeled.

Sel klisichel a Chedaol sils a mo melchesuar ra chelsel a ikelesia ma blid sel lungil reng, deurreng, mesel mekekeald el blekerdelel a Reng ra Rubak el diak a kora ngodech el me mengesang.

Te betok a di tir el chemoit a temir el ngara melideiul lolab a ikal dengua—siasing el kmard ra mederir ra llomes ma le klebesei el telingt a dingerir meng kal rengesii ngikel mengululau el ngor ra Reng. Alsekum meng diak kede betik e ra taem el oridid ra aikang, eng diak kede ues a techall el rongesii a ngerel Ngikel dilu el kmo, “Bom chelellakl, e bo modengei el kmo ngak a Dios.”⁸ Ngdiak a kengtil a de ngai a ikel klungiolel a ikal donguu el lulekiu a Rubak, engdi kired elmo mellomes a rengud el lousbech. Lak ke mobes er sel sengk er a Chedaol sils.

A klengeltengat el denguu ra sakrament a diak el kirel mo kora urreor malechub eng tekoi el doruul er ngii ra sakrament miting. Tiang a kmal di okeuid el bung ra tal sandei sel bode chelelakl e metik e ra budech, deurreng, e lungil a rengud ra klengar er kid.

A dolai ra sakrament e omekbeches a telbiled a olechotel er kid el mora Rubak el kmo kid a di melatk er Ngii. Sel Tngakireng er Ngii a klebokel el sengk el mlara Dios.

Sel techall el mesiou el mora Demad ra Babeluades ra rengelekel a techall el loltirakl e ra okesiul a Betik e ra Rengul el Ngelekel sel dosiou ra derta er kid.

A bebil ra techall e ra omesiou a klebechel—ikel ngara keblid, ngerachel e ra Ikelesia, me kid el meruul a ureor buai lokiu a chelchad.

A rechad ra Ikelesia—a re sechal ma redil—a kirir el diak el loltngakl, alsekum e te soriri, el mora chorsechal ra buai ra ngidil deruchal e ra kaberment e ra ikel le kiei er ngii. Sel dolcholt a uldesued a usbechall er chelechal taem e klou a belkul ra skuled, beluu ma beluad. Sel ngarngii a misisiungii el kaberment, eng ngercheled er tial ikelesia el sengkio e ra re metekoked el sechal ma redil el sorir el mesiou.

Ng betok el techall ra omesiou el diak el klebechel—diak el lureor— a okiu sel doldars elmo olengeseu ra re bebil el desterir ra omeroled er tial klengar. Lak dobes ra Jesus sera lolsisechakl er ngkel chad ra llach el kmo ng kired el betik a rengud ra Dios me tirkel ngar bita er kid eldi uai kid e lulesbech er ngikel Lungil Chad ra Samaria el lokesiu.⁹

A omesiou a mekengii sel techall elmo sebeched el medengelii a klengar ma urrellel a Kristo. Ngii a mlei el me mesiou, eldi ua chedaol llechukl sel lolsisechakl, “el ua Ngelekel a chad el mlei el diak el ble losuub, eng bai mlei el melsisechakl, e tilngetengii a klengar el kirir a re betok.”¹⁰

A Petrus a ulechotii sel lungil siasing ra Osobel ra lolsisechakl e lokiu a kleiim el tekoi sera losaod ra Jesus, el “mirael el meruul a ungil.”¹¹

A Rubak el Jesus Krist e a kot el kesiokel e ra bekl el sengk el mlara Dios. A Jesus a dilu el kmo, “Ngak e a rael, e klemerang, e klengar: ngdiak a chad el mora Demad, a lak loak ngak.”¹²

A Nephi a silodii sel lusbechel a Osebeled sera le dul kmo, “Aki mesaod ra Kristo, aki oldeu a rengmam ra Kristo, aki olsisechakl e ra Kristo, aki omlauch e ra Kristo, e aki meluches a ikal lulocham, ma rengelekam bo lodengei el kmo te morker el melubet a kengterir.”¹³ Ng kired el lomsau ra Kristo elmo redemlel a klengar er kid ra bekl el taem el ngara bekl el basio.

Ng kired el melatk el kmo a Ngklel a di bereked e ra ikel basio er kid el de keldibel; kede metecholb loba Ngklel; kede moterkokl, mechedaol, ngmai ocholt, e merenged e ra chelebechiil el ngara Ngklel. Kede melai ra sakrament e yaksok el nguu a Ngklel— e mo meral Kristiano. E solang, e kede olengit ersel nglunguuch ra sakrament el “blechoel el di melatk er ngii.”¹⁴

Mesel do ngetmokl er kid el kirel a Baskua ra Sandei el klukuk, a bode letkiii el kmo a Kristo a mesisiich. Ngii e a melemalt el Loukerkeriil, blak a rengul el Mesebechakl, ngeltengat el Lolsobel, Ungil Mengkar, miltib el Losobel, meral Sechelid, a lmuut el betok. Ngii a meral kesiokel el sengk el me rekid el mlara Demad.

Me kid e loltirakl, a betok a dongetmokl, ma de bekikl, ma ngercheled. Engdi, a bebil ra tekoi a kirel blechoel el dodai er kid ra Ikelesia. A Rubak a melisiich “bo moumerang; luldelomel el meruul a urreriu el blak beskmiu; molengeseu ra re mechitechut molekiis e ra ruberedang e melisiich e ra re smecher.”¹⁵

Tiang sel Ikelesia e louedikl! Tiang e a klikiid el klechelid! Tiang sel ebangkelio el meral mengetmokl sel dolngeseu, olekiis, e melisiich er tirkel lousbech a ngeseu ra reng ma klengar! Ma de uaisei eng kired loldingel er tir e olngeseu er tir,¹⁶ ma ikel lodengei el loumerang e ra Demad ra Babeluades ma Jesus Kristo ma Tngakireng er Ngii a mo delalem ra chelsel a rengrir.

A kuureng ma Rubak bol ngosukid e lomekngeltengat er kid el mengeluoleu ra klauchad er kid e ra mla moluut el Ikelesia er Ngii. Ak meluluuch me de bode mui ra beltik el reng el kirir a rengelelkel a Demad ra Babeluades e bol sebeched el mes a usbechelir e kongei longer a kerrir ma raureng er tir ra ebangkelio lokiu a bleketakl e chubechub el rael mel mengai el mo sekutab el lungil kaukereu.

Ak medengei el kmo a Jesus Kristo a Osebeled. A ikel bode mosisechakl er tial klou el longdibel a mei er kid lokiu a ulekrael ra re apostol ma re profet, re General Authorities, ma re mengeteklir a rodos el tir a General Officers e ra Ikelesia. A deurreng ma budech e ra Rubak lobengkemiu a tara nglunguchek e loba ngklel a Jesus Kristo, amen.