O Meaalofa Faapelepele mai le Atua

Uso e ma tuafafine, o lea faatoa uma ona tatou auai i se faapotopotoga paia, o se faiga masani e mafai ona faafoi i tua i le Tusi Paia i taimi sa potopoto ai Isaraelu anamua ia lagonaina le afio ai o le Alii ma faamanatu Ana faamanuiaga.¹ Ua faamanuiaina i tatou e ola i se taimi ua toefuatai mai ai lenei faiga masani anamua na auala mai i le Perofeta o Iosefa Samita.² Ou te uunaia outou ina ia faamaumauina i a outou apitalaaga patino mea na outou lagonaina e faatatau i lenei sauniga sili ona paia lea ua outou auai ai.

Talu ai nei, sa tatou faatofa atu ai i la tatou uo pele ma le perofeta, Peresitene Thomas S. Monson. E ui ua tatou misia o ia, ae ua tatou faafetai tele ua valaauina e le Alii se perofeta fou, Peresitene Russell M. Nelson, e pulefaamalumalu i Lana Ekalesia. I se auala faatulagaina tatau ua tatou amatalia ai nei se itulau fou i la tatou talafaasolopito o le Ekalesia. O se meaalofa faapelepele lenei a le Atua.

Ina ua tatou lagolagoina Peresitene Nelson e ala i le siitia o o tatou lima, sa tatou laulaututu ai o ni molimau i luma o le Atua ma faamamaluina o ia o le sui tonu o Peresitene Monson.Faatasi ai ma o tatou lima siitia, na tatou folafola atu ai e usiusitai i lona siufofoga a o ia mauaina faatonuga mai le Alii.

Ua fetalai mai le Alii:

“Ia outou gauai i ana upu uma [o lona uiga o le Peresitene o le Ekalesia] ma poloaiga o le a tuuina atu e ia ia te outou e pei ona ia maua[ina] … ;

“Ona o lana upu ia outou talia, e pei lava ua mai i loʼu lava gutu, i le onosai ma le faatuatua atoa.”³

Ua ou iloaina la tatou perofeta ma le peresitene fou mo le silia ma le 60 tausaga. Sa ma auauna atu faatasi ma ia i le Korama a le Toasefululua mo le 33 tausaga, ma o a’u o se molimau i le sauniaina o ia e le aao o le Alii e avea ma o tatou aposetolo pulefaamalumalu ma perofeta e puleaina ki uma o le perisitua paia i luga o le fogaeleele. Tau ina ia lagolagoina e i tatou taitoatasi o ia ma ona fesoasoani ma mulimuli i la latou taitaiga. Tatou te faafeiloai atu foi ma le agalelei ia Elder Gong ma Elder Soares o ni uso o le Korama a Aposetolo e Toasefululua.

I le mavae ai o le Toetu o Iesu, o se mea tatou te faamanatuina i lenei faaiuga o le vaiaso mamalu o le Eseta, sa Ia faaali atu ai i Ona soo ma fetalai atu, “Ia outou manuia: faapei ona auina mai o a’u e le Tamā, e faapea foi ona ou aauina atu outou.”⁴ Ia matau ni faatinoga se lua—Ua auina mai e le Atua Lona Alo. Ua auina mai e le Alo Ana auauna—alii ma tamaitai faaletino—e faataunuu le La galuega.

E le tatau ona faateia i tatou e iloa o na tagata taitoatasi na valaauina e fai le galuega a le Alii e le o ni tagata atoatoa. O tala i tusitusiga paia ua auiliili ai mea na tutupu e uiga i alii ma tamaitai o e na valaauina e le Atua e faataunuu se galuega maoae—o atalii ma afafine lelei a lo tatou Tama Faalelagi na valaauina e auauna atu i o latou tofiga i le Ekalesia, o loo tauivi e fai le mea silisili latou te mafaia, ae leai ma se tasi o i latou e atoatoa. E moni foi lena mea e tasi ia i tatou i le aso.

I le tulaga moni o o tatou vaivaiga ma lē atoatoa faaletagata, e faapefea ona tatou agai i luma i le lagolagosua ma le lagolagoina o le tasi ma le isi? E amata i le faatuatua—faatuatua moni ma faamaoni i le Alii o Iesu Keriso. O le faatuatua i le Faaola o le uluai mataupu faavae lea o le aoaoga faavae ma le talalelei a Keriso.

I nai tausaga talu ai, sa ou asiasi atu ai i le Nuu Paia. A o matou pasia le laau o le sinapi, sa fesili mai le faatonu o le Nofoaga Autu o le BYU i Ierusalema ia te a’u pe na ou vaai i se fatu sinapi. Ou te lei vaai lava i ai, o lea sa matou tutu ai. Sa ia faaali mai ia te a’u ia fatu mai le laau o le sinapi. Sa faateia i le laiti [o fatu].

Ona ou manatua lea o aoaoga a Iesu: “Aua e moni, ou te fai atu ia te outou, afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i le la mea; ona alu atu ai lea; e leai foi se mea tou te le mafaia.”⁵

Afai e laitiiti lo tatou faatuatua e pei o le fua o le sinapi, e mafai ona fesoasoani le Alii ia i tatou e aveesea mauga o le lotovaivai ma le masalosalo i galuega o i luma atu o i tatou a o tatou auauna atu faatasi ma fanau a le Atua, e aofia ai tagata o aiga, tagata o le Ekalesia, ma i latou e le o ni tagata o le Ekalesia.

Uso e ma tuafafine, e mafai ona faatumulia le olaga i le faatuatua, olioli, fiafia, faamoemoe, ma le alofa pe a tatou faaaogaina sina aofaiga itiiti o le faatuatua moni ia Keriso—e oo lava i se fua o le sinapi o le faatuatua.

Sa manatua e Elder George A. Smith nisi o fautuaga na tuu atu ia te ia e le Perofeta o Iosefa Samita: “Na ia fai mai ia te au, e le tatau lava ona ou lotovaivai, pe o a lava faigata e ono siomia ai a’u. Pe afai ou te magoto ifo i le lua aupito maualalo o Nova Sikotia ma solo ifo Mauga Papa uma i ou luga, e le tatau lava ona ou lotovaivai ae pipiimau pea, faatino le faatuatua, ma lototele ma e tatau lava ona ou tulai mai i luga o le faaputuga.”⁶

E tatau ona tatou manatuaina le tautinoga a Paulo: “Ou te mafaia mea uma lava i le faamalosi mai o Keriso ia te au.”⁷ Ia iloaina o le isi meaalofa faapelepele lenei mai le Atua.

E faaopoopo atu i meaalofa ua ou ta’ua, e anoanoai isi. Ou te tautala atu nei i nai meaalofa—le meaalofa o le aso Sapati, le faamanatuga, auaunaga i isi, ma le meaalofa lemafaatusalia mai le Atua o lo tatou Faaola.

O le mana o le aso Sapati e ao ona lagonaina ai i totonu o le lotu ma le aiga le fiafia, le olioli, ma le mafanafana o lagona o le Agaga o le Alii e aunoa ma soo se ituaiga o mea faalavefau.

Ua anoanoai tagata ua faatagaina i latou lava e toetoe lava ola i le initoneti i a latou masini poto—o lau o masini e suluia ai o latou fofoga i le ao ma le po ma meafaalogo i o latou taliga ua poloka ai le leo filemu ma le ititi o le Agaga. Afai tatou te le mauaina le taimi e sei ai le palaka, tatou te ono misi avanoa e faalogo ai i le siufofoga o Ia na fetalai mai, “Ia soia [ia], ma iloa o a’u o le Atua.”⁸ Ia e leai ma se mea e leaga ai le faaaogaina o tulaga lelei o tekinolosi ua musuiaina e le Alii, ae e tatau ona tatou atamamai i lo latou faaaogaina. Manatua, le meaalofa o le aso Sapati.

O faamanuiaga o le mauaina o le faamanatuga i le sauniga faamanatuga e le tatau lava ona avea ma faiga masani pe na o se mea tatou te faia.E na o le 70 minute lava i le vaiaso atoa lea e mafai ona tatou taofi ai ma saili atili i le filemu, olioli, ma le fiafiaga i o tatou olaga.

O le taumamafa i le faamanatuga ma le faafouina o a tatou feagaiga o se tatou faailoga lea i le Alii tatou te manatua pea o Ia.O Lana Togiola o se meaalofa tunoa lea mai le Atua.

O le avanoa o auaunaga i fanau a le Tama Faalelagi o se isi avanoa e mulimuli ai i le faataitaiga a Lona Alo Pele e ala i le auauna atu o le tasi i le isi.

O nisi avanoa faaleauaunaga e aloaia—i totonu o o tatou aiga, o tatou valaauga i le Ekalesia, ma lo tatou auai i faalapotopotoga mo auaunaga i nuu ma alalafaga.

O tagata o le Ekalesia—alii ma tamaitai uma—e le tatau ona faatuai, pe a latou mananao ai, e taufetuli mo tofiga faalemalo i soo se tulaga lava o faigamalo i soo se mea o latou nonofo ai. E taua o tatou leo i aso nei ma e taua i totonu o a tatou a’oga, o tatou aai, ma o tatou atunuu. I nofoaga o loo i ai le faatemokarasi, o lo tatou tiute o ni tagata o le ekalesia le palota mo alii ma tamaitai faamaoni o e naunau e auauna atu.

E tele foi avanoa e auauna atu ai e le aloaia—e aunoa ma se tofiga—ma e oo mai a o tatou aapa atu i isi tatou te feiloai ai i le faigamalaga o le olaga. Manatua sa aoao atu e Iesu le loia e tatau ona tatou alolofa atu i le Atua ma o tatou tuaoi e pei o i tatou lava lea na faaaogaina ai le Samaria agalelei e fai ma faataitaiga.⁹

E tatala e auaunaga se faamalama lea tatou te malamalama ai i le olaga ma le auaunaga a Keriso. Na afio mai o Ia e auauna, e pei ona aoao mai tusitusiga paia, “e pei o le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui a’i tagata e toatele.”¹⁰

Atonu ua aumai e Peteru le faamatalaga aupito silisili o le auaunaga a le Faaola i la le tino i ni upu se fa ina ua ia saunoa e faatatau ia Iesu, “sa femaliuai ma agalelei.”¹¹

O le Alii o Iesu Keriso o le tatou meaalofa aupito sili ona faapelepele o meaalofa uma mai le Atua. Na fetalai Iesu, “O A’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te au.”¹²

Na iloa e Nifae le taua o lo tatou Faaola ina ua ia tautino mai, “Ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.”¹³ E tatau ona tatou faatumauina Keriso i le totonugalemu o o tatou olaga i taimi uma ma i nofoaga uma.

E tatau ona tatou manatua o Lona suafa lea e faaali mai i a tatou nofoaga o tapuaiga; ua papatisoina i tatou i Lona suafa; ma ua faamauina, faauuina, maua faaeega paia, ma faamauina i le faaipoipoga i Lona suafa. Tatou te aai ma feinu i le faamanatuga ma folafola atu e tauave i o tatou luga Lona suafa—ma avea ma Kerisiano moni. Ma le mea mulimuli, ua talosagaina i tatou i le tatalo o le faamanatuga ia “manatua pea o ia.”¹⁴

A o tatou saunia ai mo le Aso Sa o le Eseta taeao, ia tatou manatua o Keriso le tumutumuga [o mea uma]. O Ia o le faamasino amiotonu, lo tatou Puluvaga faamaoni, Togiola faamanuiaina, Leoleo Mamoe lelei, le Mesia folafolaina, Uo moni, ma isi uma faalagiga. O Ia moni o se meaalofa faapelepele tele mo i tatou mai lo tatou Tama.

I lo tatou avea ai ma soo, e tele o tatou manaoga, popolega, ma tofiga. Peitai, o nisi gaoioiga e tatau lava ona i ai i le fatu o lo tatou avea ai ma tagata o le Ekalesia. “O le mea lea,” ua poloai mai ai le Alii, “ia e faamaoni; tu i le tofi ua Ou tofia i ai oe; fesoasoani i e vaivai, sii i luga lima ua tautau i lalo, ma faamalosi tulivae ua vaivai.”¹⁵

O le Ekalesia lenei o faatinoga! O le amioatua lenei! O le talalelei lenei i lona lagona moni lava pe a tatou fesoasoani, sii, ma faamalosi i latou o mafatia faaleagaga ma faaletino! O le faia o lea mea e manaomia ai lo tatou asiasi atu ia i latou ma fesoasoani ia i latou,¹⁶ ina ia mauaa a latou molimau o le faatuatua i le Tama Faalelagi ma Iesu Keriso ma Lana Togiola i o latou loto.

Tau ina ia fesoasoani mai le Alii ma faamanuia i tatou ina ia faatauaina a tatou meaalofa faapelepele e tele mai le Atua, e aofia ai lo tatou avea ai ma tagata o Lana Ekalesia toefuataiina. Ou te tatalo ina ia faatumulia i tatou i le alofa mo fanau uma a le Tama Faalelagi ma mafai ona iloaina o latou manaoga ma ia loto ai e tali atu i a latou fesili ma atugaluga e uiga i le talalelei i ni auala manino ma agalelei ia o le a faateleina ai le malamalamaaga ma le talisapaiaina o le tasi ma le isi.

Ou te molimau atu o Iesu Keriso o lo tatou Faaola. O mea o le a aoaoina ai i tatou i lenei konafesi aoao ua oo mai ia i tatou e ala i musumusuga mai aposetolo ma perofeta, mai Pulega Aoao, ma taitai tamaitai o e o Taitai Aoao o le Ekalesia. Ia tumau ia i tatou taitoatasi le olioli ma le filemu o le Alii o la’u tatalo faamaualalo lea i le suafa o Iesu Keriso, amene.