Taw’ath ni Gaa’ Puluwan ku Got

Pi walageg, kug fini un e mo’olung ko tayfan, e yalen ni ke buch nap’an e ningyal’ ko Biblia nap’an e gidii’ ko Israel ni kakrom kar thamiy e Somoel mar madnomgaed ni fan e taw’ath Rok. ¹ Bayi taw’ath rodad ningad paered nap’an e ningyal’ ni kan fulweg e re yalen nib kakrom ney udakaen fare Profet ni Joseph Smith.² Gube wenig ngom ningam yoloey u babyor rom e tin kam thamiy nap’an e mo’olung nib thothup ney ni kam un ngay.

Kug fini, kad og e kafel’ ngak fagar nib gaa’ rodad ma profet rodad, President Thomas S. Monson. Arragon gadadra tawren ngak, machane kug falflaen’gaed ni ke pinning Somoel reb e profet nib be’ech, President Russell M. Nelson, nibe gagyeg nag e Galasia Rok. Ufithik e yarmiy rangad tabab bin magid e guruy ulan e chep rok Galasia rodad. Ni’ir e to’owath nib thabi fel’ ni ke pii Got.

Nap’an kug sustainnag President Nelson udakaen ningad tay paa’dad nga lang, kad manged e m’ag u poewchen Got mug nanged gan ni’ir e bee’ nibe gagyeg tomuren President Monson. Kug tayed paa’dad ngalang, kug micheg niged ningad folgaed ko lam nap’an irma thapeg e powiy’ ku Somoel.

En Somel ke yoeg:

Ngad tiyaen’ gaed ngak urngin e [thin nge motochiyel ko President ko Galasia] nap’an thapeg … ;

“Bachane ngad thapeged e thin rok, woed rogon ke yib u Lungun Somoel, ufithik e gumaen’ nge mich.”³

Kug nang e profet-president nib be’ech rodad ko 60 e duw. Kug pigpig gow uta’abong ulan fare Ulungi ko Ragag nge La’agruw ko 33 e duw, nge Gag I m’ag ni kan taermedliy Somoel ngak ninge mang fare apostle nib gagyeg ma profet ninge gagyeg fapi key ko priesthood nib thohtup u fayleng. Ngad sustain nograed ir nge urngin e counselor rok ngad folgaed ko powiy’raed. Gadadba pinning e magaer ko Elder Gong nge Elder Soares i yow e chonggin fare Ulung ko fare Ragag nge L’agruwi Apostle.

Tomuren Yesus ke fas ko yam’, e ban’en ningad madnomnog ko Easter. Ke m’ug ngak fapi gachalpen Rok me yoeg, “Nge yib e gapas ngomed: Rogon nike loeg en ni Chitamangiy e aram rogon ni Ngu loeg’med.”⁴Mu tiyaen’ ko gali ngongol nem—Got ba pii’ Fak Rok. En ni Fak ba loeg fapi tapigpig Rok—mo’on nge ppin—ningar mugu’ulied e muruwel Rok.

Dad tamra’gaed ningad filed fapi gidii’ ni kan pinning ningar mugu’ulied e muruwel ko Somoel dad machaelboeg. Bay yo’or e yaat ulan fapi babyor nib thothup nibe weliy’ e chepin e mo’on nge ppin kan pinningraed Got ningar rrin’ed e muruwel nib gaa’—yaedba bitir nib mo’on nge ppin ku Chitamangdaed nu Tharmiy—kan pinningraed ko pi muruwel u Galasia, kar gayed e rayog roraed, machane dabkar machaelboeg. Gadad ni woed rogon.

Bachan bayi magowen nge tin waer ko e gidii’, urrogon ningad mugu’uliyed ningad ayuwegdaed ngad fel’rogon e gidii’? Ngad tababgaed ko mich—nib riyul’ mab yul’yul e mich ko en ni Somoel Yesus Kristus. Mich ngak en Tathapeg i’ir e bin somm’on e machib nge kenginn e gospel ku Kristus.

Boech e duw u faram, Kug milekag nga Binaw nib Thothup. Nap’an kug drivenag u to’oben e wuldug ni mustard, fare director ko fare BYU Jerusalem Center ke fith fa’an Kug guy e awoch ni mustard. Kugog danga’, ere kug tal’gow. Ke dag ngog e awoch ko wuldug ni mustard. Yaedba chigchig.

Kug pugurran fare machib ku Yesus: “Fa’anra bay e michan’ romed ngak Got ni boed mam’ungun ba awochngin e mustard, mrayag ni nge lungumed ko re burey ney, Mman u roy aram; mra yan; ma demturug ban’en mrayag romed.”⁵

Fa’an bayi mich rodad ni boed mam’ungun ba awochngin e mustard, en Somoel ra ayuwegdaed ningad chuweg fapi burey ko muluwaen’ nge maewaer nifan e muruwel nira yub ngodad fa’an ngad pigpigniged e bitir rok Got, arragon e chongin e tabinaew rodad, chongin e Galasia, nge gidii’ ni daworiy chongin e Galasia.

Pi walageg, ran sug e yafas ko mich, madnom, falflaen’, athap, nge t’ufeg nap’an ngad ngongoliyed e mich nib chigchib mab yul’yul ngak Kristus—arragon e awochngin mustard ko mich.

Elder George A. Smith ke pugurran e fanow ni ke pii’ en ni Profet Joseph Smith ngak: “Ke weliy’ ngog ni Dabgu muluwaen’ug, dariy’ fan e magawon nib liyegeg. Fa’an kug ligil nga loew nib to’orngin u Nova Scotia fa ngan tay urngin e Rocky Mountain nga dakaeneg, Dabgu muluwaen’ug machane gura athamgily, ngongoliy e mich, mug fi’leg e gel bugwag nira yoeg Ningu gelong ngadakaen e burey u tomur.”⁶

Ngad pugurrangaed fapi thin ko Paul: “Demturug i mit e n’en ni gura mada’nag ma bay gelngig nike pii’ Kristus nrayag nigu par riy’.”⁷ Nang fan ko pin’ney i’ir e taw’ath nib gaa’ puluwaen ku Got.

Ko urngin e taw’ath Kug non marung’agen, bay reb nib yo’or. Gube non marung’agen boech chiney. Fare taw’ath ko fare rran ni Madnom, fare sacrament, pigpig ngak reb e gidii’, nge taw’ath nib thabi gaa’ ku Got ni Tathapegdaed.

Fare gelngin ko fare rran ni Madnom ningan nang fan u galasia nge tabinaew e madnom, falflaen’, nge thamtham nib fel’ rok Ya’el ku Somoel ni dariy’ e tin nibe wagaey ngaram.

Bo’or e gidii’ ni yaeda paer online ko e smart device roraed—pi screen nibe tamilang e owchraed nap’an e nep nge urngin e rran ma bay e earplug roraed nibe dibchay e lam, nib munguy, nib chigchi ko Ya’el. Fa’an dad fil’eg e ningyal’ ningad unplug, gadadra n’ag e wo’en ningad motoyilgaed ngak En ni ke yoeg, “Mu paged e cham, mi gimed ma nang ni gag Got.”⁸Arragon dabki kireb ningam ngongoliy e technology ni kan yibliynag Somoel, machane thingar ningad gonopgaed urrogon ningad ngongoliyed riy’. Mu pugurran, fare taw’ath ko fare rran ni Madnom.

Fare taw’ath ningan thapeg fare sacrament dad rrin’ed ni dariy’ fan ko yalen fa ban’en ni dariy’ fan ningad rrin’ed nap’an e mo’olung ko sacrament. Nigo’ 70 e minute ko urngin e week rayog ningad soengaed mag piry’eged e gapas, falflaen’, nge falfaen’gaed ko yafas rodad.

E thapeg e sacrament nge fi’leg bayay e michmich rodad nibe dag e pow ngak Somoel ningad pugurran Ngak. E Bayul Rok i’ir e taw’ath nib murnguy ku Got.

E mat’aw ko pigpig ko urngin e bitir ko Chitamangdaed nu Tharmiy ma bing e wo’en ningan fol e fanow ko en ni Fak Mo’on nib t’uf Rok ningad pigpiged ngak reb.

Boech e rogon ko pigpig nibe formal—ulane tabinaew rodad, e calling rodad ko Galasia, nge pigpig rodad ulane nam rodad.

Pi chongin e Galasia—e mo’on nge ppin—dad tal’gaed, fa’an yaedba’adag, ningar thapeg e public office ko demturug e government u gin roraed. E lamdad nib t’uf ko fapi skuul, binaw, nge nam rodad. Ulane nam ni bay e democracy, i’ir e chiylen rodad ningad vote nag ko e mo’on nge ppin nib fel’ rogon ni yaed ba’adag ningar pigpignog.

Boech e rogon ko pigpig ni yigo e muruwel’—dariy’ e muruwel kan fith—ma yib nap’an ngad mada’nag reb e gidii’ u yafas ney. Mu pugurran Yesus ni ke fil ngak fare lawyer ni thingar ningad t’ufeged Got nge yoror rodad woed rogdaed ngad folgaed e fanow ko fare bee’ ni Samaritan nib Fel’. ⁹

Pigpig nima bing e windaw ningad nang fan e yafas nge muruwel ko Kristus. Ke yib ninge pigpignog, woed rogon fapi babyor nib thothup be fil, “ni bod e en ni Fak e Girdi’ nde yib ni ngan pigpig ngak machane yib ninge pigpig me pi’ e pogofan rok nge biyuliy bo’or e gidii’ ngay.” ¹⁰

Peter ke weliy’ nib fel’ rogon e muruwel ko Tathapeg u fayleng ko laal e thin nap’an ke yoeg marung’agen Yesus, “ke yaen ninge rrin’ e tin fel’.” ¹¹

En ni Somoel Yesus Kristus i’ir e taw’ath nib gaa’ ko urngin e taw’ath rok Got. Yesus ke yoeg, “I gag e kanawo’. Me gag e tin riyul’, me gag e yafas: dariy’ be’ nrayag ni nge yan ngak e en ni Chitamangiy yak emus ni gag e ra yan rog ngak.” ¹²

Nephi ke weliy’ e tin gaa’fan nib fel’ rogon ko Tathapegdaed nap’an ke yoeg. “Ma gamaed be weliy mornga’agen Kristus, gamaed be falfalaen’ rok’ Kristus, gamaed be machib ni mornga’agen Kristus, gamaed be prophesy ni mornga’agen Kristus, ma gamaed be yol u rogon e pi prophecy romaed, ni nge yog ni nang pifakmaed e re ginn’en ni ngar sap niged e man’aegfan ko pi denen roraed ngay.” ¹³ Thingar ningad tayed Kristus ninge mang kenginn e yafas rodad ni gubin e ningyal’ ulan urngin e gin’en.

Thingar ningad pugurrangaed ni’ir e fithingan Rok ni kan yoloey ulane tafen e liyoer rodad: kan tawfe nagraed u Fithingan; ngan yibliynagdaed, ordainnag, endownag, ngad ma’g paa’dad ko maybil udakaen Fithingan. Gadadma fek fare sacrament ngad michmicheg ningad feked Fithingan ngadakaendaed—ningad manged e Gidii’en Kristus nib yul’yul’. U tomur, kan fith ngodad ningad ulan fare meybil ko sacrament ningad “pugurran ngak ni gubin yal’.” ¹⁴

Nap’an ngad taermedliy ni fan fare Rran ni Madnom ko Easter ni gabul, ngad pugurraengaed ni Kristus nib thabi tolang. I’ir e tapufthin nib mat’aw rodad, Pa’ nibe non rodad, Tabayul nib taw’ath rodad, Tachathowliy nib Fel’, Messiah kan micheg, Fagar nib yul’yul’, nge bo’or, nib bo’or. I’ir e taw’ath nib gaa’ rodad ku Chitamangiy.

U rogdaed ni gachalpen, thingar ningad mugu’uliyed bo’or e tin t’uf, magawon, nge muruwel. Machane, boech e muruwel thingar kenginn e chongin rodad ko Galasia. En Somoel ke motochiyel nagdaed ningad michaen’daed, mugu’uliyed e muruwel Ke pii’ ngodad; golnag e gidii’ nib waer, ma chibiy e paa’ngin nib waer, ngad gelniged e rifriffaneg nib waer.” ¹⁵

Aray e Galasia nibe muruweliy! I’ir e tiliw nib machaelboeg! Nib riyul’ nap’an ngad ayuweged, chibiyed, ma gelnoged e gidii’ nib t’uf ko tin ya’el nge fayleng! Ni mus ningad mada’nagraed mag ayuwegraed¹⁶ ninge yoeg fapi m’ag ko mich rodad u Chitamangdad nu Tharmiy nge Yesus Kristus nge Bayul Rok nira yaen nga kenginn e gum’racha’raed.

Ninge yoeg ninge ayuweg Somoel ma taw’ath nogdaed ningad tay fan e chongin rodad ko Galasia Rok kan fulweg. Gube meybil ningad suggaed ko t’ufeg ngak urngin e bitir ko Chitamangdaed ningad duruwiy’raed e tin t’uf ngodad ngad fulweg e pi duwer nge magawon rorad marunga’agen fare gospel u urogon nib machaelboeg nib gol ningad gaa’nag e nang fan nge t’ufeg rodad ngodad.

Gube pii’ e m’ag en ni Yesus Kristus i’ir e Tathapegdaed. Fatin ningad filed nap’an e general mo’olung ney nib a yib ngodaed udakaen e yi’iy ko pi apostle nge pi profet, ko pi General Authority, nge tiyugang’ nib ppin’ i yaed General Officer ko Galasia. Ninge yoeg e falflaen’ nge gapas ko Somoel ngomed ni’ir e meybil rog udakaen e fithingan ku Yesus Kristus, amen.