Kaunopada en Tuhong Koht
Koadoahke en diar kupwuren Koht ni pwung, minimin, oh pahrek kak kaunop kitailda pwehn tuhong Koht.
Eliza R. Snow, kosoia kasarawi en Tehnpas Sarawi en Kirtland (me e iang towehda), kosoia: “Kaunopda en sarawihn kasarawi kak wiawi, ahpw sohte lokaia kak kawehwehda kasansal en nanleng me wiawi rahno. Tohnleng kan pwarehng ekei, ni ansou me pepehm sarawi pwarada me koaros me mih mwo esehda, oh mohngiong koaros direkihla peren soh kawehwepe oh diren kaping.”1
Kasansal sarawi kan me wiawi nan Tehnpas Sarawi en Kirtland iei poahsoan ong kahrepe en kapwurpwurdohn Mwomwohdiso en Sises Krais pwehn ketkihdo komour oh lapalapla ong sapwellimen Sahm Nanleng serihkan.2 Ni atail pahn kaunopada en tuheng Koht, kitail kak ese dahme kupwure sang ni kataman en kih sarawi kan ni ar kapwurpwurdohr nan Tehnpas Sarawi en Kirtland.
Nan kapakap en kasarawio, Soukohp Joseph Smith ni karakarahk peki rehn Kauno “en ketin ninlimehda tehnpas sarawi wet … me E ketin poahngoakihier irail en kawada.”3
Wihk ehu mwurin, Rahn Sarawi en Ihster, Kauno pwarada nan kairoir lingan oh sapwellimenkihda Sapwellime tehnpas sarawio. Met wiawi nan Epreil 3, 1836, kerenieng pahrekiengte sounpar 182 samwalahro sang Rahn Sarawi en Ihster wet. E pil wia ansou en Pahsohpa—ansou malaulau kei me Ihster oh Pahsohpa poaloangloangda. Mwurin kairoiro ah imwseklahr, soukohp en kawa silimen, Moses, Elias, oh Elijah, pwaradahr katengehdi kih kan me kesempwal ong kapweipweidahn kupwuren Kauno ong ni Sapwellime Mwomwohdiso me kopwurpwurdohr nan irair en ansou. Kahrepehu me mengei, ahpw kalewehdi, wehweki en kapwurepene Israel, katengepene irail duwen peneinei ehu, oh kaunopada sampah ong ni Ketdo Keriau en Kauno.4
Ni Elijah oh Moses ara pwarada ni mwohmw me “‘mwomw pene’ ni ‘tiahk en mehn Sews kan, nin duen Moses ih Elijah ara pahn pwarodo ni ‘imwin ansou.’”5Nan atail padahk, pwarada wet kaimwsekla poahsoan en kapwurpwurdohn soangen kih kan “pwilidier … ong kaimwseklahn rahn akan oh imwin ansou, me wia irair en unseklahn ansou.”6
Tehnpas Sarawi en Kirtland, ni wasa oh iauwe, sohte dehde. Me inenen kesempwal ong aramas, wia weliakapw poatoapoat. Soukohp kan en kawa kapwurehdo kih kan en prihstuhd ong tiahk sarawi poatoapoat kan en rongamwahu en Sises Krais. Met kahredahr peren laud ong towe kan me pwoson.
Kih pwukat kihda “manaman sang wasa ile”7 sang ni manaman en Koht ong pwukoah pilipildahr me ansouo oh met wiahda kahrepe keieu kesempwal ong Mwomwohdiso.8Ni rahn kaselel en Ihstero nan Tehnpas Sarawi en Kirtland, kih siluh kapwurpwurdohr:
Keieu, Moses pwarada oh mweidadahr kih kan me pahn kapwurepene Israel sang ni keimw pahieu en sampah, me iei doadoahk en misineri.9
Keriau, Elias pwarada oh mweidadahr kih kan en mwei marain en rongamwahu en Abraham, me iangahki kapwurpwurdohn inou en Abraham.10Presiden Russell M. Nelson padahngkiher me kahrepen kih pwukat iei pwehn kaunopada towehkan ong wein Koht. E mahsanih, “Kitail ese ihs kitail oh [kitail ese] dahme Koht kasik rehtail.”11
Kesiluh, Elijah pwarada oh mweidadahr kih kan ong manaman en katengtengpene nan mwei marain wet, me iei doadoahk ong poadepen peneinei oh tiahk sarawi kan en nan tehnpas sarawi pwehn komourla me momour oh me mehla.12
Sang ni kaweid en Presidensi Keieu oh Pwihn en Ehk Riemeno, mie, soun sawas lap silimen nan Mwomwohdiso me kin tehk pwukoah kesempwal pwukat poahsoankihda kih kan me kapwurpwurdohr nan Tehnpas Sarawi en Kirtland. Irail kan iei Pwihn me kin Apwali Misineri, Pwihn me kin Apwalih Prihsduhd oh Peneinei, Pwihn me kin Apwalih Tehnpas Sarawi oh Poadepen Peneinei.
Dahme Kitail Wiewia pwe Kitail en Kapwaiada Pwukoah pilipildahr me Sarawi Pwukat?
Keiou, ni wahu ong Moses ah kapwurehdo kih kan ong kapwurpwurpenehn Israel, rahnwet kerenieng misineri 70,000 mihseli nan sampah kalkalohki Sapwellime rongamwahu pwehn kapwurepene Sapwellime me pilipilda. Iei met me tapiada pweidahn doadoahk laud oh kapwuriamwei me Nephi kilangehr nan pwungen Mehn liki kan oh mehn Israel. Nephi kilangada nan atail mwehi ansou souleng kan en Koht pahn mih pohn sampah pwon, ahpw arail nempe kan pahn tikitik pwehki suwed. E kilangada me re pahn “kidikidki pwung oh manaman en Koht me lingan laud.”13 Ni petehk mwotomwot en poadoapoad ong kapwurpwurdohn Mwomwohdiso, an misineri kan doadoahk laud me inenen kaselel. Kitail kilkilang pweidahn an Nephi kairoir. Itarete atail nempe kan ah malaulau, kitail pahn wenlahte nan atail doadoahk oh sewese irail kan me pahn sapeng sapwellimen Sounkomouro mahsen.
Keriau, Elias pwarada oh inoukihdi nan mwei marain en rongamwahu en Abraham, kehkehliki me nan kitail oh atail wahn dih kan koaros mwurin atail pahn alehdi kapai. Nan kapokon wet, kaweid kesempwal akan kodahr pwehn sewese kamwahulahn Souleng kan oh kaunopirailda ong wein Koht.14
Kesiluh, Elijah mweidadahr kih kan en katengtengpene nan mwei marain wet. Ong kitail me momour rahn pwukat, tohtohlahn tehnpas sarawi kan oh doadoahk en poadepen peneinei me kaselel. Mwekid wet pahn popouslahte oh kehlailla lau Ketdo Keriau en Sounkomouro pwe sampah pwon “de kamwomwala ni Ah pahn ketdo.”15
Doadoahk en poadoapoad en peneinei, nanleng kapaiada sang dipwsoun doadoahk kapw akan, lapalahn keirda nan irair en pahr kei samwalahro. Kitail sohte pahn marain en itarkihla duen pwukoahn manaman en Koht me pilipilda oh kasik me Aunt Jane de ekei peneinei pahn apwaliala; I men sawaski an President Joseph Fielding Smith koasoai inen: “Sohte emen mweimweida sang pwukoah lap wet. Anahnepen soukohpo pil iangahki ohl [de lih]. Wasa, de wekpeseng, de doadoahk reirei nan Mwomwohdiso, pahn sohte pwukoahki emen sohte lipilipil en kesehla komourlahn an emen mehla.”16
Rahnwet atail tehnpas sarawi kan mih wasa tohtoh nan sampah oh elen sawas en mwohni ong irail kan me anahne ahpw dohsang tehnpas sarawi.
Emen emen, anahne teneki atail kak en wia doadoahk en misineri, tehnpas sarawi oh poadepen peneinei, oh kaunopada pwehn tuheng Koht.
Mour pwung, ehupene, oh pahrekpene mwohn Kauno pahn wiahda poahsoan en pwukoah sarawi kan
Me pid duwen mour pwung, mour wet iei ansou ong kitail koaros en kaunopada pwehn tuhong Koht.17 Pwuhk en Mormon kasalehda karasaras tohto ong mwekid apwal akan ni emen emen de pwihn ehu ah sohte pahn kapwaiada kosoned en Koht.18
Nin doken ahi momour, kahpwal kan oh kapwunod kan en sampah kin kohsang ni ehu me laud kolahng ni ehu—sang me sohte katepe oh sohte kesempwal imwikihla mour suwed. E wia mehn kasansal me me mour suwed kasansaladahr oh riahla.19Soangen mour suwed kan uhong kosonned en Koht oh wasa kan. Ahpw, irail me wehwehki koasoandi en Koht pil anahne uhong mour suwed, me iei dihp. Kalohk en peneinei ehu ong sampah keperki “me mehmen me pahn kawehla inou kan en mour mwakelekel, me wiakawe ah pwoud de nah seri (de emen tohrohr) … pahn ehu rahn ale kadeikpe mwohn Koht.”20
Ni atail kileng seli, kitail kilang mour suwed tohto wasa koaros. Ma, emen emen, kitail pahn udahn pwunodki kadeik laud en atail Sounkomour, kitail anahne rapahki koluhla. I ese me aramas tohto solahr pehm kupwuren Koht oh pil solahr wadek pwuhk sarawi kan de kaweid en soukohp kan. Ma kitail, tohn wehi ehu, pahn medewe kalokepen dihp kan, pahn mie lapalahn uhpenehn koaros ong kilel sued oh wiakaupen lih akan.21Me Alma kosoiahiengehr nah pwutak Corianton nan Pwuhk en Mormon, “Mour sapwung sohte kin imwkihla peren.”22
Me pid minimin, Sounkomouro mahsani, “Ma kumwail sohte ehupene ah kaidehn nei kumwail.”23 Kitail ese me ngehn en uhpene iei sang rehn tepelo.24
Rahn pwukat, kaweid en pwuhk sarawi kan ong ehupene udahn manoknokla, ong aramas tohto pwehki wiewia en keinek kan,25 kak poahsoanki irair, ohl lih, wehi, oh pai. Nan wehi tohto, ma kaidehn koaros, aramas katohrohr peseng duen arail pahn momour. Oaralap laud en kaskuhl kawehwehda weikek laud kan, mwekid en wiakawe emen, oh soahng teikan me pahn katohrepeseng aramas.Nan sapwellimen Kauno Mwomwohdiso, ihte tiahk me kitail pahn idawehn oh padahngki iei tiahk en rongamwahu en Sises Krais. Ehupene me kitail rapahki iei miniminpene rehn Sounkomouro oh Sapwellime padahngkan.26
Ni atail kasawih kahrepe kesempwal en Mwomwodiso, re poahsoankihda pahrekla mwohn Kauno27 oh idawehn tiahk kan en Rongamwahu en Sises Krais. Ni wahupen doadoahk en misineri, poahsoan oh kak en papdaisla iei en karakarahkla mwohn Koht ki loalohlahn pali ngehn.28 Kasukuhl, pai, tohn wehi, de wehi me ke kohsang ie sohte iang.
Pwehn kapatahieng, misineri kan papah ni karakarahk wasa re pwukoahki. Re sohte song en papah koasoandi en sampah de kaunopadahn doadoahk me pahn kohdo kan. Re papah ni mohngiong unsek, kehl, oh lamalam unsek wasa me re wie doadoahk ie. Re sohte kin pilada iengerail misineri kan, oh re nantihieng rapahki en momourki mour en Krais,29 me iei poahsoan en tiahk en Sises Krais.
Pwuhk sarawi kan kihda kaweid kesempwal akan ong miniminpene. Sounkomouro padahngki me keioun kosoned iei en “poakohng Kauno ahmw Koht.” Oh keriau iei en “poakoahng mehn mpomw duen pein uhk.”30
Sounkomouro eri kawehwehda me koaruhsie iei mehn mpomw.31 Pwuhk en Mormon kasansalehda me sohte katohrohrpeseng en keinek de dakehn aramas.32 Kitail udahn pahn ehupene oh pahrekpene.
Tiahk sarawi kesempwal oh pwukoah sarawi kan kokouda wasaht. I pahn kasik me pein amwail pepehm en nan tehnpas sarawi pahn duehte ahi. Ni ansou me I mweselsang ahi pwukoah kan nan San Francisco oh lellahng Tehnpas Sarawi en Oakland, I kak kehn pepehm laud en limpoak oh meleilei. Me laudsang iei pepehm me I karanih Koht oh Sapwellime koasoandi kan. Poahsoan en tiahk sarawi kan iei ihte me I kilkilang, ah pali kesempwal en pepehm mwahuko iei pahrekpene oh ehupene me I kehn nan tehnpas sarawio. Koaros likou pwetepwet. Sohte kadehdehpen pai, dake, de skuhl laud; kiht koaros perien aktikitikla mwohn Koht.
Nan pere sarawi en katengeteng pene, pwopwoud sarawi kohkohlahte duwepenehte ohng koaros. I kesempwaliki pwopwoud me sang peneinei aktikitik oh pwopwoud me kohsang peneinei kepwehpwe kan ahr aneki pepehm tehiou. Re likauih likou me soahngetehiou oh pil wia inou me duwepenehte ni pehi tehiou. Irail koaros alehda kapai poatoapoat kan en prihsdud. Met pweida nan tehnpas sarawi lingan me kokouda sang ni meiroang en souleng kan pwehn wia tehnpas sarawi en Kauno.
Ni atail pahn kin kapwaiada atail pwukoh sarawi kan, poahsoanda pohn mour pwung, ehupene, oh pahrekpene mwohn Kauno, E pahn kihong kitail popohl oh meleilei nan sampah wet oh kaunop kitail ong mour soutuk nan mour me pahn kohdo.33 Met kaunopkitailda pwehn tuheng Koht.34
Se kapakapki me emen emen kumwail, mendahte dah me ke mihmi loale ansouet, pahn ale sawas rehn ahmw pisop oh waroahng en ale mweimei ong nan tehnpas sarawi.35
Se kapingki towehkan me tohto ar kaukaunop en kohla nan tehnpas sarawi. Pali laud en aramas me warohng kolokol mweimwei en pidelong nan tehnpas sarawi ong pahr tohto. Uwen tohtohn-doadoahngki mweimwei ong me pwulepwul kan me warohng inenen tohtohla nan irair en pahr riau samwalahro. E sansal me poahsoan en pwoson ong towehkan en Mwomwohdiso udahn kehlailla.
Pwehn kaimwsekala, menlau tamataman me kaun laud kan en Mwomwohdiso me moange idihda sarawi kan en Mwomwohdiso ale sawas sarawi. Kaweid wet kohsang rehn Ngehn Sarawi oh ekei pak inensang rehn Sounkomouro. Soangen kaweid sarawi kan koaros mie. I kapingki ahi alehdier soangen sawas pwukat. Ahpw kaweid kohsang nan sapwellimen Kauno ansou, ni oaritik oh sansal mwahu,36ni ansou me “Kaun eripit pahn pilada en padahkieng kitail.”37 Kaweid ong Mwomwohdiso wet koaros kohiengte Sapwellime soukohp.
Kitail koaros ahneki pwung en utung Presiden Russell M. Nelson pwehn wia atail soukohp oh Presiden en Mwomwohdiso en Sises Krais en Souleng en Imwin Rahn Akan nan kapokon wet. Pwihn en Ehk Riemeno, ahneki pepehm kesempwal en ngehn sarawi ni ansou me re kihdieng pehrailkan pohn moangen Presiden Nelson oh Dallin H. Oaks, wiewia ni ngihl, kasarawihla oh katohrehla pwehn wia Presiden en Mwomwohdiso wet. I kadehde me e kasarawihla oh kaunopadahr ah mour unsek pwehn wia soukohp en Kauno ong nan mwei marain wet. Ni mwaren Sises Krais, amen.