Faʼaineine nō te fārerei i te Atua

’A tahi, nō niʼa i tō Mose faʼahoʼiraʼa mai i te mau tāviri nō te putuputuraʼa ia ’Īserā’ela, fātata e 70 000 misiōnare i teie mahana tei purara nā te ao atoʼa nei i te pororaʼa i tāna ʼevanelia nō te haʼaputuputu i te feiā tāna i māʼiti. Teie ïa te ʼōmuaraʼa nō te tupuraʼa o teie ʼohipa māere ʼe te faʼahiahia tā Nephi i ʼite ātea i rotopū i te mau Etene ʼe te ʼutuāfare nō ’Īserā’ela. ʼUa ʼite Nephi i tō tātou nei tau ’a tiʼa ai te feiā moʼa a te Atua nā te mau fenua atoʼa, e mea iti rā tō rātou nūmera nō te ’ohipa ’ino. ʼUa ʼite rā ʼoia ē, « te parau-ti‘a ʼe te mana o te Atua i te hanahana rahi, ʼo tā rātou ïa mauihaʼa ».¹³ ʼIa tuatāpapa-anaʼe-hia te ʼāʼamu poto o te ʼĒkālesia tei faʼahoʼihia mai, e mea faʼahiahia mau te tautoʼoraʼa misiōnare. Tē ʼite nei tātou i te tupuraʼaʼa o te ʼōrama a Nephi. Noa atu e mea iti tā tātou mau nūmera, e tāmau noa ā tātou i tā tātou tautoʼoraʼa ma tē toro atu i te rima i te mau taʼata e pāhono mai i te poroʼi a te Faʼaora.

Te piti, ʼua fā mai Elia nō te hōro’a mai i te tau tuʼuraʼa nō te ʼevanelia a Aberahama, ma te parau mai ē nā roto ia tātou ’ tō tātou hua’ai, e haʼamaitaʼihia te tā’āto’ara’a o te mau uʼi i muri mai ia tātou. I roto i teie ʼāmuiraʼa, ʼua hōhorahia mai te arataʼiraʼa taʼa ʼē nō te tauturu i te haʼamaitaʼiraʼa i te feiā moʼa ʼe te faʼaineineraʼa ia rātou nō te bāsileia o te Atua.¹⁴ E riro te parau fa’aara i te tuha’a purera’a a te Autahu’ara’a nō ni’a i te mau pupu peresibutero ’e te tahu’a rahi, i te tu’u hua atu i te mana autahu’ara’a, nā reira ato’a te mana o te autahu’ara’a. E riro te hāhaerera’a ’utuāfare ’e te hāhaerera’a a te mau tuahine, te « aupurura’a » i teienei, tei ha’api’i-nehenehe-hia i roto i teie tuha’a purera’a, i te fa’aineine i te feiā mo’a nō te fārerei i te Atua.

Te toru, ʼua hōroʼa mai Eliaha i te mau tāviri tāʼatiraʼa nō teie tau tuʼuraʼa ʼevanelia. Nō tātou pāʼātoʼa e ora nei i teie taime, e mea faʼahiahia te rahiraʼa o te mau hiero ʼe te ʼohipa ʼāʼamu ʼutuāfare. E tāmau noa ïa teie fāito ʼe e vitiviti atu ā ē tae noa atu i te tae-piti-raʼa mai o te Faʼaora ʼoi « [riro] te ao atoʼa nei… ʼei mea faufaʼa ʼore i tōna taeraʼa mai ».¹⁵

ʼUa maraʼa rahi roa teʼohipa ʼāʼamu ʼutuāfare, tei haʼamaitaʼihia e te rāveʼa ʼāpī, i te roara’a o te mau matahiti i ma’iri aʼenei. E ’ere ïa tātou i te mea paʼari ’ia ʼore tātou e haʼapaʼo i teie hōpoi’a tei faʼataʼahia mai e te Atua ma te mana’o ē, nā tatie Jane ʼaore rā te tahi atu fētiʼi itoito e rave i te reira ʼohipa. E faʼaʼite atu vau i te mau manaʼo faʼahapa a te peresideni Joseph Fielding Smith : « ʼAita roa e taʼata i haʼapaehia i teie nei tītauraʼa rahi. ʼUa tītauhia te reira i te ʼāpōsetolo ʼe te peresibutero ha’ehaʼa roa aʼe [’aore rā te tuahine]. Eʼita te tiʼaraʼa, ʼaore rā te tōroʼa hanahana, ʼaore rā te tāvini-maoro-raʼa i roto i te ʼĒkālesia e faʼatiʼa ia tātou ’ia haʼafaufaʼa ʼore i te faʼaoraraʼa i tō tātou feiā i pohe ».¹⁶

Tē vai nei tō tātou mau hiero nā te ao atoʼa nei i teie nei mahana ʼe tē vai atoʼa nei te ’āfata tauturu i te feiā navaʼi ʼore e ora ra, ātea roa i te hiero.

E mea maita’i ’ia hiʼopoʼa tātou tāta’itahi i tā tātou mau tautoʼoraʼa i te raveraʼa i te ʼohipa misiōnare, te ʼohipa hiero ʼe te ’ohipa ʼāʼamu ʼutuāfare, ʼe te faʼaineineraʼa nō te fārerei i te Atua.

Nō niʼa i te parau tiʼa, e taime teie orara’a nō tātou pāʼātoʼa ’ia faʼaineine nō te fārerei atu i te Atua.¹⁷ Tē hōroʼa mai nei te Buka a Moromona i te mau hiʼoraʼa e rave rahi nō te mau ʼati rahi e tupu ’ia ʼore anaʼe te mau taʼata ʼaore rā te mau pupu taʼata e haʼapaʼo i te mau faʼaueraʼa a te Atua.¹⁸

I roto i tōʼu nei oraraʼa, ʼua tāuiui noa te mau fifi ’e te mau māna’ona’ora’a o teie nei ao mai te hōʼē pae i te tahi atu pae—mai te mau ʼohipa haʼihaʼi ʼe te faufaʼa ʼore, i te viʼiviʼi rahi. E mea maitaʼi ’ua faʼaʼitehia ʼe ’ua faʼahapahia te mau ’ohipa māferara’a.¹⁹ Tē ’ōfati nei te mau ’ohipa māferara’a i te mau ture a te Atua ’e a te sōtaiete. ’Ia pāto’i ato’a te mau taʼata i māramarama i te ʼōpuaraʼa a te Atua i te ’ohipa tai’ata e ti’a ai, e hara ato’a hoʼi te reira. Tē faʼa’ara nei te poro’i nō ni’a i te ’utuāfare i tō te ao ē « te mau taʼata atoʼa ʼo tei ʼōfati i te mau fafauraʼa nō te viʼiviʼi ʼore, ʼo tei hamani ʼino i tō rātou hoa faʼaipoipo ʼe ʼaore rā i tā rātou mau tamariʼi [’aore rā i’ō nei, i te hō’ē noa atu ta’ata]…’ia tae i te hōʼē mahana e ti’a mau ā rātou i mua i te Atua ’ia haʼavāhia ».²⁰

’Ia hiʼo tātou nā piha’i iho ia tātou, tē ʼite nei tātou i te ehu o te ʼohipa ʼino ʼe te faʼatītī i te mau vāhi atoʼa. Mai te peu tē haʼapeʼapeʼa mau nei tātou tāta’itahi i te haʼavāraʼa hopeʼa a tō tātou Faʼaora ia tātou, ’ia ’imi tātou ’ia tātarahapa e ti’a ai. Tē taiā nei au ē ʼua rahi te taʼata ’aita fa’ahou e tauʼa nei i te Atua ʼe ʼo tē ʼore e fāriu nei i ni’a i te mau pāpaʼiraʼa moʼa ʼaore rā i ni’a i te mau peropheta nō te arataʼiraʼa. ʼĀhani, e hiʼo tātou, te sōtaiete, i te mau fa’ahopeʼara’a o te hara, e rave rahi ïa ta’ata e pātoʼi atu i te mau hōhoʼa faufau ʼe i te faʼariroraʼa i te mau vahine ʼei mau taoʼa.²¹ Mai tā Alama i parau atu i tāna ra tamaiti ia Korianotona i roto i te Buka ʼa Moromona, « E ʼere roa te parau ʼino i te ʼoaʼoa ».²²

Nō niʼa i te hōʼēraʼa, ʼua parau mai te Faʼaora : « ’E mai te mea ʼaita ʼoutou e riro ʼei hōʼē ra ʼe ʼere hoʼi ʼoutou nōʼu nei ».²³ ʼUa ʼite hoʼi tātou ē, te vārua mārō ra, nō te diabolo ïa.²⁴

I tō tātou nei tau, ʼaita te tītauraʼa a te pāpaʼiraʼa moʼa ’ia hōʼē e tauʼa-rahi-hia nei, ʼe nō te mau taʼata e rave rahi, te haʼapūairaʼa, tei niʼa ïa i te faʼatupuraʼa i te mau pupu²⁵ tei haʼamau-pinepine-hia i ni’a i te tiʼaraʼa, te ’āpeni, te nūna’a ta’ata, ʼe te taoʼa rahi. I roto i te mau fenua e rave rahi, penei a’e te rahiraʼa o rātou, e mea ta’a ’ē roa tō te tahi ’e tō te tahi mana’ora’a i te oraraʼa. I roto i te ʼĒkālesia a te Fatu, te taʼere ana’e tā tātou e ʼāmui atu ʼe e haʼapiʼi atu, ʼo te taʼere ïa o te ʼevanelia a Iesu Mesia. Te hōʼēraʼa tā tātou e tūtava nei, ʼo te hōʼēraʼa ïa ʼe te Faʼaora ʼe tāna mau haʼapiʼiraʼa.²⁶

’Ia hiʼo anaʼe tātou i te mau fā mātāmua o te ʼĒkālesia, ʼua niu-pauroa-hia ïa te reira i niʼa i te ’aifāitora’a i mua i te Fatu ²⁷ ʼe mai te au i te taʼere o te ʼevanelia a Iesu Mesia. Nō niʼa i te ʼohipa misiōnare, te mau tītauraʼa tumu nō te bāpetizoraʼa ʼo te faʼaha’ehaʼaraʼa ïa iāna iho i mua i te Atua ʼe te haereraʼa mai ma te ʼāʼau tae ʼe te vārua marū.²⁸ ʼAita roa atu te fāito haʼapiʼiraʼa, te taoʼa rahi, te nūna’a ta’ata ʼaore rā te fenua nō reira mai ’oe e haʼapaʼohia.

Taʼa ʼē noa atu i te reira, te tāvini nei te mau misiōnare ma te ha’ehaʼa i te vāhi i piʼihia ai rātou. Eʼita rātou e tāmata nei i te tāvini ’ia au i te mau fa’aturera’a a tō te ao nei, ʼaore rā nō te faʼaineineraʼa nō te mau tōroʼa ananahi. Tē tāvini nei rātou ma tō rātou ʼāʼau atoʼa, tō rātou pūaʼi atoʼa, tō rātou manaʼo atoʼa ʼe tō rātou itoito atoʼa i te mau vāhi rātou e faʼataʼahia ai. Eʼita rātou e māʼiti i tō rātou mau hoa misiōnare, ʼe e tūtava rātou ma te itoito i te faʼatupu i te mau tāpaʼo maitaʼi mai tō te Mesia te huru,³⁰ ’o te pū ho’i te reira o te taʼere a Iesu Mesia.

Tē hōroʼa mai nei te mau pāpaʼiraʼa moʼa i te arataʼiraʼa nō tō tātou mau auraʼa faufaʼa rahi roa aʼe. ʼUa haʼapiʼi te Faʼaora ē te ture mātāmua « ’ia hinaʼaro ïa i tō Atua ». ʼE te piti « ’ia aroha atu ïa i tō ta’ata tupu, mai tō aroha ia ’oe iho na ».³⁰

Hau atu, ʼua haʼamāramarama mai te Faʼaora ē ʼo te mau taʼata atoʼa tō tātou taʼata tupu.³¹ Tē haʼamāramarama mai nei te Buka ’a Moromona ē ʼeiaha e mau pupu, e mau ʼāti, ʼaore rā e mau fāito pupu.³² ’Ia vai hōʼē ʼe te ʼaifāito noa tātou i mua i te Atua e ti’a ai.

ʼUa patuhia te mau ʼōroʼa moʼa ʼe te mau hōpoiʼa hanahana i niʼa i teie tumu parau. Penei a’e te ’ohipa e tupu nō ’outou i roto i te hiero, mai tā’u ato’a ïa. ’Ia faʼaruʼe anaʼe au i tāʼu ao ʼohipa i San Francisco ʼe ’ia tae atu vau i te hiero nō Oakland, e ʼite au i te manaʼo pūai nō te here ʼe te hau. Te hōʼē tufaʼa rahi o te reira ʼite, ʼo te mana’o ïa nō tōʼu fātata-atu-ā-ra’a i te Atua ʼe i tāna ra mau ʼōpuaraʼa. ʼUa riro te mau ʼōroʼa faʼaoraraʼa i tāʼu fā mātāmua roa, te hōʼē rā tufaʼa faufaʼa rahi nō taua mau manaʼo nehenehe ra, ʼo te ʼaifāitoraʼa ïa ʼe te hōʼēraʼa e vai nei i roto i te hiero. ʼUa ʼahuhia te mau taʼata atoʼa i te ʼahu ʼuoʼuo. ʼAita e tāpaʼo faʼaʼite nō te taoʼa rahi, te tiʼaraʼa, ʼaore rā te fāito ha’api’ira’a teitei ; e mau taeaʼe ʼe e mau tuahine anaʼe tātou ʼo tē faʼaha’ehaʼa nei ia tātou iho i mua i te Atua.

I roto i te piha moʼa nō te tāʼatiraʼa, hōʼē ā ʼōroʼa faʼaipoiporaʼa mure ʼore, nō te mau taʼata atoʼa. Mea au nāʼu ’ia ’ite ē, te tāne ʼe te vahine vēvē roa aʼe ʼe te tāne ʼe te vahine moni roa aʼe, e fāriʼi ïa rātou i te hōʼē ā ʼite i roto i te hiero. E ʼōʼomo rātou i te hōʼē ā huru ʼahu ʼe ʼe rave rātou i te hōʼē ā mau fafauraʼa i niʼa i te hōʼē ā fata. E fāriʼi atoʼa rātou i te hōʼē ā mau haʼamaitaiʼaraʼa mure ʼore o te autahuʼaraʼa. E ravehia te reira i roto i te hōʼē hiero nehenehe tei patuhia nā roto i te mau tufaʼa ʼahuru a te feiā moʼa, ʼei fare moʼa nō te Fatu.

Nā te rave-faʼaoti-raʼa i te mau hōpoʼia tei faʼataʼahia mai e te Atua, tei niuhia i niʼa i te parau tiʼa, te hōʼēraʼa ʼe te ʼaifāitoraʼa i mua i te Fatu, e hōpoi mai i te ʼoaʼoa ʼe te hau i roto i teie ao ʼe e faʼaineine ia tātou nō te ora mure ʼore i roto i te ao a muri atu.³³ E fa’aineine te reira ia tātou ’ia farerei i te Atua.³⁴

Tē pure nei mātou ē, e paraparau ’outou tāta’itahi i tō ’outou ’episekōpo nō te vai ti’amā nō te hō’ē parau fa’ati’a nō te hiero, ta’a ’ē noa atu tō ’outou huru orara’a.³⁵

Tē māuruuru nei mātou ē, tē rahi noa atu ra te mau melo e faʼaineine nei i te haere i te hiero. Tē vai nei te hō’ē mara’ara’a rahi i roto i te nūmera o te mau taʼata paʼari tei mau i te parau faʼatiʼa nō te hiero e rave rahi mau matahiti i teienei. ’Ua mara’a ʼūʼana ato’a te mau parau faʼatiʼa tā’ōti’ahia nō te feiā ʼāpī i roto i nā matahiti e piti i mā’iri aʼenei. E mea pāpū roa ē, ’aita te rahira’a melo haʼapaʼo maita’i i pūai a’enei mai te reira i roto i te ʼĒkālesia.

ʼEi faʼahope’araʼa, ’ia pāpū maitaʼi ia ʼoutou ē, tē fāriʼi nei te feiā faʼatere paʼari o te ʼĒkālesia, rātou e faʼatere nei i te mau ʼōpuaraʼa hanahana a te ʼĒkālesia, i te tautururaʼa nō niʼa mai. E tae mai teie arataʼiraʼa nā roto mai i te Vārua ʼe i te tahi mau taime, nā roto roa mai i te Faʼaora. ʼUa hōroʼahia mai taua nā huru ʼarataʼiraʼa vārua toʼopiti. Tē māuruuru nei au i te fāriʼiraʼa i taua huru tautururaʼa ra. E hōroʼahia mai rā te arataʼiraʼa ’ia au i te tārena a te Fatu, te faʼaue nā niʼa iho i te faʼaue, te aʼo nā niʼa iho i te aʼo,³⁶ i te taime « e māʼiti ai te hōʼē Fatu tei ʼite i te mau mea atoʼa i te haʼapiʼi ia tātou ».³⁷ E tae mai te arataʼiraʼa nō te tāʼātoʼaraʼa o te ʼĒkālesia i tāna noa peropheta.

’Ua fāriʼi pāʼātoʼa tātou i te haʼamaitaʼiraʼa i te pātururaʼa i te peresideni Russell M. Nelson ʼei peropheta nō tātou ʼe ʼei peresideni nō te ’Ēkālesia a Iesu Mesia i te Feiā Mo’a i te mau Mahana Hope’a Nei, i roto i teie nei ʼāmuiraʼa. ʼUa fariʼi te pupu Tino ʼAhuru ma Piti ʼāpōsetolo ’e te ’āpōsetolo tāta’itahi i te hōʼē faʼaʼiteraʼa pae vārua rahi ’a tuʼu ai mātou i tō matou mau puʼe rima i niʼa i te upoʼo o te peresideni Nelson ʼe ʼua faʼatoroʼa, ʼe ʼua faʼataʼa tō mātou reo, te peresideni Dallin H. Oaks, iāna ʼei peresideni nō te ʼĒkālesia. Tē faʼaʼite pāpū atu nei au ē ʼua faʼatōroʼa-ātea-hia ʼe ʼua faʼaineinehia ʼoia i te roaraʼa o tōna oraraʼa ’ei peropheta nā te Fatu i tō tātou nei tau. I te i’oa o Iesu Mesia, ’āmene.