Ekkewe Soufos Ra Kapas ren Manamanen ewe Ngun mi Fel

Pwi me fefinei mi acheingicheing, ia chok oua nom ia, ua mochen apasa ai ennetin kinisou ren ami eitata poumi naneu ren ami etiwaei. Ua tipetekison me mefi pwe use naf ai upwe fori ei wis mi kon watte ai upwe tupweni ach Chon Amanau, Jises Kraist, won fonufan. Ua mefi usun chok Moses, minne a ekieki pwe ese angoch ne poraus me ese sinei met epwe apasa. Ua kinamwe ren kapasen ewe Samon ngeni i:

“Io a ngeni emon aramas awan? Io a fori an epwe seningepung ika auwemoch, Io a ngeni mesan ika fori an epwe chuun? Ngang ewe Samol.

“Iwe kopwe ne feinno! Upwe anisuk o erenuk met kopwe apasa” (Exodus 4:11–12; pwan nengeni wokisin 10).

Ua kinamwe ren ewe tong me aninis seni punuei mi achengicheng. I eu nenien appiru ren murino, tong, me ennetin tupwen ngeni ewe Samon ngenikem me ai famini. Ua tongei i ren unusen netipei, me ua kinisou ren an anisikem aupwe foffor och.

Pwi me fefinei, ua pwarata ngeni kemi pwe Preseten Russell M. Nelson i ewe soufosun Kot won fonufan. Use mo kuna emon mi kirokiroch me uren tong nap seni i. Inamo pwe ua mefi pwe use naf ren ei wis, an kapas me nikinikin mesan mi uren kirekiroch nupwen a kokkoriei ngeni ei wis a efisata ai mefi an ewe Chon Amanau tong. Kinisou chapur, Preseten Nelson. Ua etiwok me tongeok.

Esap ew feioch ei pwe epwe wor soufos, chon osini, me chon pwarata won fonufan non ekkei fansoun, ir ra kuta ar repwe sinei netipen ewe Samon me aponueta? Ach sinei pwe sise akenemon won ei fonufan a awora kinamwe, inamo ekkewe osukosuk sia kuna non manauach. An Kot kokkori soufos a pwarata pwe A tongei Noun kewe. Ra pwarata ekkewe pwon me napanapen Kot me Jises Kraist ngeni Nour kewe aramas. Ua fen keao ei ren met a fis ngeniei.

Engon me wanu ier me a no, ngang me punuei aua angei eu kokko won fon seni Preseten James E. Faust, ewe Aruemonun Chon Aninis non ewe Aewin Presetensi. A kokkorikem ren am oupwe presetenin misini me chiechi non Portugal. A erenikem pwe mi chok wor wonu wik mwen aupwe poputani am misin. Inamo pwe ause mefi pwe aua ammonata me pwe ause nafoch, aua etiwa ewe kokko. Am aua kon aureki non ena fansoun ren am aupwe atauwei ne angei noum kewe visa pwe a auchea nounoun ren aupwe angang non ewe fonu pokiten, met aua fen sinei, pwe ita epwe fen wonu ika wanu maram mwen epwe wes ekkewe visa.

Preseten Faust a kapas eis ika mi wor am nuku pwe ewe Samon epwe efisata eu manaman me aupwe tongeni mwitir ne angei am kewe visa. Aua punueni “ewer,” me aua poputa ne ammonata iei chok. Aua ammonata ekkewe taropwe mi namwot ngeni ekkewe visa me aua uwei am famini, me aua mwitir feino ngeni ewe nenien angei visa. Emon fefin mi kirokiroch a chufengen reom. Non an katon am kewe taropwe me a keao usun met am aupwe fori non Portugal, a kapas eis, “Oupwe weswesen feino anisi ekkewe aramas non fonuei?” Aua punueni “ewer” me aua awewe pwe aupwe tupweni Jises Kraist me pwarata usun I me An misin mi pin won fonufan. Aua niwin mwirin ruanu wik, angei am kewe visa, me a tori ewe misin non wonu wik, usun chok met ewe soufosun Kot a tingorei kem aupwe fori.

Pwi me fefinei, ua pwarata pwe ekkewe soufos ra kapas ren ewe manamanen ewe Ngun mi Fel. Ra pwarata usun Kraist me An misin mi pin won fonufan. Ra siwinin mochenin me netipen ewe Samon me ra kokko ar repwe siwinin I ne aitikich met sipwe fori ach sipwe niwin me nonnom ren Kot me Noun we, Jises Kraist. Sia feioch nupwen sia anganga ach nuku me aponuweta ar kewe pesepes. Ren ach tapweno mwirir, sipwe kuna pwan och pwapwa non manauach me sisap wesen osukosuk, sipwe tongeni pworacho ngeni ach kewe osukosuk me weires, me sipwe fori eu epet non pekin ngun minne epwe tumunu kich seni ekkewe chon koum ngenikich non ach ei fansoun.

Won ei ranin Paska ua ennetin pwarata pwe Jises Kraist mi manau me A emweni An Mwichefen won fonufan ren Noun kewe soufos, chon kuna, me chon pwarata. Ua pwarata pwe I ewe Chon Amanau me Chon Angasanon fonufan o me ren I sia tongeni kuna manau ese much me nonnom ren Kot. Ua tongei I, ua pin ngeni I. Ua mochen tapweno mwirin I me fori netipan me achocho ai upwe winiti usun I. Ua apasa ekkei mettoch fiti tipetekison non ewe it mi pin iten ach Samon Jises Kraist, amen.