2010–2019
Eb’ li profeet neke’aatinak rik’in lix wankil li Santil Musiq’ej
Abril 2018


Eb’ li profeet neke’aatinak rik’in lix wankil li Santil Musiq’ej

Nak’utb’esiman lix rahom li Dios choq’ reheb’ li ralal xk’ajol rik’in naq wankeb’ li profeet. Eb’ a’an neke’xk’e chi nawmank lix yeechi’ihom ut chan ru naq tz’aqal wan li Dios ut li Jesukristo rik’ineb’ lix tenamit.

Ex was wiitz’in raarookex inb’aan, yalaq ta b’ar wankex, nawaj xb’antioxinkil eere chi anchal inch’ool naq xexaqab’ qawankil ewer. Us ta naweek’a naq moko tz’aqal ta inchaab’ilal chi moko inseeb’al ta chi aatinak, jo’ laj Moises, nak’ojob’aak inch’ool xb’aan li raatin li Qaawa’ choq’ re a’an:

“Ani xk’ehok li ehej re li winq? Ani aj [b’aan naq] wan li mem ut li tz’ap xik, li na’ilok ut li mutz’? Ma ink’a’ tab’i’ inb’aan laa’in li Qaawa’?”

“Jo’kan b’i’, ayu: laa’in wanqin sa’ laa we ut tink’ut chawu li k’a’ru toxaaye” (Exodo 4:11–12; chi’ilmanq ajwi’ raqal 10).

Nak’ojob’aak ajwi’ inch’ool xb’aan lix rahom ut lix tenq’ lin raarookil ixaqil. A’an jun eetalil re li chaab’ilal, li rahok, ut li wank chi k’eek’o tz’aqal xch’ool chiru li Qaawa’ choq’ we ut choq’ re injunkab’al. Ninra chi anchal inch’ool, ut ninb’antioxin xb’aan lix chaab’ilal sa’ li qayu’am.

Ex was wiitz’in, nawaj xch’olob’ankil xyaalal eere naq li Awa’b’ej Russell M. Nelson a’an lix profeet li Dios sa’ ruchich’och’. Maajun sut wilom junaq li naxq’ax ru xchaab’ilal xch’ool ut lix rahom a’an. Us ta naweek’a’ naq ink’a’ tz’aqal inmetz’ew sa’ li loq’laj b’oqom a’in, li raatin ut li chaab’ilal sa’ xnaq’ ru naq xinixb’oq’ sa’ li k’anjel a’in xinixk’e chireek’ankil naq sutsuukin xb’aan lix rahom li Kolonel. B’antiox aawe, at Awa’b’ej Nelson. Nakatinxaqab’ ut nakatinra.

Ma ink’a’ tab’i’ osob’tesinb’ilo rik’in naq wankeb’ li profeet, aj ilol na’leb’, ut aj k’utb’esinel sa’ li ruchich’och’ sa’ li qakutan, li neke’xnaw li rajom li Qaawa’ ut neke’xtaaqe? Nak’ojob’aak qach’ool xb’aan xnawb’al naq moko qajunes ta wanko sa’ ruchich’och’, us ta li ch’a’ajkilal naqanumsi sa’ li yu’am a’in. Nak’utb’esiman lix rahom li Dios choq’ reheb’ li ralal xk’ajol rik’in naq wankeb’ li profeet. Eb’ a’an neke’xk’e chi nawmank lix yeechi’ihom ut chan ru naq tz’aqal wan li Dios ut li Jesukristo rik’ineb’ lix tenamit. Laa’in intzolom a’an rik’in li ak xinnumsi.

18 chihab’ chaq, li wixaqil ut laa’in xoob’oqe’ sa’ telefono xb’aan li Awa’b’ej James E. Faust, xkab’ aj tenq’ aj k’ehol na’leb’ sa’ li Xb’eenil Awa’b’ejil sa’ li kutan a’an. A’an xooxb’oq chi k’anjelak choq’ awa’b’ej re mision sa’ Portugal. A’an xye qe naq sa’ waqib’ xamaan taatiklaaq li qamision. Us ta naqak’oxla naq moko kawresinb’ilo ta ut ink’a’ tz’aqal qametz’ew, xqak’ulub’a li b’oqom a’an. Li k’a’ru mas naxik wi’ qak’a’uxl sa’ li hoonal a’an, a’an naq tento taqak’ul li qavisa re k’anjelak sa’ li tenamit a’an. Ak naqanaw naq naraj junaq waqib’ malaj waqxakib’ po re xk’ulb’al jun li visa.

Toja’ naq li Awa’b’ej Faust xpatz’ qe ma wan qapaab’aal naq li Qaawa’ tixb’aanu jun sachb’a-ch’oolej re taqak’ul li qavisa sa’ junpaat. “Hehe’,” xqasume, ut tikto xoo’ok chixkawresinkil li qahu. Xqakawresiheb’ li hu neke’ajman ru choq’ reheb’ li visa, xqach’utub’ li oxib’ li qalal qak’ajol toj saajeb’, ut xkoho toj sa’ li consulado. Jun li ixq jwal chaab’il xch’ool xooxk’ul aran. Naq yoo chixtz’ilb’al rixheb’ li qahu ut chixnawb’al li k’a’ru taqab’aanu sa’ Portugal, a’an xooril ut xpatz’ qe, “Ma yaal naq teetenq’aheb’ li kristaan re lin tenamit?” Xqasume chi anchal qach’oolnaq yaal a’an ut xqach’olob’ naq toowanq jo’ ruuchil li Jesukristo ut taqach’olob’ xyaalal a’an ut lix choxahil k’anjel sa’ ruchich’och’. Xoosutq’i chaq aran chirix kaahib’ xamaan, xqak’ul li qavisa, ut xoowulak sa’ li qamision chiru li waqib’ xamaan a’an, jo’ xpatz’ qe jun lix profeet li Qaawa’ naq taqab’aanu.

Ex was wiitz’in, rik’in x’anchalil lin waam, ninch’olob’ xyaalal naq eb’ li profeet neke’aatinak rik’in lix wankil li Santil Musiq’ej. Neke’xch’olob’ xyaalal li Kristo ut lix choxahil k’anjel sa’ ruchich’och’. Neke’reetali lix k’a’uxl ut lix ch’ool li Qaawa’ ut b’oqb’ileb’ re wank choq’ ruuchil a’an ut xk’utb’al chiqu li tento taqab’aanu re toosutq’iiq rik’in li Dios ut li Ralal, li Jesukristo. Noko’osob’tesiik naq naqak’anjela li qapaab’aal ut naqataaqe lix k’utumeb’. Rik’in xtaaqenkileb’, te’sahob’resiiq li qayu’am ut te’k’osq li qach’a’ajkilal, te’seeb’ob’resiiq li qiiq ut li qach’a’ajkilal, ut tooruuq chixtiqib’ankil qib’ sa’ li musiq’ejil aq’ej li tixkol qix chiru lix toch’om li xik’ neke’ilok qe sa’ li kutan a’in.

Chiru li Paswa a’in, chi tiik ru ink’a’uxl ninch’olob’ xyaalal naq waklijenaq li Jesukristo, yo’yo a’an, ut a’an naxjolomi lix Iglees sa’ ruchich’och’ rik’ineb’ lix profeet, aj ilol na’leb’, ut aj k’utb’esinel. Ninch’olob’ xyaalal naq a’an aj Kolol re ut aj Tojol rix li ruchich’och’ ut naq xb’aan a’an naru tookole’q ut taqak’ul li taqenaqil loq’al rik’in li qaraarookil Dios. Ninra, ut nawoxloq’i ru. Nawaj xtaaqenkil ut xb’aanunkil li rajom ut wank jo’ a’an. Chi tuulan inch’ool ninye a’in sa’ lix loq’laj k’ab’a’ li Qaawa’ Jesukristo, amen.