A Re Profet a Mengedecheduch lokiu a Klisichel a Chedaol Reng

Rodam me a rodos er ngak, a omngar ngidil ker, eak kureng a dmolech omereng el saul el kirel a odbechel me a sengkio er kau er sera chelii. Malta kumelchesiu el diak ungil mengedecheduch e meoud e kokong el uai a Moses, eng mlo ungil a renguk er aikel Rubak a dilung el mo er ngii:

“Ng techa msa ngerel a chad? malechub e techa rulii el mo mechad, malechub eng bengong, malechub omes, malechub eng miku? Ng ngak el Rubak.

“Mada morael; ak mo ngosukau el mengedecheduch, e mo dmu er kau cho bo molekoi” (Exodus 4:11–12; dirrek mesa bades 10).

Ng dirrek mo ungil a renguk e leng sel ngesuil me a beltkil a rengul a bechik el mer ngak. Ngii a ungil okesiu el olechotel a ungil reng, beltik el reng, me a blakelrengel er ngii el mo Rubak me a ngak me a telungalek er kemam. Ng betik a renguk er ngii loba rokui el renguk, e ngak a mereng a saul el kirel aikel lungil omeruul el ngii a meruul.

Rodam me a rodos, ak ouchais el kmo a President Russell M. Nelson a profet er a Dios el ngar tial beluulechad. Ng kmal dirrekak kisang a ngidil el chad el ungil a rengul e oubeltik el reng el mo uai ngii. Malta kumdasu el kmo ngdiak keldmokl el mo er tial okedong el Apostol er a Chelechad er a Teruich me a terung, engdi a tekingel me a ungil ues el mlara medal sera lodersii tial ngerachel a rirelak el mlo omelchesiu er a beltkil a rengul a Osobel. Ke meral mesulang, e President Nelson. Ak oldubech er kau e betik a renguk er kau.

Tiang ngdiak lungil klengeltengat el ngar ngii a re profet, chad er a ues, chad er a ocholt el ngara beluulechad er a chelechal taem el kid a kiei er ngii, el losiik el mo medengelii a moktel a Rubak e oltirakl er ngii? Ng ungil a rengud el medengei el kmo a rubak a obengked el ngar tial beluulechad, el diak ior er a ringel el dechau er tial klengar. Mesel Dios a omekedong er a re profet a olechotel el kmo Ngii a betik a rengul er a Rengelekel. A re profet a ouchais a yaksok me a meral lomerolel a Dios me a Jesus Kristo el mo er a Rechedal. Ngak a mla mesuub aikang lokiu a okesiu el blak ruul.

Teruich me a eiai el rak er a mla memong, e a bechik me a ngak a ngiluu a dengua el mla er a President James E. Faust, el sel taem e ngii a mle Ongeru el Counselor er a First Presidency. Ngii a ulmekedong er kemam el mo kaukledm e mission president er a Portugal. Ng dilu er kemam el kmo ngdi ngara chelsel a elolem el sandei ea ki mo er a mission. Malta dimla kim keldmokl, a ki kilengei er tial okedong. Sel ble kim simbai el kirel er sel taem a ngeiul a visa el kiram lousbech er ngii el mo mesiou er tial beluu, eleng sel uriul okesiu er kemam, aki mle medengei el kmo a rellel a visa a mo melai a elolem el mo bedul eiai el buil.

A President Faust a uleker er kemam alsekum ngar ngii a klaumerang er a Rubak el mo meruul a ongasireng e kemam mo sebecham el ngmai a visa er kemam di mereched. Aki mle mesisiich longer el uasei choi, e mocha omuchel el mengedmokl er kemam. Aki kildmokl aikel babier lousbech el meruul er a visa, e ngiltirerir a tedei el mekekerei el rengelkam e mlo er a consulate el kmal di mle mereched. A kmal lungil redil a milsekemam er sei. Sera lomes aikal babilengam e bo lodengei aikel ki bo moruul er a Portugal, e ngii a ulebult e uleker er kemam, “Kemiu ko meral mo olngeseu er a rechad er a beluak?” Aki mle mesisiich longer choi e mo ouchaise el kmo kemam a mesiungel a Jesus Kristo e mo ouchais el Kirel ma chedaol Ngerchelel er tial beluulechad. Aki liluut el mo er sei er a uriul er a eua el sandei, e ngmai a visa er kemam, e mlo er a mission field er a chelsel a elolem el sandei, el diua sera profet er a Dios lolengit er kemam el mo meruul er ngii.

Rodam me a rodos, a kuba rokui el renguk, e ouchais el kmo a re profet a mengedecheduch lokiu a klisichel a Chedaol Reng. Tir a ouchais el kirel a Kristo me a chedaol Ngerchelel er tial beluulechad. Te olecholt er a uldesuel me a rengul a Rubak e mokedong el mo omtechei er Ngii e olisechakl er kid el kmo ngera kired el meruul me deluut el mo kiei er a rengedel a Dios me a Ngelekel, el Jesus Kristo. Kid a mukngeltengat sel dolecholt er a klaumerang er kid e oltirakl a osisecheklir. Sel doltirakl er tir, eng ngungil a rengud e diak el sal kmal chetituokl a klengar er kid, ea ringel me a mondai a beot a doltekau, e mo er ngii a chedaol selbechakl el meliuekl er kid el mo mengeluolu er kid er a mekngit el omeruul.

Tial sils er a Baskua, e ak mengemdaol louchais el kmo a Jesus Kristo mla mekiis, Ngii a kiei e Ngii a omekrael er a Ikelesia er Ngii er tial beluulechad lokiu a re profet er Ngii, chad er a ues, me a ocholt. A kuchais el kmo Ngii a Osobel e Osobelel a beluulechad eng ngokiu Ngii e kid a sebeched el mo suobel e mo er a rengedel a Dios. Ng betik a renguk er Ngii; Ak menguul er Ngii. Ng soak loltirakl er Ngii e meruul er a Moktel e mo uai Ngii. A kuba ngariou reng el melekoi aikang loba chedaol ngklel a Jesus Kristo, amen.