E Saunoa Perofeta i le Mana o le Agaga Paia

O’u uso e ma tuafafine pele, po o fea lava o outou i ai, ou te fia momoli atu la’u faafetai faamaoni ma le loloto mo la outou palota lagolago i le aso ananafi. E ui ou te lagona le le mautonu ma telegese le tautala e pei o Mose, ua ou faamafanafanaina a’u lava i afioga a le Alii ia te ia:

“O ai ea na na faia le gutu o le tagata? po o ai na te faia le gugu, po o le tutuli, po o le vaai, po o le tauaso? E le o a’u ea o Ieova?

“O lenei, alu ia oe, o a’u foi ou te faatasi ma lou gutu, ou te a’oa’o atu foi ia te oe i upu e te tautala atu ai (Esoto 4:11–12; tagai foi fuaiupu 10).

Ua ou maua foi le filemu i le alofa ma le lagolago mai a lo’u toalua pele. Sa avea lava o ia o se faataitaiga o le agalelei, alofa, ma le tuuto atoatoa i le Alii mo a’u ma lo’u aiga. Ou te alofa ia te ia ma lo’u fatu atoa, ma ou te faafetai lava mo lana tosinaga lelei mo i matou.

Uso e ma tuafafine, ou te fia molimau atu ia te outou o Peresitene Russell M. Nelson o le perofeta a le Atua i le lalolagi. Ou te lei vaai lava i se isi e sili atu le agalelei ma le alofa nai lo ia. E ui ina ou lagonaina lo’u matua le agavaa lava mo lenei valaauga paia, a o ana upu ma le silasila agamalu i ona fofoga a o ia tuuina mai lenei tiutetauave na mafai ai ona ou lagonaina le opoina o a’u i le alofa o le Faaola. Faafetai lava, Peresitene Nelson. Ou te lagolagoina oe ma ou te alofa ia te oe.

Pe le o se faamanuiaga ea le i ai o perofeta, tagatavaai, ma talifaaaliga i le lalolagi i nei aso ua tatou ola ai, o e o saili ia iloa le finagalo o le Alii ma mulimuli ai? O se faamafanafanaga lava le iloa e le o tuua na o i tatou i le lalolagi, tusa lava po o a luitau o tatou feagai i le olaga. O le i ai o perofeta o se faailoga o le alofa o le Atua i Ana fanau. Latou te faailoa maia folafolaga ma le natura moni o le Atua ma Iesu Keriso i lo La’ua nuu. Ua ou aoaoina lena mea e ala i o’u lava aafiaga patino.

Sefuluvalu tausaga talu ai, na ma maua ai ma lo’u toalua se telefoni mai ia Peresitene James E. Faust, a o Fesoasoani Lua i le Au Peresitene Sili. Sa ia valaauina i ma’ua e fai ma peresitene o le misiona ma se soa i Potukale. Sa ia fai mai e na o le ono vaiaso o totoe a o lei amataina le ma misiona. E ui ina sa ma lagonaina le lei saunia ma le le agavaa, ae sa ma taliaina lava le valaauga. O lo ma popolega aupito sili i lena taimi o le mauaina lea o ni visa sa moomia e galulue ai i lena atunuu aua, e tusa ai ma ni aafiaga ua mavae, sa ma iloaina e ono i le valu masina e faamaea ai.

Ona fesili mai lea o Peresitene Faust pe i ai so ma faatuatua o le a faia e le Alii se vavega ma o le a mafai ona ma vave foiaina le faafitauli o o ma visa. O la ma tali o se ioe tele, ma sa amata loa lava ona fai a ma fuafuaga. Sa ma tapenaina pepa o faamatalaga sa moomia mo visa, ave le ma fanau laiti e toatolu, ma sa matou o loa i le vave sa mafai ai i le konesula. Sa faafeiloaia i matou e se tamaitai tausaafia iina. I le iloiloina o o matou pepa ma faamasani i mea o le a matou faia i Potukale, sa ia faliu mai ia i maua ma fesili mai ai, “O le a outou o moni lava e fesoasoani i tagata o lo’u atunuu?” Sa matou tali faamaopo atu ioe ma sa faamalamalama atu o le a avea i ma’ua ma sui o Iesu Keriso ma molimau atu e uiga ia te Ia ma Lana misiona paia i le lalolagi. Sa matou toe foi atu iina i le fa vaiaso mulimuli ane, sa maua mai o matou visa, ma sa matou tulaueleele i le misiona i totonu o le ono vaiaso, pei ona talosagaina ai i ma’ua e se perofeta a le Alii e fai.

Uso e ma tuafafine, ou te molimau atu, mai le taele o lo’u loto, e saunoa mai perofeta e ala i le mana o le Agaga Paia. Latou te molimau atu e uiga ia Keriso ma Lana misiona paia i le lalolagi. Latou te suitulaga i le mafaufau ma le finagalo o le Alii ma e tofia i latou e suitulaga ia te Ia ma aoao mai i tatou i mea e tatau ona tatou faia e toe foi atu ai e mau i le afioaga o le Atua ma Lona Alo, o Iesu Keriso. Ua faamanuiaina i tatou a o tatou faaaogaina lo tatou faatuatua ma mulimuli ia latou aoaoga. O le mulimuli ia te i latou, o le a sili atu ai ona fiafia o tatou olaga ma tuuitiitia le faigata, e faigofie atu foi ona onosaia o tatou faigata ma faafitauli, ma tatou fatuina se ofutau faaleagaga o le a puipuia ai i tatou mai osofaiga a le fili i o tatou taimi.

I lenei aso o le Eseta ou te molimau atu ma le paia ua toetu mai Iesu Keriso, o loo soifua o Ia, ma o loo Ia taitaia Lana Ekalesia i le lalolagi e ala i Ana perofeta, tagatavaai, ma talifaaaliga. Ou te molimau atu o Ia o le Faaola ma le Togiola o le lalolagi ma e ala mai ia te Ia e mafai ai ona laveaiina ma faaeaina i tatou i le afioaga a lo tatou Atua pele. Ou te alofa ia te Ia; ou te faamemelo ia te Ia. Ou te manao e mulimuli ia te Ia ma faia Lona finagalo ma avea atili e faapei o Ia. Ou te fai atu ai lenei tautalaga ma le lotomaualalo i le suafa paia o lo tatou Alii o Iesu Keriso, amene.