Unusochun Tong: Ewe Ennetin Esisinen Noun Jises Kraist Ekkewe Chon Kuno mi Ennet

Sia tongei me positi Preseten Thomas S. Monson, me sia tongei me etiwa Preseten Russell M. Nelson. Preseten Nelson a fokkun auchea me non netipei.

Non ewe fansoun ngang mi chiwen anuon semenap, neum we kukun at, nimu ierin, a wareto me sukun non eu ran iwe a eisi inan we, “Met sokkun angang papa ekan fori?” Iwe a apasa pwe chienan kewe non sukun minafo re anini won met semer kewe rekan fori. Emon me neir a apasa pwe seman we emon meinapen ponis, iwe ewe emon a apasa pwe seman we emon meinapen eu watten kompeni.

Iwe ra eisini nei we at ika met seman ekan fori, nei we at a apasa, “Semei we ekan angang non offes won eu kompiuter.” Iwe, nge a mefi pwe chienan kewe rese pwapwaiti met ewe a ponuen ngeni ar ewe kapas eis, iwe a apachata, “O iwe, semei we emon meinapen ei fonufan.”

Ua ekieki pwe ina soponon ewe aporous.

Ua ereni punuwei we, “Iei fansoun sipwe asukuna usun ekkoch mannapen ewe kokkoten manau ese much me ion a wisen fori me nemeni.”

Nge nupwen am uwe aua asukuna noum kewe ewe kokkoten manau ese much, ar tongei Semach won Nang me ewe Chon Amanau a napono nupwen ra kaeo pwe eu kokkoten tong. Ewe kapas allimen Jises Kraist a anongonong won ewe tong an ewe Sam me ewe Chon Amanau ngeni kich me ach tong ngenir me ach tong fengen nefinach.

Elter Jeffrey R. Holland a apasa: “Ewe akaewin annuk mi nap me nein meinisin ese much kopwe tongei Kot ren unusen netipwom, ekiekum, om pochokun, me unusen ngunum—ina ewe akaewin annuk mi nap. Nge ewe akaewin ennet ren mettoch meinisin ese much usun an Kot tongei kich ren unusen Netipan, ekiekin, an pochokun me unusen ngunun. Ena tong ewe foun nongonongen ese much, me epwe pwan iei ewe foun nongonong non manauach.”¹

Manaueni ei foun nongonong non manauach, unusochun tong a wor ren emon me emon noun Jises Kraist kewe chon kuno mi ennet.

Ewe soufos Mormon a aiti kich. “Ina minne, ami pwi achengicheng, iotek ngeni ewe Sam ren unusen pochokunen netip, pwe oupwe ureno ren ei tong, minne a fen wata won ir meinisin chon ennetin tapweno mwirin Noun we, Jises Kraist.”²

Ennetin tong eu ennetin esisin ngeni noun Jises Kraist kewe chon kuno mi ennet.

Ennetin chon kuno ra sani ar repwe anisi ekkoch. Ra sinei pwe anisi ekkoch a pwarano usun ewe ennetin tong me pwon ra fori nupwen ar ra paptais.³ Anongonong won wiser kewe non Mwichefen are wiser kewe non muu, ra mefi eu watten amemef ar repwe tongei me anisi ewe Samon me ekkoch.

Ennetin chon kuno ra sani ar repwe epichano ekkoch. Ra sinei pwe ewe Achasefan an ewe Chon Amanau a amusano meinisin tipis me fofforungaw emon me emon kich sia fori. Ra sinei pwe ewe A mwoni meinisin tipisin emon me emon kich. Angangen ngun, niwinimang, me ekkoch niwinimang mi wenengeni tipis, mwanino, me fofforungaw mettoch meinisin ra musono. Ennetin chon kunon ra mwitir ne amusano me mwitir ne tingor ren omusomus.

Pwii me fefinei achengicheng, ika pwe ami mi weires ami oupwe kuna pochokun ren ami oupwe omusano, ousapw ekieki met ekkoch ra fori ngeni kemi, nge oupwe ekieki usun met ewe Chon Amanau a fori ngeni kemi, iwe oupwe mefi kinamwe non ekkewe feioch ren An we Achasefan.

Ekkewe ennetin chon kuno ra sani ar repwe faneta inisir ngeni ewe Samon fiti kinamwe non netiper. Ra tipetekison me anneasosich pokiten ar tongei Ii. A wor ar nuku me ar ennetin etiwa An we angang, esapw chok en met A fori nge pwan non napanapan me inet. Ekkewe ennetin chon kuno ra sinei pwe ekkewe ennetin feioch esapw chok iteitan epwe fis metekewe ra mochen nge a fis met minne ewe Samon a mochen fan iter.

Ennetin chon kuno ra fokkun tongei ewe Samon nap seni ei fonufan me ra nikitu me moneta non ar nuku. Ra fokkun pochokun me nikitu non ei fonufan fonuen osukosuk me ekesiwin. Ennetin chon kuno ra sani ar repwe rongorong ngeni mongungun ewe Ngun mi Fel me ekkewe soufos nge rese osukosuker ren mongungun ei fonufan. Ennetin chon kuno ra sani ar repwe uta non ekkewe neni mi pin⁴ me sani ar repwe epini ewe neni ia ra nonom ie. Ekis me ekis ia ra no ia, ra uwei an ewe Samon we tong me kinamwe ngeni netipen ekkoch. Ennetin chon kuno ra tongei ar repwe anneasosichi an ewe Samon kewe annuk, ra aponueta pokiten ar tongei ewe Samon. Nupwen ra tongei me anneasosichi ar kewe pwon mi pin, netiper a ekesiwin me ra fokkun ekkesiwin.

Unusochun Tong ewe esisin ren noun Jises Kraist kewe chon kuno mi ennet.

Ua kaeo usun ewe unusochun tong seni inei we. Esapw emon chochon ei Mwichefen.

Eu ran non chommong ier ano, ua churi inei we, ewe a riafou ren an semwenin kanser. Ngang mi sinei pwe epwene mano, nge ua men aureki ren an we riaffou. Use era mwo ekis kapas, nge ii amen sinechuwei, a apasa, “Ngang mi sinei pwe ka aurek.”

Iwe ua fokkun mairu, a eisiniei fiti ngingin we amen nouwen apwangapwang, “Kose mochen kopwe aitiei ifa usun iotek? Ua mochen upwe iotekiuk. Ngang mi sinei pwe kekan poputa ne apasa ‘Semei Kot Won Nang,’ nge met upwe pwan apasa?”

Nupwen ua fotopwukutiw unukun an we bed me a iotekiei, ua mefi eu tong use memefi me nomw. A men mecheres, ennet, unusochun tong. Ina mwo nge ese sinei usun ewe kokkoten manau ese much, nge mi fen wor non netipan ewe kokkoten tong, ewe kokkoten tong an emon inenap ngeni noun at. Mi nom non metek, riafou nge awora an fansoun an epwe iotek. Use kon rongoch nouwan, nge ua men unusen mefi an we tong.

Ua chechemeni me ekieki, “Ifa usun an emon mi nom non watte metek nge a tongeni ioteki emon? Fen ii ewe a namot fan itan.”

Iwe ponuan we a tonong non ekieki mi fokkun fatoch: unusochun tong. A fokkun unusen tongei ei ina ren a nikitano ekiekin inisin. Non an we fansoun riaffou, a tongeiei nap seni pusin ii.

Iei, pwii me fefinei achengicheng, esapw iei met ewe Chon Amanau a fori? Ewer, non fansoun ese much me naponon met mi mefi. Nge nupwen An we wachemuken metek, non ewe atake non na pwini, Ii ewe a auchea an emon epwe anisi, a riaffou non eu napanap sise tongeni weweiti are tongeni. Nge nesoponon, A monukano pusin Ii me a iotek fanitach ren an epwe omusano unusen ach kewe tipis. Ifa usun An a tongeni fori? Pokiten An we unusochun tong ren ewe Sam, ewe a tinato Ii, me ngeni kich, a fokkun tongei ewe Sam me kich nap seni pusin Ii.

A moni ekkoch mettoch mine Ese foffori. A moni tipis nge Ii ese tipis. Pwata? Unusochun tong. A moni unusan, A nom non ewe nenien an epwe tingor ngeni kich ren feioch faniten met ewe A fori, ika pun sia aier. Pwata A tingor ngeni kich ren ei? Sefan, me fansoun meinsin, Unusochun tong.

Unusochun Tong ewe esisin ren noun Jises Kraist kewe chon kuno mi ennet.

Preseten Thomas S. Monson a apasa: “Ua anean amwo sipwe poputa iei, non ei ran, sipwe pwarano ach tong ngeni noun Kot kewe meinisin, ese pwan nifinifin chochon non ach famini, chiechiach, chon unukuch, are ekkewe sise sisiner. Nupwen sipwe pwaataa iteiten nesosor, sipwe fini ion sipwe anisi ren tong me kirekiroch ngeni met ekkewe epwe fisi ngeni kich.”⁵

Pwii me fefinei, ewe kapas allimen Jises Kraist eu kapasen tong. Ewe annuk mi nap a usun tong. Ngeni ei, mettoch meinisin seni tong. Ewe tong an ewe Sam, ewe a fangono Noun we At fan itach. Ewe tong an ewe Chon Amanau, ewe a fangeta fanitach meinisin. Ewe tong an ewe inenap ika semenap ekkewe repwe fang ngeni nour met ra mochen. Ewe tong an ekkewe ra fori ar angang non monomon me rese fatoch ren kich meinisin nge ra fatoch meren ewe Samon. Ewe tong an ekkewe chon omusomus me iteitan. Ewe tong an ekkewe a watte ar fangono nap seni met ra angei.

Ua men tongei Semei Won Nang. Ua men tongei ai we Chon Amanau. Ua men tongei ewe kapas allim. Ua tongei ei Mwichefen. Ua men tongei ai we famini. Ua men tongei ei manau a men murino. Me rei, mettoch meinisin seni tong.

Ua anean amwo sipwe chechemeni ewe Manausefan an ewe Chon Amanau eu ranin asofosefani ngunun emon me emon kich. Anean amwo ei ran sipwe poputani ne aurano manauach ren tong, “ewe foun nongonongun manauach.”

Anean amwo netipach epwe ur ren ewe unusochun tong an Kraist, ewe ennetin esisin ren noun Jises Kraist kewe chon kuno mi ennet. Iei ai iotek fan iten Jises Kraist, amen.