Kev Hlub Dawb Paug: Lub Cim Tseeb txog Yexus Khetos ib tug Thwj Tim Tiag Tiag

Peb hlub thiab nco Thawj Tswj Hwm Thomas S. Monson, thiab peb hlub thiab txhawb nqa Thawj Tswj Hwm Russell M. Nelson. Thawj Tswj Hwm Nelson muaj ib qho chaw tshwj xeeb hauv kuv lub siab.

Thaum kuv yog ib leej txiv hluas, peb tus me nyuam tub, uas muaj tsib xyoos, los ntawm tsev kawm ntawv los thiab nug nws niam hais tias, “Txiv ua txoj hauj lwm dab tsi os?” Ces nws piav hais tias cov me nyuam tom tsev kawm ntawv pib sib cav txog lawv txiv tej hauj lwm. Ib tug cav hais tias nws txiv yog tus thawj tub ceev xwm hauv zos, lwm tus cav hais tias nws txiv yog tus thawj coj rau ib lub tsev lag luam loj.

Ces thaum lawv nug kuv tus tub txog nws leej txiv, nws tsuas teb hais tias, “Kuv txiv ua hauj lwm hauv ib lub hoob kas saib ib lub computer xwb.” Ces, thaum pom hais tias nws cov phooj ywg xav tias ua li ntawd tsis haib pes tsawg, nws ntxiv hais tias, “Tsis tas li ntawd xwb, kuv txiv yog tus thawj coj rau qab ntuj khwb no.”

Kuv xav hais tias lawv txoj kev sib tham xaus li ntawd.

Kuv qhia kuv tus poj niam hais tias, “Txog sij hawm qhia nws ntxiv txog txoj kev cawm seej thiab seb leej twg yog tus thawj coj tiag tiag.”

Tiam sis thaum wb qhia wb cov me nyuam txog txoj kev cawm seej, lawv txoj kev hlub rau Leej Txiv Saum Ntuj Ceeb Tsheej txoj hau kev thiab tus Cawm Seej tau loj hlob tuaj thaum lawv kawm hais tias nws yog ib txoj hau kev uas muaj kev hlub. Qhov uas nyob hauv nruab plawv Yexus Khetos txoj moo zoo yog txoj kev hlub Leej Txiv thiab tus Cawm Seej thiab peb txoj kev hlub rau Nkawd thiab ib leeg rau ib leeg.

Txwj Laug Jeffrey R. Holland hais tias: “Lo lus txib thib ib uas nyob mus ib txhis yog kom peb hlub Vajtswv kawg siab ntsws, kawg plab kawg plawv thiab kawg lub dag zog—nov yog lo lus txib thib ib. Tiam sis qhov tseeb thib ib uas nyob mus ib txhis yog qhov uas Vajtswv hlub peb kawg Nws lub siab lub ntsws, lub plab lub plawv, thiab lub dag zog. Txoj kev hlub ntawd yog lub hauv paus uas nyob mus ib txhis, thiab tsim nyog uas peb ua kom txoj kev hlub ntawd ua lub hauv paus ntawm peb lub neej.”¹

Ua lub hauv paus rau peb lub neej mas, kev hlub dawb paug yog qhov uas Yexus Khetos txhua tus thwj tim yuav tsum muaj.

Tus yaj saub Maumoos qhia hais tias, “Yog li ntawd, kuv cov kwv tij uas kuv hlub es, cia li thov Leej Txiv kawg siab kawg ntsws, xwv kom nej yuav muaj txoj kev hlub no puv npo, uas nws tau muab rau tag nrho cov uas coj raws li nws Leej Tub, Yexus Khetos, tiag tiag.”²

Kev hlub yeej yog lub cim tseeb txog kev ua Yexus Khetos ib tug thwj tim.

Cov thwj tim tiag tiag nyiam ua hauj lwm pab. Lawv paub hais tias txoj kev ua hauj lwm pab yog txoj kev qhia kev hlub tiag tiag thiab ib txoj kev khi lus uas lawv khi tseg thaum lawv tau ua kev cai raus dej.³ Txawm hais tias lawv ua txoj hauj lwm dab tsi hauv lub Koom Txoos los sis muaj ntiag tug hauj lwm li cas hauv koog zej zog los xij, lawv haj yam muaj kev hlub thiab ua hauj lwm pab tus Tswv thiab lwm tus neeg.

Cov thwj tim tiag tiag nyiam zam txim. Lawv paub hais tias tus Cawm Seej txoj Kev Theej Txhoj duav txhua yam kev txog kev txhaum uas peb sawv daws ua. Lawv paub hais tias tus nqi uas Nws them yog “duav txhua tus nqi huv tib si.” Kev sau se, tsub nqi, them nyiaj nqi tes, thiab lwm cov nqi thaum ua txhaum, ua yuam kev, thiab tej lub txim no puav leej raug duav. Cov thwj tim tiag tiag muaj lub siab xav zam txim sai thiab thov luag tej zam txim rau lawv.

Kuv cov kwv tij thiab cov muam, yog tias nej muaj teeb meem zam txim, tsis txhob xav txog tej yam uas luag tej twb ua yuam kev rau nej lawm, tiam sis xav txog tej yam uas tus Cawm Seej tau ua rau nej lawm, thiab nej yuav nrhiav tau kev thaj yeeb nyab xeeb uas yog tej koob hmoov los ntawm Nws txoj Kev Theej Txhoj.

Cov thwj tim tiag tiag nyiam ua raws li tus Tswv lub siab nyiam vim lawv muaj kev kaj siab lug. Lawv txo hwj chim thiab ua raws li Nws hais vim hais tias lawv hlub Nws. Lawv muaj kev ntseeg txaus lawv thiaj kam ua raws li Nws lub siab nyiam, tsis yog ua li Nws xav kom lawv ua xwb tiam sis kam ua thaum twg thiab raws nraim li Nws hais. Cov thwj tim tiag tiag paub hais tias tej koob hmoov tseem ceeb tshaj tsis yog tej yam uas lawv xav tau tab sis mas yog tau tej yam uas tus Tswv xav kom lawv txais.

Cov thwj tim tiag tiag hlub tus Tswv ntau tshaj lub ntiaj teb thiab yeej rau siab ntso thiab nyob ruaj khov hauv lawv txoj kev ntseeg. Lawv khov kho thiab ruaj nrees hauv ib lub ntiaj teb uas muaj kev kub ntxhov thiab ib sij hloov. Cov thwj tim tiag tiag nyiam mloog tus Ntsuj Plig thiab cov yaj saub lub suab thiab tsis ua xyem xyav thaum mloog lub ntiaj teb cov suab. Cov thwj tim tiag tiag nyiam “sawv hauv tej qhov chaw dawb huv”⁴ thiab nyiam ua rau tej chaw uas lawv sawv ntawd muaj kev dawb kev huv. Txawm lawv mus qhov twg los, lawv coj tus Tswv txoj kev hlub thiab kev thaj yeeb nyab xeeb los rau hauv lwm tus neeg tej siab. Cov thwj tim tiag tiag nyiam ua raws li tus Tswv cov lus txib, thiab lawv mloog lus vim hais tias lawv hlub tus Tswv. Thaum lawv nyiam thiab ceev lawv tej kev khi lus, lawv tej siab raug hloov hlo thiab lawv tus cwj pwm pauv kiag.

Kev hlub dawb paug yog lub cim tseeb txog kev ua Yexus Khetos ib tug thwj tim tiag tiag.

Kuv niam qhia kuv txog kev hlub dawb paug. Nws tsis tau ua ib tug mej zeej hauv lub Koom Txoos.

Ntau xyoo tas los lawm, muaj ib hnub uas kuv tau mus xyuas kuv niam, nws twb mob cancer lawm. Kuv paub tias tsis ntev ces nws yuav tso lub neej no tseg, tiam sis kuv tseem txhawj tsam nws raug mob thiab txom nyem. Kuv tsis tau hais ib lo, tab sis mas vim nws paub kuv, nws hais tias, “Kuv paub hais tias koj txhawj heev.”

Ces kuv txawm xav tsis thoob, thaum nws nug kuv hais tias, “Koj puas kam qhia kuv seb yuav thov Vajtswv li cas? Kuv xav thov Vajtswv pab koj. Kuv paub tias yus yuav pib hais tias, ‘Leej Txiv Nyob Saum Ntuj Ceeb Tsheej,’ tab sis mas tom qab ntawd nev kuv yuav hais li cas?”

Thaum kuv txhos caug ntawm nws lub txaj thiab nws thov Vajtswv rau kuv, kuv txawm hlub nws tshaj yav tas los lawm. Nws yog ib txoj kev hlub me me, uas dawb paug thiab muaj tseeb tiag. Txawm hais tias nws tsis paub txog txoj kev cawm seej los, nws muaj ib txoj kev hlub nyob rau hauv nws nruab siab, ib txoj kev hlub uas ib leej niam muaj rau nws tus tub. Nws hnov mob heev, twb tsis muaj zog thov Vajtswv hlo li. Kuv hnov tsis tshua tau nws cov lus, tiam sis kuv tau hnov nws txoj kev hlub.

Kuv nco qab hais tias kuv tau xav tias, “Ib tug neeg uas hnov mob npaum li ntawd yuav ua li cas thiaj thov tau Vajtswv rau lwm tus neeg? Nws twb yog tus uas xav tau kev pab.”

Ces kuv txawm tau lo lus teb hauv kuv paj hlwb hais tias: kev hlub dawb paug. Nws hlub kuv tag npaud nws thiaj tsis nco qab xav txog nws tus kheej. Lub sij hawm uas muaj xwm txheej ntawd, nws hlub kuv tshaj nws hlub nws tus kheej.

Nim no, kuv cov kwv tij thiab cov muam es, puas yog tus Cawm Seej twb ua li no thiab? Muaj tseeb tiag, tiam sis nws ua rau lub neej nyob mus ib txhis thiab tau ua pab txhua tus neeg. Tiam sis thaum Nws raug mob loj tshaj plaws, nyob hauv lub vaj hmo ntawd, Nws yog tus uas xav tau kev pab, raug kev txom nyem ntau tshaj peb yuav to taub los sis xav txog. Tiam sis thaum kawg, Nws tsis nco qab xav txog Nws tus Kheej thiab thov Vajtswv pab peb mus txog thaum Nws them tus nqi tag nrho. Nws ua li cas thiaj ua tau li no? Twb yog vim Nws muaj kev hlub dawb paug rau Leej Txiv, tus uas tus txib Nws los, thiab rau peb sawv daws. Nws hlub Leej Txiv thiab peb ntau tshaj Nws hlub Nws tus Kheej.

Nws tau them tus nqi rau ib yam dab tsi uas Nws tsis tau ua. Nws them tus nqi rau tej kev txhaum uas Nws tsis tau ua. Vim li cas? Kev hlub dawb paug. Vim twb them tus nqi tag nrho, Nws thiaj muaj cuab kav muab tej koob hmoov rau peb vim nws tau them tus nqi lawm, yog tias peb kam hloov siab lees txim. Vim li cas Nws thiaj kam ua li no? Hais ib zaug ntxiv, thiab txhua lub sij hawm tias, yog kev hlub dawb paug.

Kev hlub dawb paug yog lub cim tseeb txog kev ua Yexus Khetos ib tug thwj tim tiag tiag.

Thawj Tswj Hwm Thomas S. Monson hais tias: “Nim thov kom peb yuav pib ua hnub no mus, cia li qhia kev hlub rau tag nrho Vajtswv cov me nyuam, txawm yog rau cov neeg hauv peb tsev neeg, peb cov phooj ywg, cov neeg uas peb tsis paub zoo, los sis cov neeg qhuas los xij. Txhua tag kis thaum peb sawv los, cia peb txiav txim kom muaj kev hlub thiab ua siab zoo txawm peb raug xwm dab tsi los xij peem.”⁵

Cov kwv tij thiab cov muam es, Yexus Khetos txoj moo zoo yog ib txoj moo zoo rau kev hlub. Txoj kev cai loj dua ntais yog txog kev hlub. Rau kuv mas, txhua yam tsav yog kev hlub. Leej Txiv txoj kev hlub, uas kam txi Nws Tib Leej Tub rau peb. Tus Cawm Seej txoj kev hlub, uas kam txi txhua yam tsav rau peb. Leej niam los sis leej txiv txoj kev hlub uas yuav kam muab txhua yam tsav rau lawv cov me nyuam. Cov uas ua hauj lwm ntsiag to txoj kev hlub uas neeg feem coob tsis paub txog tiam sis tus Tswv yeej paub zoo. Tag nrho cov neeg uas zam txim rau txhua tus neeg txhua lub sij hawm txoj kev hlub. Cov uas muab ntau tshaj lawv txais txoj kev hlub.

Kuv hlub kuv Leej Txiv Saum Ntuj Ceeb Tsheej. Kuv hlub kuv tus Cawm Seej. Kuv hlub txoj moo zoo no. Kuv hlub lub Koom Txoos no. Kuv hlub kuv tsev neeg. Kuv hlub lub neej zoo kawg nkaus no. Rau kuv mas, txhua yam tsav yog kev hlub.

Thov kom hnub uas peb nco txog tus Cawm Seej txoj Kev Sawv Rov Los no yuav yog ib hnub uas peb txhua tus sab ntsuj plig yuav yug dua tshiab. Thov kom hnub no yuav yog hnub uas peb pib muaj kev hlub puv npo hauv peb lub neej, “lub hauv paus rau peb txoj kev ua neej nyob.”

Thov kom peb tej siab tej ntsws yuav muaj Yexus Khetos txoj kev hlub dawb paug puv npo, uas yog lub cim txog kev ua Yexus Khetos ib tug thwj tim tiag tiag. Kuv thov Vajtswv li no los ntawm Yexus Khetos lub npe, Amees.