Klikiid el Beltikereng: Olangch er a Rebek el Meral Oltirakl er a Jesus Kristo

Ng betik a rengud e miss er a President Thomas S. Monson, e dirrek el betik a rengud e oldubech er a President Russell M. Nelson. A President Nelson a kmal tokubets er a renguk.

Sera kngeasek el chedam, e a kekerei el ngelekam el sechal, el mle eim a rekil, a mle remei er a tara klebesei, ruriul er a skuul e oker er a delal el kmo, “A Demak ngoureor el mekerang?” Ng uluchais el kmo a beches el tara ngalek ra skuul a milchelii a mondai el kirel a urerir a rechedam. A chimong a dilu el kmo a demal a merredel er a rebulis, e a chimong a kmal mle semeriar e kmo a demal a merredel er a klou el kombalii.

A bocha loker ngii er a urerel a demal, e ngika el ngelekek a dula el kmo, “A demak a di oureor er a obis lousbech a computer.” E lomes, er tirkal beches el sechelil eng uaia lak le ko er a mechas a rengrir er tial nger ngii, meng mocha dochelii el kmo, “A demak a dirrek el, merredel er a beluulechad el rokir.”

Tiaikid a locha mlo ulebongel er a cheldechederir.

Ak dula er a bechik el kmo, “Ng mla mo taem el deluut el smodii a uldasou el kirel a mo suobel e desbedii el kmo ng techa meral merredel er a beluelchad.”

Sera kimolisechakl er a rengelekam el kirel a uldasou er a mo suobel, e a beltikereng er tir el mo e ra Chedam er a Babeluades a mlukeroul er a bolodengei el kmo tia dirrek el uldasou er a beltikereng. A ebangkelio er a Jesus Kristo a ultuil er a beltikereng er a Chedam me a Osobel me a beltikereng er kid el mo er Tir me a ta me a tang.

A Elder Jeffrey  R. Holland a dilu el kmo: “A kote el ngarbab el llach er a rokui el tekoi a beltikereng el mo er a Dios loba rengud el rokir, klisiched, uldesued me a rengud—tiaikid a kot el ngarbab el llach. Ng di a kot el ngarbab el klemerang er a rokui el tekoi a kmo a Dios a betik a rengul er kid loba rokir el Rengul, klisichel, uldesuel, me a reng. Tiaikid el beltikereng a dodai el mo er a ulebongel, e kirel mo dodai er a klengar kid er a bek el sils.”¹

Sel dodai er a klengar kid er a bek el sils, e a klikiid el beltikereng a kirel mocholt er a bek el chad el meral loltirakl er a Jesus Kristo.

A profet Mormon aulisechakl el kmo ng kired el meluluch el mo er a Chedam loba klisichel a rengud, me bo demui ra beltikereng er tial beltikereng, el ngii a mla mesterir tirkel rokui el meral loltirakl er a Ngelekel, er a Jesus Kristo.”²

A beltikereng a meral ngii olengchelel a chad el meral loltirakl er a Jesus Kristo.

A remeral loltirakl a sorir elmesiou. Te medengei el kmo a omesiou a olchotel a meral beltikereng e telbiil el milkedmokl er a taem er a techlbechelid.³ Ng diak el iior er a ngercheled er a Iekelsia malechub a deruchelled er a buai, le temelchesuar a klemeriar reng el mo oubeltikereng e mesiou er a Rubak me a ta me a tang.

A remeral loltirakl a mereched lousubes. Te medengei el kmo a Tngakireng er a Osobel a usbechall er a rokui el klengit me a telitur er a dersta me a dersta er kid. Te medengei el kmo a klengar Ngii el mlodars a “uldimukl er ngii a rokui el tekoi.” A le tax er a kgtim, me a belsel, moker, me a cheral a ngii di el ngerang el kirel a klengit, telitur, mekngit lomerellem a ngii el rokui luldimukl. A meral roltirakl a mereched lousubes e mereched lolengit a klausubes.

Rodam me a rodos er ngak, alsekum eng meringel er kau a mo ousubes, elak momdasou aikel omerellir a rebebil el mei e rkau, bai momdasou aikel blal ruul a Rubak el mei er kau, e kau a mo melchesuar a budech er a klengeltengat er a Tngakireng er Ngii.

A remeral loltirakl a osiik er a Rubak loba budech er a rengrir. Te ngariou a rengrir le tir el betik a rengrir er Ngii. Te oba klaumerang el mui el kongei er a Soal, el diak di ikel Loruul ng dirrek el sel ugil Temel. A remeral loltirakl a medengei el kmo a meral klengeltengat a diak el blechoel el sel sorir ng bai sel ngii a soal a Rubak el kirir.

A remeral loltirakl a lmuut el betik a rengrir er a Rubak e mesisiich el diak el mesim er a klaumera er tir. Te melemolem el mesisiich er a chelsel tial di ngeldengodech e cheliseksikd el beluulechad. A remeral loltirakl a sorir lorrenges er a ngerel Chedaol Reng me a reprofete e diak bl rrau a rengrir er a teletael er a beluulechad. A remeral loltirakl a sorir el “ngara chedaol basio”⁴ e sorir remuul aikel le kiei er ngii el mo chedaol basio. Ngii di el ker leborngii, e oba beltikereng me a budech er a Rubak el mo er a rengrir a rebebil. A remeral loltirakl a sorir loltirakl a llechul a Rubak, e olngesenges le tir el betik a rengrir er a Rubak. Me sel loltirakl a telbilir, e a rengrir a kuk mo beches me tir me te moengodech.

A klikiid el beltikereng a olangch er a rebek el chad el meral loltirakl er a Jesus Kristo.

Ak silubii a klikiid el beltikereng er a delak. Ng dimlak el chedal a Ikelesia.

Betok el ra er a memong, e a tara klebesei, ak mlo oldingel er a delak, el mle smecher er a kasinoma. Ak mle medengei el uase ng mo mad, eng di ng mle suebek a renguk er a ringel leblarngii. Ng dimlak a ngera el kdung, e ng di ngii a ungil medengelkak, eng dula el kmo, “A kumes eng ko er a suebek a rengum.”

E mlo mechas a renguk er ngii, er a loker er ngak el kmo, “Ng sebechem losischeklak el meluluuch? Ng soak el meluluch el kirem. Ak medengei el uase komuchel el kmo ‘Chedam er a Babeluades,’ e sola ngera dmung?”

Sera bo koutubaruach er a bita er a dukellel e ngii loluluuch el kirek, e ak milchesuar a beltikereng el dirkak a ta mekulchesuar. Ng mle beot, e merang, e klikiid el nglugnuuch. Ng uaisei el dimlak lodengelii a uldasou el kirel a mo suobel, eng di chelsel a rengul eng mlarngii a klaumera er ngii er a beltikereng, el beltikereng er a chedil el mo er a ngelekel sechal. Ng mlara ringel, e meringl losiik a klisichel a bedengel mo meluluuch. Ng dimlak sal ungil rongesii oto er a ngerel, eng di ak milchesuar a beltikereng er ngii.

Ak lotkak lomdasou el kmo, “Ng mekera chad el kmal ngara ringel a meluluuch el kirel a tara rechad? Ngii a bai ousbech a ngesou.”

E a nger a mlei el kmal bleketakl er a uldesuek. Ng kmal betik a rengul er ngak meng mla obes el uase ngii a ngara ringel. Chelsel aikel kmal meringel el taem er ngii, e ng ulechotii a beltkil a rengul er ngak e dimlak bai lolatk el kirel.

Chelecha, e rodam me a rodos, tiang diak el ngii a rirelii a Rubak? Nguasiei, er a lmuut el diak a ulebengelel teletael. Ng di sel taem el Ngii a kmal ngara ringel, er a lengar sers er sel kesus, e Ngii a mle chimong lousbech a ngesou, el ngii el ringel a diak el sebeched el mtebengar. E ng di a uriul, e Ngii a ulebes el kmo ngara ringel e milluluuch el kired el molmuut er a lekedmeklii a Urerel. Ng milkerang e sebechel kudmeklii tiang? Ngokiu a klikiid el beltikereng er Ngii el mo er a Chedam, el uldureklii, el kired. Ngii a mle betik a rengul er a Chedam me a kid el muut el ngaruchei er Ngii.

Ngii a uldersii a klengar Ngii er a tekoi el dimlak el Telmellel. Ng uldersii a klengar Ngii el kirel a klengit el dimlak el ruul. Ngera uchul? Ng klikiid el beltikereng. E ngulderii a klengar ngii, el mle kldmokl el meskid a klengeltengat er ikel uchul eng mlodars a klengar Ngii, alsekum e kede mo ouchel a rengud. Ngera uchul me Ngii a uldersii a klengar ngii? Ngultuil, er a klikiid, el beltikereng.

A klikiid el beltikerneg a meral olangch er a rebek el chad el meral oltirakl er a Jesus Kristo.

A President Thomas S. Monson a millekoi: “Domuchel er chelechang, chelchal sils, el mochotii a beltikereng el mo er a rokui el ngelekel a Dios, a lechedal a telungalek er kid, resechelid, di dekaodengei, malechub e te ngodech el chad. Sel debekiis er a bek el tutau, e detibir er a rengud el mo olngeseu loba beltikereng me a blekokeuii er a ngii di el ngerang el mo duubech.”⁵

Rodam me a rodos, a ebangkelio er a Jesus Kristo a ebangkelio er a beltikereng. Sel kot el ngarbab el llach a kirel a beltikereng. A denguu er ngak, e ngii el rokir el di melutk er a beltikereng. Ng beltikereng er a Chedam, luldersii a Ngelekel el kired. Ng beltikereng er a Osobel, el mlora ringel el kired el rokui. Ng beltikereng er a chedil malechub a chedam el mo er sel tkul er bab el sebechir el kirir a rengelekir. Ng beltikereng er tirkel el berrotel e mesiou e diak dodengelterir eng di a Rubak a medengelterir. Ng beltikereng er tirkel blechoel lousubes a rokui. Ng beltikereng er tirkel lodars a lmuut el betok er a ikel lengai.

Ng betik a renguk er a Demak er a Babeluades. Ng betik a renguk er a Osobelek. Ng betik a renguk er a ebangkelio. Ng betik a renguk er a Ikelesia. Ng betik a renguk er a telungalek er ngak. Ng kmal soak tial klebokel el klengar. A denguu er ngii, eng rokui el di melutk er a beltikereng.

Tiakid el sils er a omelbedebek er a Okiis er a kodall er a Osobel bol sils er a omekbeches a reng er kid er a dersta me a dersta er kid. Tiaikid el sils boluchelel a klengar el mui er a beltikereng, e “bol dodai er a klengar kid er a bel el sils.”

A rengud mo lemui er a klikiid el beltikereng er a Kristo, el olangch er a rebek el meral loltirakl er a Jesus Kristo. A nglunguchek el ngara ngklel a Jesus Kristo, amen.