Limpoak Mehlel: Kasalepen Tohnpadahk Mehlel Men

Se poakohng oh loaloidki Presiden Thomas S. Monson, oh se poakohng oh utung Presiden Russel M Nelson. Presiden Nelson udahn wia aramas kesempwal men ohng ie.

Ni ansou me I wia pahpa pwulopwul men, nait kisin pwutak, me sounpar limau, pwursang sukuhl ehu rahno oh idek rehn ah nohnou, “Soangen doadoahk da me Pahpa kin wia?” Ih eri ndahda me ienge tohn sukuhl koa akamaikihda soangen doadoahk da me arail pahpah koa kin wia. Emeno nda me ah pahpahu me wia kaun en police en wasahu, ah emen nda me ah papahu wia kaun en ehu lepelepen company.

Eri ni ansou me re idek reh duwen ah pahpahu, nei sin pwutako nda, “Ei pahpahu kin doadoahk nan ohpis iu nan computer.” Eri, ih diarada me iengehko sohte nohn pereniki ah pasapengo, ih eri nda, “Oh ei pahpau me wia kaun en kepikipik pwon.”

Mwein ih imwilahn arail koaskoasoai pene mwo.

Ngehi ndahng ei pwoudo, “Met ansou en kaskuhlihieng mehkan me pid pilahn en komouro oh ihs me kaun.”

Ahpw ni ansou me se kaskuhlih nait seri kan duwehn pilahn en komour, arail limpoak ohng Sahm Nanleng oh Sounkomouro kin laudla ni anosu me re kin wehwehkihla me e wia pilahn en limpoak ehu. Rongamwahu en Sises Krais poahsonkihda limpoak en Sahmo oh Sounkomouro oh atail limpoak ohng Ira oh nan pwungatail.

Elder Jeffrey R. Holland padahngki: “Kosonned me keiuhn laud oh poatoapaot iei kitail en poakohng Koht sang nan atail mohngiong, kehl, oh madmadau unsek—ihme wia kosonned me keiuhn laud. Ahpw me keiuhn mehlel Koht poakohng kitail sang nan Ah mohngiong, kehl oh madmadau unsek. Limpoak wet me wia poahsoan pen mour soutuk, oh e konehng en wia poasoan pen atail mour en ehu ehu rahn.”¹

Pwehki eh wia poahsoan pen atail mour en ehu ehu rahn akan, sapwelimen Sises Krais soun papah kan anahne ahniki limpoak mehlel.

Soukohp Mormon padahngki, “Eri, riei kempoak kan, kapakap ohng sahmo sang ni kehl en amwail mohngiong kan koaros, pwe kumwail en kak audaudkihda limpoak wet, me e ketkihiongehr pohn koaros me kin idawehn mehlel sapwelime Ieroaso, Sises Krais.”²

Limpoak me kin kasalehda irail akan me wia sapwellimen Sises Krais tohnpadahk mehlel kan.

Tohnpadahk mehlel kan kin pereniki papah. Irail ese me papah wia kasalepen limpoak mehlel oh inou ieu me re wiahda ansou me re pepdaisla.³ Mendahte arail pwukoah kan nan mwomwohdiso de wasahn kouson irail kin ahniki ineng mehlel en papah Kauno oh mehtei kan.

Tohnpadahk mehlel kan kin ahniki mahk. Irail ese me kitail kak mwakelekel dah sang dipatail kan sang ni Tomw en Sises Krais. Irail ese me tomwo pwainlah soahng koaros. Alepen mahk pen dihp kan miehier. Soun papah mehlel kan kin mwadang en mahk oh peki mahk.

Riei ohl oh lih akan, ma kumwail kin apwaliki mahk, ah kumwail dehr kin medewe dahme mehtei kan kin wiahiong kumwail, ahpw kumwail medewe dahme Kauno wiahiong kumwail, ah kumwail pahn diar meleilei sang ni Tomwo.

Tohnpadahk mehlel men kin mweidohng pein ih rehn Kauno. Irail kin aktikitik oh mpahi pwehki re poakohng Ih. Irail kin ahniki pwoson en alehda Kupwure, kaidehnte ohng dahme E wia ahpw ia mwomwe oh iahd. Tohnpadahk mehlel men ese me kapai mehlel sohte kin ansou koaros pid dahme re mwahuki ahpw dahme Kauno kupwurki.

Tohnpadahk mehlel men kin poakohng Kauno laud sang sampah oh kin tengediong arail pwoson Ih. Irail kin kehkehlail nan mour apwal en sampah wet. Soun papah mehlel men kin karonge ngehn sarawi oh soukop kan oh sohte kin pingkihda koasoandi en sampah kan. Soun papah mehlel kin “keskesihnen wasa me sarawi”⁴ oh kin wiahda wasah kan koaros me re kin mih ie en sarawi. Wasa koaros me re kin kohla ie, re kin wahla limpoak en koht oh meleilei rehn mehtei kan. Soun papah mehlel men kin kapwaiada sapwelimen Koht kosonned kan, oh re kin peikiong pwe re poakohng Kauno. Ansou me re kin ahniki limpoak oh kolokol arail inou kan, mohngiongirail oh mwomwarail kin wekila.

Limpoak mehlel iei kasalepen sapwellimen Sises Krais tohnpadahk mehlel kan.

I esehla duwen limpoak mehlel sang ahi nohnou. E sto wia tohn mwomwohdiso wet.

Pahr ekei samwalahr o, ehu rahno I kohla rehn ahi nohnou, me ahniki kanser. I ese me e pahn mehla, ahpw I pwunodki eh wie lokolok. I sto nda mehkot, ahpw pwehki eh eseiehier, e nda, “I kak kilang me ke pwunod.”

I pwuriamwei ki eh peki ni ngihl en luwet, “Ke kak padahkihiong ie mwomwen kapakap? I men kapakap kin uhk. I ese me e kin tepkihda ‘Maing Sahm Nanleng,’ ah dah I pahn uhd nda mwuri?”

Ansou me I kelepwidi limwahn ah pehto ih eri kapakap kin ie, I kehnda limpoak ieu me I sohte kin kehn. E wia limpaok mehlel ieu. Mendahte ah sehse duwen pilahn en komour, mie pein ah pilahn en limpoak, limpoak en nan pwungen nohno men oh seri men. E ahniki medek laud, songosong en kak kapakap. I sohte nohn kak rong ngile, ahpw I kak kehn ah limpoak.

I taman ei medmedewe, “Ia mwomwen aramas emen me ahniki medek laud eh kak kapakap ki emen? Ih soangen lih me I anahne.”

Pasapengo sansal dohngie: limpoak mehlel. Wen ah poakohngie e manokehkihla pein ih. Nan ansoun eh apwal mehlel, e poakohngie laudsang pein ih.

Riei koa, kaidehn ih soahng wet me Kauno wia? Ei, ni wiepe me laud oh poatoapoat mehlel. Ahpw nan ansoun medek laud me E mih loale nan mwetuelo, Ih me anahne sawas, wia lokolok ieu me sohte emen kak kawehwehda. Ahpw ni imwilahu E manokehla pein ih oh kapakap kin kitail laud E kanekehla eh doadoahk. Ia mwomwen eh kak wia? Pwehki eh ahniki limpoak mehlel ohng Sahm, me kadar do ih, oh kitail. E poakohng Sahmo oh kitail laudsang pein Ih.

E pwain mehkot me e sohte wia. E pwainla dihp kan me e sohte wiahda. Pwehda? Limpoak mehlel. Pwehki eh pwainlahr, E pahn ketkihiong kitail kapai, ma kitail pahn koluhla, Dahme e wiahki met? Limpoak mehlel.

Limpoak mehlel iei kasalepen sapwellimen Sises Krais soun papah mehlel kan.

Presiden Thomas S. Monson nda: “Kitail tapiada met en kasalehiong atail limpoak ohng Sapwellimen Koht seri kan, me wia atail peneinei, kempoakepahtail, me kitail eseh kan, de me kitail pil sehse kan. Ni atail pirida ni menseng, kitail koasoanehdi kitail en kasalehda limpoak oh kadek nan soahng kan koaros me pahn pwarada.”⁵

Riei ko, rongamwahu en Sises Krais wia rongamwahu en limpoak. Kosonned me keiuhn laud pid duwen limpoak. Ohng ie e pid duwen limpoak. Limpoak en Samo, me tohnmetei kihta Sapwelime Ieros ohng kitail. Limpoak en Sounkomouro, me tomwkihla dipatail kan. Limpoak en pahpa oh nohno me wia soahng koaros ohng neira seri kan. Limpoak en irail akan me kin wia doadoahk en papah me kitail sehse ahpw me Kauno ketin mwahngih. Limpoak en irail akan me kin ahniki mahk ansou koaros. Limpoak en irail akan me kin kihla laud sang me re kin ale.

I poakohng Semei Nanleng. I poakohng ei Sounkomour. I poakohng rongamwahu wet. I poakohng ei peneinei. I poakohng mour kaselel wet. Ohng ngehi, limpoak me wia meh koaros.

I koapwoaroapwoarki me rahn en Iasadahn Sounkomouro pahn wia rahn en kakapwa pali ngenitail kan. I koapworopworki me rahn wet kitail pahn tapiada mour me diren limpoak, “poasoan pen atail mour en ehu ehu rahn.”

I koapworopworki me mohngiongitail kan audaudkidahr limpoak mehlel en Krais, me wia kasalepen soun papah mehlel en Sises Krais. E wia ei kapakap ni mwaren Sises Krais, amen.