Alofa Mama: O Le Faailoga Moni o Soo Moni Uma o Iesu Keriso
O le talalelei a Iesu Keriso ua faatotonugalemu i le alofa o le Tama ma le Faaola mo i tatou ma lo tatou alofa mo i Laua ma mo le tasi ma le isi.
Tatou te alolofa ma misia Peresitene Monson, tatou te alolofa foi ma lagolagoina Peresitene Russell M. Nelson. E i ai se nofoaga faapitoa o Peresitene Nelson i lo’u loto.
A o avea a’u o se tama talavou, sa sau lo’u atalii laitiiti, sa lima tausaga, i le fale mai le aoga i se tasi aso ma fesili i lona tina, “O a ituaiga galuega e fai e lo’u Tama?” Ona ia faamatala atu lea e faapea sa fai se felafolafoaiga a tamaiti o lana vasega e uiga i galuega a o latou tama. Na fai mai le tasi, o lona tama o le taitai sili o leoleo i le aai, ae fai mai le isi ma le mitamita o lona tama o le faatonu sili o se kamupani tele.
Ina ua ia fesili la e uiga i lona tama, sa na ona fai atu o lo’u atalii, “O lo’u tama e faigaluega i se ofisa i se komepiuta.” Ona, vaaia lea sa lei faagaeetia tele ana uo fou laiti i lana tali, sa ia faaopoopo atu, “Ae tasi o le mea, o lo’u tama o le sifi o le atulaulau.”
Ou te masalo na uma ai iina le talatalanoaga.
Sa ou fai i lo’u toalua, “Ua oo i le taimi e aoao ai o ia i nisi faamatalaga e uiga i le ata o le faaolataga ma pe o ai le pule moni.”
Ae a o tatou aoaoina a tatou fanau i le ata o le faaolataga, e faatupulaia lo latou alolofa i le Tama Faalelagi ma le Faaola a o latou aoaoina o se fuafuaga o le fiafia. O le talalelei a Iesu Keriso ua faatotonugalemu i le alofa o le Tama ma le Faaola mo i tatou ma lo tatou alofa mo i Laua ma mo le tasi ma le isi.
Na saunoa Elder Jeffrey R. Holland: “O le poloaiga muamua ma le sili o le faavavau atoa o le alofa atu lea i le Atua ma o tatou loto atoa, manatu, mafaufau, ma le malosi atoa—o le poloaiga muamua ma le sili lena. Ae o le upumoni muamua ma le sili o le faavavau atoa, e alofa le Atua ia i tatou ma Lona finagalo atoa, manatu, mafaufau, ma le malosi atoa. O lena alofa o le mataupu faavae autu lena o le faavavau, ma e tatau ona avea ma faavae autu o o tatou olaga i aso uma”1
O le avea ai ma maa faavae o o tatou olaga i aso taitasi, o le alofa mama a’ia’i o se tulaga manaomia mo soo moni uma o Iesu Keriso.
Sa apoapoai mai le perofeta o Mamona, “O le mea lea, ou uso pele e, ia outou tatalo atu i le Tama ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o Lona Alo o Iesu Keriso.”2
E moni lava o le alofa o le faailoga moni lea o soo moni uma o Iesu Keriso.
O soo moni e fiafia e auauna atu. Latou te iloa o le auauna atu o se faailoga o le alofa moni ma se feagaiga sa latou osia i le papatisoga.3 Po o a lava o latou valaauga i le Ekalesia po o a latou matafaioi i le nuu, latou te lagonaina se manaoga faateleina e alolofa ma auauna atu i le Alii ma i le tasi ma le isi.
O soo moni e fiafia e faamagalo atu. Latou te iloa o le Togiola a le Faaola e ufitia ai agasala uma ma mea sese a i tatou uma taitoatasi. Latou te iloa o le tau na Ia totogiina o se “tau-e-aofia-uma ai.” O lafoga faaleagaga, o pili, o komisi, ma tau e fesootai i agasala, sasi, po o mea sese e fai ua aofia uma ai lava. O soo moni e vave ona faamagalo atu ma vave ona ole atu mo le faamagaloga.
O’u uso e ma tuafafine pele, afai o e tauivi e sue le malosi e faamagalo atu ai, aua e te mafaufau i mea na faia e isi ia te oe, ae mafaufau i le mea na faia e le Alii mo oe, ma o le a e maua le filemu i faamanuiaga laveai o Lana Togiola.
O soo moni e fiafia e gauai atu i latou lava i le Alii faatasi ai ma le filemu i o latou loto. E lotomaualalo i latou ma gauai atu aua latou te alolofa ia te Ia. Ua ia te i latou le faatuatua e talia atoatoa ai Lona finagalo, e le gata i mea Na te faia ae i le auala ma le taimi. O soo moni e iloa o faamanuiaga moni e le o mea latou te mananao ai i taimi uma ae o mea e finagalo ai le Alii mo i latou.
O soo moni e alolofa i le Alii e sili atu nai lo le lalolagi ma e tutu mausali ma e le maluelue i lo latou faatuatua. Latou te tumau malosi ma mausali i se lalolagi fesuisuiai ma fenumiai. O soo moni e fiafia e faalogologo i le leo o le Agaga ma perofeta ma e le fenumiai i leo o le lalolagi. O soo moni e fiafia e “tutu i nofoaga paia”4 ma e fiafia e avea nofoaga paia ma mea e tutu ai. Po o fea lava latou te o i ai, latou te aumaia le alofa o le Alii ma le filemu i loto o isi. O soo moni e fiafia e usitai i poloaiga a le Alii, ma e latou te usiusitai aua latou te alolofa i le Alii. A o latou alolofa ma tausi a latou feagaiga, e faafouina o latou loto ma e suia foi o latou lava natura.
O le alofa mama a’ia’i o le faailoga moni o le soo moni o Iesu Keriso.
Sa ou aoao e uiga i le alofa mama a’ia’i mai i lo’u tina. Sa le o se tagata o le Ekalesia o ia.
I se tasi aso i le tele o tausaga ua mavae, sa ou asiasi ai i lo’u tina, o le sa tauivi ma le kanesa. Sa ou iloa o le a oti o ia, ae sa ou popole ona sa mafatia o ia. Sa leai sa’u tala, ae i le iloa lelei ai o a’u, sa ia fai mai, “Ou te iloa o loo e popole.”
Ona ou ofo lea, sa fesili mai i se leo vaivai, “E mafai ona e aoao mai pe faapefea ona ou tatalo? Ou te fia tatalo mo oe. Ou te iloa e amata i le faapea, ‘Le Tama Faalelagi Pele,’ ae o le a la le isi a’u tala?”
A o ou tootuli i autafa o lona moega ma sa ia tatalo mo au, sa ou lagonaina se alofa ou te lei lagonaina muamua. Sa o se alofa faigofie, moni, ma le mama a’ia’i. E ui ina sa ia lei iloa e uiga i le ata o le faaolataga, ae sa i ai i lona loto lana ata patino o le alofa, le ata o le alofa o se tina mo lana tama. Sa feagai ma tiga, tauivi ia maua le malosi e tatalo ai. Sa toetoe ina ou le lagonaina lona leo, ae o le mea moni sa ou lagonaina lona alofa.
Ou te manatua lo’u mafaufau ai, “E mafai faapefea e se tasi o feagai ma le tiga tele ona tatalo mo se isi tagata? O ia o le tagata o loo manaomia le fesoasoani.”
Ona oo manino mai ai lea o le tali i lo’u mafaufau: alofa mama a’ia’i. Sa tele naua lona alofa mo au o lea na ia faagalo ai o ia lava. I ona taimi sili ona ogaoga, sa sili atu ai lona alofa ia te au nai lo ia lava.
O lenei, uso e ma tuafafine pele, pe le o le mea ea lea sa faia e le Faaola? Ioe, i se vaaiga e faavavau ma sili atu ona lautele. Ae i le lotolotoi o ona tiga aupito maoae, i le faatoaga i lena po, o Ia o le sa manaomia le fesoasoani, sa puapuagatia i se ala e le mafai ona oo i ai lo tatou malamalama. Ae i le iuga, sa Ia faagalo o Ia lava ae tatalo atu mo i tatou seia oo ina Ia totogiina le tau atoa. Na faapefea ona Ia faia? Ona o Lona alofa mama a’ia’i mo le Tama, o le na auina mai o Ia, ma mo i tatou. Sa alofa o Ia i le Tama ma i tatou e sili atu nai lo Ia lava.
Sa Ia totogia se mea Na te lei faia. Sa ia totogia mo agasala Na te lei faia. Aisea? Alofa mama a’ia’i. O le totogiina o le tau atoa, sa i ai o Ia i le tulaga e ofoina mai ai mo i tatou ia faamanuiaga o mea sa Ia totogiina, pe afai tatou te salamo. Aisea na Ia ofoina mai ai lenei mea? Ona o le alofa mama lava.
O le alofa mama a’ia’i o le faailoga moni o le soo moni o Iesu Keriso.
Na saunoa Peresitene Thomas S. Monson: “E mafai ona tatou amata nei, i le aso nei lava, ona faailoa atu le alofa i fanau uma a le Atua, pe o i latou o tagata o o tatou aiga, a tatou uo, nisi tatou te masani, po o ni tagata ese. A tatou ala a’e i taeao taitasi, ia tatou naunau e tali atu i le alofa ma le agalelei i soo se tagata tatou te fetaui i ai i le ala.”5
Uso e ma tuafafine, o le talalelei a Iesu Keriso o se talalelei o le alofa. O le poloaiga aupito sili e faatatau i le alofa. Mo a’u, e faatatau uma i le alofa. O le alofa o le Tama, o le na ositaulagaina Lona Alo mo i tatou. O le alofa o le Faaola, o le na taulagaina mea uma mo i tatou. O le alofa o se tina po o se tama o e e tuuina atu soo se mea mo a la fanau. O le alofa o i latou o e auauna atu le leoa ma e le o iloa e le toatele o i tatou ae e silafia lelei e le Alii. O le alofa o i latou o e faamagalo atu i tagata uma ma i taimi uma. O le alofa o i latou o e foai sili atu nai lo mea latou te talia.
Ou te alofa i lo’u Tama Faalelagi. Ou te alofa i lo’u Faaola. Ou te alofa i le talalelei. Ou te alofa i lenei Ekalesia. Ou te alofa i lo’u aiga. Ou te alofa i lenei olaga matagofie. Mo a’u, e faatatau uma i le alofa.
Ia avea lenei aso faamanatu o le Toetu o le Faaola ma aso o le toefaafouga faaleagaga mo i tatou taitoatasi. Ia avea lenei aso ma amataga o se olaga e tumu i le alofa, “o le maa faavae o o tatou olaga i aso taitasi.”
Ia tumu o tatou loto i le alofa mama a’ia’i o Keriso, o le faailoga moni o soo moni uma o Iesu Keriso. O la’u tatalo lea i le suafa o Iesu Keriso, amene.