Tu’ufeg nib Ma’ang’ang: Fare Pow ko Gubin e Gachalpen nib Yul’yul’

Ba tu’uf President Monson rodaed ma kad tawren niged, ma ba tu’uf President Nelson rodaed ma gadaed be sustain nag. President Nelson e bay bang u gumircha’eg ni fan ngak.

Napan ni kug mang e chitamangiy, ma fak mow nib pagael, nib laal, e yib nga tabinaew u skul ta’areb e rran me fith chitinngin nibe ga’ar, “Miti mang murwel e ma rrin’ Papa’?” Me arame weliy ni bitir u clas rok e yad be weliy mornga’agen e murwel ko papa’ roraed. Bay reb ni yoeg ni chitamangin e ba chief ko city polis, ma bee’ e yoeg ni papa’ rok e ba chief ko ba company nib ga’.

Ere napan ni fith mornga’agen e chitamangin, ma kemus ni ga’ar, “Papa’ rog e ma murwel u lan ba ofis ni bay e computer rok.” Ma arame, me na’ab ni fulweg rok e dani falfalen’ e tafagar rok ngay, me ulul ni ga’ar, “Ma, chitamangig e ba pilung ko urngin e fayleng.”

Gube tafney nag ni iraram e tomur ko sabathin.

Ku ga’ar ko ppin rog, “Ke taw ko ngiyal’ ni ngan fil ngak boech reb mornga’agen fare wo’en e thap nge mini’ e baga’ riy.”

Machane napan ni ku filew ko pifaak mow mornga’agen fare wo’en e thap, ma tu’ufeg roraed ngak e Chitamangiy nu Tharmiy nge fare Tathapeg e gel napan ni yaed be fil nib tunom ko tu’ufeg. Fare gospel rok Yesus Kristus e bay u lukngun e tu’ufeg rok fare Chitamangiy nge fare Tathapeg nge tu’ufeg rodaed Ngorow nge ngodaed.

Ke ga’ar Elder Jeffrey R. Holland: “Bin somm’on e motochiyel nib falel’ ko gubin e manemus e nge tu’uf Got u, lan gumircha’en dad, laniyan’ daed, nge gelngin daed—iraram e bin somm’on e motochiyel nib falel’. Machane bin somm’on e riyul’ ko gubin e manemus ni gadaed ba tu’uf rok Got ko gubin, gumircha’En, laniyan’, nge gelngin. Binem e tu’ufeg e defin e manemus, ma thingari mang defin e yafas rodaed ni gubin e rran.”¹

Ra mang e defin e yafas rodaed ni gubin e rran, ma fare tu’ufeg nib machalbog e ba tu’uf ko gubin e gachalpen Yesus Kristus.

Fare profet Mormon e fil ni ga’ar, “Ere, pi walageg nib tʼuf rog, mmeybil gaed ngakʼ e en Chitamangiy u poloʼ i gelingin gumʼirchaʼmed, ni nge yog ni ngam sug gaed ko re adag ney, ni ke piiʼ nga dakean gubin e piʼin nib riyulʼ ni ma lek Fak, ni Yesus Kristus.”²

Tu’ufeg e riyul’ nib pow ko gubin e tin riyul’ e gachalpen Yesus Kristus.

Gachalpen nib riyul’ e ba’adag nima pigpig. Yaed manang ni pigpig e pow ko tu’ufeg nib riyul’ nge m’ag ni kar ngongliyed ko tawfe.³ Demtrug rogon e calling roraed u lane Galasia fa murwel roraed u lane binaew, ma yaed be thamiy nib gel ni yad ba’adag ni ngar tu’ufeg ned miyad pigpig ngak Somoel nge yad.

Gachalpen nib riyul’ e ba’adag ni nge n’ag fan e kireb rok bee’. Yaed manang ni fare Bayul rok fare Tathapeg e be chuweg gubin e denen nge oloboch rodaed. Yaed manang ni pulwon nike pi’ e “fan gubin e gidii’.” Tin tharmiy e tax, malfith, nge m’ag, nge pin’en nib l’ag ko denen, oloboch, nge kireb e kan pi’ pulwon. Gachalpen nib riyul’ e ba papey ni ngan n’ag fan ma ba papey ni ngan wenig nag e n’ag fan.

Pi walageg, fa’anra gabe magawon ni ngam pir’eg e gelngin ni ngam n’ag fan e kireb rok bee’, ma dam leam nag e n’en nike rrin’ bee’ ngom, machane mu leam nag e n’en nike rrin’ Tathapeg ni fan ngom, ma gara pir’eg e gapas u fithik e tawa’ath ko fare Bayul Rok.

Pi gachalpen nib riyul’ e yaed ba’adag ni yad ma pag raed ngak Somoel nibay e gapas u lan gumircha’en rad. Ba sobutan’ rad ma yad ma pag rad ya Ba tu’uf rorad. Bay e mich rorad ma yad ba’adag e n’en nib m’agan’ ngay, ni gathi kemus ni n’en nibe rrin’ machane ku rogon nge we’in. Pi gachalpen nib riyul’ e manang e pi tawa’ath nib riyul’ e gathi gubin ngiyal’ ma n’en ni yad ba’adag machane n’en ni ba’adag Somoel ni fan ngorad.

Pi gachalpen nib riyul’ e ba tu’uf Somoel roraed nib gel ko tin donop nge ba gel e mich roraed ni dar mithmith. Yad be paer ni yad be gel u fithik e tin balyang ban’en u donop. Pi gachalpen nib riyul’ e ba’adag nima motoyil nga luman fare Kan Nthothup nge fapi profet ma dar balyang e tafney rorad ko lungun e tin donop ban’en. Pi gachalpen nib riyul’ e ba’adag nima “sak’iy ko yu yang nib thothup”⁴ ma yad ba’adag ni yad ma fal’eggin e gin nib thothup ko gin ni yad bay riy. Pi gachalpen nib riyul’ e yad ba’adag ni yad ma fol ko pi motochiyel rok Somoel, ma yad ma fol y aba tu’uf Somoel rorad. Napan ni yad ba’adag e pi m’ag rorad ma yad be fol riy, ma be thil gumircha’en rad ma yad be thil.

Tu’ufeg nib ma’ang’ang e pow nib riyul’ rok gubin e pi gachalpen Yesus Kristus.

Ku fil mornga’agen e tu’ufeg nib ma’ang’ang rok e chitinngig. Dani bee’ ko Galasia.

Bukun e duw nga tomur, ni reb e rran, mug guy e nina’ rog, nike ubchiya’ ko cancer. Ku nang ni ir ra yim’, machane kug leam nag rogon e gafgow rok. Danugog ban’en, machane ir manangeg, me ga’ar, “Gube guy ni kam magar.”

Mug gin, me fitheg nibe mo’owar luman nibe ga’ar, “Rayog ngam fil ngog rogon i meybil? Gu ba’adag ni nggu meybil ni fanam. Gu manang ni gama tabab ni gama ga’ar, ‘A Chitamangiy nibay u Tharmiy,’ machane mange thingar goeg?”

Napan ni gu garbag nga to’ben e bet rok me meybil ni fan ngog, mug thamiy e tu’ufeg ni daworug thamiy bi’id. Ba moem, nib riyul’, tu’ufeg nib ma’ang’ang. Mus ni dani nang mornga’agen fare wo’en e thap, ma bay u gumircha’en e wo’en e tu’ufeg, wo’en e tu’ufeg rok e nina’ ngak faak. Be magawon ko amith, nibe magawon ni nge pir’eg gelngin ni nnge meybil. Momaw’ ni nggu rung’ag luman, machane ku thamiy e tu’ufeg rok.

Kug manang ni gube leam, “Urogon bee’ ni kari magawon ko amith nibe meybil ni fan ngak bee’? Ir e ba tu’uf e ayuw rok.”

Me arame yib e fulweg riy nga tafney rok nib tamilang: tu’ufeg nib mang’ang. Gub tu’uf rok nbi gel nike pagtilin mornga’agen. Lane awa rok, ma rugub tu’uf rok nib gel ngak.

Chiney, o pi walageg, gathi iraray e n’en nike rrin’ Tathapeg? Arrogon, lane bin manemus. Machane fithik e amith Rok nib alamrin, u lan fare milay’ e re neap nem, me Ir e ba tu’uf e ayuw Rok, nibe gafgow ko rogon ni dariy bag daed ni manang. Machane tomuren, ma ke pagtilin Mornga’agen me meybil ni fan ngodad nge taw ko ngiyal’ nike pi’ pulwon ni ga’ngin yang. Urogon nike rrin’? Bachane tu’ufeg rok nib ma’ang’ang ngak e Chitamangiy, nike pi’, nge fan ngodaed. Ba tu’uf e chitamangin rok nge gadaed daki leam nag Ir.

Ke pi’ pulwon ban’en ni gathi Ir e ke rrin’. Ke pi’ pulwon e pi denen ni dawori rrin’. Mongfan? Tu’ufeg nib mang’ang. Kan pi’ pulwon ni ga’ngin, ma ke paer ko gin ni nge pi’ ngodaed e pi tawa’ath ko n’en nike pi’ pulwon, fa’anra gadad ra kalngan’. Mongfan nike rrin’ e biney? Biyay, nge biyay, Tu’ufeg nib m’ang’ang.

Tu’ufeg nib ma’ang’ang e pow nib riyul’ ko gubin e pi gachalpen Yesus Kristus nib riyul’.

President Thomas S. Monson e ke ga’ar: “Aygun tabab gad e chiney, re rran ney, ni ngad daged e tu’ufeg ngak gubin pifaak Got, demtrug ko tabinaew rodad, tafagar rodad, pi’in ni gadad be mad’eg, fa pi’in ni dananged ko mini’. Napan ni gadad ra od ni kadbul, ma gadad dugliy ni ngad mithmith gad u fithik e tu’ufeg e gol ko pin’en nibe yib ngodad.”⁵

Pi walageg, fare gospel rok Yesus Kristus e gospel ko tu’ufeg. Bin tha’abi mangil e motochiyel’ e mornga’agen e tu’ufeg. Gag rog, ma i go’ mornga’agen e tu’ufeg. Tu’ufeg ko Chitamangiy, ni miligach nag Faak ni fan ngodaed. Fare tu’ufeg rok Tathapeg, nike miligach ni fan ngodaed ni gubin. Tu’ufeg rok e nina’ fa papa’ ni demtrug e n’en ni ra rrin’ ni fan faak rad. Tu’ufeg ko pi’in nibe pigpig nib mith ma gathi ban’en ni gadad manang machane manang Somoel. Tu’ufeg ko pi’in nima n’ag fan e kireb rok bee’ ni gubin ngiyal’. Tu’ufeg ko pi’in nima pi’ nib bo’or ko tin ni yad be thapeg.

Ba tu’uf e Chitamangig nu Tharmiy rog. Ba tu’uf fare Tathapeg rog. Ba tu’uf fare gospel rog. Gu ba’adag e re Galasia ney. Ba tu’uf e tabinaew rog rog. Gu ba’adag e biney e yafas nib mangil. Gag rog, ma i go’ mornga’agen e tu’ufeg.

Aygi mange biney e rran ni yibe leam nag fare Tathapeg nike Foskoyam’ e rran ni ngad bi’ech gad. Aygi mang e biney e rran e tabolngin e yafas nib sug ko tu’ufeg, “fare defin e yafas rodad ni gubin e rran.”

Aygi sug gumircha’en dad ko fare tu’ufeg rok Kristus nib ma’ang’ang, bin riyul’ e pow ko gubin e gachalpen Yesus Kristus. Meybil rog u dakean fithngan Yesus Kristus, amen.