2010–2019
Revelesen blong Jos, Revelesen blong Laef blong Yumi
Epril 2018


Revelesen blong Jos, Revelesen blong Laef blong Yumi

Long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem, kamfotem yumi oltaem wetem paoa blong Hem.

!I wan gudfala janis blong selebretem Ista wetem yufala long Sandei ia blong jeneral konfrens! I no gat wan samting we i moa fit bitim blong tingbaot impoten taem ia we i bin eva hapen long wol ia taem yumi stap wosipim Hem we i moa hae we i bin wokbaot long wol ia. Insaed ia, insaed long Jos blong Jisas Kraes blong Ol Lata Dei Sent, yumi wosipim Hem we i statem Atonmen blong Hem we i no gat en insaed long Garen blong Getsemane. Hem i bin glad blong safa from ol sin mo ol wiknes blong wanwan long yumi, we i mekem se blad i kamaot long evri hol blong skin blong Hem.1 Oli bin hangem hem antap long kros long Kalvari2 mo Hem i girap long nambatri dei olsem faswan long ol pikinini blong Papa long Heven we i bin laef bakegen long ded. !Mi lavem Hem mo testifae se Hem i stap laef! Hem nao i stap lidim mo gaedem Jos blong Hem.

Sapos i no gat Atonmen we i no gat en blong Ridima blong yumi, bambae i no gat wan long yumi we bae i hop blong gobak stap wetem Papa long Heven.Sapos Hem i no bin laef bakegen long ded, bae ded i en ia nao. Atonmen blong Sevya blong yumi i bin mekem fasin blong laef we i no save finis, i posibol, mo i mekem se fasin blong nomo save ded, i ril, long yumi evriwan.

From misin blong Hem we Hem i kamdaon evriwan mo pis we Hem i givim long olgeta we oli stap folem Hem, we i mekem se waef blong mi, Wendy mo mi, i filim kamfot long 2 Jenuware 2018, taem we wan telefon kol i bin wekemap mitufala mo talem se Presiden Thomas S. Monson i bin go, i pasem vel.

Pikja
Presiden Russell M. Nelson mo Presiden Thomas S. Monson

!Mifala i misim Presiden Monson! Mifala i ona long laef blong hem, mo wanem hem i livim i stap. Hem i wan haeman long saed blong spirit, hem i livim mak we yumi no save rapemaot, i stap wetem evriwan we i bin save hem, mo long Jos ia we hem i lavem.

Long Sandei 14 Jenuware 2018, long rum antap insaed long Sol Lek Tempol, oli oganaesem bakegen Fas Presidensi folem tabu paten we Lod i bin stanemap. Afta, long tabu asembli blong yestedei, ol memba blong Jos raon long wol oli bin leftemap han blong olgeta blong konfemem aksen we Ol Aposol oli bin tekem fastaem long olgeta. Tingting blong mi i stap daon mo glad from sastening sapot blong yufala.

Mi glad long olgeta ia, we mi stanap hang long solda blong olgeta. I bin spesel janis blong mi blong givim seves long Kworom blong Olgeta Twelef Aposol blong 34 yia mo blong save 10 long ol 16 Presiden blong Jos blong bifo. Mi lanem fulap samting long wanwan long olgeta.

Mi gat kaon tu long olgeta fastaem long mi. Evri eit bigfala bubu blong mi oli bin konvet long Jos long Yurop. Wanwan strongfala sol ia, oli bin sakrifaesem evri samting blong kam long Saeon. Long ol jeneresen we oli folfolem afta, i no evriwan blong ol bubu blong mi we oli bin stap strong. From hemia, mi mi no groap long wan hom we gospel i stap insaed long hem.

Pikja
Papa mo mama blong Presiden Nelson
Pikja
Yangfala famli blong Presiden Nelson

Mi laekem tumas papa mo mama blong mi. Oli minim evri samting long mi, mo oli bin tijim mi ol impoten lesen. Mi no save talem tangkyu inaf from hapi hom laef we oli bin givim long mi mo ol brata mo sista. Be yet, olsem wan boe, mi bin save se wan samting i lus. Wan dei, mi jam long wan trak, mo go long wan LDS bukstoa blong faenem wan buk abaot Jos. Mi lavem blong lanem samting abaot gospel.

Taem mi kam blong andastanem Tok blong Waes, mi wantem papa mo mama blong mi blong laef folem loa ia. Mekem se, wan dei, taem mi yangfala tumas, !mi go long rum we i stap andanit graon long haos mo mi saksakem brekem evri botel blong strong dring long simen floa! Mi ting se papa blong mi bae i panisim mi, be hem i no talem wan toktok.

Taem mi kam bigwan mo stat blong andastanem se plan blong Papa long Heven i bigwan, plante taem, mi talem miwan: “!Mi nomo wantem wan moa Krismes presen! Mi wantem sil nomo wetem papa mo mama blong mi.” Taem ia we mi wet longtaem from i no bin hapen kasem taem we papa mo mama i gat ova 80 ia, mo afta, i bin hapen. Mi no save talemaot fulwan glad ia we mi bin filim long dei ia,3 mo evri dei, mi filim glad ia we tufala i bin sil, mo mi, mi bin sil long tufala.

Pikja
Russell mo Dantzel Nelson

Long 1945, taem mi stap long medikol skul, mi bin maredem Dantsel Waet long Sol Lek Tempol. Hem mo mi i gat blesing blong gat naen naesfala gel mo wan boe. Tedei, famli blong mitufala we i stap gohed blong gro i wan long ol bigfala glad blong laef blong mi.

Pikja
Presiden mo Sista Nelson mo gel blong tufala
Pikja
Presiden Nelson mo boe blong hem

Long 2005, afta kolosap 60 yia blong mared, dia Dantsel blong mi i mas gobak hom. Blong wan smol taem, krae sore blong mi i stap stopem mi. Be mesej blong Ista mo promes blong laef bakegen long ded i bin sapotem mi.

Pikja
Wendy mo Russell Nelson

Nao Lod i sendem Wendy Watson long saed blong mi. Mitufala i bin sil long Sol Lek Tempol long 6 Epril 2006. !Mi lavem Hem.! Hem i wan gudgudfala woman—wan bigfala blesing long mi, long famli blong mi, mo long ful Jos.

Wanwan long ol blesing ia oli kam from we mi stap lukaotem mo stap folem ol slo toktok blong Tabu Spirit.Presiden Lorenzo Snow i talem: “Hemia i bigfala spesel janis blong evri Lata-dei Sent; se hem i raet blong yumi, blong gat Spirit i soem samting long yumi evri dei blong laef blong yumi.”4

Wan long ol samting we Spirit i wokem ripitim long maen blong mi, i we, stat long niufala koling blong mi, olsem Presiden blong Jos, i wei we Lod bae i talemaot maen mo tingting blong Hem long mi. Spesel janis blong kasem revelesen, i wan long ol presen blong God long ol pikinini blong Hem we i moa bigwan bitim ol narawan.

Tru long wanem we Tabu Spirit i soemaot, Lod bambae i helpem yumi long evri stret mo gud rod blong yumi. Mi tingbaot we long wan operesen rum, mi stanap ova long bodi blong wan sikman—we mi no sua tumas hao blong mekem wan operesen we oli neva mekem bifo—mo Tabu Spirit i soem evri step blong teknik ia insaed long maen blong mi.5

Blong winim tingting blong Wendy taem mi askem mared long hem, mi talem: “Mi save long saed blong revelesen, mo hao blong kasem.” Blong gud blong hem—mo, olsem we mi kam blong lanem, we i fasin blong hem—hemwan, hem i bin prea finis mo i kasem revelesen blong hemwan abaot mitufala, we i givim strong paoa long tingting blong hem blong talem yes.

Olsem wan memba blong Kworom blong Olgeta Twelef Aposol, mi bin prea evri dei blong kasem revelesen mo talem tangkyu long Lod evri taem we Hem i bin toktok long hat mo maen blong mi.

!Pikjarem merikel ia! Nomata wanem Jos koling blong yumi, yumi save prea long Papa long Heven mo kasem toktok we bae i gaedem mo daerektem yumi, kasem woning abaot ol denja mo samting we bae i pulumaot yumi, mo i save kasem paoa blong mekem ol samting we yumi no save mekem nomo yumiwan. Sapos yumi rili kasem Tabu Spirit mo lanem blong luksave mo andastanem ol toktok blong Hem, bambae Hem i lidim yumi long ol bigfala samting mo ol smolwan tu.

Taem mi bin fesem, i no longtaem, bigfala wok ia blong jusum tufala kaonsela, mi bin askem miwan hao mi save jusum tu long olgeta twelef man we mi mi lavem mo respektem olgeta.

From we mi bin save se gudfala insperesen, i stanap long gudfala infomesen, mi bin prea mo mit wetem wanwan long ol Aposol.6 Afta, mi sarem miwan insaed long wan praevet rum insaed long tempol mo mi askem tingting blong Lod. Mi testifae se Lod i talem long mi blong jusum Presiden Dallin H. Oks mo Presiden Henry B. Eyring blong stap olsem kaonsela long Fas Presidensi.

Long semfala wei, mi testifae se Lod i bin insperesen blong singaotem Elda Gerrit W. Gong mo Elda Ulisses Soares blong odenem tufala olsem ol Aposol blong Hem. Mi mo yumi i welkamem tufala long spesel seves ia blong ol brata.

Taem mifala i stap mit olsem wan Kaonsel blong Fas Presidensi mo Kworom blong Olgeta Twelef Aposol, ol miting rum blong mifala oli olsem ol rum blong revelesen. Spirit, bae stap we bae yu save tajem Hem. Taem mifala i toktok from ol samting we oli bigwan mo fasfas, evri samting oli kamkamaot klia taem wanwan Aposol i fri blong talemaot tingting blong hem mo wei we Hem i luk ol samting. Nomata we bae mifala i gat ol defren wei blong lukluk, lav we mifala i filim long wanwan long mifala i stap oltaem. Yuniti blong yumi i helpem yumi blong luksave tingting blong Lod from Jos blong Hem.

Long miting blong mifala, !bigfala namba i neva win! Mifala i lisin, wetem prea, long wanwan long mifala, mo storian wetem wanwan long mifala kasem taem mifala i kam wan. Afta we mifala i kam blong agri fulwan, !paoa blong Tabu Spirit we i joenem mifala i gud tumas! Yumi eksperiensem wanem we Profet Josef Smit i bin save taem hem i bin tijim: “Taem yumi joenem ol filing, yumi kasem paoa blong God.”7 !I no gat wan memba blong Fas Presidensi o Kworom blong Olgeta Twelef Aposol we bae i lego ol desisen blong Jos blong Lod i stap folem bes jajmen blong hem nomo!

Ol brata mo sista. ?Olsem wanem nao yumi save kam ol man mo ol woman—ol wokman olsem Kraes—we Lod i nidim yumi blong kam olsem? ?Olsem wanem nao yumi save faenemaot ol ansa long ol kwestin we i stap trabolem yumi? Sapos eksperiens blong Josef Smit long Tabu Bus i stap tijim yumi eni samting, hem i we, ol heven oli open mo we God i stap toktok long ol pikinini blong Hem.

Profet Josef Smit i putum wan paten i stap blong yumi folem blong stretem ol kwestin blong yumi. Folem promes blong Jemes se sapos yumi no gat waes, yumi save askem long God,8 nao Josef i tekem kwestin blong hem i go stret long Papa long Heven. Hem i askem revelesen blong hemwan, mo from hem i lukaotem, nao hemia i openem las dispensesen ia.

Long semmak fasin, ?wanem we yu stap lukaotem ia, bae i openem wanem long yu? ?Wanem waes nao yu no gat? ?Wanem nao yu filim se yu mas save o andastanem kwik naoia? Folem eksampol blong Profet Josef. Faenem wan kwaet ples we yu save go long hem oltaem. Putum tingting blong yu i stap daon long fes blong God. Talemaot hat blong yu long Papa blong yu long Heven. Tanem yu long Hem blong yu kasem ansa mo kamfot.

Prea long nem blong Jisas Kraes abaot ol wari blong yu, ol fraet blong yu, ol wiknes blong yu—yes ol samting we i hevi long hat blong yu. !Mo afta, yu lisin! Raetemdaon ol tingting we oli kam long maen blong yu. Raetemdaon ol filing blong yu, mo folem wetem ol aksen we Spirit i talem yu blong mekem. Taem yu stap ripitim wei ia dei afta dei, manis afta manis, yia afta yia, bambae yu “gro blong folem prinsipol ia blong revelesen.”9

?God i rili wantem toktok wetem yu? !Yes! “Olsem i no posibol blong man i stretem han blong hem we i no strong mo i sot blong stopem Misuri reva blong ron long bed blong hem, o blong tanem blong i tekem narafala rod, nao i no posibol blong blokem Hem we I Gat Olgeta Paoa blong kapsaetem save long heven i kamdaon long ol hed blong ol Lata-dei Sent.”10

Yu no nid blong askem yuwan abaot wanem i tru.11 Yu no nid blong save huia stret i sef blong yu trastem. Tru long revelesen we i kam long yuwan, yu save kasem witnes blong yuwan se Buk blong Momon i toktok blong God, se Josef Smit i wan profet, mo hemia i Jos blong Lod. Nomata wanem ol narawan oli talem o mekem, i no gat wan i save tekemaot wan witnes we Spirit i talem long hat mo maen blong yu abaot wanem i tru.

Mi askem yufala blong yufala i mekem paoa blong yufala i go longfala moa long saed blong spirit blong kasem revelesen blong yufalawan, from se Lod i promesem se “Sapos yufala i askem, bambae yufala i kasem wan revelesen folem nara revelesen, wan save folem nara save, blong yufala i save ol sikret mo ol trutok blong kingdom we bae oli givim pis—we oli tekem glad i kam, we oli tekem laef we i no save finis i kam.”12

!O! I gat plante moa samting we Papa blong yu we i stap long Heven i wantem yu blong save. Olsem we Elda Neal A. Maxwell i tijim: “Long olgeta we oli gat ae blong luk mo ol sora blong harem, !hem i klia se Papa mo Pikinini, Tufala i stap givimaot ol sikret blong yunives!”13

I no gat wan samting i openem ol heven olsem taem yumi kombaenem fasin blong stap klin gud, obei fulwan, kakae long ol toktok blong Kraes insaed long Buk blong Momon evri dei,14 mo gobak oltaem long tempol mo mekem famli histri wok.

I tru, bae i gat ol taem we yu filim olsem se ol heven oli klos i stap. Be mi promesem yu se taem yu gohed blong stap obei, taem tangkyu from evri blesing we Lod i stap givim yu, mo taem yu gat longfala tingting blong folem taemtebol blong Lod, bambae yu kasem save mo andastaning ia we yu stap lukaotem. Evri blesing we Lod i gat blong yu—iven ol merikel—bae oli kam. Hemia nao wanem we revelesen blong yuwan bae i mekem blong yu.

Mi mi gat hop long saed blong fiuja. Bae i fulap wetem ol janis blong wanwan long yumi i progres, i givim wan samting, mo i tekem gospel i go long evri kona blong wol ia. Be tu, mi save gud wanem nara samting i stap long ol dei we oli stap kam. Yumi stap laef long wan wol we i gat fulap samting mo raorao i kam antap plante. Sosol media we i stap oltaem, mo i ol 24 aoa nius oli stap atakem yumi wetem ol mesej we oli no stop. Sapos yumi mas gat eni hop blong save sevsevem ol plante kaen voes ia mo ol tingting blong ol man we oli atakem trutok, nao yumi mas lan blong kasem revelesen.

Sevya mo Ridima blong yumi, Jisas Kraes, bambae i mekem sam bigbigfala wok bitwin naoia mo taem we bae Hem i kambak bakegen. Tru long merikel, bae yumi luk ol saen we God Papa, mo Pikinini blong Hem, Jisas Kraes, Tufala i prisaed ova long Jos ia wetem hae paoa mo glori. Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.

Ol brata mo sista blong mi we mi lavem. Mi plis long yufala blong kam antap long paoa blong yufala long spirit blong kasem revelesen. Bae Ista Sandei ia i wan taem blong desisen long laef blong yu. Jusum blong mekem wok long saed blong spirit we bae i mekem yu gat presen we i Tabu Spirit mo harem voes blong Spirit plante taem moa, mo moa klia.

Wetem Moronae, mi askem strong long yufala blong kam long Kraes mo holemtaet evri gudfala presen,15 stat wetem presen we i Tabu Spirit, we i presen ia we i save mo bambae i jenisim laef blong yu.

Yumi ol disaepol blong Lod Jisas Kraes. Trutok we i moa impoten we bae Tabu Spirit i testifae long yu i we, Jisas, Hem i Kraes, Pikinini blong God we i stap laef. !Hem i stap laef! Hem i Loya wetem Papa, i Eksampol blong yumi, mo i Ridima blong yumi. Long Ista Sandei ia, yumi tingbaot sakrifaes we Hem i pem praes from sin, Laef Bakegen long Ded, mo we Hem i Hae tumas.

Hemia i Jos blong Hem, we i kambak tru long Profet Josef Smit. Mi testifae olsem, mo talemaot lav blong mi long wanwan long yufala, long tabu nem blong Jisas Kraes, amen.