Fwackyuck nuh ke Alu, Fwackyuck nuh ke Moul Lasr
Ke lwen ac fah tuhkuh, tiac fihsrwacsr in pain moullac ke wacngihn kolyuck, kohkoh, ahkwo, ac kuh fal luhn Nguhn Muhtahl uh.
Wacngihn ma yohk fallacna liki in acsmakihn oruh yohk srihpac se emet ma tuhfahna sikyak fin facl se inge in alu nuh mwet se ma yohk srihpac emet ma tuhfahna moul fin facluh. Ke, Alu luhn Jisus Kraist luhn Mwet luhlahlfongi ke Lwen-sahflah, inge, kuht alu nuh selsuc sramtweack Iwaclah wacngihn sahflahiyac ke Imac Gethsemane. El insese in kweok ke ma koluk ac muhnahs lasr kais sie, suc kweok oruh nuh Sel “srah in kahklah ke pat nuhkwewa.”1El tuh srihpsrihpyak ke sahksin luhn Calvary2 ac sifil moulyak tukun lwen tolu in pa mwet se moulyak emet ke tuhlihk nuhtin Pahpah tuhmasr Inkuhsrao. Nga luhngse El ac fahkwack lah El moul! El pa kol Alu Lal uh.
Sahyacn Iwaclah wacngihn sahflahiyac luhn Mwet Molwelah lasr, wacngihn sesr ac finsrak in fohlohk oacna sie pacl nuh yurun Pahpah tuhmasr Inkuhsrao. Sahyacn Sifil Moulyak, misac pa sahflah ke moul lasr uh. Iwaclah luhn Mwet Lahngo lasr oruh moul ma pahtpaht kuh ac moul kawihl sie ma pwacye nuh sn nohfohn.
Ke srihpen usrnguck fuhfahsryucsr Lal ac mislac El sang nuh sin mwet fahsr Tohkohl ma muhtwacn kiyuck, Wendy, ac nga puhla wo ke ekuh in Jacnweri 2, 2018 ah, pacl se kuht nguhtwaclihk ke pahng se ke tacluhfon ah fahk nuh sesr lah Prestuhn Thomas Monson el misac ah.
Kuht ahsroellah Prestuhn Monson yohk! Kuht ahkfuhlwactye moul lal ac mwe usru lal. Sie mwet yohk nguhn la, el fihliyac mokleyuck ma koflah in muhlkihnyucklac nuh selos kwewa ma etwacl ac nuh ke Alu se ma el luhngse.
Ke Sacnri se, Jacnweri 14, 2018, ke rum se lucng ke tempuhl Salt Lake ah, Prestuhnsi Se Met tuh sulpac oreklac ke pactuhn na fihsrwacsr tuhsruhk muhtahl se sin Leum. Na ke tuhkweni muhtahl litutwacng in ekweah ah, mempucr fin facluh nohfohn ke Alu uh kohlwack paholos in ahkweye mukwikwi se oreklac met kuhtuhsrihk sin Mwet Sap ah. Ke puhsisacl nga tarilacna ke ahkkweye in tahpuhk lowos an.
Nga oacyacpac tarilacna nuh selos ma oasr inse met likiyuc ah. Tuh oasr pacl wowo luhk in kuhlwacnsap ke U luhn Mwet Sap Singucul Luo ah ke yac 34 ac in sifacna etuh 10 sin Prestuhn 16 met ke Alu uh ah. Nga tuh lotwelah yohk sin kais sie selos.
Oacyacpac yohk sowemoul luhk nuh sin mwet mahtuh luhk. Mwet alkosr nohfohn ke great grand parents luhk ah mwet eklac nuh ke Alu uh fin acn Europe. Kais sie mwet puhlaik inge kihsackuhnlah ma nuhkwewa in tuhkuh nuh ke Zion. Ke we se tok ah, tuh, tiac nohfohna mwet mahtuh luhk kihsaceloslac in muhta na. Ke srihpac inge nga tena kapwack ke sie lohm ma siyac na wosasuc uh.
Nga luhngse pahpah ninac kiyuck. Elos yohk srihpac nuh sihk ac lutiyuc mwe luti na yohk. Ngwac koflah falkihn kuloh luhk nuh selos ke moul engan elos oraclah lohm ah nuh sihk ac tuhlihk wiyuck ah. Pacl sacn pacna, finne ke nga tuh sie tuhlihk mukul, nga etuh oasr ma se wacngihn ke moul luhk uh. Sie lwen ah nga sroacng nuh ke soko trein som nuh ke sie acn in kuhka puk in suk sie puk ke Alu uh. Nga luhngse luti ke wosasuc uh.
Ke nga tuh kahlwemwack ke kahs in lahlmwetmwet ah, nga tuh ke pahpah ninac kiyuck in moulkihn ma sap sacn. Na sie lwen ah ke nga tuh arulacna fuhsr, nga som nuh ye lohm ah ac fukulyacsuhfah in nihmnihm nuhkwewa fin simacn ah! Nga tuh sano pahpah tuhmuhk ah in kaiyucwi, tuhsruhk el tena fahk kuhtuh ma.
Ke nga mahtuhyak ac muhtwacwacack in kahlwem ke kahtoiyacn plwacn luhn Pahpah Inkuhsrao, nga wacna fahk nuh sihk sifacna, “nga tiac sifilluhngse mwe sang ke Christmas! Nga ke sil muhkwena nuh sin pahpah ninac kiyuck.” Ahkwot se kac inge tuh tiacna sikyak nwekena pahpah ninac kiyuck ahluhkwelah yac 80, tuhsruhk sikyak. Nga koflah lihksreni ahkkahlwemye engan nga puhlakihn lwen sac,3 ac kais sie lwen nga puhla lah engan ke sil laltahl ac ke nga sil nuh seltahl.
Ke 1945, ke nga oasr ke lutlut ke ono nga tuh macruhtlac sel Dantzel White ke Tempuhl Salt Lake ah. Nga ac el tuh ahkinsewowoyeyuck ke tuhlihk muhtwacn na wowo ac tuhlihk mukul sacohk se. Mihsenge sucu kapwack lasr uh pa sie sin mwe engan yohk emet luhk uh.
Ke 2005 ah, tukun apkuhran yac 60 ke macruht lasr, Dantzel sacohk kiyuck tuh misac ke wacngihn motkweyac. Ke puhlan pacl se, ahsor luhk apkuhran in eislah kuhiyuck. Tuhsruhk pweng ke Istucr ac olwelah ke sifil moulyak ahkkweyeyucyak.
Na Leum El usacluh Wendy Watson nuh siskuck. Kuht tuh sil ke Tempuhl Salt Lake ke Eprel 6, 2006 ah. Nga luhngse el! El sie muhtwacn na sacohk— sie mwe insewowo nuh sihk, nuh sin sucu lasr, ac nuh ke Alu uh nohfohn.
Kais sie mwe insewowo inge tuhkuh ke suk ac ke lohacng nuh kepihrihkyuck luhn Nguhn Muhtahl uh. Prestuhn Lorenzo Snow el fahk, “Pa inge pacl wowo ituckyang luhn Mwet Luhlahlfongi ke Lwen-sahflah… lah pa suwohs se lasr in eis ahkkahlwemyeyacn Nguhn lwen nuhkwewa ke moul lasr uh.”4
Sie sin ma ma Nguhn el kalweni na in fihliyac in nuhnak luhk uh ekena pahng sasuc luhk ekihn Prestuhn luhn Alu uh pa luhpan kena luhn Leum pa in ahkkahlwemye nuhnak ac luhngse Lal. Pacl wowo in eis fwackyuck pa sie sin mwe sang yohk emet luhn God nuh sin tuhlihk Nahtuhl.
Ke sikyak luhn Nguhn Muhtahl, Leum El fah kahsre kuht ke suk suwohs lasr nuhkwewa uh. Nga esam ke sie rum in laslas, nga tu sisken mwet mas se—tiac etuh lah ac orek fuhkah ohiyacn unweyuck sasuc tiac etweyuck se—ac puhlakihn atac se Nguhn Muhtahl ahkuhtweyac ke nuhnak luhk uh.5
In ahkfokokoye nguhsr luhk nuh sel Wendy ac, nga fahk nuh sel, “Nga etuh ke ma fwackyuck uh ac lah ituck fuhkah.” Nuhke lwelah lal—ac ke nga etwacack, ohiyac lal—el tuh suk ac eis tari fwackyuck lal sifacna kacsr, suc tuh ahkpuhlaikyacl in fahk ahok.
Ekihn sie mwet ke U luhn Mwet Sap Singucul Luo, nga pruhe lwen nuhkwewa in eis fwackyuck ac sang kuloh nuh sin Leum pacl nuhkwewa El sramsram nuhke insiyuck ac nuhnak luhk uh.
Nuhnkuh ke mwenmwen kac uh. Lah pahng fuhkah lasr ke Alu uh, kuht kuh in pruhe nuh sin Pahpah tuhmasr Inkuhsrao ac eis kolyuck, in sensenkackihnyuck ke mwe elyah ac lofolyuck, ac eis kuh in oraclah ma suc kuht ac koflahna in sifacna oruh. Fin kuht eis Nguhn Muhtahl ke pwacye ac luti in akihlen ac kahlwem ke pihrihkyuck Lal, kuht ac fah kolyuck ke ohiyac yohk ac srihk.
Ke nga puhlakihn kihtin pacl tari ac oruh upac se nuhke sulaclah mwet in kahsruh luo ah, nga nuhnkuh lah ngwac kuh in sulaclah fuhkah luo na sin mwet singucul luo suc nga luhngse ac ahkfuhlwactye.
Ke srihpen nga etuh lah kolyuck wowo uh som yohk nuhke etuh wowo uh, nga kais sie ohsun nuh sin Mwet Sap uh. 6 Na nga eisyuclac sifacna nuhke sie rum srisrilac ke tempuhl ac suk luhngse luhn Leum. Nga fahkwack lah Leum El tuh ahkuhtweyac nuh sihk in sulacllah Prestuhn Dallin H. Oaks ac Prestuhn Henry B. Eyring in kuhlwacnsap ekihn mwet in kahsruh luo ke Prestuhnsi Se Met.
Ke ohiyac se pacna, nga fahkwack lah Leum El pihrihk pahng nuh sel Elder Gerrit W. Gong ac Elder Ulisses Soares in akmuhsralah ekihn Mwet Sap Lal, nga painguhlos nuhke kuhlwacnsap utuftuf se luhn tamuhlwel uh inge.
Ke kuht tuhkweni ekihn Council se ke Prestuhnsi Se Met ac U luhn Singucul Luo, rum in miting lasr eklac rum in fwackyuck. Akihlenyuck oasr luhn Nguhn. Ke kuht mweuni ohiyac puhs ke mwe sramsram inge tuh ikackwelihk sie oruh na wowo suc ma kais sie Mwet Sap tuh sukohsohk in ahkkahlwemye nuhnak ac liye lalos kac. Finne kuht tiac oacna sie ke muhtwacwacack ah, luhngse kuht puhla nuh sin kais sie sin sie fokoko. Tuhkweni in ma sefanna lasr uh kahsre kuht in akihlen luhngse luhn Leum ke Alu Lal.
Ke miting lasr ah, ma uh tiacwotlac ke puhsiyacn mwet uh! Kuht porongo sie sin sie ac sramsram inmahsrlosr nuhke kuht ma se na lac. Na ke kuht insese na pwacye, pihrihkyuck nuhke ma sefanna uh arulacna fokoko! Kuht puhlakihn ma Mwet Pahluh Joseph Smith el etuh pacl se el tuh luti muh, “Ke kuht ma se na ke puhla uh kuht eis kuh luhn God.”7 Wacngihn mempucr ke Prestuhnsi Se Met kuh U luhn Singucul Luo ac oruh sulaclah nuhke Alu luhn Leum ke nuhnuhnkuh woe met lal sifacna!
Tamuhlwel ac tahmtahel, kuht ac eklac fuhkah in mukul ac muhtwacn—kuhlwacnsap oacna Kraist—Leum El kena tuh in pa kuht uh? Kuht ac konwacack fuhkah top nuhke siyuck ma ahkfohsye kuht uh? Fin oruh utuftuf se lal Joseph Smith ke Insack Muhtahl sac luti kuht kuhtwena ma, pa kuhsrao ikacklah na God El sramsram nuh sin tuhlihk Nahtuhl.
Mwet Pahluh Joseph Smith el akiyac atac se nuh sesr in ukwe in ahkwoye siyuck lasr uh. Mokleyuck ke olwelah lal James lah fin kuht enenuh lahlmwetmwet kuht kuh in siyuck sin God, 8 Joseph fuhsr el uslah siyuck lal nuh sel Pahpah Inkuhsrao. El tuh suk fwackyuck nuh sel sifacna, ac suk lal tuh ikacslah we sahflah se inge.
Ke atac sacn pac, meac suk lom an acikacslah nuh sum? Lahlmwetmwet fuhkah wacngihn sum uh? Meac kom puhla muh sie enenuh silahklahk in etuh kuh kahlwem kac uh? Ukwe srihkasrak lal Mwet Pahluh Joseph Smith. Sokwack sie acn mihs ma kom kuh in kwacna som nuh we. Ahkpuhsisaclye kom sifacna ye muhtuhn God. Okwaclah insiom nuh sin Pahpah tomom Inkuhsrao. For nuh Sel in eis top ac ahkwo.
Pruhe ke inen Jisus Kraist ke elyah lom an, fosrngah lom an, mwe muhnahs lom an—ahok kena luhn art lom an. Na porongo! Suhmuhslah nuhnak ma puhtati nuh in nuhnak lom an. Suhmuhslah puhla lom ac ukwe in oruh ohiyac ma kom pihrihkyuck in oruh an. Ke kom kalweni oruh se inge ke lwen nuh ke lwen uh, mahlwem nuhke mahlwem, yac nuhke yac, kom ac “kapwack nuhke mwe luti luhn fwackyuck.”9
Kuh God El ke sramsram na pwacye nuh sum? Ahok! Sie mwet ac wo in kohllah paho srihsrihk lal in srihke in tulokihnyac infacl Missouri ke acn ac sohrohr nuh we uh, likina lain kuh in tulokihnilyac God in tiac okwaclah etwacack inkuhsrao me nuh fin sifen Mwet Luhlahlfongi ke Lwen-sahflah.”10
Kom tiac enenuh in nuhnkuh lah meac pwacye uh.11 Kom tiac enenuh in nuhnkuh lah suc kom ac luhlahlfongi uh. Ke luhlahlfongi lom sifacna, kom kuh in eis mwe loh lom sifacna, lah Puk luhn Mormon pa kahs luhn God, lah Joseph Smith el mwet pahluh se, lah pa inge Alu luhn Leum. Wacngihn ma ke ma mwet sahyac ac fahk kuh oruh, tiac siefanna kuh in eislah mwe loh fwackyuck nuhke art ac nuhnak ke ma pwacye uh.
Nga salkwekom in ahkyohkye kuh luhn nguhnma oasr sum ingena an in eis fwackyuck nuh sum sifacna, ke srihpen Leum El olwelah muh fin kom siyuck, kom fah eis fwackyuck nuhke fwackyuck ac kahlwem nuh fin kahlwem, tuh kom in kuh in etuh ma lukmac ac ma kuh in ahkmihsye uh—ma suc use engan, ma suc use moul nwe tok uh.12
O, arulacna yohk pac ma Pahpah tomom Inkuhsrao El ke kom in etuh. Oacna ke Elder Neal A. Maxwell el luti ac, “Nuh selos ma oasr muhta in liye ac insrac in lohng, kahlwem lah Pahpah ac Wen fuhlwelah ma lukmac luhn facluh uh” 13
Wacngihn ma ikacslah inkuhsrao oacna tuhkweni luhn nwacsnwacs yohk, ahkostwen na pwacye, suk na pwacye, kuhfa ke kahs luhn Kraist ke Puk luhn Mormon ke lwen nuhkwewa, 14 ac pacl sisilac nuhke tempuhl ac orekma ke ma mahtuh ke sucu.
Pwacye, kuh in oasr pacl ke kom ac puhla oacna kuhsrao in kauli uh. Tuhsruhk nga olwelah muh ke kom sikalweni in ahkostwen, ahkkahlwemye tarilacna lom ke mwe insewowo nuh kwewa Leum El usot nuh sum, ac ke kom muhtweng in ahkfuhlwactye pacl Leum El akiyac uh, ac fah utuckot nuh sum etwacack ac kahlwem kom suk uh. Mwe insewowo ma oasr sin Leum nuh sum—finne mwenmwen—fah tuhkuh. Pa ingacn ma fwackyuck lom sifacna ac oruh nuh sum uh.
Nga liye ma wo ke pacl fahsruh uh. Ac sesseslah ke pacl wowo nuh sin kais sie sesr in kapwack, kahsruh, ac uslah wosasuc nuh ke sroasrihk nuhkwewa fin facluh. Tuhsruhk nga oacyacpac fosrngah ke pacl fahsruh uh. Kuht muhta ke sie facluh ma iktoklac ac yohkwaclihk luhn mwe ahkengan. Oasr luhn technologies pacl nuhkwewaac lohlngohk ac ripohrti news ke ao nuhkwewa tiac tui in lain kuht ke pweng uh. Fin kuht ac eis kuhtwena finsrak kuht in suk ma yohk srihpac ke nuhnak puhs luhn mwet ac suhmaht luhn mwet ma lain ma pwacye uh, kuht enenuh in eis etwacack in eis fwackyuck.
Mwet Lahngo ac Molwelah lasr, Jisus Kraist, ac oruh kuhtuh sin orekma usrnguck Lal inmahsrlon pacl se inge ac tuhkuh ahkluo Lal. Kuht ac liye akucl usrnguck lah God Pahpah ac Wen Nahtuhl, Jisus Kraist, karihngihn Alu ke facluh se inge ke fuhlwact ac wolacna. Tuhsruhk, ke lwen ac tuhkuh uh, ac koflah in pain moullac ke nguhn fin wacngihn kolyuck, kahsruh, ahkwo, ac kuh fal luhn Nguhn Muhtahl.
Tamuhlwel ac tahmtahel wiyuck, nga ngihsre suwos in ahkyohkye kuhiyacn nguhn lowos an in eis fwackyuck. Lwelah Sacnri in Istucr se inge in oasr ma ekuhllah ke moul lom an. Sulaclah in oruh orekma in nguhn ma enenuh in engankihn mwe sang luhn Nguhn Muhtahl ac lohng puhsren Nguhn in fususeni ac kahlwemi.
Weluhl Moroni, nga kwacfe kowos ke Sacnri in Istucr se inge in “tuhkuh nuh yurun Kraist, ac sruokyac mwe sang wo nuhkwewa,” 15 muhtwacwacack ke mwe sang luhn Nguhn Muhtahl, mwe sang ma kuh in ekuhllah moul lowos.
Kuht mwet fahsr tohkohl Jisus Kraist. Ma yohk srihpac se emet ma Nguhn Muhtahl ac fahkwack kac nuh suwos pa lah Jisus Kraist pa Kraist, Wen nuhtin God moul. El moul! El pa Mwet in Aholkuhtlac nuh sin Pahpah uh, Mwet Srihkasrak lasr, ac Mwet Molwelah lasr. Ke Sacnri in Istucr se ngwe, kuht ahkacsmakihnye kihsac in Iwaclah Lal, Sifil Moulyak Lal, ac muhtahlacna Lal.
Pa inge Alu Lal, fohlohkyak sel Mwet Pahluh Joseph Smith. Nga fahkwack na pwacye, ke ahkkahlwemyeyacn luhngse luhk nuh sin kais sie suwos, ke ine muhtahl luhn Jisus Kraist, amen.